Womusu 103 - Bibeli Gusunɔn Gari

¹ Womu ɡe Dɑfidi u kuɑ. U nɛɛ, kon Yinni Gusunɔ siɑrɑ. Kon win yĩsi dɛɛrɑru tɔmɑ kɑ nɛn ɡɔ̃ru kpuro.

² Kon Yinni Gusunɔ siɑrɑ. Win ye u kuɑ, nɑ ǹ duɑrimɔ, bɑɑ yen tiɑ.

³ U rɑ mɑn nɛn torɑnu kpuro suuru kue. U rɑ nɛn bɑrɑnu kpuro kpeesie.

⁴ U rɑ mɑn yɑre sɑɑ siki wɔrun di. U rɑ mɑn durom kɑ wɔnwɔndu kue.

⁵ U rɑ nɛn wɑ̃ɑru doo nɔɔru yibie. Kpɑ u mɑn ko nɡe ɑluwɑɑsi nɛn tɔkɔru sɔɔ, nɑ n dɑm mɔ nɡe ɡunɔ bɑkeru te tɑ yɔ̃ɔwɑ.

⁶ Yinni Gusunɔ u rɑ siriwɑ ɡem sɔɔ. U rɑ be bɑ dɑm dɔremɔ wɔre.

⁷ U Mɔwisi win woodɑbɑ sɔ̃ɔsi. Mɑ u Isirelibɑ win sɔm mɑɑmɑɑkiɡinu sɔ̃ɔsi.

⁸ Yinni Gusunɔ u wɔnwɔndu mɔ. U rɑ mɑɑ tɔnu durom kue. Win durom mu kpɑ̃. Win mɔru ku rɑ se fuuku.

⁹ U ku rɑ tɔmbu ɡerusi kiri kiri. U ku rɑ mɑɑ mɔru ko n kɑ tɛ.

¹⁰ U ku rɑ sun sɛɛyɑsie nɡe mɛ bɛsɛn torɑrɑ nɛ. U ku rɑ sun bɛsɛn torɑnu kɔsie.

^11-12 Adɑmɑ nɡe mɛ sɔ̃ɔ yɑri yeru tɑ kɑ sɔ̃ɔ duu yeru tondinɛ, nɡe mɛyɑ u rɑ mɑɑ bɛsɛn torɑnu tondɑsie. Nɡe mɛ wɔllɑ kɑ tem tomɑ, nɡe mɛyɑ win durom mu kpɑ̃ɑru nɛ be bɑ nùn nɑsien mi.

¹³ Nɡe mɛ tundo u rɑ n win bibun wɔnwɔndu mɔ, nɡe mɛyɑ Yinni u be bɑ nùn nɑsien wɔnwɔndu mɔ.

¹⁴ Domi u yɛ̃ ye bɑ kɑ sun tɑkɑ kuɑ. U ǹ duɑri mɑ yɑnimɑ bɑ kɑ sun mɔmɑ.

¹⁵ Tɔnun wɑ̃ɑrun tɔ̃nu nu ku rɑ tɛ. Nu sɑ̃ɑwɑ nɡe yɑkɑsu. U rɑ sewɑ nɡe dɑ̃ɑ wɛ̃su.

¹⁶ Woo ɡɑ̀ n su swee kpɑ su doonɑ. Bɑɑ sin yĩreru ɑ ǹ mɑɑ wɑsi.

^17-18 Adɑmɑ Yinni Gusunɔn durom mu rɑ n wɑ̃ɑwɑ sere kɑ bɑɑdommɑɔ be bɑ nùn nɑsien mi, mɑ bɑ win ɑrukɑwɑni nɛni, mɑ bɑ win woodɑbɑ mɛm nɔɔwɑmmɛ. Mɛyɑ mɑɑ win ɡem mu rɑ n kɑ bu wɑ̃ɑ sere kɑ ben bibun bibɔ.

¹⁹ Yinni Gusunɔ u win sinɑ ɡɔnɑ tɛriɑ wɔllɔ. Mɑ u bɑndu dii ɡɑ̃ɑnu kpuron wɔllɔ.

²⁰ Bɛɛ Yinni Gusunɔn ɡɔrɑdobɑ, bɛɛ be i dɑm mɔ i rɑ win ɡɑri mɛm nɔɔwɛ, i nùn siɑro.

²¹ Bɛɛ win tɑbu kowobu kpuro, bɛɛ be i nùn sɑ̃ɑmɔ, i win kĩru mɔ̀, i nùn siɑro.

²² Bɛɛ win tɑkɑ koorɑ, i nùn siɑro mi u bɑndu dii kpuro. Yinni Gusunɔ, kon nun siɑrɑ.