खाङ्मुमा 13 - बान्तावा राई1 खोन्कि धियाङ्वामादाङ्का लोन्ताओ अ़क्तात साक्स़ङ अ़ङ्का खाङ, मोसोओ दस्कातात अ़खुक्खाचि खोन्कि सात्कातात अ़ताङ्चि म़याआङा। मोसोओ दस्कातात अ़खुक्खाचिदाङा दस्कातात ताङ्बोप्माचि म़याआङा, खोन्कि मोसोओ झारा अ़ताङ्दा निनाम्हाङ सुङ्माय़ङ ऩङ याआङा। 2 अ़ङ्का खाङ्ओ मो साक्स़ङ स़ङ्चोङ्खेवात्नि काराङा, मोसोओ अ़लाङ्चि माक्साओवा म़मुवाङा, खोन्कि मोसोओ अ़दो धिनाराओवा मुवाङा। मो अ़धिवाङ प़आ मो साक्स़ङ आप्पि अ़सावा, अ़हाङ्युङ्खा खोन्कि तोक्पो पाङ प़। 3 मोसोओ अ़ताङ्चिदाङ्का अ़क्तात अ़ताङ्दा अ़धिवा खेन वारिन्ओवा दाराङा, मेन मो अ़खेन नुवाखारायुङ्सा। खोन्कि झारा हेन्खामादाओचि दोम्तुदोकि मो साक्स़ङ त़ङ्मा अ़पुङ्सा। 4 म़नाचिआ अ़धिवाङ प़ अ़ब़क्ताङा, देकिनालो मोसोओ अ़पाङ साक्स़ङ प़युङ्सु। मोचिआ ओवात्नि य़ङ्सा साक्स़ङ्छाङ अ़ब़क्ता, “ओ साक्स़ङ्वाको नि साङ युङ्याङ कि? ओसोओ अ़देङ्सालाप्पादा साङ ङेन मुमा ऱ कि?” 5 अ़धिवा प़आ मो साक्स़ङ ऱफोक्वा खोन्कि निनाम्हाङ सुङ्मा य़ङ्चि चेप्मा दो प़। मो बयालिस्कादोङ्वात्तारि मोसोओ अ़पाङ याङ्मा पुवा। 6 निनाम्हाङ्ओ अ़चुदेङ्सालाप्पादा सुङ्मा, खोक्कोसोओ अ़चुऩङ खोन्कि खोक्कोसोओ अ़चुयुङ्खा, खोन्कि निनाम्मादु कायुङ्चिछाङ झारा सुङ्माचि मोसाआ अ़दो होउ। 7 मो निनाम्हाङ्ओ अ़चुम़नाचिओ अ़चुदेङ्सालाप्पादा ङेन मुमा खोन्कि मोचिएदा छोमा सावा म़प़युङ्सुचि। झारा भुङ्चि, म़नाचि, य़ङ्चि खोन्कि रावाचिएदा मो हाङ मुमा पाङ म़प़युङ्सुचि। 8 खोन्कि हेन्खामादा कायुङ झारा म़नाचिआ मो साक्स़ङ अ़ब़क। मोचिओ अ़चुऩङ हेन्खामा मुन्मा बुयादाङ्काङा ह़ङ्म़ङ्ओ छाप्लाखादा मान्छाप्युक्ता। मो छाप्लाखा म़सेराओ थुबाछाएदा याक्याङ। 9 साङ्को अ़नाबाक याक्याङ मोसाआ एनुने! 10 छेक्खादा खात्मादोत्ओ अ़नुछ्या छेक्खादाङा खात, बान्छोन्आ सेत्मादोत्ओ अ़नुछ्या बान्छोन्आङा सेत। खोन्ओसा निनाम्हाङ्ओ अ़चुम़नाचिआ आङ्मादोत खोन्कि साकोङ्छ़ङ मुमादोत। हेन्खामादाङ्का लोन्ताओ साक्स़ङ 11 खोन्किना हेन्खामादाङ्का लोन्ताओ नि अ़क्तात साक्स़ङ अ़ङ्का खाङ। मोसोओछाङ थुबाछाओवाङा ह्वातात अ़खुक्खाचि याआङा, मेन मो अ़धिवाङ प़वात्नि चेवाङा। 12 मोसाआ बुयाओ साक्स़ङ्ओ अ़बुदा खोसाआ प़ओ अ़पाङ्ङा याङुङु। खोन्कि मोसाआ बुयाओ अ़खोवा नुवाओ साक्स़ङ हेन्खामादाओ झारा म़नाचि राकाङ्थेत्नि ब़क्मेत्तुङुचि। 13-14 बुयाओ साक्स़ङ्ओ अ़बुदा मो बुन्चि खाङ्मुमा सावा मो पुवायुङ्सा। नाम्छ़ऱदुङ्का मि धान्मा अ़धिवा बुन्चिछाङ ओ ह्वातात्ओतात साक्स़ङ्आ मुचि। मोसाआ मो बुन्चिलाम्पा हेन्खामादा कायुङ म़नाचि थेम्सुखाइसुचि। बान्छोन्आ खेन वाराकिछाङ ह़ङाओ मो बुयाओ साक्स़ङ्ओ अ़साऩङ्वा मेत्मादा अ़क्तात सेम्पोक मुमानि मोसाआ मोचि लोचि। 15 मो बुयाओ साक्स़ङ्ओ अ़सेम्पोक्दा साक्मा पाक्मानि मो ह्वातात्ओतात साक्स़ङ लोवा, खोन्ओसा साक्स़ङ्ओ मो अ़सेम्पोक चेप्मा ऱने, खोन्कि झारा मो साक्स़ङ्ओ अ़सेम्पोक ब़क्मा काछुन्चि म़सेत्ने। 16 खोन्किना मोसाआ अ़धिवा खोन्कि अ़चुप्पा, कातोक खोन्कि मान्तोक्कादा खोन्कि लेत्वा खोन्कि हारुक झारा म़नाचिओ अ़चुचुप्ताङ्छुक माङ्लो अ़चुत़ऱबुप्दा सेप्खा राकाङ्थेत्नि पाक्मेत्तुचि 17 मो सेप्खा मात्द़ङ साङ्आछाङ खित्मा माङ्लो इन्मा ऩतोक्तुन। मो सेप्खा मो साक्स़ङ्ओ अ़ऩङ ओ माङ्लो मो अ़खिप्आ मोसोओ अ़ऩङ खाङ्मुसु। 18 खारुआ अ़नुछ्या ओ तुप्मा ऱ, साङ्आ तुप्मा ऱ, मोसाआ ओ साक्स़ङ्ओ अ़खिप तुप्तुने। देकिनालो मो म़नाओ अ़खिप ओ। मोसोओ अ़खिप छ सये छयसत्थि ओ। |
© Wycliffe Bible Translators, Inc. All rights reserved.
Wycliffe Bible Translators, Inc.