Womusu 101 - Bibeli Gusunɔn Gari

¹ Womu ɡe Dɑfidi u kuɑ. Ge wee. Wee kon womu ko ɡe ɡɑ kɑ siribu kɑ durom yɑ̃. Yinni Gusunɔ, kon ɡu kowɑ n kɑ nun bɛɛrɛ wɛ̃.

² Kon nɛn lɑɑkɑri doke swɑɑ ɡeɑ sɔɔ. Sɑɑ yerɑ̀ kɑɑ mɑn nɑɑwɑ. Kon sĩwɑ dee dee nɛn yɛnuɡibun suunu sɔɔ.

³ Nɑ ǹ wurɑmɔ n kɔ̃sɑ mɛɛri. Nɑ mɛm nɔɔbu sɑribɑn dɑɑ tusɑ. Nɑ ǹ wurɑmɔ yu mɑn tiɑ.

⁴ Nɑ ǹ wurɑmɔ kɔ̃sɑ yɑ n wɑ̃ɑ nɛ sɔɔ. Kon kɑ tɔn kɔ̃sobu tondɑ.

⁵ Kon de wi u rɑ kpɑɑsi wĩi u kɑm ko. Nɑ ǹ kɑ wi u tii sue nɔɔ tiɑ mɔ̀.

⁶ Kon mɛɛri n wɑ be bɑ nɑɑnɛ mɔ tem mɛ sɔɔ, kpɑ bɑ n wɑ̃ɑ nɛn bɔkuɔ. Wi u sĩimɔ ɡem sɔɔ, wiyɑ u koo ko nɛn sɔm kowo.

⁷ Gbɛnɔ kun ɑyeru wɑsi nɛn yɛnuɔ. Mɛyɑ mɑɑ wee kowo u ǹ yɔ̃rɑmɔ nɛn wuswɑɑɔ.

⁸ Bururu bɑɑtere, nɑ ko n dɑ tem mɛn tɔn kɔ̃sobu nɔɔ mɑrisiewɑ. Kpɑ n wɑ n kɑ bu wunɑ mɑm mɑm Yinni Gusunɔn wuun di.