मत्‍ति 19 - बान्‍तावा राई

सायाकाम्‍माय़ङ फेक्‍मा

¹ ओ य़ङ्‌चि म़चेवाचिआकिना येसु गालिल्‌दाङ्‌का यर्दन याङ्‌वामाओ अ़ह्‍याउधेत यहुदिया धिखाहुप्‌ह्‍यात्‍नि म़खारा।

² अ़धिवा म़ना मुक्‍लाचिआ खोक्‍को अ़त़ङ्‌ता, खोन्‍कि खोक्‍कोसाआ मोचि मोदा म़नुसुचि।

³ खा-खाक्‍को फरिसिचि म़ता, खोन्‍कि येसु चिन्‍माखाङ्‌मा निकिना मोचिआ अ़सेना, “दि दुवाछाआ दिसुओनुछाङ अ़तुक्‌वाआ अ़खिम्‍हाङ्‌मा छित्‍मा य़ङ्‌हुप्‌वा लि?”

⁴ खोक्‍कोसाआ म़लासुलोचि, “खानानिन्‌आ साम्‍कालिन्‌दा मान्‍खिप्‍त़युक्‍तुम? ‘अ़पुङ्‌चिपुक्‌दाङ्‌काङा निनाम्‍हाङ्‌आ दुवाछा खोन्‍कि मेत्‍छाछा म़मुयुचि,

⁵ खोन्‍कि म़य़ङा, खोन्‌ओसा दुवाछाआ अ़पा खोन्‍कि अ़मा छिरुदाचिकि अ़खिम्‍हाङ्‌माएनान युङ। खोन्‍किना मो ह़वाङ्‌माङ अ़क पोक लिचि।’

⁶ मोचि हान ह़वाङ माआङ, मेन अ़क पोक लिचि। खोन्‌ओसा निनाम्‍हाङ्‌आ म़काम्‍सुचिओचि म़नाआ फेक्‍माचि अ़नुनिन।”

⁷ फरिसिचिआ खोक्‍को अ़सेना, “खोन्‍नालो निनाम्‍हाङ्‌य़ङ खाकालु मोसाआ सायाकाम्‍माय़ङ छित्‍मुमा छाप्‍लावा दुवाछाआ छाप्‍माकि अ़खिम्‍हाङ्‌मा छिरुनेनि देकि य़ङायुङ्‌सा?”

⁸ येसुआ मोचि म़लासुलोचि, “आम्‍नुओ साकोङ्‌वा ऱक्‍भाक मुवाङाओसा मोसाआ आम्‍नुओ खिम्‍हाङ्‌माएनान फेक्‍मान्‍चिन खानानिन ऩप़न्‌ओ, मेन बुयादाङ्‌का ओवात्‍नि मात्‍द़ङ्‌याङ्‌ओ।

⁹ अ़ङ्‌का खानानिन लोनानिन, साङ्‌आ ताङ्‌लान्‌दाङ्‌का नि अ़तुक्‌वाआ अ़खिम्‍हाङ्‌मा छिरु, खोन्‍कि नि मेत्‍छामाएनान सायाकाम, मो ताङ्‌लान मु।”

¹⁰ येसुओ अ़चुकाखेङ्‌पाचिआ खोक्‍को अ़लोवा, “खिम्‍हाङ्‌पा खोन्‍कि खिम्‍हाङ्‌माएदा ओवात्‍नि लिनालो साया मान्‍काम्‍दामा अ़नुवाक लि।”

¹¹ येसुआ मोचि म़लासुलोचि, “झारा म़नाचिआ साया मान्‍काम्‍दामायु य़ङ लोक्‍मा ऩऱन। मेन निनाम्‍हाङ्‌आ साङ्‌चि ओ य़ङ म़प़युङ्‌सुचि, मोचिआ ओन्‍ङा लोक्‍मा अ़ऱ।

¹² देकिनालो खा-खाक्‍कोचि म़लिहिदाङा मेत्‍छाला म़मु, देम्‍पाङ म़नाचिआ मेत्‍छाला मुमाय़ङ्‌चि म़युङ। देम्‍पाङ निनाम्‍हाङ्‌होन्‌ओ निम्‍पाङ आप्‍पि मेत्‍छाला म़मुनान्‍चिन। साङ्‌आ मो लोक्‍मा ऱ, मोसाआ मो लोउने।”

येसु खोन्‍कि अ़चुप्‍पो छाचि

¹³ खोन्‍किना येसुआ छाचिओ अ़चुताङ्‌दा अ़चुछुक अ़युङ्‌कि याम़मात्‍तुप़चिने निकिना म़नाचिआ अ़चुप्‍पो छाचि खोक्‍कोएदा म़तारुचि। मेन अ़चुकाखेङ्‌चिआ मोचि म़रेन्‍तुचि।

¹⁴ मेन येसुआ म़लोचि, “छाचि अ़ङ्‌काएदा तामा पुवानुम्‍च़म, मोचि मान्‍छेक्‍दानुम्‍च़म। देकिनालो निनाम्‍हाङ्‌होन ओ छाचिवाकोचिओ निकिङा ओ।”

¹⁵ खोन्‍किना खोक्‍को मोदाङ्‌का खात्‍मा बुया अ़चुछुक छाचिओ अ़चुताङ्‌दा अ़युङ्‌साकि मोचि आसिखा म़प़चि।

अ़क्‍छा कातोक म़ना

¹⁶ अ़क्‍दु खोक्‍कोएदा अ़क्‍छा म़ना ताकि सेनु, “काचिन्‍पो, अ़ङ्‌का अ़लुक्‍निन्‌ओ ह़ङ्‌म़ङ तोक्‍मा दियाको अ़नुवाक काचि मुमादोत?”

¹⁷ खोक्‍कोसाआ मो अ़लासालोवा, “अ़नुवाक दि ओ, मोसोओ अ़तुक्‌वादा खाना अ़ङ्‌का देकि त़सेन्‍ङाङा? अ़नुवाक ना निनाम्‍हाङ ओन्‍ङा म़मुयाङ। मेन खाना अ़लुक्‍निन्‌ओ ह़ङ्‌म़ङ्‌दा वाङ्‌मानि त़मिन्‌याङ्‌नालो मोसाओ अ़य़ङ्‌हुप्‌वात्‍नि चुवा।”

¹⁸ मो म़नाआ खोक्‍को सेनु, “खा-खाक्‍को य़ङ्‌चि?” येसुआ म़लासुलोचि, “खाना म़ना मान्‍सेत्‌दा, खाना ताङ्‌लान मान्‍मुदा, खाना मान्‍ख़दा, खाना सोज्‍जे सालुम्‍स़ङ मान्‍प़दो।

¹⁹ आम्‍मामा खोन्‍कि आम्‍पापाचि साया मेत्‍तुचि, खोन्‍कि खाना आम्‍तेन्‍पाङ आप्‍पिवाङा सोमातुक्‍तु।”

²⁰ मो म़नाआ येसु लासुलो, “ओ झारा य़ङ्‌चि ना अ़ङ्‌का अ़ङ्‌सावाछायुङ्‌काङा मुङ्‌युङ्‌सुङ्‌च़ङ। हान अ़ङ्‌काएदा दि मान्‍तालायुक?”

²¹ येसुआ मो अ़लासालोवा, “खाना झारा अ़नुवाक लिमा त़स़याङ्‌नालो खाराकि झारा आम्‍सामाचि इनुचिकि मान्‍तोक्‍कादाचि प़चि। खोन्‍कि खाना निनाम्‍मादु चासुम्‍छेन्‍बि त़तोक्‍तु। खोन्‍किना बानाकि अ़ङ्‌का त़ङ्‌ताङ।”

²² मो सावाछाआ ओ य़ङ एनु, खोन्‍कि खोसोओ अ़मिन्‍मा सुवाकि खारालावा, देकिनालो खोसोओ ब़द्‍धे अ़चासुम्‍छेन्‍बि युङाङा।

²³ खोन्‍किना येसुआ अ़चुकाखेङ्‌पाचि म़लोचि, “अ़नुछ्‍या अ़ङ्‌का खानानिन लोनानिन, कातोक म़ना निनाम्‍हाङ्‌होन्‌दा वाङ्‌मा ब़द्‍धे चाअ़त।

²⁴ अ़ङ्‌का खानानिन लानालोनाङ्‌नानिन, कातोक म़ना निनाम्‍हाङ्‌होन्‌दा वाङ्‌मादाङ्‌का ना उता लुप्‍मित्‌ओ अ़खेत्‌दाङ्‌का लेन्‍मालोन्‍मा नुसुम्‍पेन्‍ता लि।”

²⁵ ओ अ़एनाकि अ़चुकाखेङ्‌पाचि अ़न्‍नुनु दोम्‍तुदोचि खोन्‍कि अ़सेना, “खोन्‍नालो साङ लेन्‍मा ऱ?”

²⁶ येसुआ मोचि नुलोक म़चोउचि खोन्‍कि म़लोचि, “म़नाचिदाङ्‌का ओ लिमा अ़ऱनिन, मेन झारा य़ङ्‌चि निनाम्‍हाङ्‌एदा लिमा म़ऱ।”

²⁷ खोन्‍कि पत्रुस्‌आ खोक्‍को अ़लोवा, “खानुम, आन्‍कान्‍का झारा सामाचि छिरुम्दोम्‍च़म्‍काकि खानानिन त़ङ्‌निङ्‌नि। आन्‍कान्‍का दि तोक्‍तुम्‍का?”

²⁸ येसुआ मोचि म़लोचि, “अ़नुछ्‍या अ़ङ्‌का खानानिन लोनानिन, खानानिन साङ-साङ्‌आ अ़ङ्‌का त़त़ङ्‌ताङ्‌युङ्‌साङ्‌ऩङ, खाउग़रि म़नाओ अ़छा झारा अ़ऩङ्‌वा य़ङ्‌चि मुन्‍माय़ङ ग़रिदा साम्‍स़रिओ हाङ्‌युङ्‌खादा युङ, मोन्‍ग़रि अ़ङ्‌का कात़ङ्‌चिछाङ बारकाहाङ्‌युङ्‌खाचिदा त़युङिन, खोन्‍कि इस्राएल्‌दाओ बारकाभुङ्‌चिओ अ़चुछ़ङ त़छेन्‍तुम्‍च़म।

²⁹ खोन्‍कि साङ-साङ्‌आ अ़ङ्‌ऩङ्‌ओ निम्‍पाङ अ़खिम माङ्‌लो अ़द़क्‍छा-बुवाचि माङ्‌लो अ़ना-निछाचि माङ्‌लो अ़पापा-अ़मामाचि माङ्‌लो अ़छाचि माङ्‌लो अ़व़क्‍स़ङ्‌चि छिरुयुङ्‌सुचि, मोसाआ सयेकास़रो तोक्‍तु, खोन्‍कि अ़लुक्‍निन्‌ओ ह़ङ्‌म़ङ्‌ओ पाङ तोक्‍तु।

³⁰ मेन बुया कालिचि देङ्‌दा म़लि, खोन्‍कि देङ्‌दा कालिचि बुया म़लि।”