फिलिप्पि 1 - बान्तावा राई1 ओ छाप्लावा ख्रिस्त येसुओ अ़चुहारुक्चि पावल खोन्कि तिमोथिदाङ्का ओ। ख्रिस्त येसुदा अ़क्भोम त़लिसिन्ओ फिलिप्पिदा कायुङ धिताङ्पाचि खोन्कि साम्भुङ काफापाचि झारा निनाम्हाङ्ओ अ़चुम़नाचि अ़ङ्का छाप्तुङ्योङ्ओ। 2 आन्पापा निनाम्हाङ पापा खोन्कि हाङ्पा येसु ख्रिस्तआ खानानिन सोमाऩतुक्तिन्ने खोन्कि सेवाङ्नि लिसानिन। पावल्ओ अ़आलाङ प़माय़ङ खोन्कि अ़यामात्मा 3 अ़ङ्का खानानिन झारा मित्नानिन्ओ ग़रि अ़ङ्का अ़ङ्निनाम्हाङ आलाङ प़ङ। 4 खानानिन झारासोओ निम्पाङ अ़धुन झारा अ़ङ्यामात्मादा अ़ङ्का ऩङानुमाआ यामात्ङा, 5 देकिनालो बुयाओ लेन्दाङ्का आइमित्तारि नुय़ङ्खान काचिदा खानानिन्आ अ़ङ्का त़फानियुङ्नि। 6 खोन्कि अ़ङ्का सोम्कुवा मुङा, निनाम्हाङ्आ खानानिन्एदा अ़क्तात अ़नुवाक काचि अ़पुङ्साओ, खोक्कोसाआ येसु ख्रिस्त म़लाताओ लेन्तारि मो अ़ताला। 7 अ़ङ्का खानानिन झारा अ़ङ्साकोङ्वादा युङ्नानिन। खानानिन झारासोओ निम्पाङ अ़ङ्का ओवात्नि मित्मा तोङ्नि मिनाङ, देकिनालो अ़ङ्छेक्मादा खोन्कि अ़छ़ङ नुय़ङ्खान्ओ अ़रात्मादा खोन्कि नुय़ङ्खान अ़छ़ङ मुयाङ्नि खाङ्मुमा ह्वातात्माङ्दा खानानिन अ़ङ्काएनान्ओ सोमातुक्मादा फासि त़वाङिन्युङ्सिन। 8 येसु ख्रिस्तआ खानानिन देत्नि सोमाऩतुक्तिन, मोवात्निङा अ़ङ्काछाङ खानानिन झारा सोमातुक्नाङ्नानिन निकिना निनाम्हाङ अ़ङ्सालुम्स़ङ म़युङ्याङ। 9 अ़ङ्यामात्मा ओङा ओ: अ़नुछ्याओ ताया खोन्कि तुप्मा सावादा आम्नुओ सोमातुक्मा च़लोक पोन्याङ्सा खात्ने। 10 खोन्ओसा खानानिन्आ अ़नुवाक य़ङ छेन्मा त़ऱम्ने। खोन्किना ख्रिस्त म़लाताओ लेन्दा अ़च़क़ल़क खोन्कि लाहि मात्द़ङ्ओ त़लिसिन्ने। 11 निनाम्हाङ्ओ अ़चुसाऩङ्वा खोन्कि अ़चुऩङ्चोन्माओ निम्पाङ येसु ख्रिस्तलाम्पा ताओ अ़नुवाक काचि सिवाआ खानानिन भेप्याङ्सा त़खारिन्ने। पावल्ओ अ़छुम्मादाङ्का नुय़ङ्खान फेमा 12 ब़ब़, नाना खोन्कि निछाचि ओ, खानानिन ओ सिन्तानुम्नि अ़ङ्का मिन्ङा, अ़ङ्काएदा म़ताओ य़ङ्चिआ अ़नुछ्याङा नुय़ङ्खान फेमा म़फासायुङ्सा। 13 अ़ङ्का ख्रिस्त खालुसुङ्ओसा अ़ङ्का छेक्खादा छुक्ताङ्ओनिओ हाङ्युङ्खादाओ झारा रात्खामिचि खोन्कि नि म़नाचिआ अ़सिन्तायुङ्सा। 14 ब़द्धेकापाङ ब़ब़, नाना खोन्कि निछाचि, अ़ङ्छेक्माआ हाङ्पाआ राक्एनान्ओ खोन्कि निनाम्हाङ्ओ अ़चुय़ङ अ़चुक़मा मान्कात्माङ चेप्मा च़लोक अ़चुराक्स़रिओ म़मुयुङ्सुचि। 15 ओ अ़छ़ङ ओ, खा-खाक्कोचिआ ऩङ्च़ खोन्कि होराआ ख्रिस्तओ अ़तुक्वादा खाअ़लुयाङ, मेन निचिआ अ़नुवाक मिन्माआ खाअ़लु। 16 नुय़ङ्खान रात्माओ निम्पाङ अ़ङ्का ओदा युङ्ङाङाओ मोचिआ अ़सिन्तायुङ्सा। खोन्ओसा खा-खाक्कोचिआ अ़नुवाक मिन्माआ खाअ़लुसायुङ्सा, मोचिआ अ़चुसोमातुक्माआ अ़मुयाङ। 17 मेन होरा कामुचिआ सेङ्याङ्ओ मिन्माआ माआङ, अ़ङ्का छेक्ङाङाओदा अ़चाअ़त्मा तेप्मा प़मानि म़मिन्कि अ़अ़त्पा मिन्माआ ख्रिस्त खाअ़लु। 18 अ़ताकावाने! मुलो य़ङ ओङा ओ, अ़अ़त्पा मिन्माआङाने माङ्लो अ़नुवाक मिन्माआङाने झाराकापाराआ ख्रिस्त खालुने। 19 उवा, अ़ङ्का अ़ङ्ऩङानुयुङ! देकिनालो अ़ङ्का सिन्तुङ्योङ, आम्नुओ यामात्मा खोन्कि येसु ख्रिस्तओ अ़चुलावाओ अ़चुफामाआ अ़ङ्का फोङ्मा तोक्तुङ। 20 अ़ङ्को अ़न्नुनु अ़ङ्हुङ्मा खोन्कि सोम्कुवा ओङा ओ, अ़ङ्का देम्खाछाङ लेजो अ़लिऩङ, मेन अ़ङ्को च़लोक अ़ङ्राक पोन, खोन्कि अ़धुन्वा आइमित्छाङ अ़ङ्पोक्आ ख्रिस्त साया मेत्तु, ह़ङ्ङानेकि स़ङादाङाने। 21 देकिनालो अ़ङ्का ख्रिस्तओ निम्पाङ ह़ङ्ङाङा, खोन्कि स़मा अ़नुवाक ओ। 22 मेन पोक्दाङा ह़ङ्माओनालो अ़ङ्का ख्रिस्तओ निम्पाङ ब़द्धे अ़सिवा सिओ काचि मुमा ऱङा। खोन्ओसा अ़ङ्का खाक्को छेन्मादोत ओ, मो अ़ङ्का य़ङ्मा अ़ऱऩङ। 23 अ़ङ्का ना हाक्हाक्किरा लिसाङ्युङ्साङ। हामान्चिन्कि ख्रिस्तएनान युङ्मा स़ङाङा, देकिनालो ओ ब़द्धे अ़नुवाक मुयाङ। 24 मेन आम्नुओ निम्पाङ पोक्दा युङ्मा च़लोक अ़च़वाङ मुयाङ। 25 अ़ङ्का ओ य़ङ अ़नुछ्या सिन्तुङ्योङ। साकोङ्छ़ङ्दा आम्नुओ पोन्मा खोन्कि सेवाङ्निओ निम्पाङ अ़ङ्का ह़ङ्ङायुङ्ङा, खोन्कि खानानिन झाराएनान युङ्ङा। 26 खोन्ओसा अ़ङ्का खानानिन्एदा लाङाताङाहिदा अ़ङ्तुक्वाआ खानानिन्आ ख्रिस्त येसु चोन्माओ च़लोक अ़तुक्वा लि। 27 अ़च़वाङ य़ङ ओङा ओ, आम्नुओ ह़ङ्म़ङ्ओ च़माथाङ्माआ ख्रिस्तओ अ़चुनुय़ङ्खान खान्तुओ मुने। अ़ङ्का बान्ङाकि तुप्नानिन्नुछाङ माङ्लो अ़ङ्का अ़युङ्ऩङ्ऩङ्ङाने, अ़ङ्का ओ य़ङ आम्नुओ तुक्वादा एन्मा स़ङा, खानानिन अ़क्तात लावादा अ़क्नि त़लिसिन्कि त़एविन्ओ खोन्कि अ़क्मिन्माओ त़लिसिन्कि नुय़ङ्खान्ओ साकोङ्छ़ङ्ओ निम्पाङ अ़क्नि त़मुन्येन्ओ अ़ङ्का एन्मा तोक्तुङ्ने। 28 खोन्कि आम्नुओ फित्चि कामुचिदाङ्का दियाको य़ङ्दाछाङ मान्क़दानिन। ओ निनाम्हाङ्आ मोचि म़लुक्ने निम्पाङ खाङ्अ़मुयाङ ओ, मेन खानानिन त़लेरिन। 29 देकिनालो ख्रिस्तओ निम्पाङ खानानिन ब़क्मा अ़वाखाम ऩप़न्युङ्सिन, खोक्को साकोङ्छ़ङ मुमा ओन्ङा माआङ, मेन खोक्कोसोओ निम्पाङ दुखा आङ्माछाङ ओ। 30 खोन्कि मो मुमा खानानिन्आ अ़ङ्काएदा त़खाम, खोन्कि अ़ङ्काएदा युङ्याङ निकिना आइमित त़एनुम्योम, मो य़ङ्दाङा खानानिन त़वाङिन्युङ्सिन। |
© Wycliffe Bible Translators, Inc. All rights reserved.
Wycliffe Bible Translators, Inc.