Esɑi 22 - Bibeli Gusunɔn Gari

Gɑri yi Gusunɔ u ɡeruɑ Yerusɑlɛmun sɔ̃

^1-2 Gɑri wee, yi yi kɑ Yerusɑlɛmun wɔwɑ yɑ̃ mi bɑ rɑ kɑ̃si. Wunɛ Yerusɑlɛmu, mbɑn sɔ̃nɑ wunɛn tɔmbɑ nuku dobu mɔ̀, mɑ bɑ kuuki mɔ̀. Mbɑ n kuɑ bɑ kɑ yɔɔmɔ dii tɛɛri wɔllɔ. Wunɛn tɔn be bɑ mɛɛrɑ kuɑ, bɑ ǹ bu mɛɛrɑ kue tɑbu sɔɔ, bɑ ǹ mɑɑ ɡu kɑ tɑkobi.

³ Wee wunɛn tɑbu sinɑmbu kɑ wunɛn tɔmbu kpuro bɑ duki yɑrinɑ n tomɑ, mɑ tɛn towobu bɑ bu mwɛɛrɑ bɑ kuɑ yobu.

⁴ Yen sɔ̃, nɑ bɛɛ sɔ̃ɔmɔ, i ɡɛsiro nɛn bɔkun di, i mɑn derio n swĩ. I ku tii nɔwiɑ ko i nɛɛ, i ko i mɑn nukuru yɛmiɑsiɑ nɛn tɔmbun nɔni swɑ̃ɑrun sɔ̃.

⁵ Tɔ̃ɔ teni sɔɔ, Gusunɔ, wɔllu kɑ tem Yinni u derɑ sɑ nɔni sɔ̃ɔre, sɑ burisinɛ, sɑ wɑ̃ɑ biti sɔɔ wɔwɑ yeni sɔɔ mi bɑ rɑ kɑ̃si. Bɑ ɡɑni kɔsukumɔ mɑ sɑ nɔɔɡiru sue sɑ fɑɑbɑ kɑnɑmɔ ɡuunun berɑ ɡiɑ.

⁶ Elɑmun tɑbu kowobu bɑ wee bɑ wɑ̃ɑ tɑbu kɛkɛbɑ sɔɔ kɑ mɑɑsɔbu, mɑ bɑ sɛ̃ɛ bwɑ̃ɑnu bɛki. Kiriɡibu bɑ mɑɑ wee, bɑ tɛrɛnu nɛni.

⁷ Wunɛ Yerusɑlɛmu, wee tɑbu kɛkɛbɑ bɑ tɛrie wunɛn wɔwi sɔɔ mi tem ɡem wɑ̃ɑ. Mɑ mɑɑsɔbu bɑ wunɛn ɡbɑ̃rɑ kɔnnɔsu tɑrusi.

⁸ Bɛɛ Yudɑbɑ i ǹ mɑɑ tɑ̃si yeru mɔ. Tɔ̃ɔ te, i mɛɛrɑ mi i rɑ bɛɛn tɑbu yɑ̃nu bere dii te bɑ mɔ̀ Dɑ̃ɑ sɔ̃ɔwɔ.

^9-10 Mɑ i deemɑ bɑ bɛɛn wuu Yerusɑlɛmun ɡbɑ̃rɑru yɑburɑ. Yerɑ i diɑ mɛɛrɑ mɛɛrɑ i kɔsukɑ i kɑ ɡbɑ̃rɑ te sɔnwɑ. Mɑ i nim torɑ ye bɑ rɑɑ ɡbɑn nim yɔ̃rɑsiɑ wuu sɔɔ.

¹¹ I kpɑɑ ɡbɑ ɡbɑ̃rɑnu yirun bɑɑ sɔɔ yu kɑ yeɔnɔn nim nɛnɛ. Adɑmɑ i ǹ Gusunɔ mɛɛrɑ wi u yen himbɑ yi yellun di.

¹² Yen sɔ̃nɑ tɔ̃ɔ teni sɔɔ, Gusunɔ, wɔllu kɑ tem Yinni, u bɛɛ sokɑ i kɑ swĩ, kpɑ i weeweenu ko i bɛɛn winu kɔni, kpɑ i sɑɑkibɑ dewe nuku sɑnkirɑnun sɔ̃.

¹³ Adɑmɑ wee i nuku dobu mɔ̀ i yɛ̃ɛrimɔ. I kɛtɛbɑ kɑ yɑ̃ɑnu ɡoomɔ. I yɑɑ temmɔ mɑ i tɑm nɔrumɔ i mɔ̀, su di kpɑ su nɔ, domi siɑ sɑ ko ɡbi.

¹⁴ Yen sɔ̃nɑ Gusunɔ, wɔllu kɑ tem Yinni u mɑn sɔ̃ɔwɑ u nɛɛ, u ǹ bɛɛ bɛɛn durum yeni wɔkɑmmɛ sere i kɑ ɡbi.

Bɑ Sebinɑ kirɔ mɔ̀

¹⁵ Amɛniwɑ Gusunɔ, wɔllu kɑ tem Yinni, u mɑn sɔ̃ɔwɑ. U nɛɛ, n doo n Sebinɑ wi u sɑ̃ɑ sinɑ kpɑɑrun sɔm kowobun wiruɡii sɔ̃ n nɛɛ,

¹⁶ mbɑ u mɔ̀ mi. Wɑrɑ u mɔ mi u kɑ tii siki wɔru dɑ̃kuɑmmɛ kperɔ.

¹⁷ Wee wi, Yinni Gusunɔ u koo nùn bɔke nɡe kureru kpɑ u nùn kɑsɑ kɔ̃ kɑ dɑm,

¹⁸ kpɑ u n bindimɔ nɡe bɑnɔ bɑtumɑ bɑkɑ sɔɔ. Miyɑ u koo ɡbi kɑ win tɑbu kɛkɛ sisuɡii yi u nɑɑnɛ sɑ̃ɑ, wi, wi u win yinnin yɛnu sekuru doke.

¹⁹ Wi, Yinni Gusunɔ, u koo nùn yɑrɑ win sɔmburun di kpɑ u kun mɑɑ sɑ̃ɑ ɡoo.

²⁰ Yen tɔ̃ɔ te, wi Yinni Gusunɔ, u koo win sɔm kowo Eliɑkimu, Hilikiyɑn bii soku,

²¹ kpɑ u nùn wi, Sebinɑn yɑberu sebusiɑ kpɑ u nùn win kpɑkɑ sɛ̃ke kpɑ u nùn win dɑm wɛ̃. Eliɑkimu wi, u ko n sɑ̃ɑwɑ Yerusɑlɛmuɡibu kɑ Yudɑbɑn bɑɑbɑ.

²² Yinni Gusunɔ u koo nùn Dɑfidin yɛnun kɔkɔrɔ wɛ̃. Ù n kɛniɑ, ɡoo kun kɛnumɔ. Ù n mɑɑ kɛnuɑ, ɡoo kun kɛniɑmɔ.

²³ U koo nùn ɡirɑwɑ nɡe sɑsɑru mi n nɑɑnɛ mɔ, kpɑ u de win tundon yɛnu ɡɑ n bɛɛrɛ mɔ.

²⁴ U ko n sɑ̃ɑwɑ bɛɛrɛ yen wiru. Be bɑ wɑ̃ɑ win yɛnuɔ, bukurobu kɑ bibu, ɡobiɡibu kɑ sɑ̃ɑrobu, wiyɑ u ko n be kpuro sɔɔwɑ nɡe sɑsɑru.

²⁵ Adɑmɑ Gusunɔ, wɔllu kɑ tem Yinni, u mɑɑ nɛɛ, sɔ̃ɔ teeru bɑ koo sɑsɑ te wukɑ te bɑ rɑɑ ɡirɑ mi n nɑɑnɛ mɔ mi, kpɑ tu wɔrumɑ tu bɔɔrɑ, kpɑ sɔmu ni tɑ rɑɑ sɔɔwɑ mi, nu kɑm ko. Yinni Gusunɔwɑ u yeni ɡeruɑ.