फिलिप्पि 2 - बान्तावा राईख्रिस्तओ अ़चुसिम्मान्चिन 1 मोवात्नि ख्रिस्तएदा अ़क्भोम लिमादा अ़क्चित राक याक्याङ्नालो, खोक्कोसोओ अ़चुसोमातुक्मादाङ्काओ अ़क्चित सोम्सेत्मा याक्याङ्नालो, निनाम्हाङ लावाएनान्ओ अ़क्चित यावायोक युङ्याङ्नालो, अ़क्छा निएदा सोमातुक्मा खोन्कि सोम्मासेत्माय़ङ अ़क्चित युङ्याङ्नालो, 2 खानानिन अ़क्मिन्माओ लिसानिन्कि, अ़क्छा निएदा सोमातुक्कातुक मुयाङ्सा, झारा तोङानिन्कि अ़क्साकोङ्वाओ मुवानिन्चिन खोन्कि अ़ङ्ऩङानुमा तासालानुम। 3 देम्खाछाङ आप्पि खानानिन खाङ्मान्चिन माङ्लो तोक्पो लिमाओ निम्पाङ देत्छाङ माच़दानिन, मेन सिम्नान्चिन्सा निचि खानानिन आप्पिदाङ्का अ़धिवा मित्तानुम्च़म। 4 खानानिन झारासाआ आम्नुओ आप्पिओ ओन्ङा मित्मा मान्लाम्दानुम, मेन निचिओ अ़चुमित्माछाङ लामानुम। 5 झारा आम्नुओ रादा येसु ख्रिस्तदा याआङावाको मिन्मा याक्ने। 6 ख्रिस्त अ़नुछ्याङा निनाम्हाङ म़मुवाङानुछाङ, खोक्कोसाआ निनाम्हाङ्एनान अ़क्निवा लिमा अ़क्तात लाप्मायुङ्मादोत्ओ सामावात्नि मान्मित्अ़दा। 7 मेन खोक्कोसाआ झारा म़छिरुचि, खोन्कि हारुक म़मुवान्चिन्किना म़नावा म़लिसा। 8 अ़चुकात्मादा म़नावात्नि म़लिसाकि आप्पि म़सिम्सान्चिन, खोन्कि अ़चुस़मादामातारि निनाम्हाङ्ओ अ़चुलोमाय़ङ अ़मुवाकि क्रुस्दाछाङ म़सुवा। 9 खोन्ओसा निनाम्हाङ्आ खोक्को अ़न्नुनु अ़झोइसा, खोन्कि खोक्को मो अ़क्तात ऩङ अ़पुवा, मो झारा ऩङ्दाङ्का झोन्याङ, 10 मोवात्नि निनाम्मादु, हेन्खामादा माङ्लो हेन्खामा हुत्युओ झारासाआ, येसुओ अ़चुऩङ्दा अ़चुतुम्प़छ़क तोम्मादोत, 11 खोन्कि झारा लेम्आ निनाम्हाङ पापाओ अ़चुऩङ्लोङ्माओ निम्पाङ, येसु ख्रिस्त हाङ्पाओ निकिना लोक्मादोत। हेन्खामादा कालेत साम 12 खोन्ओसा सोमातुक्नाङ्नानिन्ओ यावाचि ओ, देत्नि खानानिन्आ अ़धुन निनाम्हाङ्ओ अ़चुलोमाय़ङ त़काङ्सिन, अ़ङ्का खानानिन्एदा युङाङ्याङ्हिदा ओन्ङा मुन्वा माआङ, मेन च़लोक अ़ङ्का मात्द़ङ्हिदाछाङ क़माआ धुन्याङ्सा आम्नुओ लेन्माय़ङ्आ खानानिन झारासाआ चात्लो काचि मुवायुङ्सानिन। 13 देकिनालो खानानिन्एदा निनाम्हाङ आप्पि काचि म़मुयाङ। खोक्कोसाआ खानानिन अ़चुओ अ़नुवाक मित्चिऩङ तामालामा मिन्मा खोन्कि सावा ऩप़न। 14 छुऩङ्वा माङ्लो दुम मान्तुमाङ झारा य़ङ मुयाङ्सा खारानिन। 15 खोन्किना खानानिन मान्फिकादा खोन्कि सोत्सोत्वाओ लिसानिन्किना ऱक्याङ्ओ खोन्कि वाऱनान्चिन्ओ म़नाचिओ दुङ्ओ अ़रादा निनाम्हाङ्ओ थुपि मात्द़ङ्ओ अ़चुछा लिसानिन। ओ दुङ्ओ अ़रादा हेन्खामादा खानानिन साङ्केन्माचिवा लेरानिन। 16 ह़ङ्म़ङ्ओ नुय़ङ्खान नुलोक लावायुङ्सानुम। मोवात्नि अ़ङ्का सोज्जेङा मान्लोत्ङा माङ्लो अ़ङ्का सोज्जेङा काचि मान्मुङा निकिना ख्रिस्तओ अ़चुलामातामा लेन्दा अ़ङ्का तोक्पो लिमा ऱङाने। 17 मेन मोवात्नि आम्नुओ साकोङ्छ़ङ्ओ हेन्खोक्वादा अ़ङ्कोछाङ ह़ हेन्खोक्वावात्नि सोन्नुछाङ, अ़ङ्का अ़ङ्ऩङानु, खोन्कि खानानिन झाराएनान अ़ङ्सोम्स़। 18 मोवात्निङा खानानिन्छाङ अ़ङ्काएनान आम्नुओ ऩङानुमादोत खोन्कि सोम्सेत्मान्चिन्दोत। तिमोथि खोन्कि इपाफ्रोदितस 19 हाङ्पा येसुओ अ़चुमिन्मा याक्याङ्नालो खानानिन्एदा च़क्नि तिमोथि बान्मानि मिन्ङाङा, मोवात्नि आम्नुओ य़ङ्खान्आ अ़ङ्काछाङ अ़ङ्ऩङानुमान्चिन ऱङाने। 20 खोवाको अ़छ़ङ मिन्माआ आम्नुओ नुलोक कामित अ़ङ्काएदा नि साङ्छाङ मात्द़ङ। 21 येसु ख्रिस्तओ अ़चुतुक्वादा मान्मिन्माङ, नि म़नाचि झारा आप्पि मित्मान्चिन म़लाम। 22 मेन तिमोथि दियाको म़ना ओ, खानानिन्आ त़सिन्तुम्योम, देत्नि अ़छाआ अ़पा ब़रु, मोवात्निङा खोसाआ अ़ङ्का नुय़ङ्खान खालुमा अ़फासाङ। 23 खोन्ओसा अ़ङ्को निम्पाङ दि देत्नि लि, मो तुप्तुङ्योङ्वा अ़ङ्का खो खानानिन्एदा बान्मानि मिन्ङाङा। 24 खोन्किना अ़ङ्काछाङ च़क्नि बान्मा ऱन्ङाने निम्पाङ हाङ्पाएदा सोम्कुवा मुङाङा। 25 इपाफ्रोदितस, खो अ़ङ्निछा, अ़ङ्काएनान अ़क्नि नुय़ङ्खान खालुमा काचि कामु खोन्कि नुय़ङ्खान कारात अ़क्निओ रात्खामि खोन्कि खानानिन्आ त़बाइसुम्ओ य़ङ्काखुन खोन्कि अ़ङ्का हाप्ङाहिदा काफा ओ, खो खानानिन्एदा लामाबान्मानि मिन्ङाङा। 26 खोसाआ खानानिन झारा अ़न्नुनु तुप्मा स़याङ। खो तुआओ य़ङ्खान खानानिन्आ त़एनुम्ओसा खो चाअ़त्लो लिसायुङ्सा। 27 खो अ़नुछ्याङा सुवालो तुआकि आप्फात सुवादा, मेन निनाम्हाङ्आ खो सोमाअ़तुक्ता। खो ओन्ङा माआङ, मेन सोखादुङ्दा सोखा अ़तेप्निन्ने निम्पाङ अ़ङ्काछाङ सोमाऩतुक्ताङ। 28 खोन्ओसा अ़ङ्का खो बान्मा च़लोक अ़ङ्ऩङानुयाङ, मोवात्नि खो त़लासुम खाम खोन्किना खानानिन आम्नुओ ऩङानु, खोन्कि अ़ङ्योक्माछाङ अ़क्चित सेम। 29 खोन्ओसा अ़न्नुनु ऩङानुयाङ्सा हाङ्पाएदा खो लोआनुम, खोन्कि ओवाको म़नाचि साया मेत्तानुम्च़म। 30 देकिनालो ख्रिस्तओ अ़चुकाचिओ निम्पाङ खो आप्फात सुवादाओ। खोन्कि अ़ङ्काएदाओ आम्नुओ ब़त्मा तामालामा निम्पाङ खोसाआ अ़ह़ङ्म़ङ चाअ़त्लोदा पाउ। |
© Wycliffe Bible Translators, Inc. All rights reserved.
Wycliffe Bible Translators, Inc.