खाङ्‌मुमा 12 - बान्‍तावा राई

मेत्‍छामा खोन्‍कि अ़धिवा प़

¹ निनाम्‍मादु अ़क्‌तात म़दोम्‍दाओ तोक्‍पो बुन दारा। मोदा अ़क्‍छा मेत्‍छामा नाम्‌वात्‍नि दाराङाओ तित हुम्‍साङाओ दाइसान्‍चिन, मोसोओ अ़लाङ्‌भेन्‌यु लादिप्‍मा याआङा खोन्‍कि अ़ताङ्‌दु बारकातात साङ्‌केन्‍माचिआ मुमाय़ङ्‌ओ ताङ्‌बोप्‍खा याआङा।

² मो बुक्‍खुयाङा, खोन्‍कि मो छातोक्‍मा योक्‍माआ पाराङा।

³ खोन्‍किना निनाम्‍मादु नि बुन दारा, सात्‌कातात अ़ताङ, दस्‌कातात अ़खुक्‍खा खोन्‍कि अ़ताङ्‌दु सात्‌कातात ताङ्‌बोप्‍खा बोम्‍साङाओ अ़क्‌तात हालापाक्‍पाक्‌ओ अ़धिवा प़ दारा।

⁴ मोसोओ अ़मिरिआ निनाम्‍मादुओ सुम्‌कालोक साङ्‌केन्‍माचि ब़उचिकि हेन्‍खामादा वेइसुधान्‍तुचि। नुनु छा लिछाङ मो ख़ङ्‌माखात्‍मा निम्‍पाङ मो अ़धिवा प़ नुनु छातोक्‍मा मुवाङाओ मेत्‍छामाओ अ़बुदा एवाङा।

⁵ मो मेत्‍छामाआ झारा रावाचि काकाराओ रोलाआ हाङ्‌काचि कामु अ़क्‍छा दुवाछा तोक्‍तु। मोसोओ अ़नुनु छा निनाम्‍हाङ्‌एदा थेन्‍ताखात्‍ता, खोन्‍कि खोक्‍कोसोओ अ़चुहाङ्‌युङ्‌खादा युङ्‌सा।

⁶ मो मेत्‍छामा लेक्‍लेक्‍लेक्‌वाओदा फुङ्‌सा, मोदा अ़क हजारा ह्‍वा सये साथिकालेन्‌तारि मो केन्‍मा निनाम्‍हाङ्‌आ मोसोओ निम्‍पाङ युङ्‌खा अ़चुम्‍सायुङ्‌सा।

⁷ खोन्‍किना निनाम्‍मादु ङेन लिसा। तोक्‍पो निनाम्‍हाङ काफा मिखाएल खोन्‍कि मोसोओ अ़काफाचिआ मो अ़धिवा प़एनान ङेन म़मुवा। अ़धिवा प़ खोन्‍कि मोसोओ अ़काफाचिछाङ मिखाएल खोन्‍कि मोसोओ अ़काफाचिएनान मोचिओ अ़चुदेङ्‌सालाप्‍पादा ङेन म़मुवा।

⁸ मेन मो अ़धिवाङ प़ खोन्‍कि अ़काफाचि हारा म़लिसा, खोन्‍कि मोचिआ निनाम्‍मादुओ युङ्‌खा छित्‍मादामादोरा।

⁹ मिखाएल खोन्‍कि अ़काफाचिआ मो अ़धिवा प़ निनाम्‍मादुङ्‌का ह्‍युना अ़वेइसाधान्‍ता। मो बुयाओ अ़धिवा प़ ओ, मो झारा हेन्‍खामा काथेम्‍खान सैतानानिछाङ लो। मो हेन्‍खामादा वेइसाधान्‍ता खोन्‍कि मोसोओ झारा अ़काफाचिछाङ मोएनान अ़क्‍नि म़वेइसुधान्‍तुचि।

¹⁰ खोन्‍किना निनाम्‍मादु ओवात्‍नि य़ङाङाओ अ़क्‌तात अ़धिवाङ य़ङ एनुङ, “हान निनाम्‍हाङ्‌ओ अ़चुलेन्‍मा तायुङ्‌सा! निनाम्‍हाङ्‌आ ख्रिस्‍तओ अ़चुसावा हाङ्‌वा खाङ्‌अ़मुसायुङ्‌सा। हान मसिह तोक्‍पोहाङ कामु निनाम्‍हाङ्‌आ अ़छेन्‍तायुङ्‌सा, खोक्‍कोसाआ झारा म़नाचिएदा हाङ मुमा पाङ अ़तोक्‍तायुङ्‌सा। देकिनालो सैतानाआ आन्‍ब़ब़, नाना खोन्‍कि निछाचि आन्‍निनाम्‍हाङ्‌ओ अ़चुबुदा अ़खाखुत अ़खोलेन लाहि पाक्‍तुचि। मो निनाम्‍मादुङ्‌का ह्‍युना वेइसाधान्‍तायुङ्‌सा।

¹¹ ब़ब़, नाना खोन्‍कि निछाचिआ थुबाछाओ अ़चुह़ खोन्‍कि अ़चुओ सालुम्‍स़ङ य़ङ्‌ओ अ़तुक्‌वाआ मोएदा म़छोसायुङ्‌सा। मोचिआ अ़चुस़मातारिछाङ अ़चुह़ङ्‌म़ङ सोमामान्‍तुक्‌अ़दा।

¹² खोन्‌ओसा निनाम्‍मादु कायुङ्‌चि ओ, ऩङानुसानिन्‍चिन! मेन हेन्‍खामा खोन्‍कि धियाङ्‌वामा देम चाअ़त्‍लो त़लिचि! देकिनालो सैताना खानाचिएदा वेइसाधान्‍तायुङ्‌सा! खोसोओ अ़माइसुङ्‌कारायुङ्‌सा देकिनालो अ़ग़रि थुत्‍मेत्‍लो मुयाङ निकिना खोसाआ सिन्‍तुङु।”

¹³ मो अ़धिवाङ प़आ खो हेन्‍खामादा वेइसाधान्‍ताओ खाकिना दुवाछा छा कातोक मेत्‍छामा खोसाआ ऱमा पुङ्‌सु।

¹⁴ मेन मो मेत्‍छामा मो अ़धिवाङ प़ओ अ़बुदाङ्‌का लेक्‍लेक्‍लेक्‌वाओदा पिमा खात्‍मा निम्‍पाङ तोक्‍पो कोकोङ्‌वेत्‍माओ ह्‍वातात अ़लाप्‌चि पुवा। मो लेक्‍लेक्‍लेक्‌वाओदा सुम्‌कादोङ अ़क्‍धाङ्‌तारि मो मेत्‍छामा अ़धिवाङ प़दाङ्‌का केन्‍मा खोन्‍कि रात्‍मा निम्‍पाङ चुम्‍सायुङ्‌सा।

¹⁵ खोन्‍किना मो मेत्‍छामा वाधुप्‌आ वालेक्‍तुखात्‍तुने निम्‍पाङ मो अ़धिवाङ प़आ अ़दोदाङ्‌का याङ्‌वामावा चाक्‌वा पेम्‍सुलोइसु।

¹⁶ मेन हेन्‍खामाआ मो मेत्‍छामा फासु, खोन्‍कि अ़धिवाङ प़आ अ़दोदाङ्‌का लोइसुओ याङ्‌वामा हेन्‍खामाआ अ़दो होउकि ख़ङ्‌सुखात्‍तु।

¹⁷ खोन्‍किना मो अ़धिवाङ प़ मो मेत्‍छामाएदा चाअ़त्‍लो अ़च़ऱपाकारा। खोन्‌ओसा मोसाआ मो नि मेत्‍छामाओ अ़छाचिएनान ङेन मुमा पुङ्‌सु। मोचि निनाम्‍हाङ्‌ओ अ़चुय़ङ काकाङ्‌चि खोन्‍कि येसुआ अ़मुवाओ खोन्‍कि म़चिन्‍तुचिओ य़ङ्‌दा सोम्‍कुवा कामुचिओ।

धियाङ्‌वामादाङ्‌का लोन्‍ताओ साक्‍स़ङ

¹⁸ मो अ़धिवा प़ धियाङ्‌वामाओ अ़केम्‌दा एवा।