Osee 7 - Bibeli Gusunɔn Gari

¹ kpɑ n bu bɛkiɑ, sɑɑ yerɑ ben durum mɑɑ sɔ̃ɔsirɑ Sɑmɑriɔ. Gbɛnɔbu bɑ dumɔ diɑɔ bɑ ɡbɛnimɔ. Mɑ ben ɡɑbɑ yibɑ swɛɛ sɔɔ.

² Adɑmɑ ben ɡoo sɑri wi u rɑ tii sɔ̃ u nɛɛ, nɑ yɑɑye kɔ̃sɑ ye bɑ mɔ̀. Tɛ̃, wee bɑ mwɑɑrɑ ben kom kɔ̃sum mɛ sɔɔ. Nɑ ye kpuro wɑɑmɔ.

³ Ben nuku kɔ̃su kookoosu kɑ ben weesu su sinɑ boko kɑ ben wiruɡibu nuku dobu wɛ̃ɛmɔ.

⁴ Be kpuro bɑ sɑ̃ɑwɑ sɑkɑrɑ kowobu bɑ sum nɡe pɛ̃ɛ wɔ̃ɔ yeru te pɛ̃ɛ kowo u dɔ̃ɔ doke u deri. Mɑ u dɑ u win pɛ̃ɛ som burɑ u yi sere mu kɑ se.

⁵ Bɑ̀ n ben sinɑ bokon tɔ̃ɔ bɑkɑru mɔ̀, ben sinɑ ɑsɑkpɔbu kɑ sunɔn tii bɑ rɑ tɑm nɔwɑ kpɑ bɑ n tɔmbu yɑɑ kɑsikimɔ.

⁶ Be bɑ rɑ nɔɔ tiɑ ko bu kɑ tɔmbu seesi, bɑ sɑ̃ɑ nɡe pɛ̃ɛ wɔ̃ɔ yeru. Wɔ̃kuru, ben wɔruɡɔru tɑ rɑ yɛmiɛwɑ kpɑ yɑm sɑ̃re bururu tu se nɡe bɑ ɡɑ̃ɑnu dɔ̃ɔ doke.

⁷ Be kpuro bɑ sumwɑ nɡe dɔ̃ɔ. Bɑ rɑ ben kpɑrobu ɡowɑ kpɑ ben sinɑmbu bɑ n wɔrukumɔ tiɑ tiɑ. Adɑmɑ ben ɡoo ku rɑ mɑɑ mɑn somiru kɑnɛ.

⁸ Yinni Gusunɔ u mɑɑ nɛɛ, Isirelibɑ bɑ kɑ bwese tukunu mɛnnɑ. Mɑ bɑ kuɑ nɡe kirɑ te bɑ ǹ ɡɔsie.

⁹ Bwese tuku ni, nu bu dɑm mwɑɑrimɔ. Adɑmɑ bɑ ǹ yɛ̃ mɛ. Tɔkɔrɑ bu deemɑmɔwɑ, ɑdɑmɑ bɑ ǹ tubɑ.

¹⁰ Ben tii suɑbu sɔ̃ɔsirɑmɔ. Domi bɑ ǹ ɡɔsirɑmɛ nɛ Gusunɔ ben Yinnin mi. Kɑ yen de kpuro, bɑ ǹ mɑn kɑsu.

¹¹ Bɑ sɑ̃ɑwɑ nɡe totobɛrɛ te tɑ ǹ bwisi mɔ. Bɑ Eɡibitiɡibu somiru kɑnɑmɔ, mɑ bɑ dɑɑmɔ Asiriɔ.

¹² Adɑmɑ bɑ̀ n swɑɑ wɔri nɑ rɑ bu tɑɑ bɛriewɑ n bu mwɛɛri nɡe ɡunɔsu. Kpɑ n bu sɛɛyɑsiɑ nɡe mɛ bɑ bu nɔɔsiɑ.

¹³ Bɑ kɑm kuɑwɑ mi, domi bɑ mɑn dukɑ suurimɔ. Bɑ mɑn seesi, bɑ mɑn weesu kuɑ. N deemɑ nɛnɑ kon dɑɑ bu fɑɑbɑ ko.

¹⁴ Bɑ̀ n mɑn somiru kɑnɑmɔ, bɑ ku rɑ tu ko ɡɔ̃ruɔ. Adɑmɑ bɑ rɑ sinɛwɑ bɑ n tii muririmɔ. Kpɑ bɑ n yĩiyɔ yeyɑ yɑ koo de ben ɡbeɑ yu ɑlikɑmɑ kɑ resɛm ɡeɑ mɑ. Nɡe mɛyɑ bɑ rɑ n mɔ̀ bu kɑ mɑn seesi.

¹⁵ N deemɑ nɛnɑ nɑ bu nɔni doke nɑ bu dɑm wɛ̃. Adɑmɑ kɑ mɛ, bɑ mɑn kɔ̃sɑ bwisikusimɔ.

¹⁶ Bɑ ɡɔsirɑ ɡoon mi ɡiɑ. Bɑ sɑ̃ɑ nɡe tɛn te tɑ ǹ ɡeɑ sɑ̃ɑ. Yen sɔ̃, bɑ koo ben wiruɡibu ɡo tɑbu sɔɔ ben ɡɑri kɑm ɡerubun sɔ̃. Yerɑ yɑ koo de bu bu yɛ̃ɛ Eɡibitiɔ.