मर्कुस 4 - बान्‍तावा राई

बिउ कावेत्‌ओ दोय़ङ्‌ला

¹ खोन्‍किना आदेङ्‌छाङ येसुआ धियाङ्‌वामाओ अ़केम्‌दा लामाचिन्‍मा म़पुङ्‌सुचि। खोन्‍कि खोक्‍कोसोओ अ़चुऱङ्‌कोप्‍नि ब़द्‍धे म़ना मुक्‍लाचि म़कोवान्‍चिन, खोन्‌ओसा खोक्‍को मो धियाङ्‌वामादाओ अ़क्‌तात नावादा म़वाङाकि मोदा म़युङा, खोन्‍कि झारा म़नाचि धियाङ्‌वामाओ अ़केम्‌दा म़युङा।

² खोन्‍कि खोक्‍कोसाआ मोचि दोय़ङ्‌लाचिदा ब़द्‍धे य़ङ्‌चि म़चिन्‍तुचि, खोन्‍कि खोक्‍कोसाआ म़चिन्‍तुङुचिहिदा मोचि म़लोङुचि:

³ “एनानुम! अ़क्‍छा बिउ कावेत म़ना बिउ वेत्‍सि खारा।

⁴ खोन्‍कि बिउ वेत्‍तुङुहिदा अ़क्‍चित बिउचि लाम्‌दात्‍नि म़छुक्‍ता, खोन्‍कि छोङ्‌वाचि म़ताकि मो बिउ अ़चाखात्‍ता।

⁵ अ़क्‍चित बिउचि लुङ्‌खावाचिदात्‍नि म़छुक्‍ता, मोदा ब़द्‍धे बाखा मात्‍द़ङ्‌याङ, मोदा ब़द्‍धे छान्‍लो बाखा मात्‍द़ङ्‌याङ्‌ओसाआ मोचि च़क्‍नि खेक्‍तुचि।

⁶ खोन्‍कि नाम बानाहिदा मो अ़लिम्‌चि म़राङ्‌ताखारा खोन्‍कि मोचिओ अ़चुभेन ह्‍युहुत्‌युतारि खात्‍मा मान्‍ऱओसा म़युलाखारा।

⁷ अ़क्‍चित बिउचि त़ङ्‌खोक्‌वालादा म़छुक्‍ता, खोन्‍किना त़ङ्‌खोक्‌वा ताङ्‌चि म़पोयालोन्‍ताकि मो बिउचि म़उप्‍तुदिसुचि, खोन्‌ओसा मोचिआ अ़चुसिवा सिमा मान्‍ऱअ़दा।

⁸ मेन अ़क्‍चित बिउचि अ़नुवाक बाखादा म़छुक्‍ता, खोन्‍कि म़लिमाकि म़पोया, खोन्‍कि खा-खाक्‍कोसाआ तिसकास़रो, साथिकास़रो, सयेकास़रो, च़लोक अ़चुसिवा अ़सिसा।”

⁹ खोन्‍किना येसुआ म़लोचि, “साङ्‌को अ़एन्‍खा नाबाक याक्‌याङ, मोसाआ एनुने!”

¹⁰ खोक्‍को अ़चुदाप्‍म़ङ म़युङाङाहिदा बारकापाङ अ़चुकाखेङ्‌पाचि खोन्‍कि नि अ़चुऱङ्‌कोप्‍नि कायुङ्‌चिआ दोय़ङ्‌लाओ अ़तुक्‌वादा खोक्‍को अ़सेना।

¹¹ खोन्‍कि येसुआ मोचि म़लासुलोचि, “खानानिन निनाम्‍हाङ्‌ओ अ़चुहाङ्‌होन्‌ओ अ़कोङ्‌दुम्‌ओ अ़तुक्‌वादा तुप्‍खाताया ऩप़न्‌युङ्‌सिन, मेन निचि झारा दोय़ङ्‌लाचिदा अ़ङ्‌का खाएत्‍तुङ्‌च़ङ।

¹² खोन्‌ओसा मोचिआ चोप्‍मा ना अ़चोप मेन ऩखान, एन्‍मा ना अ़एन, मेन ऩतुप्‍तुन, माङ्‌नालोना मोचि अ़चुहेवाचिदाङ्‌का निनाम्‍हाङ्‌एह्‍यात्‍नि म़लासाओ, खोन्‍कि मोचिओ अ़चुहेवा म़लेत्‍तुप़चिओ।”

¹³ खोन्‍कि खोक्‍कोसाआ मोचि म़लोचि, “खानानिन ओ दोय़ङ्‌ला मान्‍तुप्‍त़दोम? खोन्‍नालो खानानिन झारा दोय़ङ्‌लाचि देत्‍नि त़तुप्‍तुम्‍च़म कि?

¹⁴ बिउ कावेत्‌आ निनाम्‍हाङ्‌ओ अ़चुय़ङ वेत्‍तु।

¹⁵ देम्‌कापाङ म़नाचि लाम्‌दा वेत्‍ताओ बिउवात्‍नि म़लि, खोन्‍कि निनाम्‍हाङ्‌ओ अ़चुय़ङ अ़एन्‌याङ्‌वा सैताना च़क्‍नि ताकि मोचिआ अ़एनाओ य़ङ ङाप्‍तुखात्‍तुचि।

¹⁶ खोन्‍कि लुङ्‌खावादा म़छुक्‍ताओ बिउचि ओङा ओ: निनाम्‍हाङ्‌ओ अ़चुय़ङ एनुकि अ़ऩङानुयाङ्‌सा मो च़क्‍नि लोउ।

¹⁷ मेन मोसोओ अ़भेन अ़मेत्‍तुन्‌ओसा मो अ़क्‍चित लेन ओन्‍ङा ह़ङ, खोन्‍कि निनाम्‍हाङ्‌ओ अ़चुय़ङ्‌दा साकोङ्‌छ़ङ मुवाओसा अ़चाअ़त्‍मा माङ्‌लो ल़क्‍मा ताहिदा निनाम्‍हाङ्‌ओ अ़चुय़ङ साकोङ्‌छ़ङ मुमादा मो च़क्‍नि देङ्‌ला।

¹⁸ खोन्‍कि त़ङ्‌खोक्‌वालादा म़छुक्‍ताओ बिउचि ओचिङा ओ: मोसाआ निनाम्‍हाङ्‌ओ अ़चुय़ङ एनु,

¹⁹ मेन ओ हेन्‍खामादाओ मिन्‍राक्‌चि, चासुम्‍छेन्‍बि सोम्‍तुक्‍मा खोन्‍कि नि सामाचिओ च़क्‍ख़य़ मुमाआ मो निनाम्‍हाङ य़ङ उप्‍तुदिसु, खोन्‍कि मोसाआ अ़सिवा अ़सिसुन।

²⁰ मोवात्‍निङा अ़नुवाक बाखादा म़छुक्‍ताओ बिउचि मोङा ओ: साङ्‌आ निनाम्‍हाङ्‌ओ अ़चुय़ङ एनुकि लोउ, खोन्‍कि तिसकास़रो, साथिकास़रो खोन्‍कि सयेकास़रो वेत्‍ताओ बिउदाङ्‌का सिवा सिसु।”

अ़युङ्‌खादाओ कुपि

²¹ खोन्‍किना येसुआ मोचि म़सेनुचि, “साङ्‌आ खाउप्‍खा ओङ्‌सुकि खेङ्‌हुत्‌दा माङ्‌लो इम्‍खा भेन्‌यु युङ्‌सु? दि मो खाउप्‍खा युङ्‌खाचोक्‌दु युङ्‌मा अ़दोत्‍निन?

²² देकिनालो दि म़कुम्‍सायुङ्‌सा मो आदेङ्‌माङ दात, खोन्‍कि दि मान्‍सिन्‌युक मो खाङ्‌अ़मु।

²³ साङ्‌को अ़एन्‍खा अ़नाबाक याक्‌याङ, मोसाआ एनुने!”

²⁴ खोन्‍कि येसुआ मोचि म़लोचि, “खानानिन त़एनुम्‌ओ य़ङ्‌ओ अ़तुक्‌वादा मिन्‍मा पाक्‍तानुम! खाउ हाक्‍खाआ नि म़नाचि खानानिन त़हाक्‍तुम्‍च़म, मो हाक्‍खाआङा खानानिन्‌छाङ निनाम्‍हाङ्‌आ ऩहाक्‍तिन, खोन्‍कि मोदाङ्‌काछाङ च़लोक त़तोक्‍तुम।

²⁵ देकिनालो साङ्‌एदा युङ्‌याङ, मो च़लोक प़, खोन्‍कि मोएदा ब़द्‍धे लि। मेन साङ्‌एदा मात्‍द़ङ, मोएदा युङ्‌याङ्‌ओछाङ मोएदाङ्‌का अ़ङाप।”

बिउ वेत्‍माओ अ़तुक्‌वादा दोय़ङ्‌ला

²⁶ खोन्‍कि येसुआ म़लोचि, “निनाम्‍हाङ्‌ओ अ़चुहाङ्‌होन ओवाको ओ, अ़क्‍छा म़नाआ अ़व़क्‌दा बिउ वेत्‍तु।

²⁷ खोन्‍कि खो अ़खाखुत इम्‍सि खात, खोन्‍कि अ़खोलेन पुक्‍लोन खोन्‍नुछाङ बिउ लिम्‌कि पोन्‌युङ, मेन मो देत्‍नि पोन खोसाआ अ़सिन्‍तुन।

²⁸ बाखाआङा चा सिसु, बुया अ़कुकुरि लोन, खोन्‍कि अ़खाक, खोन्‍किना आदेङ अ़खाक्‌दा अ़सिवा पाक्‍तु।

²⁹ मेन अ़सिवा तुम्‌याङ्‌वा मोसाआ क़च्‍चेआ हेक्‍तु, देकिनालो अ़सिवा कोप्‍मा ग़रि लिसायुङ्‌सा।”

प़सैओ अ़ल़वा

³⁰ खोन्‍किना येसुआ म़लोचि, “निनाम्‍हाङ्‌ओ अ़चुहाङ्‌होन दिएनान तोङ्‌सुम्‍खाम? माङ्‌लो ओ खालुमा खाक्‍को दोय़ङ्‌ला आन्‍कान याङुम?

³¹ ओ ना प़सैओ अ़ल़वावाको ओ, ओ बाखादा वेत। ओ हेन्‍खामादाओ झारा बिउचिदा अ़चुप्‍पो मु,

³² खोन्‍नुछाङ मो वेत्‌कि पोन्‌हिदा झारा लिम्‍खान्‌चिदाङ्‌का अ़धिवाङ अ़ताङ लि। खोन्‍कि ओसाआ अ़धिवो-अ़धिवो अ़खेक्‌चि पाक्‍तुचि, खोन्‌ओसा नाम्‍छ़ऱदुओ छोङ्‌वाचि म़ताकि मोसोओ अ़इप्‍नाम्‍माचिदा याङ म़पाक।”

³³ खोचिआ तुप्‍मा अ़रुवालो मोवाकोङा येसुआ ब़द्‍धे दोय़ङ्‌लाचिदाङ्‌का निनाम्‍हाङ्‌ओ अ़चुय़ङ मोचि खाम़एत्‍तुचि।

³⁴ खोक्‍कोसाआ दोय़ङ्‌लाचि मान्‌याङ्‌माङ दित्‍छाङ मोचि मान्‍लोम़दोचि। मेन सुकुलादा खोक्‍कोसाआ अ़चुकाखेङ्‌पाचि झारा य़ङ्‌चि खाम़एत्‍तुङुचि।

येसुआ कुह़क्‍मा अ़सेम्‍ताओ

³⁵ मो लेन अ़नाम्‍प़क्‍साऱङ लिसाहिदा येसुआ अ़चुकाखेङ्‌पाचि “आन्‍कान धियाङ्‌वामाओ अ़ह्‍याउधेत खारिन्‍ने”नि म़लोचि।

³⁶ खोन्‍किना म़ना मुक्‍लाचि म़छिरुदोचि, खोन्‍कि येसु म़युङाङाओ नावादा अ़चुकाखेङ्‌पाचि म़वाङाकि खोक्‍को अ़क्‍नि अ़खात्‍ता। नि नावाचिआछाङ खोक्‍को अ़त़ङ्‌ता।

³⁷ खोन्‍कि क़माकात्‍तुओ कुह़क्‍मा बाना खोन्‍कि अ़लोङ्‌वात्‌चि नावादा धुङ्‌मा अ़पुङ्‌सा, खोन्‌ओसा चाक्‌वाआ नावा भेप्‍मा पुङ्‌सु।

³⁸ मेन येसु नावाओ अ़देङ्‌या ताङ्‌कोङ म़पाक्‍तान्‍चिन्‌कि म़इम्‍साङा। खोन्‍कि अ़चुकाखेङ्‌पाचि ओवात्‍नि य़ङ्‌सा खोक्‍को अ़थिन्‍ता, “काचिन्‍पो, आन्‍कान वालुम्‍माखात्‍मा मुन्‌येन्‌ओ खानानिन त़खान्‍मिन्‌येन?”

³⁹ येसु म़थिन्‍तालोन्‍ताकि ह़क अ़रेन्‍ता, खोन्‍कि धियाङ्‌वामा अ़लोवा, “सेम्‍ता! छेक्‍तालावा!” खोन्‍किना ह़क छेक्‍ता खोन्‍कि मोदा झारा सेम्‍ताखारा।

⁴⁰ खोक्‍कोसाआ अ़चुकाखेङ्‌पाचि म़लोचि, “देकि खानानिन ओन चाअ़त्‍लो त़क़सिन्‌येन? दि हान्‍छाङ आम्‍नुओ साकोङ्‌छ़ङ मात्‍द़ङ?”

⁴¹ खोन्‍कि मोचि अ़न्‍नुनु म़क़साकिना अ़क्‍छा निएदा सेन्‍कासेन म़मुवा, “ओक्‍को साङ ओ? मोवात्‍नि ह़क खोन्‍कि धियाङ्‌वामाआछाङ खोक्‍कोसोओ अ़चुलोमाय़ङ म़काङ्‌याङ!”