Misee 6 - Bibeli Gusunɔn Gari

Yinni Gusunɔ u win tɔmbu tɑɑrɛ wɛ̃ɛmɔ

¹ I swɑɑ dɑkio ye nɛ, Yinni Gusunɔ nɑ ɡeruɑ. Nɑ nɛɛ, Isirelibɑ, i seewo i kɑ tii yinɑ ɡuunu kɑ ɡunɡunun wuswɑɑɔ.

² Bɛɛ ɡuunu, i swɑɑ dɑkio. Bɛɛ tem kpɛɛkpɛɛku dɑmɡinu, nɛ, Yinni Gusunɔ nɑ nɛn tɔmbu tɑɑrɛ wɛ̃ɛmɔ. Nɑ kĩ n bu siribu soku.

³ Bɛɛ Isirelibɑ, bɛɛ nɛn tɔmbu, kɔ̃sɑ mbɑ nɑ bɛɛ kuɑ. Mɑ sɔɔrɑ nɑ derɑ i wɑsirɑ. I mɑn wisio.

⁴ I mɑn tɑɑrɛ wɛ̃ɛmɔ yèn sɔ̃ nɑ bɛɛ Isirelibɑ yɑrɑ sɑɑ Eɡibitin di? Ǹ kun mɛ yèn sɔ̃ nɑ bɛɛ yɑrɑ sɑɑ yorun di? Ǹ kun mɛ yèn sɔ̃ nɑ bɛɛ kpɑro beni ɡɔriɑmɑ, Mɔwisi kɑ Aroni kɑ Mɑriɑmu?

⁵ Bɛɛ nɛn tɔmbu, i yɑɑyo kɔ̃sɑ ye Bɑlɑki Mɔɑbun sinɑ boko u bwisikɑ u bɛɛ kuɑ. I mɑɑ yɑɑyo ye Bɑlɑmu Beorin bii u nùn wisɑ. Nɑ bɛɛ yɔ̃siri bɛɛn sɑnum sɔɔ sɑɑ Sitimun di sere Giliɡɑliɔ. Mɑ i nɛn durom wɑ mɛ nɛ, Yinni Gusunɔ nɑ bɛɛ kuɑ.

Ye Yinni Gusunɔ u tɔmbu bikiɑmɔ

⁶ Kɛ̃ɛ terɑ̀ kon kɑ Yinni Gusunɔ wi, wi u kpuro kere dɑɑwɑ nɑ̀ n dɔɔ win sɑ̃ɑ yerɔ. Kɛ̃ɛ terɑ̀ ko nɑ n nɛni n kɑ nùn yiirɑ. Nɑɑ wɔ̃ɔ tiɑɡiɑ kon kɑ nùn yɑ̃ku dɔ̃ɔ mwɑɑrɑruɡiru kuɑ?

⁷ Yinni Gusunɔ u yɑ̃ɑ kinɛ dɑbi dɑbinun bukɑtɑ mɔ? Gum kotosun bukɑtɑwɑ u mɔ? Nɛn bii ɡbiikoowɑ kon nùn wɛ̃ u sere mɑn nɛn torɑnu suuru kuɑ?

⁸ Aɑwo, Yinni Gusunɔ u tɔmbu ɡeɑ sɔ̃ɔsi ye u rɑ kɑ̃. Ye u bu kɑnɑmɔ bu ko, yerɑ bu ben berusebu wɛ̃ ye n sɑ̃ɑ beɡiɑ. Kpɑ bu bu kĩru sɔ̃ɔsi. Kpɑ bu wi, Gusunɔ ben Yinni swĩi kɑ tii kɑwɑbu.

Yinni Gusunɔ u rɑ ɡbɛnɔbu kɑ dɑɑ bɔɔbɔyɑɡibu sɛɛyɑsie

⁹ Yinni Gusunɔ u kɑ Yerusɑlɛmuɡibu yɑ̃. Wi u bwisi mɔ, u koo nùn nɑsiɑ. Bɛɛ Yudɑbɑ, i de nɛn siribu bu bɛɛ yeeri.

¹⁰ Kon wurɑ tɔn kɔ̃so u dukiɑ ɡure win dirɔ kɑ ɡbɛnɑ? Kpɑ u n sɑkɑku mɔ ɡe nɑ ǹ kĩ?

¹¹ I tɑmɑɑ wi u kilo weesuɡiɑ mɔ u dɛɛre?

¹² Wee bɛɛn ɡobiɡibu bɑ tɔmbu dɑm dɔremɔ, bɑ rɑ n weesu mɔ̀. Kpɑ bɑ n ɡɑbu nɔni wɔ̃kumɔ kɑ ben ɡɑri.

¹³ Tɛ̃, nɑ sɔɔru kpɑ n kɑ bɛɛ sɛ̃suku bɛɛn durum sɔ̃, kpɑ i kɑm ko.

¹⁴ I ko i di, ɑdɑmɑ i ǹ debumɔ. I ko i nɔɔɡiru suɑ ɡɔ̃ɔrun sɔ̃. Mɛyɑ n ǹ koorɔ i ɡɑ̃ɑnu bere. Ì n mɑɑ ɡɑ̃ɑnu beruɑ, tɑbɑ kon kɑ ye kɑm koosiɑ.

¹⁵ I ko i duure, ɑdɑmɑ i ǹ ɡɛ̃ɛmɔ. I ko i olifi ɡɑmɑ, ɑdɑmɑ i ǹ wɑsi i yen ɡum sɑwɑ. I ko i resɛm tɑm wĩɑ, ɑdɑmɑ i ǹ wɑsi i mu nɔ.

¹⁶ Domi i sinɑ boko Omirin dɑɑ kɔ̃sɑ sɑɑrimɔ kɑ sere mɑɑ Akɑbuɡiɑ. I ben dɑɑ sɑɑrimɔwɑ mɑm mɑm. Yen sɔ̃nɑ kon de bɛɛn wuu ɡu ko bɑnsu. Kpɑ n de bu bɛɛ yɛ̃ɛ. I ko i sekuru wɑ bɛɛ kpuro nɡe mɛ nɛn tɔmbu bɑ rɑ wɑ.