फिलिप्पि 4 - बान्तावा राई1 खोन्ओसा अ़ङ्का सोमातुक्नानिन्ओ खोन्कि खाङ्मा स़ङाङाओ अ़ङ्ब़ब़, नाना खोन्कि निछाचि ओ, खानानिन अ़ङ्ऩङानुमा खोन्कि अ़ङ्तोक्पो लिखा ओ। अ़ङ्का सोमातुक्नाङ्नानिन्ओचि ओ, ओवात्निङा हाङ्पाएदा नुलोक युङानिन। यायोक्चि 2 अ़ङ्का इयोदिया खोन्कि सुन्तुखे हाङ्पादा अ़क्छा निएदा तोङाचिनि लोनाङ्नाचि। 3 अ़ङ्सोम्कुवाओ यावा, अ़ङ्का खानाछाङ लोनाङ्ना, ओ मेत्छामाचि फासुचि, देकिनालो मोचिआ अ़ङ्काएनान अ़क्नि नुय़ङ्खान खालुमा, क्लेमेसएनान खोन्कि नि यावाचिएनान अ़क्नि चात्लो काचि मुवायुङ्साचि। मोचिओ अ़चुऩङ ह़ङ्म़ङ्ओ छाप्लाखादा याक्याङ। 4 हाङ्पाएदा अ़धुन आम्नुओ ऩङानुसानिन्चिन। अ़ङ्का लाङाय़ङ्ङा आम्नुओ ऩङानुसानिन्चिन! 5 आम्नुओ अ़नुवाक च़माथाङ्मा झारा म़नाचिआ अ़सिन्ने। हाङ्पा च़क्निङा म़ता। 6 खाक्कोछाङ य़ङ्दा मिन्राक मान्मुदानिन, मेन झारा य़ङ्दा आम्नुओ यामात्मा खोन्कि दोत्माय़ङ्लाम्पा आलाङ्एनान खानानिन दोत्ओचि निनाम्हाङ दोत्तानुम। 7 साङ्आछाङ तुप्मा अ़ऱन्मिन्ओ निनाम्हाङ्ओ अ़चुसेवाङ्निआ आम्नुओ साकोङ्वाचि खोन्कि आम्नुओ मिन्माचि रात्तुचि देकिनालो खानानिन ख्रिस्त येसुएदा त़याइन्येन। 8 देङ्दा ब़ब़, नाना खोन्कि निछाचि ओ, दि अ़छ़ङ मुयाङ, दि सायामेत्मायु मुयाङ, दि साम्योक्मि मुयाङ, दि सेङ्याङ, दि सोमा तुक्मायु मुयाङ, दि चोन्मायु मुयाङ, मोवात्नि दि-दिचि अ़नुवाक खोन्कि चोन्मा खान्तुओ म़मुयाङ्नालो, मो य़ङ्चिओ अ़तुक्वादा मित्तानुम्च़म। 9 खानानिन्आ दि अ़ङ्काएदाङ्का त़चिन्तिन्चिन, खोन्कि त़लोउम खोन्कि त़एनुम खोन्कि त़खाम, मोवात्निङा चुवानिन। खोन्किना सेवाङ्नि काप़ निनाम्हाङ खानानिन्एनान म़युङ। अ़चुछुक्दाम्ओ निम्पाङ आलाङ 10 हान ब़द्धेकालेन्कि अ़ङ्काएदा आम्नुओ सोम्तुक्मा खाङ्त़मुसुम्युङ्सुम्ओदा निनाम्हाङ्एदा अ़ङ्को अ़न्नुनु अ़ङ्ऩङानुवायुङ्सा। अ़नुछ्या, खानानिन अ़ङ्का अ़धुन फामा त़स़न्येन्ओ, मेन खानानिन्आ मो फामा अ़वाखाम मान्तोक्त़दोम। 11 दोराङाओदा हाप्ताङ निकिना अ़ङ्का हिदुक मुङाङाओ माआङ, देकिनालो दियाको ग़रिदानुछाङ मोदा अ़ङ्सोम्सेत्मान्चिन अ़ङ्का चिन्ताङ्युङ्साङ्च़ङ। 12 अ़ङ्काएदा दित्छाङ मात्द़ङ्याङ्ओ ग़रि खोन्कि च़लोक युङाङाओ ग़रि देत्नि ह़ङ्मादोत, मो अ़ङ्का झारा सिन्तुङ्युङ्सुङ। खाङाहिदानेकि सास़ङाङाहिदाने, च़लोक युङ्याङ्हिदानेकि मात्द़ङ्हिदाने, झारा ग़रिदा सोम्सेत्मान्चिन्ओ अ़कोङ्दुम अ़ङ्का चिन्ताङ्युङ्साङ्च़ङ। 13 साङ्आ अ़ङ्का सावा ऩप़ङा, खोक्कोलाम्पाङा अ़ङ्का झारा य़ङ मुमा ऱङ। 14 खोन्नुछाङ, अ़ङ्चाअ़त्माचिदा खानानिन त़फानिकिना ब़द्धे नुलोक त़च़न। 15 अ़नुछ्या खानानिन फिलिप्पिचि आप्पिछाङ त़सिन्तुम्योम, बुयाओदु खानानिन्एदा अ़ङ्का नुय़ङ्खान तारुङ, खोन्किना अ़ङ्का माकेदोनियादाङ्का हासाङ्च़ङ्हिदा प़मा खोन्कि लोक्मा काचिदा खानानिन्एदाङ्का नि खाक्कोछाङ साम्भुङ्चि अ़ङ्काएदा मान्वाङ्चि। 16 देकिनालो अ़ङ्का थेसलोनिकेदा युङाङ्याङ्हिदाछाङ खानानिन्आ अ़क्दुदाङ्का च़लोक्ङा अ़ङ्को निम्पाङ फामायु त़बाइसुम्कि त़फानि। 17 अ़ङ्का छुक्तुप्मा लाम्ङाङाओ माआङ, मेन अ़ङ्का ना खानानिन्आ च़लोक आसिखा तोक्तानुम्नि मिन्ङाङा। 18 अ़ङ्का तोक्मादोत्ओदाङ्का च़लोक्ङा तोक्तुङ्युङ्सुङ। इपाफ्रोदितस्लाम्पा त़छोक्निओ आम्नुओ छुक्तुप्मा अ़ङ्का तोक्तुङ्युङ्सुङ। मो निनाम्हाङ्ओ अ़चुऩङानुओ नाम्नुओ अ़सुङ अ़क्तात लोक्माखान्तुओ हेन्खोक्वा ओ। 19 अ़ङ्निनाम्हाङ्आ खोक्कोसोओ अ़चुओ अ़न्नुनु च़लोक अ़चुचासुम्छेन्बिवा आम्नुओ झारा दोत्ओ ख्रिस्त येसुदा त़याइन्येन्ओसा ऩतासिन्लान्प़न। 20 हान आन्निनाम्हाङ खोन्कि आन्पापाओ अ़धुन-अ़धुन्तारि अ़चुऩङ्लोङ्ने! मोवात्निङा लिने। देङ्दाओ सेवा 21 ख्रिस्त येसुदा झारा निनाम्हाङ्ओ अ़चुम़नाचि सेवा मेत्तानुम्च़म। अ़ङ्काएनान्ओ ब़ब़, नाना खोन्कि निछाचिआ सेवा अ़बान्याङ। 22 झारा निनाम्हाङ्ओ अ़चुम़नाचिआ खोन्कि च़लोक्वा कैसर हाङ्ओ अ़हाङ्मुखादाओचिआ खानानिन सेवा अ़बान्याङ। 23 हाङ्पा येसु ख्रिस्तओ अ़चुसोम्तुक्मा आम्नुओ लावाएनान युङ्ने। |
© Wycliffe Bible Translators, Inc. All rights reserved.
Wycliffe Bible Translators, Inc.