Amɔsu 7 - Bibeli Gusunɔn Gari

Amɔsun kɑ̃siru sɔɔ, u twee wɑ yi tɛrie

¹ Wee ye Yinni Gusunɔ u derɑ nɑ wɑ kɑ̃siru sɔɔ. Tweeyɑ u derɑ yi kɔwɑrɑ dɑbi dɑbinu sɑnɑm mɛ yɑkɑsu kpɑrɑm wee si sinɑ boko u rɑɑ bɔɔrɑ win yɑɑ sɑbenun sɔ̃.

² Sɑnɑm mɛ yi tem min yɑkɑ si kpuro di, yerɑ nɑ nɛɛ, Yinni Gusunɔ, ɑ suuru koowo. Amɔnɑ Yɑkɔbun bweseru tɑ ko n kɑ wɑ̃ɑ. Domi tɑ ǹ mɑɑ dɑm mɔ.

³ Mɑ Yinni Gusunɔ u ɡɔ̃ru ɡɔsiɑ kɔ̃sɑ yen di. U nɛɛ, yeni yɑ ǹ mɑɑ koorɑmɔ.

Amɔsu u mɑɑ dɔ̃ɔ wɑ win kɑ̃siru sɔɔ

⁴ Wee ye Yinni Gusunɔ u mɑɑ derɑ nɑ wɑ kɑ̃siru ɡɑru sɔɔ. U nɛɛ, u koo tɔmbu sɛɛyɑsiɑ kɑ dɔ̃ɔ. Kpɑ u de dɔ̃ɔ wi, u nim mɛ mu wɑ̃ɑ tem sɔɔwɔ ɡberɑsiɑ kpɑ u Isirelibɑn tem kpuro di.

⁵ Mɑ nɑ nɛɛ, Yinni Gusunɔ, ɑ ye yɔ̃rɑsio. Amɔnɑ Yɑkɔbun bweseru tɑ ko n kɑ wɑ̃ɑ. Domi tɑ ǹ dɑm mɔ.

⁶ Mɑ Yinni Gusunɔ u ɡɔ̃ru ɡɔsiɑ kɔ̃sɑ yen di u nɛɛ, yenin tii yɑ ǹ mɑɑ koorɑmɔ.

Amɔsu u nifoo wɑ win kɑ̃siru sɔɔ

⁷ Wee ye nɑ mɑɑ wɑ kɑ̃siru ɡɑru sɔɔ. Nɑ Yinni Gusunɔ wɑ u yɔ̃ ɡɑnɑɔ mɑ u nifoo nɛni.

⁸ Mɑ u mɑn bikiɑ u nɛɛ, mbɑ nɑ wɑɑmɔ mi. Nɑ nùn wisɑ nɑ nɛɛ, nifoo. Mɑ u mɑn sɔ̃ɔwɑ u nɛɛ, nifoowɑ kon kɑ nɛn tɔmbu Isirelibɑ yĩire nɡe ɡɑnɑ. Nɑ ǹ mɑɑ bu suuru kuɑmmɛ.

⁹ Kon ben sikɑdo Isɑkin bũu turɑnu kɔsuku, kpɑ n Isirelin sɑ̃ɑ yenu suriri, kpɑ n Yeroboɑmun bɑndu surɑ kɑ tɑkobi n tu kpeerɑsiɑ.

Amɔsu kɑ yɑ̃ku kowo Amɑsiɑ

¹⁰ Yerɑ Amɑsiɑ Betɛlin yɑ̃ku kowo u Yeroboɑmu Isirelibɑn sinɑ boko ɡɔriɑ u nɛɛ, wee Amɔsu u nun seesimɔ Isirelibɑn suunu sɔɔ. Win ɡɑri yi u mɑɑ ɡeruɑ mi, yi tɔmbu kpuro burisinɑ.

¹¹ Domi u nɛɛ, wunɛ Yeroboɑmu, bɑ koo nun ɡowɑ tɑbu sɔɔ kɑ tɑkobi. Kpɑ bu Isirelibɑ yoru mwɛɛri ben tem di bu kɑ dɑ mi n tomɑ.

¹² Yen biruwɑ Amɑsiɑ u nɑ Amɔsun mi, u nùn sɔ̃ɔwɑ u nɛɛ, Gusunɔn sɔmɔ wunɛ, ɑ doo Yudɑn tem ɡiɑ, kpɑ ɑ n wunɛn ɡɑri yi mɔ̀ mi, ɑ kɑ wɑ ɑ n dimɔ.

¹³ Adɑmɑ ɑ ku mɑɑ Gusunɔn ɡɑri ɡere Betɛli mi, domi yɑ sɑ̃ɑwɑ sinɑ boko kɑ Isirelibɑ kpuron sɑ̃ɑ yeru.

¹⁴ Mɑ Amɔsu u nùn wisɑ u nɛɛ, nɑ ǹ sɑ̃ɑ Gusunɔn sɔmɔ. Nɑ ǹ mɑɑ Gusunɔn sɔmɔn bɔ̃ɔ. Nɛ, yɑ̃ɑ kpɑrowɑ. Sikɑmɔrewɑ nɑ rɑ yewe.

¹⁵ Yerɑ Yinni Gusunɔ u mɑn ɡɔsɑ sɑnɑm mɛ nɑ yɑ̃ɑnu kpɑrɑmɔ. U mɑn sɔ̃ɔwɑ u nɛɛ, n doo n win tɔmbu Isirelibɑ win ɡɑri sɔ̃.

¹⁶ Tɛ̃, ɑ swɑɑ dɑkio ɑ Yinni Gusunɔn ɡɑri nɔ. Wunɛ Amɑsiɑ, wunɛ wi ɑ nɛɛ, n ku Isirelibɑ Gusunɔn ɡɑri sɔ̃.

¹⁷ Wee ye Yinni Gusunɔ u ɡeruɑ. U nɛɛ, wunɛn kurɔ u koo sɑkɑrɑru ko wuu sɔɔ, kpɑ bu wunɛn bibu ɡo tɑbu sɔɔ, kpɑ bu wunɛn ɡberu bɔnu ko, domi wunɛn tii kɑɑ ɡbi tem tukumɔ mi n tomɑ, mi bɑ koo kɑ Isirelibɑ dɑ bu yoru di.