खाङ्मुमा 19 - बान्तावा राई1 खोन्किना अ़ङ्का निनाम्मादुङ्का अ़धिवाङ म़ना मुक्लाआ ओवात्नि य़ङाङाओ य़ङ एनुङ, “हल्लेलुयाह! लेन्मा आन्निनाम्हाङ्दाङ्का ओ। साम खोन्कि सावा आन्निनाम्हाङ्एदा याक्याङ। 2 देकिनालो खोक्कोसोओ अ़चुछ़ङ छेन्माचि तोङ्लो खोन्कि अ़छ़ङ मुयाङ। झारा हेन्खामा मोसोओ अ़पोप्माआ अ़त्लोकामु मो तोक्पो काचान्चामा खोक्कोसाआ दन्दा अ़पुवायुङ्सा। निनाम्हाङ्आ मो दन्दा अ़पुवायुङ्सा देकिनालो खोक्कोसोओ अ़चुहारुक्चि मोसाआ सेरुचि।” 3 मोचि म़लासापारा, “हल्लेलुयाह! मो तोक्पो सहरा हत्ताओ तुङ्ऱक अ़धुन्तारि धात्नि खात्युङ!” 4 खोन्किना मो चौबिस्कासाम्योक ताङ्पाचि खोन्कि मो चारकातात अ़ह़ङ्चिआ म़बोम्सान्चिन्कि हाङ्युङ्खादा म़युङाङाओ निनाम्हाङ ओवात्नि य़ङ्याङ्सा अ़ब़क्ता, “मोवात्निङा लिने! हल्लेलुयाह!” सायाकाम्मा खाबाचा 5 खोन्किना हाङ्युङ्खादाङ्का ओवात्नि य़ङाङाओ अ़क्तात य़ङ ता, “आन्निनाम्हाङ्ओ अ़चुऩङ चोन्तानुम, खोक्कोसोओ झारा अ़चुहारुक्चि खोन्कि अ़चुम़नाचि ओ, खानानिन अ़चुप्पा खोन्कि अ़धिवा साङ्चिआ खोक्को त़कित्तुम्योम।” 6 खोन्कि अ़क्तात अ़धिवा म़ना मुक्ला ऱङाङाओ एनुङ। मो लोङ्याङ्ओ चाक्वाओ अ़साप्मा खोन्कि ब़द्धे अ़धिवाङ कुलुङ्धिप्पाओ अ़मुक्मावा ऱङाङा, मो ओवात्नि य़ङाङा, “हल्लेलुयाह! देकिनालो हाङ्पा आन्निनाम्हाङ झारा सावाकातोक हाङ्म़मु। 7 आन्कान आन्ऩङानुसिन्चिन्ने खोन्कि ऩङ्नुखालोक्ताखा मुन्ने, खोक्कोसोओ अ़चुऩङ लोङ्सुम्ने! देकिनालो थुबाछाओ अ़चुसायाकाम्मा ग़रि तायुङ्सा, खोन्कि खोक्कोसोओ अ़चुसायाकाकाम्मा आप्पि मोसोओ निम्पाङ म़चुम्सान्युङ्सान्चिन। 8 बाङ्गाय़ओ छोक्छोक्छोक्वाओ खोन्कि सेङाङाओ तित हुम्मा मो पुवा।” बाङ्गाय़ओ छोक्छोक्छोक्वाओ तित निनाम्हाङ्ओ अ़चुम़नाचिओ अ़नुवाक काचिचि ओ। 9 खोन्किना मो निनाम्हाङ काफाआ अ़ङ्का अ़लोवाङ, “ओ छाप्तु, थुबाछाओ अ़चुसायाकाम्खाओ खाबाचादा बुत्माय़ङ्चि निनाम्हाङ्आ झारा आसिखा म़प़चि।” निनाम्हाङ काफाआ अ़लासाङ्लोवाङ, “निनाम्हाङ म़य़ङाओ ओ य़ङ्चि अ़छ़ङ ओ।” 10 खोन्किना खो सेवा मेत्सि अ़ङ्का खोसोओ अ़लाङ्दा बोम्साङ्च़ङ। मेन खोसाआ अ़ङ्का अ़लोवाङ, “खाना अ़ङ्का ओवात्नि मुमा अ़नुनिन। अ़ङ्का येसुओ अ़छ़ङ सालुम्स़ङ काखुन आम्निछाचि खोन्कि अ़क्निओ आम्यावा काफाचि ओन्ङा ओ। निनाम्हाङ ब़क्तु!” देकिनालो येसु ख्रिस्तआ खाङ्अ़मुसाओ अ़छ़ङ्आङा निनाम्हाङ्य़ङ खाकालुचि मो अ़छ़ङ य़ङ्खान खालुमा सावा प़चि। ओम्प़चिवा युक्वा कायुक 11 अ़ङ्का निनाम्मा होराओ खाङ, खोन्कि मोदा अ़क्तात ओमाङाओ युक्वा युङाङा। मोदा कायाक, ‘सोम्कुवा मुमा खान्तुओ’ खोन्कि ‘अ़छ़ङ मुमाय़ङ’नि लोवाङा। खोक्को तोङ्लो छ़ङ म़छेन खोन्कि ङेन म़मु। 12 खोक्कोसोओ अ़चुम़क्चि मिलाप्वा म़मुवाङा, खोन्कि खोक्कोसोओ अ़चुताङ्दा ब़द्धे हाङ ताङ्बोप्खाचि म़याआङा। खोक्कोसोओ अ़चुऩङ मोएदा छाप्ताङा, मेन मो ऩङ्ओ अ़तुप्य़ङ खोक्कोएदाङ्का नि साङ्आछाङ मान्सिन्अ़दाङा। 13 खोक्को ह़आ वाहोवाओ तित हुम्साङा। खोक्को ‘निनाम्हाङ्ओ अ़चुय़ङ’निकिना सिन्ताङा। 14 निनाम्मादुओ रात्खामिचि ओम्प़चिवा खोन्कि सेङाङाओ बाङ्गाय़ओ तित म़हुम्साकि म़ओमाङाओ युक्वादा म़वाङा खोन्कि खोक्कोसोओ अ़चुदेङ्देङ म़खारा। 15 रावा-रावाचि धेत्मा खोक्कोसोओ अ़चुदोदाङ्का अ़हास़रिओ बान्छोन लोन, खोन्कि खोक्कोसाआ काकाराओ रोलाआ मोचिएदा हाङ्काचि म़मु। खोक्कोसाआ झारा सावापोरिओ निनाम्हाङ्ओ अ़चुमाइसुङ्ओ च़ऱपाआ अङ्गुरा खोक्खा अ़नेप। 16 खोक्कोसोओ अ़चुतित, अ़चुओ धिलाङ्दा ‘हाङ्चिओ अ़चुहाङ खोन्कि हाङ्पाचिओ अ़चुहाङ्पा’नि छाप्ताङा। 17 खोन्किना अ़क्छा निनाम्हाङ काफा नाम्दा एवाङाओ अ़ङ्का खाङ। मोसाआ नाम्छ़ऱओ अ़रादा साक़त्वा काचा झारा कापेन्चि अ़धिवा य़ङ्आ लोचि, “तानिन, निनाम्हाङ्ओ अ़धिवाङ खाबाचादा अ़क्नि कोआनिन्चिन। 18 खानानिन्आ हाङ्चि, कप्तानाचि, सावापोरिओ खोन्कि झारा म़नाचिओ अ़चुसाचि खोन्कि युक्वाचिकिना मो कायुक्चि, फोङ्माय़ङ खोन्कि हारुक्चि अ़चुप्पो खोन्कि अ़धिवो झारासोओ अ़चुसाचि चामा त़ऱम्च़म।” 19 हेन्खामादाओ साक्स़ङ खोन्कि झारा हाङ्चि खोन्कि अ़चुओ रात्खामिचि म़कोवान्चिन्ओ अ़ङ्का खाङ्च़ङ। मोचि युक्वादा कायुक खोन्कि खोसोओ अ़रात्खामिचिओ अ़चुदेङ्सालाप्पादा ङेन म़मुवा। 20 खोन्कि मो साक्स़ङ खोन्कि मोसोओ अ़बुदा म़दोम्दाओ काचि कामु सोज्जेओ निनाम्हाङ्य़ङ खाकालु ह़वाङ्माङ लाप्खावा चाचि। ओ म़दोम्दाओ काचिचिलाम्पा मो सोज्जेओ निनाम्हाङ्य़ङ खालुवा मो साक्स़ङ्ओ अ़सेप्मा कापाक खोन्कि मोसोओ अ़सेम्पोक काब़क्चि म़प्तुचि। मोचि ह्वातात्माङ लेराङाओ गन्दक्ओ मिराक्दा अ़ह़ङ्ङा म़वेइसुदिसुचि। 21 म़युङालाराओचि युक्वादा म़याआङाओसो अ़दोदाङ्का लोन्ताओ बान्छोन्लाम्पा म़सेरा, खोन्कि झारा कापेन साक़त्वा काचाचिआ मोसोओ अ़सा अ़चुबुक खासालो अ़चा। |
© Wycliffe Bible Translators, Inc. All rights reserved.
Wycliffe Bible Translators, Inc.