Esɑi 1 - Bibeli Gusunɔn Gari

BƆNU GBIIKAA

¹ Tire ten ɡɑri yi sɑ̃ɑwɑ ɡɑri yi Gusunɔn sɔmɔ Esɑi Amɔtin bii u ɡeruɑ Yudɑbɑn sɔ̃, kɑ sere ben wuu Yerusɑlɛmun tiin sɔ̃. U ɡɑri yi ɡeruɑwɑ sɑnɑm mɛ sinɑm beni, Osiɑsi kɑ Yotɑmu kɑ Akɑsi kɑ Esekiɑsi bɑ bɑndu di di Yudɑɔ.

Tɔn be bɑ ku rɑ ɡɑ̃ɑnu tubu

² Yinni Gusunɔ u nɛɛ, wɔllu kɑ tem, i kɑ mɑn nɔɔwɔ. Nɑ nɛn bibu seeyɑ, nɑ bu swɑɑ sɔ̃ɔsi, ɑdɑmɑ bɑ mɑn seesi.

³ Nɑɑ kinɛnu nu rɑ n nin kpɑro yɛ̃. Kɛtɛkunu nu rɑ n mɑɑ yɛ̃ mi nin yinni u rɑ nu dĩɑnu yiiye. Adɑmɑ nɛn tɔmbu Isirelibɑ bɑ ǹ mɑm kĩ bu ɡɑ̃ɑnu ɡiɑ. Bɑ ku rɑ ɡɑ̃ɑnu tubu.

⁴ Mɑ Esɑi u nɛɛ, bɛɛ Isirelibɑ, bɔ̃rurobɑ i sɑ̃ɑ, domi i durum mɔ̀wɑ. Torɑnu nu yibɑ bɛɛn suunu sɔɔ. Nuku kɔ̃surun wɑ̃ɑrɑ i wɑ̃ɑ. Bɛɛ kpuro i sɑnkirewɑ, domi i Yinni Gusunɔ deri. I nùn ɡɛmɑ, wi, wi u sɑ̃ɑ bɛɛn Yinni Dɛɛro, mɑ i nùn biru kisi.

⁵ Sɛɛyɑsiɑ birɑ̀ u koo mɑɑ bɛɛ ko, domi nɔn dɑbinɑ i nùn seesi. I sɑ̃ɑwɑ nɡe tɔnu wìn bwisikunu kun wɑ̃, mɑ u dɑɑ kɔ̃sɑ mɔ̀.

⁶ Sɑɑ win wirun di sere kɑ win nɑɑ tɑrɑnɔ, kpuro bɑrɑrɑ. Domi bɑ ǹ win mɛɛrɑbɑ kɑ win bosu teye bu tim ɡumɡim doke bu sere mɑm nɛɛ, bɑ koo bɔke.

⁷ Bɛɛn tem mu kuɑ bɑnsu. Mɛn wusu dɔ̃ɔ mwɑɑkirɑ. I tɔn tukobu mɛɛrɑ bɑ kɑ mɛn dĩɑnu ɡurɑ, bɑ ǹ ɡɑ̃ɑnu deri.

⁸ Mɑ Yerusɑlɛmu yɑ tiɑrɑ ye tɔnɑ. Yɑ kɔ̃ɔre nɡe kuru resɛm ɡbɑɑrun suunu sɔɔ, ǹ kun mɛ, ɡberɔ. Yɑ yɔ̃ tom ye tɔnɑ nɡe wuu ɡe bɑ tɑbu bure bɑ doonɑ.

⁹ Gusunɔ, wɔllu kɑ tem Yinni ù kun dɑɑ bɛsɛn sukum fiiko fɑɑbɑ kue Yerusɑlɛmu ye sɔɔ, yɑ koo rɑɑ kɑm kowɑ nɡe Sodomu kɑ Gomɔrɑ.

Sɑ̃ɑ te Gusunɔ u tusɑ

¹⁰ Mɑ Gusunɔ u nɛɛ, bɛɛ wiruɡibu be i kɑ Sodomuɡibu weenɛ, i nɛ, Yinni Gusunɔn ɡɑri swɑɑ dɑkio. Bɛɛ be i mɑɑ tie, i kɑ Gomɔrɑɡibu weenɛ, i nɛn woodɑ mɛm nɔɔwɔ.

¹¹ I tɑmɑɑ bɛɛn yɑ̃ku dɑbi ni, nu mɑn ɡɑ̃ɑnu sɑ̃ɑ? Bɛɛn yɑ̃ku yɑ̃ɑnu kɑ yɑ̃ku ɡum mɛ i rɑ kɑ mɑn yɑ̃ku dɔ̃ɔ mwɑɑrɑruɡinu kue, yɑ den mɑn tusɑ. Nɑ wɑsirɑ kɑ bɛɛn yɑɑ sɑbenun yɛm mɛ i rɑ yɛ̃ke nɛn sɑ̃ɑ yerɔ.

¹² Ye i rɑ nɛ nɛn sɑ̃ɑ yerɔ kɑ wɔrubu, yeyɑ nɑ bɛɛ bikiɑ?

¹³ Bɛɛn kɛ̃ɛ ni i kɑ nɑɑmɔ mi kɑmɑ. I ku rɑ mɑɑ kɑ nu nɑ. Bɛɛn turɑre yɑ ǹ mɑn nuburu doremɔ. I ku mɑɑ mɑn ye dɔ̃ɔ dokeɑ. Nɑ den bɛɛn kɔ̃sɑ ye tusɑ ye i rɑ ko ì n mɛnnɑ nɛn sɑ̃ɑ yerɔ i kɑ mɑn sɑ̃, suru ù n yɑrɑ, kɑ tɔ̃ɔ wɛ̃rɑruɡiru sɔɔ, kɑ sere mɑɑ tɔ̃ɔ bɑkɑnun sɑɑ. I ku mɑɑ mɑn tɔ̃ɔ bɑkɑ nin bweseru diiyɑ.

¹⁴ Nɑ mɑɑ bɛɛ sɔ̃ɔmɔ, bɛɛn tɔ̃ɔ bɑkɑ ni kpuro nu mɑn tusɑwɑ. Nu mɑn sɑ̃ɑwɛwɑ sɔmu bɑkɑnu. Nɑ mɑɑ wɑsirɑ n kɑ nu sɔbe.

¹⁵ Bɑɑ ì n bɛɛn kɑnɑru dɛnyɑsiɑmɔ, nɑ ku rɑ nu swɑɑ dɑki. Ì n nɔmɑ yiiyɑ wɔllɔ i kɑ kɑnɑru ko, nɑ rɑ nɛn wuswɑɑ sĩiyɛwɑ, nɑ kun bɛɛ mɛɛrɑ. Domi bɛɛn nɔmɑ tɔmbun yɛm yibɑ be i ɡo.

¹⁶ Yen sɔ̃, i tii sɑ̃rɑsio i nuku kɔ̃suru deri, kpɑ i ku mɑɑ kɔ̃sɑ ko.

¹⁷ I seewo i ɡeɑ ko, kpɑ i n ɡem swĩi. I be bɑ dɑm dɔremɔ fɑɑbɑ koowo. I ɡobekubɑ wɛ̃ɛyɔ ye n sɑ̃ɑ beɡiɑ, kpɑ i kɑ ɡɔminibu yinɑ.

^18-19 I nɑ su wesiɑnɑ kpɑ su nɔɔsinɑ. Ì n wurɑ i mɑn mɛm nɔɔwɑ, bɑɑ bɛɛn ɡɔ̃ru ɡɑ̀ n tĩri nɡe weke biru, kon ɡu dɛɛrɑsiɑ ɡu bururɑ nɡe wɛ̃su. Bɑɑ ɡɑ̀ n mɑɑ sɔ̃rin nɑ nɡe wɛ̃ɛ wunɔmɡii, ɡɑ koo bururɑ nɡe wɛ̃ɛ kpiki, kpɑ i tem mɛn dĩɑ ɡeenu di.

²⁰ Adɑmɑ ì n yinɑ, mɑ i mɑn seesi, bɑ koo bɛɛ ɡowɑ tɑbu sɔɔ kɑ tɑkobi. Nɛ, Yinni Gusunɔwɑ nɑ yeni ɡeruɑ.

Yinni Gusunɔ u koo Yerusɑlɛmu dɛɛrɑsiɑ

²¹ Gusunɔ u nɛɛ, Yerusɑlɛmu, wunɛ wi nɑ rɑɑ nɑɑnɛ sɑ̃ɑ, wee ɑ kuɑ nɡe kurɔ sɑkɑrɑ kowo, wi u win durɔ deri. Domi yellu ɡemɡibɑ rɑɑ yibɑ wunɛ sɔɔ. Adɑmɑ ɡisɔ, tɔn ɡowobu tɔnɑwɑ bɑ nun wɑ̃ɑsi.

²² A rɑɑ sɑ̃ɑ nɡe sii ɡeesu. Wee ɑ kuɑ nɡe sii bisu. A rɑɑ sɑ̃ɑwɑ nɡe tɑm ɡem. Adɑmɑ tɛ̃, ɑ kuɑ nɡe tɑm mɛ bɑ nim doke.

²³ Wunɛn wiruɡibɑ mɑn seesi, mɑ bɑ kɑ ɡbɛnɔbu nɔɔ tiɑ sɑ̃ɑ. Be kpurowɑ bɑ rɑ n kɛ̃nu yĩiyɔ, kpɑ bɑ n nɔm birɑn kɛ̃nu nɑɑ ɡire. Bɑ ku rɑ ɡobekubɑ wɛ̃ ye n sɑ̃ɑ beɡiɑ, bɑ ku rɑ mɑɑ kɑ ɡɔminibu yinɛ.

²⁴ Yen sɔ̃, i swɑɑ dɑkio i nɔ ye nɛ Gusunɔ, wɔllu kɑ tem Yinni nɑ ɡerumɔ, nɛ wi nɑ sɑ̃ɑ bɛɛ Isirelibɑn dɑm. Nɑ nɛɛ, kon bɛɛ nɛn yibɛrɛbɑ mɔru kɔsie kpɑ nɛn mɔru yu wɑ yu sure.

²⁵ Kon bɛɛ nɔmɑ doke kpɑ n bɛɛ wɔ̃ nɡe sisu n bɛɛn disinu kpuro wunɑ kpɑ i dɛɛrɑ.

²⁶ Kon bɛɛ kuɑ nɡe yellu. Siri kowobu bɑ ǹ mɑɑ nɔm birɑn kɛ̃nu mwɑɑmɔ. Mɛyɑ bɑ ǹ mɑɑ bwisi kɛ̃ɔbun nɔsu ɡum tɛɛnimɔ. Sɑɑ yerɑ bɑ koo nɛɛ, ɡemɡibu kɑ nɑɑnɛɡibun wuuwɑ mini.

²⁷ Kon Yerusɑlɛmu yɑkiɑ yɑ̀ n nɛn kĩru swĩi, kpɑ n mɑɑ yen tɔmbu wɔrɑ be bɑ ɡɔ̃ru ɡɔsiɑ mi kpuro.

²⁸ Be bɑ mɑn seesi, kon bu kɑm koosiɑ. Be bɑ durum mɔ̀, kpɑ n bu ɡo. Be bɑ mɑɑ mɑn biru kisi, kpɑ n bu kpeerɑsiɑ.

²⁹ Sɑɑ ye sɔɔ, dɑ̃ɑ bɑkɑnu kɑ dɑ̃ɑ sɔ̃ɔ si su sɑ̃ɑ bɛɛn bũu yenu, su koo de i sekuru wɑ.

³⁰ I ko kowɑ nɡe dɑ̃ɑ bɑkɑ ni, sɑnɑm mɛ nin wurusu dɛllɑmɔ, ǹ kun mɛ nɡe dɑ̃ɑ sɔ̃ɔ si, sɑnɑm mɛ su ǹ mɑɑ nim wɑɑmɔ.

³¹ Wi u tɑmɑɑ u dɑm mɔ u koo ko nɡe yɑkɑsu, kpɑ win kookoosu su n sɑ̃ɑ nɡe dɔ̃ɔ buri, kpɑ u dɔ̃ɔ mwɑɑrɑ kɑ win kookoo si sɑnnu. Goo sɑri wi u koo kpĩ u bu fɑɑbɑ ko.