तितस 3 - बान्‍तावा राई

अ़नुवाक च़माथाङ्‌मा

¹ हाङ्‌काचि कामुचि खोन्‍कि पाङ कातोक्‌चिओ अ़चुक़म्‍मादा युङ्‌मादोत निकिना मोदाओ म़नाचि मित्‍मेत्‍तुचि। मोचि लोमावा म़च़ने, खोन्‍कि झाराकापाराआ नुलोक च़सि म़चुम्‍नान्‌युङ्‌नान्‍चिन्‍ने।

² मोचिआ साङ्‌कोछाङ अ़देङ्‌सालाप्‍पादा सोज्‍जे ऩचेप्‍निन्‍ने, खोन्‍किना ऩखिनिन्‍ने मेन झारा म़नाचिएनान कासिम्‍नान्‍चिन खोन्‍कि कातोङ म़लिने।

³ देकिनालो आन्‍कान आप्‍पिछाङ अ़क्‍दु खामान्‍सिन, लोमावा मान्‍च़कादा खोन्‍कि लाम मान्‍तुम्‍केसुम्‌युङ्‌सुम। आन्‍कान झाराकापाराओ राका खोन्‍कि ताकावा च़माओ अ़हारुक्‌चि मुन्‌येन। आन्‍ह़ङ्‌म़ङ अ़त्‍लो मित्‍मा खोन्‍कि छुन्‌दा खाइसुम्‌योम, चिप्‍माकात्‍लो मुन्‌येन, खोन्‍कि अ़क्‍छा निआ चिप्‍मा कात्‍काकात मुन्‌येन।

^4-5 मेन आन्‍कालेन्‍पा निनाम्‍हाङ्‌आ खोक्‍कोसोओ अ़चुनुलोक मुमा खोन्‍कि म़नाचिदात्‍निओ अ़चुसोम्‍तुक्‍मा आन्‍कान खाङ्‌म़मेत्‍ताकि खोक्‍कोसाआ आन्‍कान म़लेइसा। आन्‍कान आप्‍पि अ़नुवाक काचि मुम्‌ओसा खोक्‍कोसाआ आन्‍कान म़लेइसाओ ना माआङ, मेन खोक्‍कोसाआ आन्‍कान सोमाम़तुक्‍ताकि आन्‍हेवा वाम़स़त्‍तापुवाकि अ़ऩङ्‌वा ह़ङ्‌म़ङ म़पुवा खोन्‍कि निनाम्‍हाङ्‌ओ अ़चुलावालाम्‍पा आन्‍कान अ़ऩङ्‌वा म़मुवा।

⁶ आन्‍कालेन्‍पा येसु ख्रिस्‍तओ अ़चुतुक्‌वाआ निनाम्‍हाङ्‌आ खोक्‍कोसोओ अ़चुलावा आन्‍कान्‌एदा च़लोक म़पाक्‍तापुवा।

⁷ ओवात्‍नि निनाम्‍हाङ्‌ओ अ़चुसोम्‍तुक्‍माआ आन्‍कान खोक्‍कोसोओ अ़चुबुदा अ़नुवाक म़काइसायुङ्‌सा, खोन्‍किना अ़नुछ्‍याङा अ़लुक्‍निन्‌ओ ह़ङ्‌म़ङ तोक्‍तुम निकिना मित्‍चिऩङ कामु पाङ्‌कातोक लिसिन।

⁸ ओ अ़नुछ्‍याओ य़ङ ओ। निनाम्‍हाङ्‌एदा साकोङ्‌छ़ङ कामु झारासा अ़नुवाक काचि मुमादा मिन्‍मा अ़पाक्‍ने निकिना खाना त़छ़म्‍तुचिनेनि अ़ङ्‌का लोना। ओवाको काचिचि अ़नुवाक म़मु खोन्‍कि झारा म़नाचिओ निकि अ़नुवाक य़ङ ओ।

⁹ मेन अ़काचि मात्‍द़ङ्‌ओ दुम्‍छ़न्‍मा, सुन्‍तुम्‌चिओ ओन्‍दादाभान्‍को छाप्‍माय़ङ अ़चुऩङ्‌चि खोन्‍कि मोसाओ य़ङ्‌हुप्‌ओ अ़तुक्‌वादा खिमाम्‍हुमा छिरानुम। मोचि सोज्‍जेओ खोन्‍कि अ़काचि मात्‍द़ङ्‌ओ य़ङ्‌चि ओ।

¹⁰ काफेक म़नाचि अ़क्‍दु-ह्‍वादु चाप्‍चेत्‍तुचि, खोन्‍कि ऩकाङ्‌निन्‌नालो तुप्‍मै मान्‍तुप्‌दोचि।

¹¹ ओवाको म़नाचि म़पोप्‍ताओ खोन्‍कि हेवा मुयाङ्‌सा अ़चुकाचिलाम्‍पा आप्‍पि हेवामिओनि खाङ्‌अ़मु निकिना खाना त़सिन्‍तुङुङा।

आदेङ्‌ओ यायोक

¹² अर्तिमास माङ्‌लो तुखिकस अ़ङ्‌का खानाएदा बाइसुङ्‌योङ्‌वा खाना निकोपोलिस्‌दा अ़ङ्‌का तुप्‍सि देत्‍निकिनुछाङ बाना। देकिनालो अ़ङ्‌का मोदाङा चुङ्‌हिप ओन युङ्‌मानि मिनाङ्‌युङ्‌साङ।

¹³ य़ङ्‌हुप काले जेनास खोन्‍कि अपोल्‍लोस्‌ओ अ़चुकोन्‍खा लाम्‌ओ निकि नुलोक फासुचि, खोन्‍कि मोचि दोत्‌याङ्‌ओ सामाचि झारा लाप्‍तुप़चि।

¹⁴ आन्‍म़नाचिआ अ़नुवाक काचि मुमादा अ़चुमिन्‍मा अ़पाक्‍ने, खोन्‍किना अ़न्‍नुनु दोत्‌याङ्‌ओ सामाचि कोप्‍मा अ़ऱने। मोवात्‍नि म़च़नालो आन्‍म़नाचिआ सोज्‍जेओ ह़ङ्‌म़ङ ऩखाइसुन।

¹⁵ ओदा अ़ङ्‌काएनान कायुङ झारासाआ खानाएदा सेवा अ़बाइसायुङ्‌सा। आन्‍कान सोमाकातुक मोदाओ साकोङ्‌छ़ङ कामुचि आन्‍काओ सेवाय़ङ खाएत्‍तुचि। निनाम्‍हाङ्‌ओ अ़चुसोमातुक्‍मा खानानिन झाराकापाङ्‌एदा युङ्‌ने।