Esɑi 25 - Bibeli Gusunɔn Gari

Siɑrɑbun womu

¹ Yinni Gusunɔ, wunɑ ɑ sɑ̃ɑ nɛn Yinni, wunɑ kon tɔmɑ, kpɑ n wunɛn yĩsiru wɔlle suɑ. Domi ɑ ɡɑ̃ɑ bɑkɑnu kuɑ, wunɛn himbɑ ye ɑ yi sɑɑ yellun di, yɑ ǹ kɔsɑ.

² A derɑ wuu ɡe, ɡɑ wɔrumɑ ɡɑ kuɑ nɡe kpee ni bɑ subɑ. Mɑ wuu ɡe ɡɑ ɡbɑ̃rɑru mɔ ɡɑ kuɑ bɑnsu. A derɑ tii suobun wuun ɡbɑ̃rɑnu nu wɔrukɑ. Bɑ ǹ mɑɑ nu seeyɑmɔ sere kɑ bɑɑdommɑɔ.

³ Yen sɔ̃nɑ bwese dɑmɡinu nu nun bɛɛrɛ wɛ̃ɛmɔ. Mɑ be bɑ ɡɑbu dɑm dɔremɔ bɑ nun nɑsie.

⁴ Domi ɑ kuɑ dɑm sɑriruɡibu kɑ wɔnwɔndobun kuku yeru, wɑhɑlɑn sɑɑ. A bu beruɑ woo bɔkɔn sɑɑ kɑ sɔ̃ɔn sɑɑ. Domi tɔn kɔ̃sobu bɑ rɑ tɔnu wɔriwɑ nɡe ɡuru woo ɡe ɡɑ ɡɑnɑ sweemɔ.

⁵ Yinni Gusunɔ, wunɑ ɑ tii suobun wɔkinu kpeerɑsiɑ nɡe mɛ ɑ rɑ yɑm susuru kpeerɑsie tem mi ɡɑ̃ɑnu ku rɑ kpi. Wunɑ ɑ ben nɑsɑrɑn womusu tɛɛsi nɡe mɛ ɡuru wiru tɑ rɑ sɔ̃ɔ tɛɛsi.

Yinni Gusunɔ u tɔmbu kpuro tɔ̃ɔ bɑkɑ dim sɔɔru kuɑmmɛ

⁶ Gusunɔ, wɔllu kɑ tem Yinni u koo bwesenu kpuro tɔ̃ɔ bɑkɑ dim soku, Siɔnin ɡuurɔ. Dĩɑ duronu kɑ yɑɑ ɡumɡiɑ kɑ tɑm ɡemɑ u koo bu wɛ̃.

⁷ Kpɑ u sɔnditiɑ ye bɑ ben wuswɑɑ wukiri nuku sɑnkirɑnun sɔ̃ wunɑ ɡuu ten wɔllu mi.

⁸ U koo de ɡɔɔ u kpe sere kɑ bɑɑdommɑɔ, kpɑ u ben nɔni yĩresu wokɑ kpɑ u ben sekuru wunɑ tem mɛ kpuro sɔɔ. Wi, Yinni Gusunɔwɑ, u yeni ɡeruɑ.

Yinni Gusunɔ u koo Mɔɑbubɑ sɛɛyɑsiɑ

⁹ Tɔ̃ɔ te sɔɔ, bɑ koo Yinni Gusunɔ sɔ̃ bu nɛɛ, wunɑ ɑ sɑ̃ɑ bɛsɛn Yinni wi sɑ nɑɑnɛ sɑ̃ɑ. Wunɑ ɑ sun fɑɑbɑ kuɑ. Su nuku dobu ko kpɑ su yɛ̃ɛri fɑɑbɑ yen sɔ̃.

¹⁰ Yinni Gusunɔ u koo Siɔnin ɡuuru kɔ̃su. Adɑmɑ u koo Mɔɑbubɑ munkuwɑ nɡe yɑkɑ si bɑ yɑri kɔkɔrɔwɔ.

¹¹ Kpɑ bu ben nɔmɑ dɛmiɑ kɔkɔrɔ ɡe sɔɔ nɡe be bɑ kɛ̃ɛrimɔ. Kɑ mɛ, u koo de ben tii suɑ bi, bu kpewɑ.

¹² U koo ɡbɑ̃rɑ dɑmɡii ni nu ɡunu surɑ u kɔsuku nu ɡɔsiɑ tuɑ.