खाङ्मुमा 1 - बान्तावा राई1 ओ निनाम्हाङ्आ येसु ख्रिस्त खाङ्अ़मेत्ताओ य़ङ ओ, खोन्ओसा खोक्कोसाआ अ़चुकाब़त्पाचि च़क्नि लिसि तामा म़मुयाङ्ओ य़ङ्चि खाङ्मेत्मा म़ऱचि। ख्रिस्तआ अ़चुकाफा अ़छुत्ताकि ओ य़ङ अ़चुकाब़त्पा युहन्ना खाङ्अ़मेत्ता। 2 युहन्नाआ खाओ झारा य़ङ खोसाआ खालुसुयुङ्सु। खोसाआ खालुसुओ य़ङ निनाम्हाङ्दाङ्काओ य़ङ ओ, खोन्कि येसु ख्रिस्तओ अ़चुसालुम्स़ङ ओ। 3 साङ्आ निनाम्हाङ्य़ङ खालुमा य़ङ्चि खिप्तुचि, एनुचि खोन्कि मोदा छाप्याङ्ओ य़ङ्वा च़, मो आसिखा कातोक ओ, देकिनालो ग़रि च़क्दा युङ्याङ। सात्कातात साम्भुङ्चि सेवा 4 एसियादाओ सात्कातात साम्भुङ्चिएदा युहन्नाओ अ़सेवा। खोक्कोसोओ अ़चुहाङ्मुखा बुदाओ सात्कातात लावादाङ्का खानानिन सोमातुक्मा खोन्कि सेवाङ्नि लिसानिन। खोक्को म़युङ्याङ, म़युङाङा, खोन्कि म़तायाङ। 5 ओ य़ङ्चिओ साकोङ्छ़ङ मुमा खान्तुओ सालुम्स़ङ खोन्कि म़सुवादाओचिदाङ्का बुदा म़खोन्तालोन्ताओ खोन्कि हेन्खामादाओ झारा हाङ्चिएदा हाङ्काचि कामु येसु ख्रिस्तलाम्पाछाङ खानानिन सोमातुक्मा खोन्कि सेवाङ्नि। खोक्कोसाआ आन्कान सोमाम़तुक, खोन्कि खोक्कोसोओ अ़चुस़मा हेन्खोक्वाआ आन्कान आन्हेवादाङ्का म़फोङ्सायुङ्सा। 6 खोक्कोसाआ आन्कान अ़चुहाङ्होन्ओ म़नाचि म़मुवायुङ्सा, खोन्कि निनाम्हाङ खोन्कि अ़चुपाओ काब़क्चि म़मुवायुङ्सा। येसु ख्रिस्तओ झारा अ़चुऩङ्लोङ्मा खोन्कि सावा अ़धुन-अ़धुन्तारि युङ्युङ्ने! ओवात्निङा लिने। 7 खानुम, खोक्को य़वारिदा म़तायाङ! खोन्कि झारा म़क्चिआ खोक्को अ़खाङ, साङ्चिआ खोक्को अ़धुवायुङ्सा, खोचिआछाङ अ़खाङ। हेन्खामादाओ झारा म़नाचि खोक्कोसोओ अ़चुतुक्वाआ म़खाप। उवा, मो लिलाप! मोवात्निङा लिने। 8 “अ़पुङ्चिपुक खोन्कि अ़लुक्मा अ़ङ्काङा ओ” नि झारा सावाकातोक हाङ्पा निनाम्हाङ म़य़ङ्याङ। खोक्को म़युङ्याङ, खोक्को म़युङाङा खोन्कि खोक्को म़तायाङ। ख्रिस्तओ सेन्चि 9 अ़ङ्का युहन्ना, आम्नुओ बुवा, येसुएदा साकोङ्छ़ङ मुवाङ्ओसा खानानिन्एनान अ़क्नि हुङ्याङ्सा अ़चाअ़त्मा आङ्तुङ्योङ। मो दुखा खोक्कोसोओ अ़चुहाङ्होन्दा कावाङ्चिएदा ता। निनाम्हाङ्ओ अ़चुय़ङ खालुसुङ खोन्कि येसु ख्रिस्तओ अ़चुसालुम्स़ङ प़ङ्ओसा अ़ङ्का पत्मोस्निओ खाम्दाक्दा ऩखाइसाङ। 10 हाङ्पाओ अ़चुलेन्दा अ़ङ्का अ़चुलावाओ अ़क़म्मादा याआङ्याङ, खोन्कि अ़ङ्देङ्या थुथुरिवाको अ़क्तात अ़धिवा य़ङ साङाओ एनुङ। 11 मो य़ङ्आ लो, “खाना दि त़खा, मो अ़क्तात छाप्लाखा भोङ्दा छाप्तु, खोन्किना ओ सात्कातात्माङ साम्भुङ्चि छोक्तुचि: एफिसस, स्मुर्ना, पर्गामम, थिआतिरा, सार्दिस, फिलादेल्फिया खोन्कि लाउदिकिया।” 12 खोन्किना अ़ङ्काएनान काचेप य़ङ्एह्यात्नि खाङ्सि अ़ङ्का हुसाङ्च़ङ्हिदा सात्कातात हाराक्वाओ कुपियुङ्खाचि खाङ्च़ङ। 13 खोन्कि कुपि युङ्खाचिओ अ़चुरादा म़नाओ अ़छावा काराङाओसाआ अ़लाङ्युतारि तालालो तित हुम्साङा खोन्कि अ़कोङ्कोम्दा हाराक्वाओ पेति मोसाआ छ़सुङु। 14 खोक्कोसोओ अ़चुताङ खोन्कि अ़चुताङ्मुवा भेराओ अ़मुवावाको ओम्पुवाचिचिओ मुवाङा, खोन्कि खोक्कोसोओ अ़चुम़क मिलाप्वा मुवाङा। 15 खोक्कोसोओ अ़चुलाङ्चि मिराक्दा पाआकि छोक्छोक्छोक्वा लेन्माय़ङ कासावाको मुवाङा, खोन्कि खोक्कोसोओ अ़चुय़ङ वाधाङ्चिओ अ़चुसाप्मावाको म़मुवाङा। 16 खोक्कोसोओ अ़चुचुप्ताङ्छुक्आ सात्कातात साङ्केन्माचि म़क़क्तुङुचि, खोन्कि खोक्कोसोओ अ़चुदोदाङ्का ह्वालिप्पा अ़हायाआङाओ बान्छोन लोन्तायुङ्सा। खोक्कोसोओ अ़चुङाइवा अ़खोलेन लेराङाओ नाम्वा मुवाङा। 17 खाउग़रि खोक्को अ़ङ्का खाङ, मोन्ग़रि अ़ङ्का सुवादाओ म़ना ओन्तेका लिसाङ्कि खोक्कोसोओ अ़चुलाङ्दा छुक्ताङ। मेन खोक्कोसाआ अ़चुचुप्ताङ्छुक ओवात्नि य़ङ्सा अ़ङ्काएदा अ़युङ्सा, “मान्क़दा! अ़पुङ्चिपुक खोन्कि अ़लुक्मा अ़ङ्काङा ओ। 18 अ़ङ्काङा अ़ह़ङ ओ। अ़ङ्का सुवाङ्दाङ्ओ, खानुम, अ़ङ्का अ़धुन-अ़धुन्तारिओ निम्पाङ ह़ङ्ङाङा। खोन्कि स़माओ खोन्कि सित्म़ङ दुखा तोक्खायुओ अ़होत्खाचि अ़ङ्काएदा म़युङ्याङ। 19 खोन्ओसा खाना दि त़खायुङ्सु, खोन्कि आइमित दे लियाङ, खोन्कि माय़ङ दे लि, मो छाप्तु। 20 खाना त़खाओ अ़ङ्चुप्ताङ्छुक्दाओ ओ सात्कातात साङ्केन्माचि खोन्कि हाराक्वाओ सात्कातात कुपि युङ्खाओ अ़कोङ्दुम्ओ अ़तुप्मा ओङा ओ: सात्कातात साङ्केन्माचि सात्कातात साम्भुङ्चिओ निनाम्हाङ काफाचि ओ, खोन्कि सात्कातात कुपियुङ्खाचि सात्कातात साम्भुङ्चि ओ।” |
© Wycliffe Bible Translators, Inc. All rights reserved.
Wycliffe Bible Translators, Inc.