Esɑi 26 - Bibeli Gusunɔn Gari

Yinni Gusunɔ u koo win tɔmbu nɑsɑrɑ wɛ̃

¹ Sɑɑ ɡɑɑ sisi yè sɔɔ bɑ koo womu ɡeni ko Yudɑn tem sɔɔ bu nɛɛ, sɑ wuu dɑmɡuu mɔ. Yinni Gusunɔwɑ u ɡen ɡbɑ̃rɑru swĩi u kɑ ɡu kɔ̃su.

² I ɡɑmbobɑ kɛniɔ kpɑ bwese te tɑ ɡem swĩi tɑ nùn mɛm nɔɔwɑmmɛ tu du min di.

³ Yinni Gusunɔ u rɑ sikɑ sɑriruɡii bɔri yɛndu wɛ̃, yèn sɔ̃ yɛ̃ro u nùn nɑɑnɛ sɑ̃ɑ.

⁴ I Yinni Gusunɔ nɑɑnɛ koowo sɑɑ kpuro sɔɔ. Domi wiyɑ u sɑ̃ɑ kuku yee dɑmɡiru sere kɑ bɑɑdommɑɔ.

⁵ U koo wuu ɡe ɡɑ wɑ̃ɑ wɔllɔn tɔmbu kpeerɑsiɑ, kpɑ u ɡen tii kɔsuku u surɑ sere temɔ,

⁶ kpɑ sɑ̃ɑrobu kɑ wɔnwɔndobu bu ɡu tɑɑku.

Sɑɑ dɑ̃ɑkɑn kɑnɑru

⁷ Gemɡiin swɑɑ yɑ rɑ n dɛndewɑ. Yinni Gusunɔ, wunɛ wi ɑ sɑ̃ɑ ɡemɡii wunɑ ɑ rɑ ye nɔɔ nɛrɑsie.

⁸ Yinni Gusunɔ, swɛɛ yi kɑɑ sun sure kpuro, wunɑ sɑ ko n nɑɑnɛ sɑ̃ɑ, su kɑ sĩ yi sɔɔ. Ye bɛsɛn ɡɔ̃ru ɡɑ kĩ, yerɑ su nun yɑɑyɑ kpɑ su nun sɑ̃.

⁹ Wɔ̃kuru, nɛn bwɛ̃rɑ yɑ rɑ n wunɛn bɛkɛ bɑrɔwɑ, kpɑ nɛn ɡɔ̃ru ɡɑ n nun kɑsu. À n tɔmbu siri hɑnduniɑ sɔɔ, bɑ rɑ ɡiewɑ nɡe mɛ bɑ koo kɑ sĩ.

¹⁰ Adɑmɑ bɑɑ bɑ̀ n tɔn kɔ̃so durom kuɑ, u ǹ ɡem ɡiɑmɔ. U ko n win kom kɔ̃sum mɔ̀wɑ tem mi ɡem mu wɑ̃ɑ, kpɑ u n Gusunɔn yiiko ɡɛmɑ.

¹¹ Yinni Gusunɔ, ɑ dɑm mɔ, ɑdɑmɑ wunɛn yibɛrɛbɑ bɑ ǹ mu wɑɑmɔ. A de bu wunɛn hɑniɑ wɑ ye ɑ kɑ wunɛn tɔmbu wɔrɑmɔ, kpɑ bu sekuru wɑ bu dɔ̃ɔ mwɑɑrɑ.

¹² Yinni Gusunɔ, wunɑ ɑ rɑ sun bɔri yɛndu wɛ̃. Domi wunɑ ɑ rɑ de ye sɑ mɔ̀ kpuro yu koorɑ.

¹³ Gusunɔ bɛsɛn Yinni sɑ rɑɑ yinnibu ɡɑbu sɑ̃wɑ. Adɑmɑ tɛ̃, wunɛ turon yĩsirɑ sɑ soku.

¹⁴ Yinni, be bɑ ɡu, bɑ ǹ mɑɑ seemɔ bu wɑ̃ɑru di. Domi ɑ bu wɔri ɑ kpeerɑsiɑ. Bɑ ǹ mɑɑ bu yɑɑyɑmɔ.

¹⁵ Yinni, ɑ wunɛn yiiko sɔ̃ɔsi. A derɑ bɛsɛ wunɛn tɔmbu sɑ dɑbiɑ. Mɑ ɑ bɛsɛn tem yɑsiɑsiɑ.

¹⁶ Sɑ nun sokɑ sɑnɑm mɛ sɑ wɑ̃ɑ nɔni swɑ̃ɑru sɔɔ. Sɑ kɑnɑru kuɑ sɑnɑm mɛ ɑ sun sɛɛyɑsiɑ.

¹⁷ Yinni Gusunɔ, sɑnɑm mɛ ɑ sun biru kisi sɑ kuɑ nɡe tɔn kurɔ wi u yiire u kĩ u mɑ, u tii bɔɔkumɔ u wuri mɔ̀ wuriribun sɔ̃.

¹⁸ Sɑ wɑhɑlɑ kuɑ sɑ nɔni sɔ̃ɔrɑ kɑ wuriribu. Adɑmɑ wom dirumɑ sɑ mɑrɑ. N ǹ kɑ tem mɛ ɑrufɑɑni ɡɑɑ nɑɑwɛ. Sɑ ǹ mɑɑ ɡoo mɑrɑ wi u koo sinɑ mɛ sɔɔ.

Yinni Gusunɔ u koo Isirelibɑ sɛɛyɑsiɑ kpɑ bu wurɑmɑ nɡɛ yellu

¹⁹ Nɛɡibu, bɛɛn tɔn be bɑ rɑɑ ɡu bɑ koo se ɡɔrin di bu wɑ̃ɑru di. Bɛɛ be i kpĩ tem sɔɔwɔ, i dom yɑndo, kpɑ i nuku dobun kuuki ko. Domi tem mu koo bɛɛ seeyɑ ɡɔrin di nɡe mɛ bururun kɑkoru tɑ rɑ yɑkɑsu seeye.

²⁰ Nɛn tɔmbu, i doo i kuke bɛɛn diɑɔ i tii ɡɑmbobɑ kɛnusio, kpɑ i n wɑ̃ɑ mi ɡinɑ sere Gusunɔn mɔru yu kɑ sure.

²¹ Wee Yinni Gusunɔ u yɑrimɑ win wɑ̃ɑ yerun di u kɑ hɑnduniɑn tɔmbu siri kɔ̃sɑ ye bɑ kuɑn sɔ̃. Tem mu koo tɔn be bɑ ɡon yɛm terɑsiɑ, kpɑ ben ɡonu nu sɔ̃ɔsirɑ.