खाङ्मुमा 14 - बान्तावा राईथुबाछा खोन्कि अ़क्लाखा चवालिस हजारा 1 अ़ङ्का खाङ्हिदा सियोन भ़ऱदु, थुबाछा म़एवाङा। खोक्कोएनान अ़क्लाखा चवालिस हजारा म़नाचि म़याआङा। मोचिओ अ़चुत़ऱबुप्दा खोक्कोसोओ अ़चुऩङ खोन्कि खोक्कोसोओ अ़चुपापाओ अ़चुओ ऩङ छाप्ताङा। 2 खोन्किना चाक्वा मुक्तुङुओ अ़साप्मावाको खोन्कि अ़धिवा कुलुङ्धिप्पाओ अ़मुक्मावा निनाम्मादुङ्का ताओ अ़क्तात य़ङ अ़ङ्का एनुङ। अ़ङ्का एनुङ्ओ मो य़ङ वाकेन कासाङ्चिआ अ़साङ्याङ्ओ वाकेन्ओ अ़साङ्मावा मुवाङा। 3 हाङ्युङ्खाओ खोन्कि चारकातात अ़ह़ङ साक्स़ङ्चिओ, खोन्कि साम्योक ताङ्पाचिओ अ़चुबुदा मोचिआ अ़क्तात अ़ऩङ्वा छाम अ़लुवाङा। हेन्खामादाङ्का अलुङ छोराकि लेन्माय़ङ्चि अ़क्लाखा चवालिसा हजारादाङ्का नि साङ्आछाङ मो छाम खेङ्मा मान्ऱअ़दाङा। 4 मोचि मेत्छामाचिएनान मान्पोप्म़युक्ता, खोन्कि खोचि म़सेङाङा। थुबाछा खादा-खादा म़खात मोचिआ खोक्को अ़त़ङ्ताङा। निनाम्हाङ खोन्कि थुबाछाओ निम्पाङ बुयाओ अ़सिवावात्नि म़नाचिओ अ़चुरादाङ्का ओचिओ अ़चुलुङ छोराकि म़खिरा ओ। 5 ओ म़नाचिओ अ़चुदोदाङ्का देम्खाछाङ सोज्जेओ य़ङ मान्धित, मोचि थुपि मात्द़ङ्ओचि म़मुवाङा। सुम्कापाङ निनाम्हाङ काफाचि 6 खोन्किना निनाम्हाङ काफा नाम्चोक्ओ अ़रादु पियाङाओ अ़ङ्का खाङ। हेन्खामादा कायुङ झारा रावाचि, भुङ्चि, य़ङ्चि खोन्कि म़नाचि खाएत्मा अ़धुन्तारिओ नुय़ङ्खान मोएदा याआङा। 7 खोसाआ अ़धिवा य़ङ्दा य़ङा, “निनाम्हाङ कित्तानुम, खोन्कि खोक्कोसोओ अ़चुऩङ लोङ्सानुम, देकिनालो खोक्कोसाआ म़नाचिओ अ़चुछ़ङ्छेन्मा ग़रि तायुङ्सा। निनाम्मा, हेन्खामा, धियाङ्वामा खोन्कि चाक्वाओ अ़लित्खा कामुन्पा निनाम्हाङ ब़क्तानुम।” 8 ह्वातात्ओतात निनाम्हाङ काफा ओवात्नि य़ङ्सा अ़चुदेङ्देङ त़ङ्तुचि, “लुक्ताखारा! तोक्पो सहरा बेबिलोन लुक्ताखारा! देकिनालो ओ सहराआ झारा रावाचि ताङ्लान मुमेत्मा अ़अङ्गुरा माङ्वा दुङ्मेत्तुचि।” 9 खोन्किना सुम्कातात्ओतात निनाम्हाङ काफा अ़धिवाङ य़ङ्आ ओवात्नि य़ङ्सा मोचिओ अ़चुदेङ्देङ त़ङ्तुचि, “मोवात्नि साङ्आ मो साक्स़ङ खोन्कि मोसोओ अ़सेम्पोक ब़क्तु खोन्कि अ़त़ऱबुप माङ्लो अ़छुक्दा मोसोओ अ़सेप्मा पाक्तुनालो 10 निनाम्हाङ्आ अ़चुच़ऱपाओ अ़न्नुनु छोयाङ्ओ अङ्गुरा माङ्वाछाङ मोचि दुङ्म़मेत्तुचि। मोसोओ अ़तुप्य़ङ मोचि म़सेङ्याङ्ओ निनाम्हाङ काफाचि खोन्कि थुबाछाओ अ़चुबुदा मि खोन्कि गन्ध़क्दा तोक्पो दुखा म़प़चि। 11 मो दुखा काप़ गन्धक्ओ तुङ्ऱक अ़धुन्तारि धात्नि खात। खाक्कोचिआ मो साक्स़ङ खोन्कि मोसोओ अ़सेम्पोक अ़ब़क, खोन्कि मोसोओ अ़सेप्मा अ़लोक, मोचिआ अ़खाखुत-अ़खोलेन देम्खाछाङ सावातोम्मा ऩतोक्तुन।” 12 निनाम्हाङ्ओ अ़चुम़नाचि खोचिआ निनाम्हाङ्ओ अ़चुलोमाय़ङ अ़मु खोन्कि येसुएदा साकोङ्छ़ङ म़मु, मोचि काहुङ लिमाकि युङ्मादोत। 13 खोन्किना निनाम्मादुङ्का ओवात्नि य़ङाओ अ़क्तात य़ङ अ़ङ्का एनुङ, “ओ छाप्तु: ओदाङ्का ह्यात्नि हाङ्पाएदा कास़चि आसिखा कातोक्चि ओ।” लावा म़य़ङ्याङ, “उवा, मोचिओ अ़चुकाचिदाङ्का सावा म़तोम, देकिनालो खोचिआ अ़मुवाओ य़ङ्दा सिरिफा म़प़चि।” हेन्खामादाओ चा हेक्मा 14 खोन्किना अ़ङ्का खाङ, खोन्कि अ़क्तात ओमाङाओ य़वारि खोन्कि मोदा म़युङाङाओ म़नाओ अ़छावाको अ़क्छा खाङ, मोसोओ अ़ताङ्दु हाराक्वाओ ताङ्बोप्खा याआङा खोन्कि अ़छुक्दा अ़हायाआङाओ क़च्चे याआङा। 15 नि अ़क्तात निनाम्हाङ काफा ब़क्खाखिम्दाङ्का बुङ्खादा लोन्ता खोन्कि य़वारिदा कायुङ्पा अ़धिवा य़ङ्आ लो, “आम्क़च्चे याङु, देकिनालो हेक्मा ग़रि तायुङ्सा, हेन्खामादाओ झारा चा तुमाचिआयुङ्सा।” 16 मोवात्नि य़वारिदु कायुङ्आ अ़क़च्चे हेन्खामादा अ़याङा, खोन्कि हेन्खामादाओ चा अ़हेक्ता। 17 खोन्किना अ़ङ्का निनाम्मादु युङाङाओ निनाम्हाङ ब़क्खाखिम्दाङ्का नि अ़क्तात निनाम्हाङ काफा बुङ्खादा लोन्ताओ खाङ, खोन्कि मोएदाछाङ अ़क्तात अ़हायाआङाओ क़च्चे याआङा। 18 खोन्किना ब़क्खादाङ्का नि निनाम्हाङ काफा लोन्ता, मोसोओ मिदा अ़पाङ याआङा, खोन्कि अ़धिवा य़ङ्आ मो य़ङा, “साङ्एदा अ़हा याक्याङ्ओ क़च्चे युङ्याङ, आम्क़च्चे याङु, खोन्कि हेन्खामादाओ अ़ङ्गुरा खादाओ अ़ङ्गुरा सिवाचि हेक्तुचि देकिनालो हेन्खामादाओ अङ्गुरा झारा तुमाचिआयुङ्सा।” 19 मो निनाम्हाङ काफाआ अ़कच्चे हेन्खामादा याङु, खोन्कि हेन्खामादाओ अङ्गुराओ अ़सिवा कोउ, खोन्कि मो निनाम्हाङ्ओ अ़चुमाइसुङ्ओ अ़धिवा अङ्गुरा युङ्खादा अ़वेइसादिसा। 20 सहराओ बुङ्खादाओ अङ्गुरा युङ्खादा मो अङ्गुरा नेप्ता, अङ्गुरा खोक्खादाङ्का ह़ लोन्ताकि सोला। मो युक्वाओ अ़पोत्दुतारि तालालो ग़ङ्ताङा। मो ह़ सुम्कासये किलोमितरातारि फेसा। |
© Wycliffe Bible Translators, Inc. All rights reserved.
Wycliffe Bible Translators, Inc.