लुका 24 - बान्‍तावा राई

येसु म़खोन्‍तालोन्‍ताओ

¹ साताओ बुयाओ लेन अ़वाय़ङ फ़ऱऱवा लिसाङाहिदा मो मेत्‍छामाचिआ म़चुम्‍सुयुङ्‌सुचिओ नाम्‍म़नुवाङाओ मो सुङ्‌चि म़खात्‍तुचिकि एप्‍मादा म़खारा।

² मोचिआ एप्‍माओ अ़दो दिप्‍खा लुङ्‌ताक ध़साखाइसायुङ्‌साओ अ़धिरा।

³ मेन मोचि एप्‍माहुत्‌दा म़वाङाहिदा हाङ्‌पा येसुओ अ़चुस़पोक मान्‍धित्‌अ़दा।

⁴ मोन्‍ग़रि मोचि ओहा ना मोहा म़लिसायुङ्‌सा। खोन्‍ग़रि छोक्‍छोक्‍छोक्‌वाओ तित हुम्‍साङाचिओ ह़वाङ दुवाछाचि म़प्‍च़क़क्‌दा मोचिओ अ़चुच़क्‌दा खाङ्‌मुसाचिचिन।

⁵ मो मेत्‍छामाचिओ अ़चुक़माकाराकि बाखाह्‍युत्‍नि अ़चुङाइवा अ़पोम्‍सा। मेन मो ह़वाङ दुवाछाचिआ अ़लोवाचुचिन, “खानानिन्‌आ अ़ह़ङ म़ना देकि म़सुवादाओचिएदा त़लामुम्‌योम?

^6-7 येसु ओदा मात्‍द़ङ्‌चि, खोक्‍को म़सुवादाओदाङ्‌का म़खोन्‍तालोन्‍तायुङ्‌सा! गालिल्‌या म़युङाङाहिदा खोक्‍कोसाआ खानानिन दे ऩलोन्‌युङ्‌सिन्‌ओ मो मित्‍तानुम। खोक्‍कोसाआ ‘अ़ङ्‌का म़नाओ अ़छा हेवा कामु म़नाचिओ अ़चुछुक्‌दा छुक्‍ङा खोन्‍कि क्रुस्‌दा ऩख़न्‍ङासेत्‍ङा खोन्‍कि सुम्‌कालेन्‌दा लाङाखोन्‍ङालोन्‍ङा’नि म़य़ङा।”

⁸ खोन्‍ग़रि मोचिआ खोक्‍कोसोओ अ़चुय़ङ अ़मित्‍ता।

⁹ खोन्‍किना मोचि एप्‍मायाङ्‌का म़लासाखाराकि ओ य़ङ्‌चि एघारकापाङ अ़चुकाखेङ्‌पाचि खोन्‍कि निचि झारा खाम़एत्‍तुचि।

¹⁰ मो मेत्‍छामाचि मग्‍दलिनिदाओ मरियम, योअन्‍ना खोन्‍कि याकुब्‌ओ अ़मा मरियम म़याआङा। खोन्‍कि मोचिएनान म़याआङाओ नि मेत्‍छामाचिआछाङ ओ य़ङ्‌चि छाम्‍माय़ङ्‌चि खाम़एत्‍तुचि।

¹¹ मेन मोचिआ ओ य़ङ सोज्‍जेओनि अ़मित्‍ताकि साकोङ्‌छ़ङ मान्‍मुअ़दा।

¹² मेन पत्रुस पुवालोन्‍ताकि एप्‍माया लोत्‌याङ्‌सा खारा, खोन्‍कि पोम्‍साकि चोउखोहिदा अ़नुवाक अ़रिप्‍खा तित्‌चि ओन्‍ङा म़धुवाङाओ खाचि। मोवात्‍नि लिसाओ खाकि दोम्‍दायाङ्‌सा खो खारालावा।

इम्‍माउस खात्‍खा लाम्‌दा येसु

¹³ मो लेन्‌दाङा येसुओ अ़चुकाखेङ्‌पाचिदा ह़वाङ यरुसलेम्‌दाङ्‌का आप्‍फात एघार किलोमितरा अ़थायाओ इम्‍माउस अ़ऩङ मुवाङाओ अ़क्‌तात तेन्‌ह्‍यात्‍नि खाराङाचि।

¹⁴ यरुसलेम्‌दा लिसाओ झारा य़ङ्‌चिओ अ़तुक्‌वादा मोचि खोचि-खोचिएदा हान्‍ताङाचि।

¹⁵ मोचि खोचि-खोचिएदा हान्‌याङ्‌सा दुम्‍छ़राङाचिओ ग़रि येसु आप्‍पि अ़चुच़क्‌दा म़ताकि मोचिएनान अ़क्‍नि कोन्‍मा अ़पुङ्‌सा।

¹⁶ मेन मोचिओ अ़चुम़क खोक्‍को सिन्‍मा मान्‍ऱअ़दाचुलो म़मेत्‍तुप़युङ्‌सुचि।

¹⁷ येसुआ मोचि म़सेनुचि, “खानाचि कोन्‌याङ्‌सा दिसोओ अ़तुक्‌वादा अ़क्‍छा निएदा त़हान्‍चिङ्‌चि ओ?” मोचिओ अ़चुङाइवा सुवाखारायुङ्‌साकि चोप्‍नि एवादिसाचि।

¹⁸ मोचि ह़वाङ्‌दा क्‍लेओपास्‌नि अ़ऩङ मुवाङाओ म़नाआ लो, “यरुसलेम त़युङिन्‍लान्‍किछाङ आइमित मोया दे लिसाचिआयुङ्‌सानि खानानिन त़सिन्‍नानानिमिन?”

¹⁹ येसुआ मोचि म़सेनुचि, “खाक्‍को य़ङ?” मोचिआ अ़लासालोवाचु, “नासरत्‌ओ येसुओ अ़तुक्‌वादा। खोक्‍को अ़क्‍छा निनाम्‍हाङ्‌य़ङ खाकालु म़युङाङा, खोन्‍कि निनाम्‍हाङ्‌ओ खोन्‍कि झारा म़नाचिओ निम्‍पाङ काचि म़मुवाङाहिदा खोन्‍कि म़चिन्‍तुङुचिहिदा सावापोरि म़मुवाङा।

²⁰ मेन मुलो काब़क्‍पाचि खोन्‍कि आन्‍कातित्‍पाचिआ खोक्‍को सेत्‍माओ दन्‍दा प़मा निकिना म़प़लाउचि खोन्‍किना खोक्‍को क्रुस्‌दा अ़ख़न्‍ता।

²¹ इस्राएल कालेन खोक्‍कोङाओनि आन्‍कान्‍का मित्‍तुम्‌योम्‍काओ। मेन खोक्‍को अ़सेरा, मोन ओन्‍ङा माआङ, खोक्‍को अ़सेराओ सुम्‌कालेन लिसाचिआयुङ्‌सा।

²² खोन्‍कि नि आन्‍काओ रुहुप्‌दाओ खा-खाक्‍को मेत्‍छामाचिआ आन्‍कान्‍का अ़दोम्‍तिन्‍दान्‍कालो ऩमुन्‌युङ्‌सिन्‍का। मोचि आय़ अ़वाय़ङ एप्‍मादा म़खारा ओ,

²³ मेन येसुओ अ़चुस़पोक मोदा मान्‍धित्‌अ़दा। मोचि म़बानाकि आन्‍कान्‍का खाऩएत्‍तिन्‍का, ‘आन्‍कान्‍का निनाम्‍हाङ काफाचि खाम्‍च़म्‍का, मोचिआ येसु अ़ह़ङ म़युङ्‌याङ्‌नि म़लोचि’नि।

²⁴ खोन्‍किना आन्‍कान्‍काएदाङ्‌का खा-खाक्‍को यावाचि एप्‍माया म़खारा। खोन्‍कि मो मेत्‍छामाचि देत्‍नि म़य़ङाओ, खोवात्‍निङा अ़धिरा, मेन येसु मान्‍खाङ्‌अ़दा।”

²⁵ खोन्‍ग़रि येसुआ मोचि म़लोचि, “खामान्‍तुप्‍कादा म़नाचिओ, आम्‍चुओ साकोङ्‌वा चाअ़त्‍लो मान्‍तुप्‍कादा लिसायुङ्‌सा। देत्‍निकि निनाम्‍हाङ्‌य़ङ खाकालुचिआ ऩलोन्‌ओ य़ङ्‌चि साकोङ्‌छ़ङ मुमा मान्‍ऱत़दाचु ओ!

²⁶ दि निनाम्‍मादु ख्रिस्‍तओ अ़चुऩङ तोक्‍पो लिमा बुया ओ दुखाचि आङ्‌मा मान्‍दोत्‌याङ्‌चि कि?”

²⁷ खोन्‍किना मोसाओ अ़छाप्‍लाखा खोन्‍कि नि झारा निनाम्‍हाङ्‌य़ङ खाकालुचिओ अ़चुछाप्‍लाखादाङ्‌का अ़पुङ्‌साकि झारा साम्‍कालिन्‌दा येसुओ अ़तुक्‌वादा म़छाप्‍ताङाओ य़ङ्‌चिओ अ़चुतुप्‍माय़ङ्‌चि मोचि म़फोङ्‌सुप़चि।

²⁸ मोचि तामालामादोराङाओ तेन्‌ओ अ़च़क्‌दा म़ताला। येसु अ़क्‍चित ह्‍यात्‍नि खारिन्‌येन्‌वा म़चुवाखा।

²⁹ मेन मोचिआ “आन्‍काच्‍याएनान्‌ङा युङिन्‍ने। देकिनालो अ़नाम्‍प़क लिमा मुवाङ, खोन्‍कि लेन्‌छाङ ओङ्‌मा मुयाङ”निकिना राकाङ्‌थेत्‍नि येसु अ़मुवाचु। खोन्‍किना खोक्‍को मोचिएनान युङ्‌मा निकिना खिम्‍हुत्‌या म़वाङा।

³⁰ खोन्‍किना येसु मोचिएनान चा-चासि म़युङाकि पेम्‍पाक अ़क़क्‍ताकि निनाम्‍हाङ आलाङ अ़पुवा, खोन्‍कि अ़धाङ्‌साकि मोचि म़प़चि।

³¹ मोन्‍ग़रिए मोचिओ अ़चुम़क होआ, खोन्‍किना मोचिआ येसु अ़सिन्‍ताचु। मेन खोक्‍को खोचिएदाङ्‌का म़मासान्‍केसान्‍चिन।

³² मोचि अ़क्‍छा निएदा सेन्‍कासेन मुवाचि, “खोक्‍को आन्‍काचिएनान लाम्‌दा म़हान्‍ताङाहिदा खोन्‍कि आन्‍काचि साम्‍कालिन अ़फोङ्‌सा पुवाङाचिहिदा दि आन्‍चुओ साकोङ्‌वा हाक्‍हाक्‍हाक्‌वा मान्‍लि कि?”

³³ मोचि ह़वाङ मोन्‍ग़रिङा पुवालोन्‍ताचिकि यरुसलेम लासाखाराचि। खोन्‍किना एघारकापाङ अ़चुकाखेङ्‌पाचिकि खोचिएनान्‌ओचि मोदा म़कोवान्‌युङ्‌सान्‍चिन्‌ओचि अ़धिराचुचिन।

³⁴ खोन्‍कि मो एघारकापाङ काखेङ्‌पाचिआ मो ह़वाङ ओवात्‍नि म़लोचि, “हाङ्‌पा अ़नुछ्‍याङा म़खोन्‍तालोन्‍तायुङ्‌सा, खोन्‍कि सिमोन्‌एदा खाङ म़मुसान्‍चिन।”

³⁵ खोन्‍किना लाम्‌दा दे म़लिसाओ, खोन्‍कि येसुआ पेम्‍पाक अ़धाङ्‌साहिदा मोचिआ देत्‍नि खोक्‍को अ़सिन्‍ताचुनिओ य़ङ्‌चि मोचि ह़वाङ्‌साआ खाअ़एत्‍ताचुचि।

येसु अ़चुकाखेङ्‌पाचिएदा खाङ म़मुसान्‍चिन्‌ओ

³⁶ मोचिआ मो दुम्‌ओ अ़तुक्‌वादा खाअ़लुसाङाचुहिदाङा येसु मोचिओ अ़चुरादा म़एवाकि मोचि म़लोचि, “खानानिन सेवाङ्‌नि लिसानिन!”

³⁷ मेन मोचिओ अ़चुलालोआकि क़याङ्‌सा, “आन्‍कान ना स़लावा खाम्‌योम”नि म़मिना।

³⁸ मेन येसुआ मोचि म़लोचि, “खानानिन देकिना आम्‍नुओ लालोक्‌याङ ओ? खोन्‍कि आम्‍नुओ मिन्‍मादा देकिना मान्‍केङ पुक्‍तुङु?

³⁹ अ़ङ्‌छुक, अ़ङ्‌लाङ्‌चि खानुम्‍च़म, अ़ङ्‌काङा ओ! अ़ङ्‌का नोप्‍ताङ्‌खाङ्‌ऩङ। स़लावाओ अ़सा, अ़य़वा अ़याक्‍निन, मेन खानानिन त़खाम्‌योम, अ़ङ्‌को ना म़याक्‌याङ।”

⁴⁰ खोवात्‍नि म़य़ङाचिआकि खोक्‍कोसाआ मोचि अ़चुछुक खोन्‍कि अ़चुलाङ खाङ्‌म़मेत्‍तुचि।

⁴¹ खोन्‍किना मोचिआ अ़चुऩङानुमाआ खोन्‍कि दोम्‍मादामाआ साकोङ्‌छ़ङ मुमा मान्‍ऱअ़दाहिदा खोक्‍कोसाआ मोचि म़लोचि, “दि खानानिन्‌एदा अ़क्‍चिलोक चामायु युङ्‌याङ?”

⁴² काङ्‌माय़ङ ङाओ अ़क्‍धाङ मोचिआ खोक्‍को अ़पुवा।

⁴³ खोन्‍किना येसुआ मो अ़लोआकि मोचिओ अ़चुबुदाङा अ़चा।

⁴⁴ खोक्‍कोसाआ मोचि म़लोचि, “खानानिन्‌एनान युङाङ्‌याङ्‌हिदा अ़ङ्‌का चेवाङ्‍ओ य़ङ्‌चि ओचिङा ओ: मोसाओ अ़य़ङ्‌हुप, निनाम्‍हाङ्‌य़ङ खाकालुचिओ छाप्‍लाखा खोन्‍कि साम्‍ऱङ्‌भुङ्‍ओ छाप्‍लाखादा छाप्‍ताओ अ़ङ्‌तुक्‌वादाओ झारा य़ङ्‌चि तामालामाङादोत।”

^45-46 खोन्‍किना साम्‍कालिन तुप्‍मा निकि खोसाआ मोचिओ अ़चुतुप्‍माताया म़होत्‍तुप़चिकि मोचि म़लोचि, “ओवात्‍नि छाप्‍तायुङ्‌सा: ख्रिस्‍तआ दुखा आङ्‌मादोत खोन्‍कि सुम्‌कालेन्‌दा सुवादाओदाङ्‌का खोन्‍मालोन्‍माङादोत,

⁴⁷ खोन्‍कि ‘देत्‍नि हेवादाङ्‌का लामाकि हेवा लेत्‍माय़ङ तोक्‍तिन’निओ य़ङ यरुसलेम्‌दाङ्‌का पुङ्‌किना झाराकारावाचितारि ख्रिस्‍तओ अ़चुऩङ्‌दा खालुमादोत।

⁴⁸ खानानिन अ़ङ्‌तुक्‌वादाओ झारा य़ङ्‌चिओ अ़चुसालुम्‍स़ङ्‌चि ओ।

⁴⁹ अ़ङ्‌पापा निनाम्‍हाङ्‌आ य़सुङ निकिना ऩहिप्‍तिन्‌ओ, अ़ङ्‌का खानानिन्‌एदा मो य़सुङ। मेन धानाङ्‌का सावा मान्‍तोक्‍त़युक्‍तुम्‌तारि खानानिन ओ यरुसलेम्‌दाङा युङायुङ्‌सानिन।”

येसु निनाम्‍मादुत्‍नि म़खाराओ

⁵⁰ खोन्‍किना येसुआ मोचि बेथानिया तेन्‌यातारि म़खात्‍तुचि, खोन्‍कि अ़चुछुक अ़थेन्‍ताकि मोचि आसिखा म़प़चि।

⁵¹ खोक्‍कोसाआ आसिखा म़प़ङुचिहिदाङा खोक्‍को मोचिदाङ्‌का निनाम्‍मादुत्‍नि अ़थेन्‍ताखात्‍ता।

⁵² मोचिआ येसुएदा म़बोम्‍सान्‍चिन खोन्‍कि अ़न्‍नुनु अ़चुऩङानुयाङ्‌सा यरुसलेम म़लासा।

⁵³ खोन्‍कि मोचि निनाम्‍हाङ चोन्‌याङ्‌सा निनाम्‍हाङ ब़क्‍खाखिम्‌दा म़युङायुङ्‌सा।