लुका 20 - बान्‍तावा राई

येसुओ अ़चुपाङ्‌ओ अ़तुक्‌वादा सेन्‍माय़ङ

¹ अ़क लेन निनाम्‍हाङ ब़क्‍खाखिम्‌दा येसुआ म़नाचि म़चिन्‍तुयुङ्‌सुङुचि, खोन्‍कि नुय़ङ्‌खान खाम़एत्‍तुयुङ्‌सुङुचि। खोन्‍ग़रि मुलो काब़क्‍पाचि, य़ङ्‌हुप काचिन्‍पाचि खोन्‍कि अ़चुअ़धुवाचि खोक्‍कोएदा म़ता।

² खोन्‍कि मोचिआ खोक्‍को अ़सेना, “आन्‍कान्‍का लोनि, साङ्‌कोओ अ़पाङ्‌आ खानानिन ओ काचिचि त़मुम्‌योम्‍च़म? साङ्‌आ खानानिन ओ पाङ ऩप़न?”

³ येसुआ मोचि म़लासुलोचि, “अ़ङ्‌काछाङ खानानिन अ़क्‌तात य़ङ सेन्‍नानिन, खोन्‍कि खानानिन्‌आ अ़ङ्‌का खाएत्‍ताङ्‌ऩङ।

⁴ युहन्‍नाआ बप्‍तिस्‍मा प़मा पाङ खादाङ्‌का तोक्‍तु ओ, निनाम्‍हाङ्‌दाङ्‌का हे म़नादाङ्‌का?”

⁵ मोचि अ़क्‍छा निएदा दुम म़छ़रा, “आन्‍कान निनाम्‍मादुङ्‌कानि य़ङिन्‌नालो ‘देकि खानानिन्‌आ खो साकोङ्‌छ़ङ मान्‍मुत़दोम?’नि खोक्‍कोसाआ म़सेन।

⁶ मेन ‘म़नादाङ्‌का’नि आन्‍कान य़ङिन्‌नालो ना झारा म़नाचिआ आन्‍कान लुङ्‌ताक्‌आ म़कोक। देकिनालो युहन्‍ना निनाम्‍हाङ्‌य़ङ खाकालुनि मोचिआ साकोङ्‌छ़ङ अ़मुयाङ।”

⁷ खोन्‌ओसा मोचिआ येसु अ़लासालोवा, “युहन्‍नाआ बप्‍तिस्‍मा प़मा पाङ खादाङ्‌का ताओ आन्‍कान्‍का अ़सिन्‍तिमिन्‍का।”

⁸ खोन्‍कि येसुआ मोचि म़लोचि, “अ़ङ्‌काछाङ खाक्‍को पाङ्‌आ ओ काचिचि मुङ्‌योङ्‌च़ङ, अ़ङ्‌काछाङ खानानिन अ़लोनान्‍निमिन।”

व़क काचि कामुचिओ अ़चुतुक्‌वादाओ दोय़ङ्‌ला

⁹ येसुआ ओ दोय़ङ्‌ला म़नाचि खाम़एत्‍तुचि, “अ़क्‍छा म़नाआ अङ्‌गुराखा पाउ खोन्‍कि व़क काचि कामुचिएनान अङ्‌गुराखा हामाचामादा प़दोचिकि खो ब़द्‍धेकालेन्‌ओ निम्‍पाङ प़न्‍था खारा।

¹⁰ अङ्‌गुरा तुमाओ ग़रि खोसाआ अ़हारुक्‌चिएदाओ अ़क्‍छा अङ्‌गुराओ अ़लोक लासि अ़व़क काचात्‌चिएदा छुत्‍तु। मेन अ़व़क काचात्‌चिआ मो हारुक अ़झोम्‍ताकि अ़ब़ङ्‌सा खोन्‍कि खो मोहाङा अ़लासाखाइसा।

¹¹ खोसाआ नि अ़हारुक छुत्‍तु, मेन मोचिआ मोछाङ अ़ब़ङ्‌सा, अ़साया अ़पेप्‍ता खोन्‍कि मोहाङा अ़लासाखाइसा।

¹² खोन्‍किना खोसाआ सुम्‌कापाङ्‌ओतात छुत्‍तु। मेन मोचिआ मोछाङ खेन अ़वाइसाकि अ़ऱसाखाइसा।

¹³ खोन्‍किना अङ्‌गुराखा हाङ्‌पा य़ङा, ‘हान अ़ङ्‌का दे च़ङा? अ़ङ्‌का सोमातुक्‍तुङ्‌योङ्‌ओ अ़ङ्‌छा छुत्‍तुङ। खोक्‍को ना मोचिआ साया अ़मेत।’

¹⁴ मेन अ़व़क काचात्‌चिआ अ़चुछा अ़खाकि अ़क्‍छा निएदा म़य़ङा, ‘ओ ना पाङ्‌कातोक ओ। आन्‍कान मो सेरुम्‍ने, खोन्‍कि आन्‍कान पाङ्‌कातोक लिसिन!’

¹⁵ खोन्‍किना मोचिआ अ़चुछा अङ्‌गुराखादाङ्‌का बुङ्‌खाया अ़सारा खात्‍ताकि अ़सेरा। हान अङ्‌गुराखाओ अ़हाङ्‌पाआ मोचि दे मुचि?

¹⁶ अङ्‌गुराखाओ अ़हाङ्‌पा ताकि व़क काचात्‌चि म़सेरुचि खोन्‍कि अङ्‌गुराखा नि व़क काचात्‌चि म़प़चि।” खोन्‍किना म़नाचिआ ओ अ़एनाकि म़य़ङा, “ओवात्‍नि देम्‍खाछाङ अ़लिनिन्‍ने!”

¹⁷ मेन येसुआ मोचि म़खाचिकि म़लोचि, “खोन्‍नालो ओवात्‍नि छाप्‍ताओसो अ़तुप्‍माय़ङ दि ओ? ‘खिम कामुचिआ ऩङाअ़छिराओ लुङ्‌ताक मो खुचुरोङ्‌दाओ मुलो लुङ्‌ताक म़लिसायुङ्‌सा।’

¹⁸ खाक्‍को म़ना मो लुङ्‌ताक्‌दा धा, मो योकोचेम्‍पा लि, खोन्‍कि साङ्‍एदा मो लुङ्‌ताक धा, मोसाआ मो खाक्‍बुन मु।”

कैसरएदा दाम्‍दु छोन्‍मा

¹⁹ य़ङ्‌हुप काचिन्‍पाचि खोन्‍कि मुलो काब़क्‍पाचिआ मो दोय़ङ्‌ला येसुआ खोचिओ अ़चुदेङ्‌सालाप्‍पादा म़य़ङाओ निकिना अ़सिन्‍तालावा। खोन्‌ओसा येसु मोन्‍ग़रिङा लाप्‍मा अ़लाप्‍ता, मेन मोचि म़नाचिदाङ्‌का अ़चुक़माकाराकि लाप्‍मा मान्‍ऱअ़दा।

²⁰ येसुआ काचि फिसु हे निकि मोचिआ अ़खायुङ्‌साङा, खोन्‍कि अ़नुवाक लिसिन्‌वा काच़चि खासुक्‍सि येसुएदा म़छुत्‍तुचि। देकिनालो येसु म़चेप्‌ओ अ़चुय़ङ्‌दा लाप्‍माकि रोमि धिखाहुप काखाङ्‌ओ अ़छुक्‌दा खोक्‍को पाक्‍माप़मानि म़मिनाङा।

²¹ खोन्‍किना खाकासुक्‌चिआ येसु अ़सेना, “काचिन्‍पो, आन्‍कान्‍का सिन्‍तुम्‌योम्‍का, खानानिन अ़छ़ङ त़चेविन खोन्‍कि त़चिन्‍तुम्‍च़म, खोन्‍कि खानानिन साङ्‌लिप्‍पाछाङ त़वाङिमिन, मेन खानानिन निनाम्‍हाङ्‌ओ अ़चुलाम अ़छ़ङ खात़चिन्‍तिन।

²² हान आन्‍कान्‍का लोनि, आन्‍कान्‍का रोमि तोक्‍पोहाङ कैसरएदा दाम्‍दु छोन्‍मामोसाओ अ़य़ङ्‌हुप्‌आ अ़प़न्‍का हे अ़प़न्‍मिन्‍का?”

²³ मेन येसुआ मोचिओ अ़चुचाप्‍चा मिन्‍मा अ़सिन्‍ताकि मोचि म़लोचि,

²⁴ “अ़ङ्‌का अ़क्‌तात फेक्‌वा पुवाङ्‌ऩङ। ओदा साङ्‌कोओ अ़ङाइवा खोन्‍कि अ़ऩङ सेप्‍तायुङ्‌सा?” मोचिआ “कैसरओ”नि अ़लोवा।

²⁵ येसुआ मोचि म़लोचि, “खोन्‍नालो दि कैसरओ, मो हाङ कैसरङा पुवानुम, खोन्‍कि दि निनाम्‍हाङ्‌ओ, मो निनाम्‍हाङ पुवानुम।”

²⁶ खोन्‍कि मोचिआ म़नाचिओ अ़चुबुदा येसु म़चेवाओ य़ङ्‌दा फिमाय़ङ मान्‍धित्‌अ़दा। खोन्‍कि खोक्‍कोसाआ म़लासुलोचिओ य़ङ्‌दा मोचि दोम्‍तुदोचिकि वाइवेत म़युङा।

खोन्‍मालोन्‍मा खोन्‍कि सायाकाम्‍मा

²⁷ खोन्‍किना अ़क्‍चित्‌कापाङ म़स़दाओचि ऩखोन्‍निन्‍लोन्‍निन्‌नि काय़ङ सदुकिचि येसुएदा म़ता।

²⁸ मोचिआ येसु अ़सेना, “काचिन्‍पो, निनाम्‍हाङ्‌य़ङ खाकालु मोसा य़ङायुङ्‌सा, खाक्‍कोसोओ अ़बुवा छा मान्‍तोक्‍माङ स़दाकि अ़खिम्‍हाङ्‌मा छिरुदानालो अ़बुवाओ निकिना अ़निछाआ मेन्‍मित्‍मा सायाकाम्‍मादोत, खोन्‍कि अ़बुवाओ निकिना छातोक्‍मा प़मादोत निकिना मोसाओ अ़य़ङ्‌हुप्‌दा आन्‍कान म़छाप्‍तापुवायुङ्‌सा।

²⁹ अ़क्‍खिम्‌दा सात्‌कापाङ द़क्‍छाचि म़याआङा। कुम्‍पा सायाकाम्‍सा खोन्‍कि छा मान्‍तोक्‍माङ मो सुवादा।

³⁰ खोन्‍कि मुक्‍सुछाङ छा मान्‍तोक्‍माङ सुवादा।

³¹ खोन्‍कि सुम्‍पाङ्‌ओतात्‌आछाङ मो मेन्‍मित्‍मा सायाकाम्‍सु। खोन्‍कि मोवात्‍निङा सात्‌कापाङ्‌माङ छा मान्‍तोक्‍माङ म़सुवादा।

³² आदेङ्‌माङ, मो मेन्‍मित्‍माछाङ सुवादा।

³³ खोन्‍नालो मोचि म़लाखोन्‍लोन्‌हिदा मो मेत्‍छामा खाक्‍कोसोओ अ़खिम्‍हाङ्‌मा लि? देकिनालो झारा सात्‌कापाङ्‌माङ्‌आङा मो मेत्‍छामा साया अ़काम्‍सा।”

³⁴ येसुआ म़लासुलोचि, “ओ हेन्‍खामादाओ म़नाचि सायाम़काम, खोन्‍कि सायाम़काम्‍सुप़चि।

³⁵ मेन म़स़दाओदाङ्‌का खोन्‍मालोन्‍माकि मो जुगातारि तामालामा खान्‍तुचिओचिआ ना मोचि सायाम़काम ना सायाङा म़काम्‍सुप़चि।

³⁶ मोचि ऩलानिन्‍स़निन्‍दानिन, देकिनालो मोचि निनाम्‍मादुओ निनाम्‍हाङ काफावात्‍नि म़लि। खोन्‍कि मोचि म़खोन्‍तालोन्‍ताओसा निनाम्‍हाङ्‌ओ अ़छाचि ओ।

³⁷ म़सुवादाओचिओ अ़चुलामाखोन्‍मालोन्‍माओ य़ङ मोसाआछाङ स़ङ्‌फोम्‍सुवादा लेराङाओ दोय़ङ्‌लादा खाङ अ़मेत्‍ता। मोसाआ अब्राहाम्‌ओ अ़निनाम्‍हाङ, इसहाक्‌ओ अ़निनाम्‍हाङ खोन्‍कि याकुब्‌ओ अ़निनाम्‍हाङ्‌ओ निम्‍पाङ निनाम्‍हाङ बुत्‍तुङु।

³⁸ निनाम्‍हाङ म़सुवादाओचिओ अ़चुनिनाम्‍हाङ माआङ, मेन अ़ह़ङ्‌चिओ अ़चुनिनाम्‍हाङ ओ। देकिनालो निनाम्‍हाङ्‌ओ अ़चुखाङ्‌मादा झारा म़नाचि म़ह़ङ्‌याङ।”

³⁹ खोन्‍कि य़ङ्‌हुप काचिन्‍पाचिदाङ्‌का खा-खाक्‍कोचिआ येसु अ़लोवा, “हाङ्‌पो, खानानिन तोङालो त़य़ङिन्‌युङ्‌सिन।”

⁴⁰ खोन्‍किना साङ्‌आछाङ खोक्‍को दित्‍छाङ च़लोक सेन्‍माय़ङ्‌चि लामासेन्‍मा राक मान्‍मुचि।

ख्रिस्‍त साङ्‌कोओ अ़चुछा?

⁴¹ खोन्‍किना येसुआ मोचि म़लोचि, “ख्रिस्‍त दाउद्‌ओ अ़छानि म़नाचि देकि म़य़ङ्‌याङ?

^42-43 देकिनालो साम्‍ऱङ्‌भुङ्‍ओ छाप्‍लाखादा दाउद्‌आ आप्‍पि छाप्‍तुयुङ्‌सु, निनाम्‍हाङ्‌आ अ़ङ्‌हाङ्‌पा ख्रिस्‍त अ़लोवा, ‘देम्‍खातारि अ़ङ्‌का आम्‍ङेङ्‌चि आम्‍लाङ्‌थेम्‍भेन्‌यु अ़मुऩङ्‌च़ङ मोन्‌तारि खाना अ़ङ्‌चुप्‍ताङ्‌छुक्‌लिप्‍पा युङा।’

⁴⁴ दाउद्‌आङा खोक्‍को ‘हाङ्‌पो’नि लोनालो देत्‍नि ख्रिस्‍त दाउद्‌ओ अ़छा लिमा ऱ?”

य़ङ्‌हुप काचिन्‍पाचिओ अ़चुतुक्‌वादाओ चाप्‍चेत्‍मा

⁴⁵ खोन्‍किना झारा म़नाचिआ अ़एनाङाहिदा येसुआ अ़चुकाखेङ्‌पाचि म़लोचि,

⁴⁶ “य़ङ्‌हुप काचिन्‍पाचि म़च़याङ्‌वा मान्‍च़दानिन। मोचि अ़धुवाचिआ हुम्‍खा झोम्‍लोङ्‌लोङ्‌वाओ तित्‌चि म़हुम्‍सुचिकि ओह्‍यात्‍नि-मोह्‍यात्‍नि म़कोन, हाताचिदा म़नाचिआ साऩङ्‌वाओ सेवा म़मेत्‍तुचिओ अ़चुऩङानु। यावायोक्‍खिम्‌चिदा मुलो युङ्‌खाचिदा युङ्‌मा ऩङाम़नु, खोन्‍कि खाबाचा चाखाचिदा सायातोक्‍खादा युङ्‌मा अ़चुऩङानु।

⁴⁷ मोचिआ मेन्‍मित्‍माचिओ अ़चुखिम्‌चिदाओ चासुम्‍छेन्‍बिचि म़च़न्‍तुखात्‍तुप़चि, खोन्‍कि खाङ्‌मुमाओ निम्‍पाङ ब़द्‍धे मेत्‍लोदा याम़मात। ओ म़नाचिआ ब़द्‍धे चाअ़त्‍लो दन्‍दा अ़तोक।”