लुका 3 - बान्तावा राईबप्तिस्मा काप़ युहन्नाआ निनाम्हाङ्य़ङ खालुसुओ मत्ति ३:१-१२ ; मर्कुस १:१-८ ; युहन्ना १:१९-२८ 1 रोम्दाओ तोक्पोहाङ कैसर तिबेरिअस्आ हाङ मुवाङाओ पन्ध्रकादोङ्दा पन्तियस पिलातस यहुदिया धिखाहुप्दा धिखाहुप हाङ मुवाङा। मोन्ग़रि हेरोद गालिल धिखाहुप्दाओ हाङ्काचि मुवाङा, खोन्कि मोसोओ अ़निछा फिलिप्आ इतुरिया खोन्कि त्राखोनितिस धिखाहुप्दाओ हाङ्काचि मुवाङा। मो योक्दा अबिलेने धिखाहुप्दा लुसानियास हाङ्काचि मुवाङा। 2 मोन्ग़रि हन्नास खोन्कि कैयाफा निनाम्हाङ्ओ मुलो काब़क्पा याआङाचिहिदा लेक्लेक्लेक्वाओदा युङाङाओ जकरियाओ अ़छा युहन्नाएदा निनाम्हाङ म़चेवा। 3 युहन्ना यर्दन याङ्वामाओ झारादात्नि खाराकि म़नाचि ओवात्नि खाएत्मा पुङ्सुचि, “आम्नुओ हेवाचि छिरानुम्च़म्कि बप्तिस्मा लोआनिन। खोन्कि निनाम्हाङ्आ आम्नुओ हेवाचि ऩलेत्तिन्प़न!” 4 ओवात्नि निनाम्हाङ्य़ङ खाकालु यसैयाआ छाप्लाखादा छाप्तुओ य़ङ्चि म़ताला, “लेक्लेक्लेक्वाओदा अ़क्छा अ़धिवा अ़य़ङ्आ ओवात्नि य़ङ्याङ, ‘हाङ्पाओ अ़लाम चुम्सानुम। खोक्को म़कोन्ओ लाम्चि ऩऱक्निन्लो मुवानुम्च़म। 5 झारा खोङ्पाखाङ्पिचि भुक्माचिदोत, झोन्खिलोङ-झान्खिलोङ भ़ऱचि मेम्माचिदोत। ऱक्याङ्ओ लाम अ़ऱक्निन्लो लिमादोत, खोन्कि अ़त्याङ्ओ लाम नुलोक लिमादोत। 6 निनाम्हाङ्आ म़नाचि म़लेइसुचिओ झारा म़नाचिआ अ़खाङ।’” 7 ब़द्धे म़नाचि बप्तिस्मा लोक्सि युहन्नाएदा म़ता। मेन युहन्नाआ मोचि लोचि, “खानानिन अ़छ़क याक्याङ्ओ प़ओ अ़छाचि ओ! तामा मुयाङ्ओ निनाम्हाङ्ओ अ़चुमाइसुङ्दाङ्का फुङ्मा खानानिन साङ्आ चाप्ऩचेत्तिन? 8 खानानिन्आ अ़नुछ्याङा हेवा त़छिरुम्निओ य़ङ आम्नुओ काचिसिवालाम्पा खाङ्मुसानुम। खोन्कि ‘आन्कान अब्राहाम्ओ अ़छावारिचि लिसिन्ओसा निनाम्हाङ्ओ अ़चुमाइसुङ्दाङ्का लेरिन्का’नि आम्नुओ मिन्मादा मान्य़ङ्दानिन। अ़ङ्का खानानिन लोनाङ्नानिन, निनाम्हाङ्आ ओ लुङ्चिदाङ्काछाङ अब्राहाम्ओ अ़छावारिचि मुमा म़ऱचि। 9 ओन्ग़रिङा स़ङ्ताङ्चिओ अ़चुभेन्दा छ़ङ छेन्माओ बान्त युङ्सुचिउयुङ्सु। अ़नुवाक सिवा अ़सिनिन्ओ झारा स़ङ्ताङ्चि तेइसुचिकि मिदा वेइसुदिसुचि।” 10 म़नाचिआ युहन्ना अ़सेना, “खोन्नालो आन्कान्का दे च़मादोत?” 11 खोसाआ मोचिओ अ़चुय़ङ लासु, “ह्वातात तित कातोक्आ मान्तोक्कादा अ़क्तात प़ने, खोन्कि चामायु कातोक्आ मान्तोक्कादा प़ने।” 12 दाम्दु कालात्पाचिछाङ बप्तिस्मा लोक्सि म़ताकि युहन्ना अ़सेना, “काचिन्पो, आन्कान्का दे च़मादोत?” 13 खोसाआ मोचि लोचि, “देम लात्मानि ऩलोन, मोदाङ्का च़लोक दाम्दु मान्लात्दानुम।” 14 खोन्कि रात्खामिचिआ अ़सेना, “आन्कान्का दे च़मादोत?” युहन्नाआ मोचि लोचि, “राकाङ्थेत्नि मुयाङ्सा फेक्वा मान्लात्दानिन, खोन्कि सोज्जे मान्ह़त्दानुम्च़म। आम्नुओ काचिलुङ्दा आम्नुओ सोम्सेत्तानिन्चिन।” 15 म़नाचिआ कालेन्पा ख्रिस्त अ़हुङायुङ्साङाओसा मोचिआ अ़चुमिन्मादा “युहन्नाङा ख्रिस्त म़युङ्याङ हे?”नि अ़मित्ताङा। 16 खोवात्निओसा युहन्नाआ झारा लासुलोचि, “अ़ङ्का ना खानानिन चाक्वाआ बप्तिस्मा प़नानिन, मेन अ़क्छा अ़ङ्कादाङ्का च़लोक सावापोरिओ म़मुयाङ। अ़ङ्का ना खोक्कोसोओ अ़चुफेङ्ताओ अ़छुम्खाचि हुत्माछाङ अ़ङ्का अ़खान्ऩङ। खोक्कोसाआ खानानिन सेङ्लावाआ खोन्कि मिआ बप्तिस्मा ऩप़न। 17 खोक्कोसोओ अ़चुचाथाप्खा खोक्कोसोओ अ़चुछुक्दा याक्याङ, खोन्कि खोक्कोसोओ अ़चुचा नुक्खा खाला अ़सेङ खोन्कि अ़चुछुमाचा स़ङ्कुलुधुन्दा अ़कोप, मेन अ़होम्पा देम्खाछाङ अ़स़निन्दानिन्ओ मिदा अ़ह़त्खान।” 18 ओवाको नि यायोक्चिछाङ ब़द्धे प़याङ्सा युहन्नाआ म़नाचि नुय़ङ्खान खाएत्तुचि। 19 हान हेरोद हाङ एन्तिपास्आ अ़निछा फिलिप्ओ अ़खिम्हाङ्मा हेरोदियास सायाकाम्सु खोन्कि खोसाआ निचिछाङ ब़द्धे अ़त्लो काचिचि मुचिओसा युहन्नाआ खो यासान्तु। 20 खोन्ओसा हेरोद्आ युहन्ना छेक्खाखिम्दा छेक्तुकि च़लोक अ़त्लो अ़काचि तेप्तु। येसुओ अ़चुबप्तिस्मा लिसाओ मत्ति ३:१३-१७ ; मर्कुस १:९-११ 21 बुया झारा म़नाचि बप्तिस्मा म़लोआङाहिदा येसुछाङ बप्तिस्मा म़लोआ। खोन्कि खोक्को याम़माराङाहिदा निनाम्मा होरा। 22 खोन्कि सेङ्लावा साप्दुकुत्वावात्नि खोक्कोएदा म़धान्तान्चिन। खोन्कि निनाम्मादुङ्का अ़क्तात ओवाको य़ङ ता, “खाना अ़ङ्को अ़ङ्छा ओ। अ़ङ्का खाना सोमातुक्नाङ्ना। खानाएदा अ़ङ्को ब़द्धे अ़ङ्ऩङानुयाङ।” येसुओ अ़चुसुन्तुम्चि मत्ति १:१-१७ 23 येसुआ अ़चुकाचि अ़पुङ्साहिदा खोक्को तिस्कादोङ लेकाओ म़लिसायुङ्सा। म़नाचिआ योसेफ्ङा खोक्कोसोओ अ़चुपानि अ़मित्ताङा। योसेफ्ओ अ़पा एलि युङाङा। 24 एलिओ अ़पा मत्तात, मत्तात्ओ अ़पा लेबि, लेबिओ अ़पा मल्कि, मल्किओ अ़पा यान्ना, यान्नाओ अ़पा योसेफ। 25 ओवात्निङा योसेफ्ओ अ़पा मत्ताथियास, मत्ताथियास्ओ अ़पा आमोस, आमोस्ओ अ़पा नहुम, नहुम्ओ अ़पा इसलि, इसलिओ अ़पा नग्गै। 26 नग्गैओ अ़पा माथ, माथ्ओ अ़पा मत्ताथियास, मत्ताथियास्ओ अ़पा सेमैन, सेमैन्ओ अ़पा योसेख, खोन्किना योसेख्ओ अ़पा योदा युङाङा। 27 योदाओ अ़पा योआनान खोन्कि योआनान्ओ अ़पा रेसा, रेसाओ अ़पा यरुबाबेल, यरुबाबेल्ओ अ़पा सालतिएल, सालतिएल्ओ अ़पा नेरि। 28 नेरिओ अ़पा मल्कि, मल्किओ अ़पा अद्दि, अद्दिओ अ़पा कोसाम, कोसाम्ओ अ़पा एलमादम, एलमादम्ओ अ़पा एर। 29 एरओ अ़पा यहोसु, यहोसुओ अ़पा एलिएजर, खोन्कि एलिएजरओ अ़पा योरिम, योरिम्ओ अ़पा मत्तात, मत्तात्ओ अ़पा लेबि। 30 लेबिओ अ़पा सिमियोन, सिमियोन्ओ अ़पा यहुदा, खोन्कि यहुदाओ अ़पा योसेफ, योसेफ्ओ अ़पा योनान, योनान्ओ अ़पा एल्याकिम युङाङा। 31 एल्याकिम्ओ अ़पा मलेआ खोन्कि मलेआओ अ़पा मिन्ना युङाङा। मिन्नाओ अ़पा मत्ताथा, मत्ताथाओ अ़पा नातान, नातान्ओ अ़पा दाउद। 32 दाउद्ओ अ़पा यिसै, यिसैओ अ़पा ओबेद, ओबेद्ओ अ़पा बोअज, बोअज्ओ अ़पा सल्मोन, सल्मोन्ओ अ़पा नहसोन। 33 नहसोन्ओ अ़पा अम्मिनादाब, अम्मिनादाब्ओ अ़पा आराम युङाङा। आराम्ओ अ़पा हेस्रोन, हेस्रोन्ओ अ़पा फारेस, फारेस्ओ अ़पा यहुदा। 34 यहुदाओ अ़पा याकुब, याकुब्ओ अ़पा इसहाक, इसहाक्ओ अ़पा अब्राहाम, अब्राहाम्ओ अ़पा तेरह खोन्कि तेरहओ अ़पा नाहोर युङाङा। 35 नाहोरओ अ़पा सरुग, सरुग्ओ अ़पा ऱउ, ऱउओ अ़पा पेलेग, खोन्कि पेलेग्ओ अ़पा एबेर, एबेरओ अ़पा सेलह। 36 सेलह्ओ अ़पा केनान, केनान्ओ अ़पा अरपक्सद खोन्कि अरपक्सद्ओ अ़पा सेम, सेम्ओ अ़पा नोआ खोन्कि नोआओ अ़पा लेमेख। 37 लेमेख्ओ अ़पा मतुसेलह, मतुसेलह्ओ अ़पा हनोक, हनोक्ओ अ़पा येरेद खोन्कि येरेद्ओ अ़पा महलालेल, महलालेल्ओ अ़पा केनान। 38 केनान्ओ अ़पा एनोस, एनोस्ओ अ़पा सेत खोन्कि सेत्ओ अ़पा आदम युङाङा। आदम्ओ अ़पा निनाम्हाङ म़युङाङा। |
© Wycliffe Bible Translators, Inc. All rights reserved.
Wycliffe Bible Translators, Inc.