मर्कुस 3 - बान्‍तावा राई

अ़छुक छोवाखाराओ म़ना नुवाओ

¹ येसु आदेङ्‌माङ्‌छाङ यावायोक्‍खिम्‌दा म़लासावाङा। मोदा अ़क्‍छा अ़छुक छोवाखाराओ म़ना युङाङा।

² खोन्‍कि खोक्‍कोसाआ मो म़ना सावातोम्‍खा-लेन्‌दा नुसुनालो लाहि पाक्‍मा निकिना मोचिएदाओ खा-खाक्‍कोचिआ खोक्‍को अ़सुक्‍ताङा।

³ खोन्‍कि येसुआ अ़छुक छोवाखाराओ म़ना अ़लोवा, “झारासोओ अ़चुबुदा पुवालोन्‍ताकि बाना।”

⁴ खोन्‍किना येसुआ मोचि म़सेनुचि, “सावातोम्‍खा-लेन्‌दा य़ङ्‌हुप्‌वा नुलोक च़मा नु हे, अ़त्‍लो च़मा माङ्‌लो ह़ङ्‌म़ङ लेन्‍मा नु हे, ह़ङ्‌म़ङ सेत्‍मा नु?” मेन मोचि वाइवेत म़लिसा।

⁵ खोक्‍कोसोओ अ़चुच़ऱपाआ मोचिओ अ़चुऱङ्‌कोप्‍नि म़चोउचि, देकिनालो खोक्‍को मोचिओ अ़चुऱक्‍भाक साकोङ्‌वाआ अ़न्‍नुनु अ़चुमिन्‍मा तुआ। खोन्‍किना खोक्‍कोसाआ मो म़ना अ़लोवा, “आम्‍छुक फेसु।” खोसाआ अ़छुक फेसु, खोन्‍कि बुयावाङा लासालिसा!

⁶ खोन्‍कि फरिसिचि बुङ्‌खाया म़लोन्‍ता खोन्‍कि येसु देत्‍नि सेत्‍मा निम्‍पाङ हेरोद कात़ङ्‌चिएनान खोक्‍कोसोओ अ़चुदेङ्‌सालाप्‍पादा च़क्‍नि थालि म़बाङ्‌ता।

⁷ येसु अ़चुकाखेङ्‌पाचिएनान धियाङ्‌वामाह्‍यात्‍नि म़खारा, खोन्‍कि गालिल्‌किना यहुदियायाङ्‌का अ़धिवाङ म़ना मुक्‍लाचिआ खोक्‍को अ़त़ङ्‌ता।

⁸ खोन्‍कि खोक्‍कोसाआ झारा म़दोम्‍दाओ काचिचि अ़मुवाङाओ मोचिआ अ़एनाकि यहुदिया, यरुसलेम, इदुमिया, यर्दन याङ्‌वामाओ बुसुहोन्‌दाङ्‌का खोन्‍कि तुरोस खोन्‍कि सिदोन्‌ओ ओह्‍यात्‍नि मोह्‍यात्‍निदाङ्‌का अ़धिवाङ म़ना मुक्‍लाचि खोक्‍कोएदा म़ता।

⁹ खोन्‍कि म़ना मुक्‍लाचिआ ऩछ़रुन्‍ने निकिना खोक्‍कोसोओ निम्‍पाङ अ़चुकाखेङ्‌पाचि अ़क्‌तात नावा चुम्‍म़मेत्‍तुचि।

¹⁰ देकिनालो खोक्‍कोसाआ ब़द्‍धे म़नाचि म़नुसुयुङ्‌सुचि, खोन्‌ओसा सारिमाआ लाउचिओचिआ खोक्‍को बुया नोप्‍मा छ़न्‍काछुछुरुप म़चुवाङा।

¹¹ पोप्‍ताओ लावाचिआ म़लाउचिओ म़नाचिआ येसु अ़खाओ ग़रि खोक्‍कोसोओ अ़चुबुदा मोचि बोम्‍नान्‍चिन्‍सा म़पाराङा, “खानानिन निनाम्‍हाङ्‌ओ अ़चुछा ओ।”

¹² मेन येसुआ खोक्‍को साङ्‌ओ निकिना साङ्‌छाङ खामान्‌एत्‌दानुम्‍च़म्‌नि मो पोप्‍ताओ लावाचि चात्‍लो चाप्‍म़चेत्‍तुचि।

येसुआ बारकापाङ अ़चुकाखेङ्‌पाचि म़छेन्‍तुचिओ

¹³ खोन्‍किना येसु अ़क्‌तात भ़ऱदु म़लोन्‍ता, खोन्‍कि खोक्‍कोसाआ खा-खाक्‍को छेन्‍मा म़सुवा खो-खोचि म़बुत्‍तुचि, खोन्‍कि खोचि खोक्‍कोएदा म़ता।

¹⁴ खोन्‍कि खोक्‍कोएनान अ़क्‍नि युङ्‌मा खोन्‍कि नुय़ङ्‌खान खालुसि खान्‍माचि निकिना खोक्‍कोसाआ बारकापाङ म़छेन्‍तुचि खोन्‍कि खोक्‍कोसाआ मोचि छाम्‍माय़ङ्‌नि ऩङ्‌छाङ म़पाक्‍तुचि,

¹⁵ खोन्‍कि खोक्‍कोसाआ खोचि चाकावालावाचि लोन्‍माखान्‍मा पाङ्‌छाङ म़प़चि।

¹⁶ मो बारकापाङ म़छेन्‍तुचिओ छाम्‍माय़ङ्‌चि ओचिङा ओ, सिमोन खोसोओ अ़ऩङ पत्रुस्‌निछाङ अ़पाक्‍ता,

¹⁷ जब्‍दियाओ अ़छा याकुब खोन्‍कि याकुब्‌ओ अ़निछा युहन्‍ना येसुआ खोचिओ अ़चुऩङ बोअनर्गेस म़पाक्‍तुचि, मोसोओ अ़तुप्‍माय़ङ कुलुङ्‌धिप्‍पावाको म़नाचि।

¹⁸ खोन्‍कि अन्‍द्रियास, फिलिप, बारथोलोमाइ, मत्‍ति, थोमा, अल्‍फयस्‌ओ अ़छा याकुब, थेदियस, सिमोन कनानि: अरामिक य़ङ्‌दा यहुदिचि हेन्‍कोप सोमाकातुक कनानि,

¹⁹ खोन्‍कि यहुदा इस्‍करियोत खोसाआ येसु लाप्‍तुप़चि।

मोसाओ अ़य़ङ्‌हुप काचिन्‍पाचिआ येसु अ़चुमान्‍केङ अ़कात्‍ताओ

²⁰ खोन्‍किना येसु खिम्‌दा म़लासाखारा, खोन्‍कि मोदा म़ना मुक्‍लाचि म़लासान्‍कोवान्‍चिन, खोन्‌ओसा येसु खोन्‍कि अ़चुकाखेङ्‌पाचिआ चा-चामाछाङ मान्‍तोक्‌अ़दा।

²¹ खोन्‍कि येसुओ अ़चुखिम्‍लुम्‍पाङ्‌आ ओसोओ अ़तुक्‌वादा अ़एनाकिना खोक्‍को खिम्‌दा लाप्‍मातात्‍मा निकिना म़खारा, देकिनालो “खोक्‍कोसोओ अ़चुखारु माखारायुङ्‌सा”नि म़नाचिआ अ़लोवाङा।

²² खोन्‍कि यरुसलेम्‌दुङ्‌का म़युवाओ य़ङ्‌हुप काचिन्‍पाचि म़य़ङा, “खोक्‍कोएदा चाकावालावाचिओ अ़चुहाङ बालजिबुल याक्‌याङ, खोन्‍कि मोसोओ अ़सावालाम्‍पा खोक्‍कोसाआ चाकावालावाचि लोइसुङुचि।”

²³ खोन्‍किना येसुआ खोचि म़बुत्‍तुचि, खोन्‍कि दोय़ङ्‌लाचिदा मोचि म़लोचि, “सैतानाआ सैताना देत्‍नि लोन्‍मा ऱ?

²⁴ खाक्‍को हाङ्‌होन्‌ओ अ़देङ्‌सालाप्‍पादा ङेन मुकि केत्‌नालो मो हाङ्‌होन्‌ङा लुक्‍खात।

²⁵ खाक्‍को खिम्‍लुम्‍पा अ़देङ्‌सालाप्‍पादाङा ङेन मुकि केत्‌नालो मो खिम्‍लुम्‍पा लुक्‍खात।

²⁶ खोन्‍कि सैतानाआ सैतानाओ अ़देङ्‌सालाप्‍पादा ङेन मुसि पुक्‍लोन्‌कि फेक्‍नान्‍चिन्‌नालो मो लुक्‍खात, मेन मोसोओ अ़लुक्‍मा तादिसायुङ्‌सा।

²⁷ अ़नुछ्‍याङा, साङ्‌आछाङ काछोपा म़नाओ अ़खिम्‌दा वाङ्‌कि अ़चासुम्‍छेन्‍बि ङाप्‍माखात्‍मा अ़ऱन, खोसाआ बुया मो काछोपा म़ना छ़मादोत, खोन्‍किना ओन्‍ङा खोसाआ मोसोओ अ़खिम्‌दाओ अ़चासुम्‍छेन्‍बि ङाप्‍माखात्‍मा ऱ।

²⁸ अ़नुछ्‍या अ़ङ्‌का खानानिन लोनानिन, निनाम्‍हाङ्‌आ म़नाचिओ झारा अ़चुहेवाचि खोन्‍कि निनाम्‍हाङ्‌ओ अ़चुसायापेप्‍माय़ङ य़ङ्‌चिछाङ म़लेत्‍तुप़चि।

²⁹ मेन साङ सेङ्‌लावाओ अ़चुदेङ्‌सालाप्‍पादा अ़त्‍लो चेप, निनाम्‍हाङ्‌आ देम्‍खाछाङ ऩलेत्‍तुन, देकिनालो मो म़ना अ़लुक्‍निन्‌ओ हेवाओ ऩङ्‌छिन कामु कान।”

³⁰ खोक्‍कोसाआ ओ य़ङ म़लोचि, देकिनालो “खोक्‍कोएदा पोप्‍ताओ लावा याक्‌याङ”नि मोचि म़य़ङाङा।

येसुओ अ़चुमा खोन्‍कि अ़चुनिछाचि

³¹ खोन्‍किना येसुओ अ़चुमा खोन्‍कि अ़चुदुवाछा निछाचि खोक्‍कोसाआ म़चिन्‍तुङुचिओ खिम्‌दा म़तादिसा। मोचि बुङ्‌खाया म़एवाकि येसु बुत्‍सि अ़क्‍छा अ़छुत्‍ता।

³² येसुओ अ़चुऱङ्‌कोप्‍नि म़ना मुक्‍लाचि म़युङाङा, खोन्‍कि मोचिआ खोक्‍को अ़लोवा, “आम्‍नुओ मामा खोन्‍कि आम्‍नुओ दुवाछा निछाचिआ बुङ्‌खाया खानानिन ऩलामिन्‌येन।”

³³ येसुआ मोचि म़लासुलोचि, “अ़ङ्‌मा खोन्‍कि अ़ङ्‌निछाचि साङ्‌चि ओ?”

³⁴ खोन्‍किना खोक्‍कोसाआ अ़चुऱङ्‌कोप्‍नि म़युङाङाओ म़नाचिह्‍यात्‍नि म़खाचिकि म़य़ङा, “खानुम! अ़ङ्‌मा खोन्‍कि अ़ङ्‌निछाचि ओचिङा ओ!

³⁵ साङ निनाम्‍हाङ्‌ओ अ़चुमिन्‍मावा च़, मोङा अ़ङ्‌निछा, अ़ङ्‌छेत्‍कुमा खोन्‍कि अ़ङ्‌मा ओ।”