तितस 2 - बान्तावा राईअ़नुछ्याओ ताया 1 मेन खाना ओन अ़नुछ्याओ तायादा म़याक्याङ्ओ य़ङ्चि चिन्याङ्सा मुचि। 2 खोक्पा म़नाचि म़क़म्नान्चिन्ओ, साया तोक्मा खान्तुचिओ, खोप्लो कामिन लिमादोत, खोन्कि साकोङ्छ़ङ, सोम्तुक्मा, आङ्मा सावादा काछो लिमादोत निकिना चिन्तुचि। 3 मोवात्निङा खोक्मा मेत्छामाचि सायाकातोक लिमा चिन्तुचि। म़नाचिओ अ़त्लो दुम लुमा अ़नुनिन्नि मोचि चिन्तुचि। मोचि हेङ्मावाओ अ़क़म्मादा मान्छुक्कादा लिमादोत, खोन्कि अ़नुवाक य़ङ्चि काचिन लिमादोत। 4-5 मोवात्निनालो मो खोक्माचिआ कामेत्छा खिम्हाङ्माचि अ़चुखिम्हाङ्पाचिकि अ़चुओ छाचि सोम्तुक्मा, मोचि आप्पि क़म्मान्चिन, सेङ्लो मिन्मा याक्याङ्ओ लिमा, सोम्तुक्मा, नुलोक खिम्लुम्पा तोङ्मा, खोन्कि अ़खिम्हाङ्पाओ अ़क़म्मादा युङ्मा चिन्मा म़ऱचि। मोवात्नि लिनालो निनाम्हाङ्ओ अ़चुय़ङ अ़त्लो लिमा अ़तोक्तुन। 6 मोवात्निङा फान्ताचिछाङ आप्पि क़म्मान्चिन काऱ लिमा चिन्तुचि। 7 खानाङा झारा य़ङ्दा अ़नुवाक काचिओ अ़मात्ऩङ लिसाकि मोचि खाङ्मेत्तुचि खोन्कि सोत्सोत्वाकि ताङ्च़क्तान्चिन्ओ लिसाकि ताया प़चि। 8 अ़छ़ङ य़ङ चिन्तुचि, खोन्कि साङ्आछाङ मो य़ङ क़प्मा ऩऱन्ने। मोवात्निनालो ङेङ्चिछाङ आन्तुक्वादा देत्छाङ य़ङ्मा ऩऱनिन्कि आप्पि लेजोदा म़छुक। 9 हारुक्चिछाङ अ़चुहाङ्पाचिओ अ़चुक़म्मादा म़युङ्कि झारा काचिदा अ़चुऩङा म़नुसुचिने, अ़चुदोदो ऩचिप्तुन्दिसुन्चिन्ने। 10 खोन्कि खाक्को सामाछाङ ऩख़सुन्ने। मेन अ़धुन्ङा मिन्माआ चाओ खोन्कि अ़नुवाक म़लिकिना म़युङ्ने। मोवात्नि म़च़नालो म़नाचि दियाको य़ङ्दाछाङ आन्कान कालेन्पा निनाम्हाङ्ओ अ़चुचिन्मा एन्मा म़स़। 11 देकिनालो निनाम्हाङ्आ झारा म़नाचि लेन्मा खोक्कोसोओ अ़चुसोम्तुक्मा खाङ्अ़मुसा। 12 ओ सोम्तुक्माआ आन्कान खान्अ़त्ओ ह़ङ्म़ङ खोन्कि हेन्खामादाओ च़क्ख़य़ छित्म़मेत, खोन्कि ओ सोम्तुक्माआ आन्कान आप्पि क़म्तिन्चिन्कि ओ हेन्खामादा निनाम्हाङ्ओ अ़चुमिन्मावा च़मा खोन्कि निनाम्हाङ्एनान तोङ्ओ ह़ङ्म़ङ क़प्मा ऱम। 13 ओवात्निङा तामामित्मा मुन्येन्ओ य़ङ तामालामा लेन्ओ अ़लाम आन्कान खाम्योम। मो लेन तोक्पो निनाम्हाङ येसु ख्रिस्त आन्कालेन्पा अ़धिवा साम्दा म़य़याङ्ओ खाङ्म़मुनान्चिन। 14 झाराकापाराओ आन्हेवादाङ्का आन्कान फोङ्सि, आन्कान सेङ्सि, खोन्कि अ़नुवाक काचि मुमा कास़ आप्पिओ अ़चुम़ना मुसि येसु ख्रिस्तआ आन्को निकि अ़चुह़ङ्म़ङ म़पुवा। 15 खाना ओ य़ङ त़चिन्तुङुचिहिदा झारा पाङ्एनान राक प़चि खोन्कि रेन्याङ्सा मुचि। मोवात्नि त़च़नालो साङ्आछाङ खाना हेलाङ मुमा ऩतोक्नान। |
© Wycliffe Bible Translators, Inc. All rights reserved.
Wycliffe Bible Translators, Inc.