खाङ्मुमा 2 - बान्तावा राईएफिसस्दाओ साम्भुङ्ओ निम्पाङ य़ङ्खान 1 “एफिससदाओ साम्भुङ्ओ निनाम्हाङ काफा खाना ओ य़ङ छाप्तु। ओ य़ङ्खान सात्कातात साङ्केन्माचि अ़चुचुप्ताङ्छुक्दा काक़क्क खोन्कि सात्कातात हाराक्वाओ कुपि युङ्खाचिओ अ़चुरादा काकोन म़य़ङ्याङ। 2 खाना त़मुचिओ य़ङ्चि, आम्काचिचि खोन्कि खाना देत्नि त़आङ्तुओचि अ़ङ्का सिन्तुङ्योङ। खोन्कि खाना अ़अ़त्पा म़नाचि आङ्मा त़ऱन्चिन, मोचि आप्पि ‘छाम्माय़ङ्ओचि’नि ना म़लोनान्चिन, मेन माआङ। खोन्कि खाना मोचि त़चिन्तुखोचिहिदा सोज्जेओ त़धिरुचिओ अ़ङ्का सिन्तुङ्योङ। 3 अ़ङ्का सिन्तुङ्योङ, खानानिन्आ त़हुङुम्कि त़आङ्तुम्युङ्सुम, खोन्कि अ़ङ्ऩङ्ओ अ़तुक्वाआ अ़चाअ़त्मा त़आङ्तुम्युङ्सुम, खोन्कि खानानिन मान्होत्त़युक्तिन। 4 मेन आम्नुओ देङ्सालाप्पादा अ़ङ्काएदा ओ य़ङ युङ्याङ, खानानिन्आ बुयाओ आम्नुओ सोमातुक्मा त़छिरुम्युङ्सुम। 5 खोन्ओसा निनाम्हाङ्ओ अ़चुखाङ्मादाङ्का खाना त़धाखाराओ, मो मित्तु, खोन्कि अ़ङ्काएदा लासाता, खोन्कि खाना बुया त़मुङुओ काचिचि मुचि। खाना अ़ङ्काएदा त़लानान्तानान्नालो अ़ङ्का खानाएदा ताङाकि आम्कुपियुङ्खा मोसोओ अ़युङ्खादाङ्का चुमुङ। 6 मेन खानानिन्आ अ़क्तात य़ङ तोङ्लो त़मुम्योम, अ़ङ्का ऩङाछिरुङ्वात्निङा खानानिन्आ निकोलाइतस्चिओ अ़चुकाचिचि ऩङात़छिरुम्च़म। 7 साङ्को अ़एन्खा नाबाक याक्याङ, मोसाआ एनुने, सेङ्लावाआ साम्भुङ्चि दे म़लोङुचि। साङ छो, अ़ङ्का खो निनाम्हाङ्ओ अ़चुस़ङ्सिबात्बुङ्खादाओ ह़ङ्म़ङ्ओ स़ङ्ताङ्ओ अ़सिवा चामा पाङ प़ङ। स्मुर्नादाओ साम्भुङ्ओ निम्पाङ य़ङ्खान 8 स्मुर्नादाओ साम्भुङ्ओ निनाम्हाङ काफा खाना ओ य़ङ छाप्तु। साङ सुवादा खोन्कि लासाह़ङा, ओ य़ङ्खान खोक्कोसोओ ओ, खोक्को अ़पुङ्चिपुक खोन्कि अ़लुक्मा म़युङ्याङ। 9 अ़ङ्का आम्दुखाचि खोन्कि आम्मान्तोक्दामाचि सिन्तुङ्योङ्च़ङ। मेन खाना कातोक त़मुयाङ! साङ आप्पि यहुदिनि म़लोनानान्चिन, मोचिआ खानानिन ऩसुङ्तिन्येन्ओ अ़ङ्का सिन्तुङ्योङ। मोचि यहुदिचि माआङ, मेन सैतानाओ अ़रुहुप्चि ओ। 10 खानानिन अ़चाअ़त्मादा छुक्मा त़मुन्येन्ओदा मान्क़दानिन। खानुम! सैतानाआ खानानिन्एदाङ्का देम्कापाङ आम्नुओ चिन्माखाङ्माओ निम्पाङ छेक्खादा छेक्मा त़मुन्येन, खोन्कि खानानिन दस्कालेन दुखा त़तोक्तिन। खानानिन आम्नुओ स़मादामातारि साकोङ्छ़ङ मुमा त़खान्तिन्लो त़लिसिन्नालो अ़ङ्का खानानिन ह़ङ्म़ङ्ओ सिरिफा प़नानिन। 11 साङ्को अ़एन्खा नाबाक याक्याङ, मोसाआ एनुने, सेङ्लावाआ साम्भुङ्चि दे म़लोङुचि। साङ छो, ह्वादुओदुओ स़माआ खो देत्छाङ अ़मुन। पर्गामम्दाओ साम्भुङ्ओ निम्पाङ य़ङ्खान 12 पर्गामम्दाओ साम्भुङ्ओ निनाम्हाङ काफा खाना ओ य़ङ छाप्तु। ओ य़ङ्खान ह्वालिप्पा अ़हा याक्याङ्ओ बान्छोन काखुन्दाङ्का ओ। 13 खानानिन खादा त़युङिन्येन, अ़ङ्का सिन्तुङ्योङ। मोदा सैतानाओ अ़हाङ्युङ्खा युङ्याङ। खोन्नुछाङ अ़ङ्ऩङ्दा खानानिन नुलोक त़युङिन। सोम्कुवा मुमा खान्तुओ अ़ङ्सालुम्स़ङ काप़पा एन्तिपास्ओ अ़ग़रिदाछाङ अ़ङ्काएदा साकोङ्छ़ङ मुमा मान्छित्त़दोम, खो सैतानाओ अ़युङ्खादा आम्नुओ रादा सेरायुङ्सा। 14 मेन आम्नुओ देङ्सालाप्पादा अ़ङ्काएदा दि-दि य़ङ्चि म़युङ्याङ। देकिनालो आम्नुओ रादा खा-खाक्कोचि म़युङ्याङ, मोचिआ बालाम्ओ अ़चिन्माय़ङ अ़त़ङ। इस्राएलिचि धुङ्खाओ अ़तुक्वा लिने निकिना सेम्पोक्चि प़माय़ङ चामायुचि चामा खोन्कि ताङ्लान मुमा बालाम्आ बालाक चिन्तु। 15 मोवात्निङा आम्रुहुप्दा निकोलाइतस्ओ अ़चिन्माय़ङ्चि कात़ङ म़नाचिछाङ देम्कापाङ म़याक्याङ। 16 खोन्ओसा हान हेवादाङ्का लासानिन! माङ्नालोना अ़ङ्का च़क्नि खानाएदा ताङा खोन्कि अ़ङ्दोदाङ्का लोन्ओ बान्छोन्आ मो म़नाचिएदाओ अ़चुदेङ्सालाप्पादा म्हुङा। 17 साङ्को अ़एन्खा नाबाक याक्याङ, मोसाआ एनुने, सेङ्लावाआ साम्भुङ्चि दे म़लोङुचि। साङ छो, अ़ङ्का मो सुकुलादाओ मन्ना प़ङ, खोन्कि अ़ङ्का मो अ़ऩङ्वा ऩङ छाप्याङ्ओ अ़क्तात ओम्याङ्ओ लुङ प़ङ, मो लुङ कातोक्आ ओन्ङा मो ऩङ सिन्तु। थिआतिरादाओ साम्भुङ्ओ निम्पाङ य़ङ्खान 18 थिआतिरादाओ साम्भुङ्ओ निनाम्हाङ काफा खाना ओ य़ङ छाप्तु। ओ य़ङ्खान निनाम्हाङ्ओ अ़चुछादाङ्का ओ, मोसोओ अ़म़क्चि मिओ अ़लाक्वा खोन्कि मोसोओ अ़लाङ्चि लेन्माय़ङ कासावा मुयाङ। 19 खानानिन त़मुम्योम्च़म्ओ अ़तुक्वाचि झारा सिन्तुङ्योङ्च़ङ। आम्नुओ सोमातुक्माचि, आम्नुओ साकोङ्छ़ङ्चि, आम्नुओ सेवाचि खोन्कि आम्नुओ आङ्माय़ङ्चि अ़ङ्का सिन्तुङ्योङ्च़ङ। आदेङ्ओ आम्नुओ काचिचि बुयाओदाङ्का च़लोक म़मुयाङ निकिना अ़ङ्का सिन्तुङ्योङ। 20 मेन आम्नुओ देङ्सालाप्पादा अ़ङ्काएदा ओ य़ङ य़ङ्मा दोत्याङ: खाना इजेबेल्निओ मेत्छामा त़आङ्तुङु। मो आप्पि निनाम्हाङ्य़ङ खाकालुनि लोनान्चिन, खोन्कि अ़ङ्का काब़त्चि ताङ्लान मुमा खोन्कि सेम्पोक्चि प़माय़ङ चामायुचि चामा चिन्याङ्सा थेम्सुङुचि। 21 अ़ङ्का मो हेवा मुमादाङ्का लामान्चिन ग़रि प़ङ्युङ्सुङ, मेन मो अ़ताङ्लान्दाङ्का लामान्चिन छुन। 22 खानुम, तुक्माओ इम्खादा अ़ङ्का मो वेइसुङ्दिसुङ, खोन्कि मोएनान ताङ्लान कामुचिआ मोसाआ मुओ हेवादाङ्का ऩलानान्चिमिन्नालो अ़ङ्का मोचि तोक्पो दुखादा वेइसुङ्दिसुङ्च़ङ। 23 अ़ङ्का मो कात़ङ्चि सेरुङ्च़ङ। खोन्कि झारा साम्भुङ्चिआ अ़सिन, अ़ङ्का खोङा ओ, झारासोओ अ़चुमिन्माचि खोन्कि अ़चुसाकोङ्वाचि लामुङ्च़ङ, खोन्कि खानानिन झारासा त़मुम्ओ आम्नुओ काचिचिओ सिरिफा अ़ङ्का लानाप़नानिन। 24 मेन खानानिन थिआतिरादाओ ओ अ़अ़त्पा चिन्माय़ङ मान्त़ङ्कादाचि खोन्कि ‘सैतानाओ अ़च़वाङ य़ङ्चि’नि लोमाय़ङ मान्चिन्कादान्चिन्चि खानानिन अ़ङ्का लोनानिन, खानानिन अ़ङ्का नि खाक्कोछाङ लोमाय़ङ अ़प़नानिमिन, 25 मेन खानानिन्एदा याक्याङ्ओ चिन्माय़ङ अ़ङ्का मान्बान्युक्ङाओन खानानिन नुलोक क़क्तायुङ्सानुम। 26 साङ छो खोन्कि अ़ङ्काचिचि आदेङ्तारि साङ्आ मुयुङ्सुचि, खो अ़ङ्का रावा-रावाचिदा पाङ प़ङ। 27 खोन्कि काकाराओ रोलाआ बाखाओ ब़चि अ़धाङ-अ़धाङ मुचिलो केरुचिवा मोसाआ मोचिएदा हाङ्काचि मु, ओवात्निङा अ़ङ्काछाङ अ़ङ्पापाएदाङ्का पाङ तोक्तुङ्युङ्सुङ। 28 अ़ङ्का मो अ़वाय़ङ्ओ साङ्केन्मा प़ङ। 29 साङ्को अ़एन्खा नाबाक याक्याङ, मोसाआ एनुने, सेङ्लावाआ साम्भुङ्चि दे म़लोङुचि।” |
© Wycliffe Bible Translators, Inc. All rights reserved.
Wycliffe Bible Translators, Inc.