खाङ्मुमा 20 - बान्तावा राईअ़क हजाराकादोङ 1 खोन्किना अ़थेन मात्द़ङ्ओ हुत्ओ होत्खा खोन्कि अ़क्तात अ़धिवा काकाराओ चोक्माय़ अ़छुक्दा क़क्तुङुओ अ़क्तात निनाम्हाङ काफा निनाम्मादुङ्का धाङाओ अ़ङ्का खाङ। 2 मोसाआ मो अ़धिवा प़लाउ, मो चोकोरोङ्धिप्पा माङ्लो सैतानानिछाङ लो, खोन्कि अ़क हजाराकादोङ्ओ निम्पाङ मो छ़सु। 3 मोसाआ मो अ़थेन मात्द़ङ्ओ हुत्यु वेइसुदिसु, खोन्कि मो छेक्तुकि अ़सेप्मा पाक्तु, खोन्ओसा अ़क हजाराकादोङ मान्तालायुक्ओन रावा-रावाचि मोसाआ अ़धान्तुन्चिन्ने। खोन्किना थुत्मेत्लोओ निम्पाङ मो फोङ। 4 खोन्किना अ़ङ्का हाङ्युङ्खाचि खोन्कि मोचिदा कायुङ्चि खाङ्च़ङ, मोचि छ़ङ्छेन्मा पाङ म़प़युङ्सुचि। खोन्कि येसुओ अ़चुसालुम्स़ङ्ओ निम्पाङ खोन्कि निनाम्हाङ्ओ अ़चुय़ङ खाअ़लुसाओसा अ़चुताङ म़क़प्ताओचि, खोन्कि मो साक्स़ङ खोन्कि मो साक्स़ङ्ओ अ़सेम्पोक मान्ब़क्कादाचि खोन्कि मोसोओ अ़सेप्मा अ़चुछुक त़ऱबुप्दा मान्पाक्कादाचि अ़ङ्का खाङ्च़ङ। मोचि म़लासाखोन्तालोन्ता, खोन्कि ख्रिस्तएनान अ़क हजाराकादोङ हाङ म़मुवा। 5 नि म़सुवादाओचि मो अ़क हजाराकादोङ मान्खात्युक्ताओन मान्खोन्लोन्चि। ओ स़मादाङ्का बुयाओ खोन्मालोन्माय़ङ ओ। 6 बुयाओ खोन्मालोन्माय़ङ्दा कावाङ्चि आसिखा कातोक खोन्कि म़सेङ्याङ्ओचि ओ! ओचि ह्वातात्ओतात स़माओ अ़सावाआ देत्छाङ मुमा अ़ऱन्चिन, मेन मोचि निनाम्हाङ खोन्कि ख्रिस्तओ अ़चुकाब़क म़लि, खोन्कि खोक्कोएनान अ़क हजाराकादोङ्तारि हाङ म़मु। सैतानाओ छ़ङ्छेन्मा 7 अ़क हजाराकादोङ खात्कि सैताना मोसोओ अ़छेक्खादाङ्का लेत, 8 खोन्कि हेन्खामाओ अ़ऱङ्कोप्नि म़थ़ङाओ रावा-रावाओ म़नाचि धान्माचि, मोचि ङेङ मुसि कोउचि। मो म़नाचि गोग खोन्कि मागोगनि म़लोचि, मोचिओ अ़चुखिप्चि धियाङ्वामादाओ लुङ्च़क़य़क ओन्लेकाङा मु। 9 मोचि झारा हेन्खामा भेप्लोदाङ्का म़ताकि निनाम्हाङ्ओ अ़चुम़नाचिओ अ़चुयुङ्खाओ ऱङ्कोप्नि खोन्कि खोक्कोसाआ सोमाअ़तुक्ताओ सहरा अ़कोम्ता, मेन निनाम्मादुङ्का मि धाकि मोचि ह़त्तुखाइसुचि। 10 मोचि काधान मो सैताना लेराङाओ गन्दक्ओ मिराक्दा वेइसादिसा, मोदा मो साक्स़ङ खोन्कि सोज्जेओ निनाम्हाङ्य़ङ खाकालुछाङ याआङा। मोदा मोचिआ अ़खोलेन अ़खाखुत अ़धुन्ङा दुखा अ़आङ्युङ। देङ्दाओ छ़ङ्छेन्मा 11 खोन्कि अ़ङ्का अ़क्तात अ़धिवाङ हाङ्युङ्खा खोन्कि मो दुङ्दा कायुङ खाङ। खोक्कोसोओ अ़चुबुदाङ्का हेन्खामा खोन्कि नाम्छ़ऱ फुङ्साखाराचि, खोन्कि मोचि मान्लाखाङ्मुसाचिचिन। 12 अ़धिवा अ़चुप्पा झारा म़सुवादाओचि हाङ्युङ्खाओ अ़बुदा म़एवाङाओ अ़ङ्का खाङ्च़ङ। खोन्कि छाप्लाखाचि म़होङ्सा, खोन्कि नि ह़ङ्म़ङ्ओ छाप्लाखाछाङ होङ्सा। मो छाप्लाखाचिदा म़छाप्ताङाओ य़ङ्चिवा मोचिआ अ़मुवाओ काचिवात्नि म़सुवादाओचिओ अ़चुछ़ङ म़छेन्तुचि। 13 धियाङ्वामाआ मोदा म़याआङाओ म़सुवादाओचि म़प़लाउचिओ अ़ङ्का खाङ, खोन्कि स़माआ खोन्कि सित्म़ङ्चि दुखा तोक्खाआछाङ मोचिएदा म़सुवादाओचि म़प़लाउचि। मोचिओ आआप्पिओ अ़चुकाचिवा अ़चुछ़ङ म़छेन्तुचि। 14 स़मा खोन्कि सित्म़ङ्चि दुखा तोक्खा मिराक्दा वेइसादिसा। ओ मिराक ह्वादुओदु स़मा ओ। 15 साङ्कोओ अ़ऩङ ह़ङ्म़ङ्ओ छाप्लाखादा मान्छाप्याङ, मो लेराङाओ मिराक्दा वेइसादिसा। |
© Wycliffe Bible Translators, Inc. All rights reserved.
Wycliffe Bible Translators, Inc.