मर्कुस 15 - बान्तावा राईयेसु पिलातस्ओ अ़बुदा मत्ति २७:१-२ , ११-२६ ; लुका २३:१-५ ; युहन्ना १८:२८–१९:१६ 1 अ़वाय़ङ खादात्मा मुवाङाहिदा मुलो काब़क्पाचि, म़नाचिओ अ़चुअ़धुवाचि, खोन्कि मोसाओ अ़य़ङ्हुप काचिन्पाचिकिना धियायोक्खादाओचि झारा याम़योआ। खोन्कि येसु अ़छ़साकि मोचिआ रोमि हाङ्काचि कामु पिलातस्एदा अ़खात्ता। 2 खोन्कि पिलातस्आ येसु सेनु, “दि खाना यहुदिचिओ अ़चुहाङ ओ?” येसुआ अ़लासालोवा, “खानानिन्ङा खोवात्नि त़य़ङिन्युङ्सिन म़ल़क।” 3 खोन्किना मुलो काब़क्पाचिआ येसु ब़द्धे य़ङ्चिदा लाहि अ़पाक्ता। 4 खोन्ओसा पिलातस्आ खोक्को लासुसेनु, “दि खाना रात्खान्चिन य़ङ दित्छाङ मात्द़ङ? एनुखो, मोचिआ खाना देम ब़द्धे लाहिचि ऩपाक्याङ!” 5 मेन येसुआ दित्छाङ य़ङ मान्लाअ़दा, खोन्ओसा पिलातस दोम्तुदो। 6 खोन्कि अ़दोङ्खिन्तुम काक्माखात्मा चानुचाओ ग़रि पिलातस्आ म़नाचिआ अ़दोराओ अ़क्छा छेक्ताङाओ म़ना लेत्प़सामुङुचि। 7 मोन्ग़रि बारब्बा अ़ऩङ मुवाङाओ अ़क्छा म़ना छेक्खाखिम्दा ङेन कामुचिएनान छेक्ताङा। खोसाआ ङेन्ओ ग़रिदा म़ना सेरायुङ्सा। 8 खोन्किना म़ना मुक्लाचि पिलातस्एदा म़खाराकि खो अ़धुन चुवाङावा अ़क्छा छेक्ताङाओ खोचिओ निम्पाङ लेत्प़म़लुवा। 9 खोन्कि पिलातस्आ मोचि लोचि, “दि खानानिन यहुदिचिओ अ़चुहाङ अ़ङ्का लेत्नाप़नानिन्नेनि खानानिन त़मिनिन्येन?” 10 देकिनालो मुलो काब़क्पाचिओ अ़चुऩङ्च़आ येसु खो अ़पुवालावाओ निकिना खोसाआ नुलोक सिन्तुङु। 11 मेन मुलो काब़क्पाचिआ म़ना मुक्लाचि म़छुसुलोइसुचिकि पिलातस्एदा येसुओ अ़फान्दा बारब्बा लेत्प़म़लुवा। 12 खोन्किना पिलातस्आ म़ना मुक्लाचि लासुलोचि, “खोन्नालो खानानिन्आ यहुदिचिओ अ़चुहाङ्नि त़लोम्योम्ओ, येसु अ़ङ्का दे मुङ म़ल़क?” 13 मोचि म़लासापारा, “मो क्रुस्दा ख़न्तासेरानुम!” 14 पिलातस्आ मोचि सेनुचि, “देकिना? ओसाआ दि फिसुयुङ्सु कि?” मेन मोचि च़लोक म़पारा, “मो क्रुस्दा ख़न्तासेरानुम!” 15 खोन्कि पिलातस्आ म़ना मुक्लाचिओ अ़चुसोम्सेत्माचि बारब्बा लेत्तुप़चि, खोन्कि येसु य़हुप पाक्मेत्तुचि खोन्कि क्रुस्दा ख़न्मासेत्मा प़लाउचि। रात्खामिचिआ येसु अ़सुङ्ताओ मत्ति २७:२७-३१ ; युहन्ना १९:२-३ 16 खोन्किना रात्खामिचिआ येसु प्रेतोरियन माङ्लो हाङ्काचि कामुओ अ़हाङ्मुखादा अ़खात्ता, खोन्कि खोचिआ झारा रात्खामि रुहुप्चि म़बुत्तुचि। 17 मोचिआ येसु हालापाक्पाक्ओ बोप्खु अ़हुप्ता, खोन्कि त़ङ्खोक्वाओ ताङ्बोप्खा अ़बाकि खोक्कोसोओ अ़चुताङ्दु अ़बोप्ता। 18 खोन्कि मोचिआ खोक्को “सेवा, यहुदिचिओ अ़चुहाङ!”नि लोमा अ़पुक्ता। 19 खोन्कि मोचिआ द़ङ्आ खोक्कोसोओ अ़चुताङ्दु अ़धात्ता, खोन्कि खोक्को अ़थुक्ता। खोन्किना अ़चुतुम्प़छ़क अ़तोम्ताकि खोक्को सुङ्मा निम्पाङ साया मेत्तिन्वा म़बोम्सान्चिन। 20 खोक्को अ़सुङ्ताचिआकि मोचिआ हालापाक्पाक्ओ बोप्खु अ़हुत्ता, खोन्कि खोक्कोसोओ अ़चुतित्ङा अ़हुप्ता। खोन्किना खोक्को क्रुस्दा क़ङ्मासेत्मा निकिना अ़खात्ता। येसु क्रुस्दा अ़ख़न्ताओ मत्ति २७:३२-४४ ; लुका २३:२६-४३ ; युहन्ना १९:१७-२७ 21 लाम्दा म़खाराङाहिदा मोचिआ अ़क्छा कुरेनिदाओ सिमोन अ़ऩङ मुवाङाओ तेन्दाङ्का बानाङाओ अ़धिरा। खो अलेक्जेन्दर खोन्कि रुफस्ओ अ़चुपा ओ। रात्खामिचिआ खो राकाङ्थेत्नि येसुओ अ़चुक्रुस खुन्अ़मेत्ता। 22 खोन्कि मोचिआ येसु ‘गलगथा’निओदा अ़तारा, मोसोओ अ़तुप्माय़ङ ‘ताङ्खोयोक्वा ला’ ओ। 23 खोन्कि मोचिआ येसु मुर्र होलाओ अङ्गुरा माङ्वा अ़पुवा, मेन येसु दुङ्मा म़छुन्ता। 24 खोन्किना मोचिआ येसु क्रुस्दा अ़क़ङ्सा खोन्कि साङ्आ दि खात्मा निकिना अ़चुरादा अ़छ़ङ मुमा होरा म़पाआ, खोन्कि खोक्कोसोओ अ़चुतित्चि अ़हासा। 25 येसु क्रुस्दा अ़ख़न्ताहिदा अ़वाय़ङ्ओ नौ साङायुङ्सा। 26 खोक्कोसोओ अ़चुदेङ्सालाप्पादा लाहिपाक्मा छाप्माय़ङ फलेक्दा “यहुदिचिओ अ़चुहाङ”नि छाप्ताङा। 27 मोचिआ ह़वाङ काख़पाचिछाङ येसुएनान क्रुस्दा म़ख़न्तुचि। अ़क्छा खोक्कोसोओ अ़चुचुप्ताङ्लिप्पा खोन्कि अ़क्छा अ़चुबेङ्साङ्लिप्पा। 28 [खोन्कि साम्कालिन्दा छाप्ताओ य़ङ ताला, “खोन्कि खोक्को हेवामिचिएदा म़खिप्ता।”] 29 मो लाम काकोन म़नाचिआ अ़चुताङ ङाङ्याङ्सा येसु ओवात्नि लोयाङ्सा अ़सुङ्ता, “त़चो! खानाङा निनाम्हाङ ब़क्खाखिम काभुङ खोन्कि मो सुम्कालेन्दाकालामु! 30 खाना आप्पि लेइसान्चिन, खोन्कि क्रुस्दाङ्का धान्तान्चिन!” 31 मोवात्निङा मुलो काब़क्पाचिआ, मोसाओ अ़य़ङ्हुप काचिन्पाचिआछाङ अ़क्छा निएदा ओवात्नि य़ङ्सा येसु अ़सुङ्ता, “ओसाआ निचि ना लेइसुचि, मेन खोक्को आप्पि लेन्मान्चिन अ़ऱनिन। 32 आन्कान इस्राएलिचिओ आन्हाङ ख्रिस्त! ओन्ग़रिङा खोक्को क्रुस्दाङ्का धान्नान्चिन्ने, खोन्किना आन्कान खाम्कि खोक्कोएदा साकोङ्छ़ङ मुम!” खोक्कोएनान क्रुस्दा ख़न्ताङाचिओ काङाप्खात्चिआछाङ खोक्को अ़सुङ्ताचु। येसुओ अ़चुस़मा मत्ति २७:४५-५६ ; लुका २३:४४-४९ ; युहन्ना १९:२८-३० 33 खोन्कि बार साङादाङ्का सुम्काकोम साङातारि झारा हेन्कोप्दा कुन्चियाधेक्धेक लिसा। 34 आप्फात सुम्काकोम साङाहिदा येसु अ़धिवाङ य़ङ्आ म़पारा, “इलोइ, इलोइ लामा सबखथनि?” ओसोओ अ़तुप्माय़ङ, “अ़ङ्निनाम्हाङ, अ़ङ्निनाम्हाङ, खानानिन्आ अ़ङ्का देकि त़छिराङ्ऩङ?” 35 अ़च़क्दा म़एवाङाओचिएदाओ देम्पाङ्साआ ओ अ़एनाकि म़य़ङा, “एनानुम! खोसाआ ना एलिया बुत्तुङु!” 36 खोन्किना अ़क्छा लोराखाराकि सुन्ताङाओ अङ्गुरा माङ्वादा अ़क्तात याङ्पेन्दा लुम्तु, खोन्कि अ़क्तात द़ङ्दा छ़सुकि मो खोक्को दुङ्मा प़, खोन्कि य़ङा, “हान आन्कान खाम्ने, खोक्को लात्धान्सि एलिया ता हे!” 37 मेन येसु अ़धिवाङ य़ङ्आ म़लासापाराकि खोक्कोसोओ अ़चुसाक्मा खारा। 38 खोन्कि निनाम्हाङ ब़क्खाखिम्ओ अ़थेम्खातित अ़छोङ्दुङ्का अ़थेन्युतारि ह्वाधाङ लिसालो रेआखारा 39 खोन्कि येसुओ अ़चुबुदा एवाङाओ रात्खामिचिओ अ़चुकप्तानाआ देत्नि खोक्कोसोओ अ़चुसाक्मा खाराओ खाकिना “अ़नुछ्याङा ओ म़ना ना निनाम्हाङ्ओ अ़चुछा ओ!”नि य़ङा। 40 मोदा अ़थायाङ्का खाम़चोवाङाओ खा-खाक्को मेत्छामाचिछाङ म़याआङा। मोचिएदाओ मग्दला सहरादाओ मरियम, अ़चुप्पो याकुब खोन्कि योसेफ्ओ अ़चुमा मरियम खोन्कि सलोमि म़याआङा। 41 येसु गालिल्दा म़युङाङाहिदा मोचिआ खोक्को अ़त़ङ्ताङा, खोन्कि खोक्को अ़फासाङा। खोन्किना येसुएनान यरुसलेम्दा म़ताओचि नि ब़द्धे मेत्छामाचिछाङ मोदा म़याआङा। येसु एप्मादा अ़युङ्साओ मत्ति २७:५७-६१ ; लुका २३:५०-५६ ; युहन्ना १९:३८-४२ 42 खोन्कि अ़नाम्प़क्साऱङ लिसायुङ्सा, ओ लेन चुम्मान्चिन्ओ लेन ओ माङ्लो सावातोम्खा-लेन्ओ बुयाओ लेन। 43 अरिमाथियादाओ योसेफ, धियायोक्खादाओ पाङ्कातोक अ़क्छा ब़द्धे अ़ऩङ ऱङाओसाआ निनाम्हाङ्ओ अ़चुहाङ्होन ताङाओ हुङुङु। खो अ़राक्एनान पिलातस्एदा खाराकि येसुओ अ़चुस़पोक दोरु। 44 येसु बुयाङा म़सुवादाओ एनुकिना पिलातस दोम्तुदो। खोन्कि खोसाआ रात्खामिचिओ अ़चुकप्ताना बुत्तुकि येसु म़सुवादाचिआओ हे माआङ निकिना सेनु। 45 खोसाआ रात्खामिचिओ अ़चुकप्तानादाङ्का सिन्तुकिना पिलातस्आ येसुओ अ़स़पोक योसेफ खात्मा प़। 46 खोन्किना योसेफ्आ अ़लुङ छ़साङाओ स़पोक रिप्खा बाङ्गाय़ तित खिरु, खोन्कि येसुओ अ़चुस़पोक क्रुस्दाङ्का धान्तुकि स़पोक रिप्खा छ़साङाओ तित्आ रिप्तु, खोन्कि लुङ्छ़ङ अ़क़प्ताकि अ़मुवायुङ्साओ अ़क्तात एप्मादा युङ्सु। खोन्कि खोसाआ अ़क्तात अ़धिवो लुङ्ताक एप्माओ अ़दोदा ध़सुदिप्तु। 47 मग्दला सहरादाओ मरियम खोन्कि योसेफ्ओ अ़मा मरियम्आ येसु एप्मादा युङ्साङाओ अ़खाङाचु। |
© Wycliffe Bible Translators, Inc. All rights reserved.
Wycliffe Bible Translators, Inc.