मत्ति 20 - बान्तावा राईकाचि कामुचिओ दोय़ङ्ला 1 “निनाम्हाङ्होन अ़क्छा व़क हाङ्पावाको ओ। खो अ़वाय़ङ अ़अङ्गुराखादा काचि कामुचि काचिलुङ्दा काचि मुमेत्सि बुङ्खाया लोन्ता। 2 काचि कामुचिआ अ़क लेन्दा अ़तोक्ओ काचिलुङ अ़छ़ङ मुकि खोसाआ मोचि अ़अङ्गुराखादा खाइसुचि। 3 खो आप्फात अ़वाय़ङ नउका कोम साङाहिदा बुङ्खाया लोन्ता, खोन्कि खोसाआ निचि बजारादा काचि मात्द़ङ म़एवाङाओ खाचि। 4 खोन्कि खोसाआ मोचि लोचि, ‘अ़ङ्अङ्गुराखादा खारानिन्कि काचि मुवानिन। खोन्कि देम काचि लुङ त़खान्तिन अ़ङ्का खानानिन प़नानिन।’ 5 खोन्किना मोचि अङ्गुराखादा काचि मुसि म़खारा। खोसाआ आप्फात बारकाकोम साङाहिदा खोन्कि सुम्काकोम साङाहिदा बुङ्खाया लोन्ताकि मोवात्निङा लासाचुवा। 6 खोसाआ आप्फात पाच्काकोम साङाओ ग़रि बुङ्खाया लोन्ताहिदा हान्छाङ निचि म़एवाङाओ म़धिरुचि खोन्कि मोचि म़सेनुचि, ‘खानानिन देकि नाम्प़क्लो देत्छाङ मान्च़माङ त़एविन्येन ओ?’ 7 मोचिआ खो अ़लासालोवा, ‘देकिनालो साङ्आछाङ आन्कान्का काचिदा मान्पाक्ऩदान्का।’ खोसाआ मोचि लोचि, ‘खानानिन्छाङ अ़ङ्अङ्गुराखादा खारानिन्कि काचि मुवानिन।’ 8 अ़नाम्प़क लिसाकिना अङ्गुराखाओ अ़हाङ्पाआ अ़काचि काखाङ लो, ‘काचि कामुचि बुत्तुचिकि आदेङ काताचिदाङ्का बुया काताचितारि अ़चुकाचिलुङ्चि प़चि।’ 9 आप्फात पाच्काकोम साङाहिदा काचि मुसि कावाङ्चि म़ता, खोन्कि मोचि झारासा अ़क्लेन्ओ काचिलुङ अ़तोक्ता। 10 खोन्किना बुया काचिदा कावाङ्चि म़ता, खोन्कि मोचिआ च़लोक तोक्तुम्कानि म़मिना, मेन मोचि झारासाआ अ़क्लेन्ओ काचिलुङ अ़तोक्ता। 11 काचिलुङ अ़तोक्ताचिआकिना अङ्गुराखाओ अ़हाङ्पाओ अ़देङ्सालाप्पादा बुया काचिदा कावाङ्चि छुऩङ्वा मुमा अ़पुक्ता। 12 मोचि म़य़ङा, ‘ओ आदेङ काता म़नाचि अ़क कोम ओन्ङा काचि म़मुवा, मेन खानानिन्आ मोचि आन्कान्का नाम्प़क्लो अ़खोलेन्ओ नाम काआङ काचि कामुचिएनान अ़क्निवा काचिलुङ त़प़नियुङ्नि।’ 13 मेन खोसाआ मोचिएदाओ अ़क्छाओ अ़य़ङ अ़लासा, ‘यावा, अ़ङ्का खाना देम्खाछाङ अ़त्लो मान्मुयुक्ना। दि खाना अ़ङ्काएदा अ़क्लेन्ओ काचिलुङ्दा काचि मुङा निकिना त़काङ्साओ माआङ? 14 खाना तोक्मादोत्ओ आम्काचिलुङ खात्तुकि खारा। ओ आदेङ्माङ्ओ म़नाछाङ खाना प़नाओ ओन्ङा अ़ङ्का प़मा स़ङा। 15 दि आप्पिओ अ़ङ्छेन्बिआ अ़ङ्का मिन्ङावात्नि मुमा अ़ङ्काएदा पाङ मात्द़ङ कि? अ़ङ्को अ़नुवाक काचिदा देकि आम्माइसुङ कात्याङ?’” 16 खोन्किना येसुआ म़लोचि, “ओवात्निङा देङ्दा कालिचि बुया म़लि खोन्कि बुया कालिचि देङ्दा म़लि।” येसुआ सुम्कादुओदु अ़चुस़मादामा खाअ़लुसाओ मर्कुस १०:३२-३४ ; लुका १८:३१-३४ 17 येसु यरुसलेम्ह्यात्नि म़खाराङाहिदा खोक्कोसाआ बारकापाङ अ़चुकाखेङ्पाचि अ़क्चित ह्यात्नि म़खात्तुचिकि लाम्दा मोचि म़लोचि, 18 “अ़ङ्य़ङ एनानुम, आन्कान यरुसलेम्ह्यात्नि खारिन्येन। मोदा म़नाओ अ़छा मुलो काब़क्पाचि खोन्कि य़ङ्हुप काचिन्पाचिओ अ़चुछुक्दा अ़पाक। मोचिआ खो सेत्मादोत निकिना लाहि अ़पाक 19 खो सुङ्मा, य़हुप पाक्मा खोन्कि क्रुस्दा ख़न्मा निम्पाङ मोचिआ खो निरावाचिओ अ़चुछुक्दा अ़पाक, खोन्कि सुम्कालेन्दा खो स़दाओदाङ्का लाखोन्लोन।” अ़क्छा मामाओ अ़छुक्फाङ्मा मर्कुस १०:३५-४५ ; लुका २२:२४-२७ 20 खोन्किना जब्दियाओ अ़दुवाछाचिओ अ़चुमाआ अ़छाचि अ़क्नि खात्तुचिकि येसुओ अ़चुबुदा अ़तुम्प़छ़क तोम्तुकि खोक्को बुउ। 21 खोक्कोसाआ मो अ़सेना, “खाना अ़ङ्का दि मेत्नाप़नानेनि त़मिन्याङ?” मोसाआ खोक्को लो, “खानानिन हाङ त़लिसिन्हिदा ओ ह़वाङ अ़ङ्छाचिएदा अ़क्छा आम्नुओ चुप्ताङ्लिप्पा खोन्कि अ़क्छा आम्नुओ बेङ्साङ्लिप्पा युङ्मा अ़तोक्चुने।” 22 मेन येसुआ लासुलो, “खानाचिआ दि त़दोत्चिङ्चि, मो खानाचिङा त़सिन्चुन्चुन। दि अ़ङ्का दुङ्मादोत्ओ दुखाचिओ लाङ्चोक्खुङ्दाङ्का खानाचिआ दुङ्मा त़ऱचु?” मोचि य़ङाचि, “आन्काच्या ऱचुवा।” 23 येसुआ खोचि म़लोचि, “अ़ङ्का आङ्तुङ्ओ दुखाओ लाङ्चोक्खुङ अ़नुछ्या खानाचिआ त़आङ्चु, मेन अ़ङ्चुप्ताङ खोन्कि अ़ङ्बेङ्साङ्लिप्पा युङ्मा प़मा पाङ अ़ङ्छुक्दा मात्द़ङ। मेन ओ ना अ़ङ्पापाआ साङ्को निकिना अ़चुम्सायुङ्सा, खोसोओ निकिना ओ।” 24 ओ य़ङ अ़एनाकिना नि दस्कापाङ अ़चुकाखेङ्पाचि याकुब खोन्कि युहन्नाएदा अ़चुमाइसुङ्कारा। 25 खोन्कि येसुआ मोचि अ़क्नि खोक्कोएदा म़बुत्तुचिकि मोचि म़लोचि, “खानानिन त़सिन्तुम्योम्ङा, निरावाचिओ हाङ्काचि कामुचिआ चाअ़त्लो म़तिमुचि, खोन्कि मो अ़धुवा म़नाचि मोचिएदा पाङ म़मु। 26 आम्नुओ रादा ओवात्नि लिमा अ़नुनिन। मेन आम्नुओ रादा साङ तोक्पो लिमा लाम, खो आम्नुओ काब़त लिमादोत। 27 खोन्कि आम्नुओ रादा साङ बुदाओ लिमा लाम, खो हारुक लिमादोत। 28 मोवात्निङा म़नाओ अ़छाछाङ ब़त्लुसि माआङ, मेन ब़त्सि, खोन्कि ब़द्धेकापाङ फोङ्माओ अ़लुङ छोन्सि निकिना अ़ह़ङ्म़ङ प़सि ताओ।” येसुआ ह़वाङ दोप्म़क्चि म़नुसुचिओ मर्कुस १०:४६-५२ ; लुका १८:३५-४३ 29 येसु खोन्कि अ़चुकाखेङ्पाचि यरिहोदाङ्का म़खाराङाहिदा अ़क्तात अ़धिवो म़ना मुक्लाचिआ खोक्को अ़त़ङ्ता। 30 लाम च़क्दा ह़वाङ दोप्म़क्चि युङाङाचि। येसु मो लाम लियाङ्सा म़खाराङाओ अ़एनाचुकि मोचि पाराचि, “दाउद्ओ अ़छा, हाङ्पो, आन्काच्या सोमातुक्नि!” 31 म़ना मुक्लाचिआ मोचि “वाइवेत युङाचि!”नि म़रेन्तुचि, मेन मोचि च़लोक पाराचि, “हाङ्पो, दाउद्ओ अ़चुछा, आन्काच्या सोमातुक्नि।” 32 खोन्कि येसु म़एवादिसा खोन्किना मो ह़वाङ दोप्म़क्चि म़बुत्तुचिकि म़सेनुचि, “आम्चुओ निम्पाङ अ़ङ्का दि मेत्नाप़नाचिनेनि खानाचि त़मिन्चिङ्चि?” 33 मोचिआ अ़लासालोवाचु, “हाङ्पो, आन्काच्या लामाखाखाङ्मा ऱच्याने!” 34 येसुआ मोचि सोमाम़तुक्तुचि खोन्कि मोचिओ अ़चुम़क म़नोप्तुप़चि। खोन्कि मोन्ग़रिङा मोचि लामाखाखाङ्मा रुवाचि खोन्कि मोचिआ खोक्को अ़त़ङ्ताचु। |
© Wycliffe Bible Translators, Inc. All rights reserved.
Wycliffe Bible Translators, Inc.