मत्‍ति 22 - बान्‍तावा राई

सायाकाम्‍मा खाबाचाओ दोय़ङ्‌ला

¹ खोन्‍कि येसुआ मोचि दोय़ङ्‌लाचिदा म़लोचि,

² “निनाम्‍हाङ्‌होन अ़क्‍छा हाङ्‌एनान तोङ्‌माखाङ्‌मा ऱम। खोसाआ अ़छाओ अ़चुसायाकाम्‍मादा खाबाचा चुम्‍सु।

³ खोन्‍कि सायाकाम्‍मा खाबाचा चुम्‍साचिआकिना बुत्‍तुचिओ म़नाचि तानिन्‌नि लोसि अ़हारुक्‌चि छुत्‍तुचि, मेन मोचि तामा म़छुन्‍ता।

⁴ खोन्‍किना खोसाआ नि अ़हारुक्‌चि ओवात्‍नि लोचिकि लासुछुत्‍तुचि, ‘बुत्‍माय़ङ म़नाचि लोवानुम्‍च़म, अ़ङ्‌का अ़ङ्‌खाबाचा चुम्‍सुङ्‌युङ्‌सुङ। अ़ङ्‌बोयोङ्‌चि खोन्‍कि पुन्‍दुक्‍दुक्‌वाओ सायाम्‍पोक्‌चि म़सेरायुङ्‌सा, खोन्‍कि झारा सामाचि म़चुम्‍सायुङ्‌सा। सायाकाम्‍मा खाबाचादा तानिन!’

⁵ मेन मोचिआ मान्‌एन्‍सुलावा मुयाङ्‌सा अ़क्‍छा अ़व़क्‌दा नितात अ़खित्‍खा-अ़इन्‍खादात्‍नि खारा।

⁶ निचिआ खोसोओ अ़हारुक्‌चि म़लाउचिकि मोचि अ़त्‍लो म़मुचि खोन्‍कि मोचि म़सेरुचि।

⁷ हाङ्‌ओ अ़माइसुङ्‌कारा खोन्‍कि अ़रात्‍खामिचि छुत्‍तुचिकि मो म़ना कासेत्‌चि सेरुचि, खोन्‍कि मोचिओ अ़चुसहरा ह़त्‍ताखाइसा।

⁸ खोन्‍किना खोसाआ अ़हारुक्‌चि लोचि, ‘सायाकाम्‍मा खाबाचा चुम्‍सायुङ्‌सा, मेन बुत्‍माय़ङ्‌ओ म़नाचि तामा मान्‍खान्‍दोचि।

⁹ खोन्‌ओसा खानानिन मुलो लाम्‌चिदा खारानिन, खोन्‍कि देम त़धिरुम्‍च़म, मोचि सायाकाम्‍मा खाबाचादा बुत्‍तानुम्‍च़म।’

¹⁰ खोन्‍किना मो अ़हारुक्‌चि लाम्‌चिदात्‍नि म़खाराकिना म़धिरुचिओ अ़अ़त्‍पा खोन्‍कि अ़नुवाक झारा म़कोउचि, खोन्‍कि सायाकाम्‍खा खिम तावाङ्‌चिआ अ़भेप्‍ता।

¹¹ आदेङ हाङ तावाङ्‌चि खाङ्‌सि निम्‍पाङ खिम्‍हुत्‌दा वाङा, मोन्‍ग़रि खोसाआ सायाकाम्‍खा तित मान्‍हुम्‌याङ्‌ओ अ़क्‍छा म़ना खा।

¹² खोसाआ मो सेनु, ‘यावा, सायाकाम्‍खा तित मान्‍हुम्‍माङ खाना देत्‍नि ओदा त़वाङा?’ मो म़ना देत्‍छाङ य़ङ्‌मा मान्‍ऱ।

¹³ खोन्‍किना हाङ्‌आ अ़हारुक्‌चि लोचि, ‘मोसोओ अ़लाङ अ़छुक्‌दा छुम्‍सानुम खोन्‍कि बुङ्‌खायाओ कुन्‌यामादा वेइसालोइसानुम, मोदा खो खाप खोन्‍कि अ़क़ङ ऱउ।’”

¹⁴ खोन्‍किना येसुआ म़लोचि, “बुत्‍माय़ङ्‌ओचि ब़द्‍धे म़याक्‌याङ, मेन छेन्‍माय़ङ्‌ओचि चुक्‍लो म़याक्‌याङ।”

दाम्‍दु छोन्‍मा चिन्‍माय़ङ

¹⁵ खोन्‍किना फरिसिचि म़खाराकि खोक्‍कोसोओ अ़चुय़ङ्‌दा देत्‍नि धान्‍मा निम्‍पाङ याम़योआ।

¹⁶ फरिसिचिआ अ़चुकाखेङ्‌पाचि हेरोदि रुहुप्‌दाओ म़नाचिएनान खोक्‍कोएदा म़खाइसुचि। मोचि म़य़ङा, “काचिन्‍पो, आन्‍कान्‍का सिन्‍तुम्‌योम्‍का, खानानिन अ़नुवाक त़मुन्‌येन, खोन्‍कि निनाम्‍हाङ्‌ओ अ़चुलाम अ़छ़ङ खात़चिन्‍तिन, खोन्‍कि खानानिन साङ्‌एदाङ्‌काछाङ त़क़सिमिन, देकिनालो खानानिन म़नाचि खाङ्‌याङ्‌सा काचि त़मुन्‍मिन।

¹⁷ खोन्‍नालो आन्‍कान्‍का लोनि, खानानिन देत्‍नि त़मिनिन? रोमि तोक्‍पोहाङ कैसरएदा दाम्‍दु छोन्‍मा मोसाओ अ़य़ङ्‌हुप्‌आ अ़प़न्‍का हे अ़प़न्‍मिन्‍का?”

¹⁸ मेन मोचिओ अ़चुओ अ़अ़त्‍पा मिन्‍मा अ़सिन्‍ताकि येसुआ म़लोचि, “कोङ्‌क़त्‌वाचि ओ, देकि खानानिन्‌आ अ़ङ्‌का चिन्‍माखाङ्‌मा त़लाप्‍ङाङाऩङ?

¹⁹ दाम्‍दु छोन्‍खा फेक्‌वा अ़ङ्‌का खाङ्‌मेत्‍नि!” खोन्‍किना मोचिआ खोक्‍कोएदा अ़क्‌फेक रुपाओ फेक्‌वा अ़तारा।

²⁰ खोक्‍कोसाआ मोचि म़सेनुचि, “ओ फेक्‌वादा साङ्‌कोओ अ़लावाछाप याक्‌याङ, खोन्‍कि साङ्‌कोओ अ़ऩङ सेप्‍तायुङ्‌सा?”

²¹ मोचिआ खोक्‍को अ़लासालोवा, “कैसरओ।” खोन्‍किना खोक्‍कोसाआ मोचि म़लोचि, “खोन्‍नालो दि कैसरओ ओ, मो कैसरङा पुवानुम, खोन्‍कि दि निनाम्‍हाङ्‌ओ ओ, मो निनाम्‍हाङ पुवानुम।”

²² ओ अ़एनाकि मोचि दोम्‍तुदोचि, खोन्‍किना खोक्‍को अ़छिरादाकि म़खारालावा।

लामाखोन्‍मालोन्‍माओ अ़तुक्‌वादा यायोक

²³ मो लेन्‌ङा म़स़दाओचि ऩखोन्‍निन्‍लोन्‍निन्‌नि काय़ङ सदुकिचि येसुएदा म़ता, खोन्‍कि खोक्‍को अ़सेना,

²⁴ “काचिन्‍पो, निनाम्‍हाङ्‌य़ङ खाकालु मोसा य़ङायुङ्‌सा, खाक्‍कोसोओ अ़बुवा छा मान्‍तोक्‍माङ स़दाकि अ़खिम्‍हाङ्‌मा छिरुदानालो अ़बुवाओ निकिना अ़निछाआ मेन्‍मित्‍मा सायाकाम्‍मादोत, खोन्‍कि अ़बुवाओ निकिना छातोक्‍मा प़मादोत

²⁵ हान, अ़क्‍खिम्‌दा सात्‌कापाङ द़क्‍छाचि म़याआङा। कुम्‍पा सायाकाम्‍सा खोन्‍कि छा मान्‍तोक्‍माङ मो सुवादा। खोन्‍किना छाचि मान्‍तोक्‌ओसा खोसोओ अ़निछाआ मो मेन्‍मित्‍मा सायाकाम्‍सु।

²⁶ मोवात्‍निङा मुक्‍सुआ खोन्‍कि सुम्‌कापाङ्‌ओतात्‌आछाङ खोन्‍कि सात्‌कापाङ्‌साआङा मोवात्‍नि साया अ़काम्‍सा।

²⁷ मोचि झारा म़सुवादाकि आदेङ्‌माङ मो मेत्‍छामाछाङ सुवादा।

²⁸ खोन्‍नालो हान, मोचि म़लाखोन्‍लोन्‌हिदा मो मेत्‍छामा खाक्‍कोसोओ अ़खिम्‍हाङ्‌मा लि? देकिनालो झारा सात्‌कापाङ्‌माङ्‌आङा मो मेत्‍छामा साया अ़काम्‍सा।”

²⁹ येसुआ मोचि म़लासुलोचि, “खानानिन त़फेलिन्‌युङ्‌सिन, देकिनालो खानानिन्‌आ ना साम्‍कालिन ना निनाम्‍हाङ्‌ओ अ़चुसावा त़सिन्‍तुम।

³⁰ देकिनालो म़सुवादाओ म़नाचि म़लाखोन्‍लोन्‌कि ना मोचि सायाम़काम ना सायाङा म़काम्‍सुप़चि। मेन मोचि निनाम्‍मादुओ निनाम्‍हाङ काफावात्‍नि म़लि।

³¹ मेन म़सुवादाओचिओ अ़चुलामाखोन्‍मालोन्‍माओ अ़तुक्‌वादा निनाम्‍हाङ्‌आ खानानिन देत्‍नि ऩलोन्‌युङ्‌सिन, मो खानानिन्‌आ मान्‍खिप्‍त़युक्‍तुम?

³² खोक्‍को म़य़ङायुङ्‌सा, ‘अ़ङ्‌का अब्राहाम्‌ओ अ़निनाम्‍हाङ, इसहाक्‌ओ अ़निनाम्‍हाङ खोन्‍कि याकुब्‌ओ अ़निनाम्‍हाङ ओ।’ खोक्‍को म़सुवादाओचिओ अ़चुनिनाम्‍हाङ माआङ, मेन अ़ह़ङ्‌चिओ अ़चुनिनाम्‍हाङ ओ।”

³³ ओ अ़एनाकि म़ना मुक्‍लाचि खोक्‍कोसोओ अ़चुचिन्‍माय़ङ्‌दा दोम्‍तुदोचि।

तोक्‍पो लोमाय़ङ

³⁴ खोक्‍कोसाआ सदुकिचि वाइवेत म़मुचिओ अ़एनाकि फरिसिचि अ़क रुहुप म़कोवान्‍चिन।

³⁵ मोचिएदाओ अ़क्‍छा य़ङ्‌हुप काचिन्‍पाआ खोक्‍को चिन्‍माखाङ्‌मानि मिनाकिना ताकि खोक्‍को सेनु।

³⁶ “काचिन्‍पो, य़ङ्‌हुप्‌दाओ तोक्‍पो लोमाय़ङ खाक्‍को ओ?”

³⁷ खोक्‍कोसाआ मो अ़लासालोवा, “‘खाना निनाम्‍हाङ पापा आम्‍निनाम्‍हाङ झारा आम्‍साकोङ्‌वाआ, खोन्‍कि झारा आम्‍लावाआ खोन्‍कि झारा आम्‍मिन्‍माआ सोमातुक्‍तु।’

³⁸ तोक्‍पो खोन्‍कि बुयाओ लोमाय़ङ ओङा ओ।

³⁹ ह्‍वातात्‌ओतात्‌छाङ मोवात्‍निङा अ़च़वाङ मुयाङ, ‘खाना आम्‍तेन्‍पाङ आप्‍पिवाङा सोमातुक्‍तु।’

⁴⁰ ओ ह्‍वातात लोमाय़ङ्‌दा झारा य़ङ्‌हुप खोन्‍कि निनाम्‍हाङ्‌य़ङ खाकालुचिओ अ़चुचिन्‍माय़ङ तालायुङ्‌सा।”

ख्रिस्‍त साङ्‌कोओ अ़चुछा

⁴¹ फरिसिचि म़कोवान्‌युङ्‌सान्‍चिन्‌हिदा येसुआ मोचि अ़क्‌तात य़ङ म़सेनुचि,

⁴² “ख्रिस्‍तओ अ़तुक्‌वादा देत्‍नि खानानिन त़मिनिन्‌येन? खोक्‍को साङ्‌को अ़छा ओ?” मोचिआ खोक्‍को अ़लासालोवा, “दाउद्‌ओ अ़छा ओ।”

⁴³ खोक्‍कोसाआ मोचि म़लोचि, “खोन्‍नालो दाउद्‌आ निनाम्‍हाङ लावादाङ्‌का राक तोक्‍तुकि खोक्‍को ‘हाङ्‌पो’नि देत्‍नि बुत्‍मा ऱ? खोक्‍को म़य़ङ,

⁴⁴ ‘निनाम्‍हाङ्‌आ अ़ङ्‌हाङ्‌पा अ़लोवा, देम्‍खातारि अ़ङ्‌का आम्‍ङेङ्‌चि आम्‍लाङ्‌थेम्‍भेन्‌यु अ़मुऩङ्‌च़ङ, खोग़रितारि खाना अ़ङ्‌चुप्‍ताङ छुक्‌लिप्‍पा युङा।’

⁴⁵ दाउद्‌आङा खोक्‍को ‘हाङ्‌पो’नि लोनालो देत्‍नि ख्रिस्‍त दाउद्‌ओ अ़छा लिमा ऱ?”

⁴⁶ खोन्‍किना साङ्‌आछाङ अ़क सिवाछाङ य़ङ्‌लामा मान्‍ऱचि। मो लेन्‌दाङ्‌का साङ्‌आछाङ खोक्‍को दित्‍छाङ च़लोक सेन्‍माय़ङ्‌चि लामासेन्‍मा राक मान्‍मुचि।