रोमि 7 - बान्तावा राईसायाकाम्माओ अ़मात्ऩङ 1 ब़ब़, नाना खोन्कि निछाचि ओ, खानानिन य़ङ्हुप कासिन्चि, दि म़ना ह़ङ्याङ्तारि ओन्ङा य़ङ्हुप्आ लाउ निकिना त़सिन्तिमिन्येन? 2 अ़मात्ऩङ्ओ निम्पाङ, अ़क्छा साया काम्साओ मेत्छामा अ़खिम्हाङ्पा ह़ङ्याङ्तारि अ़खिम्हाङ्पाएनान य़ङ्हुप्आ क़म्तुचि, मेन अ़खिम्हाङ्पा स़नालो सायाकाम्माय़ङ य़ङ्हुप्दाङ्का अ़खिम्हाङ्मा फोङ। 3 मोवात्निङा, अ़खिम्हाङ्पा ह़ङ्याङ्हिदा, मो नि दुवाछाएदा खात्नालो मो “ताङ्लान कामु”नि लो। मेन अ़खिम्हाङ्पा स़नालो मो मेत्छामा य़ङ्हुप्दाङ्का फोङ खोन्कि नि दुवाछाएनान सायाकाम्नुछाङ, मो ताङ्लान कामु अ़लिनिन। 4 खोन्ओसा अ़ङ्ब़ब़, नाना खोन्कि निछाचि ओ, खानानिन्छाङ ख्रिस्तओ अ़चुपोक्ओ अ़फुत्ओसा य़ङ्हुप्एदा त़स़न्युङ्सिन। खोन्कि ओन्ग़रि खानानिन म़सुवादाओदाङ्का म़खोन्तालोन्ताओ ख्रिस्तएनान अ़क्तात त़लिसिन्युङ्सिन। मोवात्निओसा, आन्कान निनाम्हाङ्ओ निम्पाङ अ़नुवाक काचिओ अ़सिवा सिमा ऱम। 5 आन्कान हेवाओ अ़क़म्मादा ह़ङिन्येन्हिदा हेवा मित्माचिआ आन्पोक्चिदा काचि मुङु, खोन्कि दि-दि मुमा अ़नुनिन्नि य़ङ्हुप य़ङायुङ्सा, अ़अ़त्पा आन्मिन्माचिआ मो मुमा च़लोक अ़चुऩङानु। खोन्किना मो हेवामि काचिआ आन्कान स़माओ अ़सिवा सिसुम। 6 मेन ओन्ग़रि आन्कान काक़म य़ङ्हुप्ओ अ़सावा आन्कान्एदा मात्द़ङ, देकिनालो मोदा स़न्कि आन्कान य़ङ्हुप्दाङ्का फोङ्सिन्युङ्सिन। खोन्ओसा हान बुया छाप्ताओ य़ङ्हुप्दा काङ्याङ्सा माआङ, मेन सेङ्लावाओ अ़ऩङ्वा ह़ङ्म़ङ्दा आन्कान निनाम्हाङ ब़क्तुम। य़ङ्हुप खोन्कि हेवा 7 खोन्नालो आन्कान दे य़ङिन म़ल़क? य़ङ्हुप हेवा ओ? देम्खाछाङ माआङ! मेन य़ङ्हुप मात्द़ङ्याङ्ओदे, हेवा दि ओ अ़ङ्का मान्सिन्ङाओ। “खाना च़क्ख़य़ मान्मुदा”नि य़ङ्हुप मान्य़ङ्ओदे च़क्ख़य़ मुमा अ़अ़त्पाओ निकिना मान्सिन्ङाओ। 8 मेन हेवाआ लोमाय़ङ्दा अ़वाखाम तोक्तुकि अ़ङ्काएदा झाराकाखालाओ च़क्ख़य़ मिन्मा लोइसु। य़ङ्हुप मात्द़ङ्याङ्ओदे, अ़ङ्साकोङ्वादा हेवाओ अ़सावा मात्द़ङ, मिनिन्ने मो सुवादायुङ्सा। 9 अ़क्दु य़ङ्हुप्ओ अ़तुक्वादा मान्सिन्युक्तुङ्हिदा अ़ङ्का ह़ङाङ्याङ। मेन लोमाय़ङ सिन्तुङ्किना अ़ङ्ह़ङ्म़ङ्दा हेवा ह़ङालोन्ता खोन्कि अ़ङ्का सुवाङ। 10 ह़ङ्म़ङ प़मादोत्ओ मो लोमाय़ङ्आ अ़ङ्को निम्पाङ स़मा तारु निकिना अ़ङ्का तुप्तुङ। 11 देकिनालो हेवाआ लोमाय़ङ्लाम्पा अ़वाखाम तोक्तुकि अ़ङ्का अ़म़प्ताङ, खोन्कि मो लोमाय़ङ्लाम्पा अ़ङ्का अ़सेराङ। 12 खोन्नुछाङ, य़ङ्हुप सेङ्याङ, खोन्कि लोमाय़ङ सेङ्याङ खोन्कि तोङ्लो खोन्कि अ़नुवाक मुयाङ। हेवाएनान म्हुमा 13 खोन्नालो दि अ़नुवाक मुयाङ, मोसाआ अ़ङ्को निम्पाङ स़मा तारु म़ल़क? देम्खाछाङ माआङ! मेन हेवा, हेवावात्नि सिन्ने निम्पाङ अ़नुवाक य़ङ्लाम्पा हेवाआ अ़ङ्काएदा स़मा तारुयुङ्सु, खोन्ओसा लोमाय़ङ्लाम्पा हेवा अ़न्नुनु हेवामि लिमा ऱने। 14 आन्कान सिन्तुम्योम, य़ङ्हुप लावामि ओ, मेन अ़ङ्का मान्साम्योक्मि मुङाङा, खोन्कि हेवाओ अ़हारुक्वात्नि अ़ङ्का इनाङ्युङ्साङ। 15 अ़ङ्का दे च़ङा, मो अ़ङ्का अ़तुप्ऩङ। अ़ङ्का देत्नि मिन्ङा, मोवात्नि अ़ङ्का अ़मुऩङ। मेन अ़ङ्का दि चिप्माकात्तुङ, मोङा अ़ङ्का मुङ। 16 मेन अ़ङ्का दि मुङ्योङ मो फिसुङ्योङ्नि सिन्तुङ्योङ्नालो य़ङ्हुप अ़नुवाक मुयाङ निकिना अ़ङ्का काङ्ङाओ ओसाआ खाङ्मुसु। 17 खोन्ओसा हान मो अ़त्लोकाच़ अ़ङ्का माआङ, मेन अ़ङ्काएदा याक्याङ्ओ हेवामि मित्माओ। 18 अ़ङ्का सिन्तुङ्योङ, अ़ङ्काएदा याक्याङ्ओ हेवामि पोक्ओ मित्माचिआ दित्छाङ नुलोक च़मा ऩप़ऩङ। दि अ़नुवाक मुयाङ, मो मुमामिन्मा अ़ङ्काएदा याक्याङ, मेन मो मुमा अ़ङ्का अ़ऱऩङ। 19 देकिनालो अ़ङ्का दि अ़नुवाक मुमा स़ङा, मो अ़ङ्का अ़मुऩङ, मेन अ़ङ्का दि अ़अ़त्पा मुमानि अ़मिन्ऩङ, मो अ़ङ्का मुङ। 20 हान अ़ङ्का दि मुमानि अ़मिन्ऩङ, मो मुङ्नालो मो कामु देम्खाछाङ अ़ङ्का माआङ, मेन अ़ङ्काएदा कायाक हेवा ओ। 21 ओवात्नि ओ अ़छ़ङ य़ङ्आ काचि मुङुओ अ़ङ्का धिरुङ। खाउग़रि अ़ङ्का नुलोक च़मा स़ङा, मोन्ग़रि अ़अ़त्पा अ़ङ्च़क्दा युङ। 22 देकिनालो अ़ङ्साकोङ्वा हुत्याङ्का निनाम्हाङ्ओ अ़चुय़ङ्हुप्दा अ़ङ्ऩङानु, 23 मेन अ़ङ्पोक्फुत्चिदा नितात य़ङ्हुप्आ अ़ङ्मिन्मादा याक्याङ्ओ निनाम्हाङ्ओ अ़चुय़ङ्हुप्ओ अ़देङ्सालाप्पादा ङेङ मु। खोन्कि अ़ङ्पोक्फुत्चिदा याक्याङ्ओ हेवाओ अ़य़ङ्हुप्आ अ़ङ्का अ़छुम्ङा। 24 अ़ङ्का ना दियाको दुखा कातोक म़ना! ओ अ़ङ्पोक कासेत हेवादाङ्का साङ्आ अ़ङ्का लेन्मा अ़ऱङा? 25 निनाम्हाङ आलाङ्ने! आन्हाङ्पा येसु ख्रिस्तलाम्पा खोक्कोसाआ अ़ङ्का ऩलेन्ङा! खोन्ओसा, आप्पि अ़ङ्मिन्माआ अ़नुछ्याङा निनाम्हाङ्ओ अ़चुय़ङ्हुप्वात्नि मुमा स़ङा, मेन पोक्दा अ़ङ्का हेवाओ अ़य़ङ्हुप्ओ अ़हारुक मुङाङा। |
© Wycliffe Bible Translators, Inc. All rights reserved.
Wycliffe Bible Translators, Inc.