लुका 19 - बान्‍तावा राई

येसु खोन्‍कि जखायस

¹ येसु यरिहोदा म़तालाकि मो सहराहुत्‌दाओ लाम लियाङ्‌सा म़खाराङा।

² मोदा अ़क्‍छा जखायस अ़ऩङ मुवाङाओ म़ना युङाङा। खो दाम्‍दु कालात्‍चिओ अ़चुमुलो खोन्‍कि कातोक म़ना मुवाङा।

³ “येसु साङ ए खा?”निकि जखायस खाङ्‌मा सुवाङा, मेन म़ना मुक्‍लाचिआ अ़इप्‍ताओसा खोसाआ येसु खाङ्‌मा मान्‍तोक्‌दो। देकिनालो खो दुन्‍ताङा।

⁴ खोन्‌ओसा जखायस येसु खाङ्‌सि बुया लोराखाराकि अ़क्‌तात वासिताङ्‌चोक्‌दु वाङा। देकिनालो येसु मो लाम लियाङ्‌सा खात्‍मा म़मुवाङा।

⁵ येसु मो तेप्‌दा म़तादिसाकि धात्‍नि अ़खा, खोन्‍कि मो अ़लोवा, “जखायस, च़क्‍नि धान्‍तान्‍चिन देकिनालो आय़ अ़ङ्‌का आम्‍खिम्‌दा याक्‍मादोत।”

⁶ खोन्‍किना जखायस च़क्‍नि धान्‍तान्‍चिन्‌कि अ़ऩङानुयाङ्‌सा अ़खिम्‌या येसु साऩङ्‌वा मेत्‍तु।

⁷ म़नाचिआ ओ अ़खाकि झारा छुऩङ्‌वा मुमा अ़पुङ्‌सा, “येसु ना हेवामिओ अ़खिम्‌दा तावाङ लिसि म़खारायुङ्‌सा।”

⁸ मेन जखायस पुवालोन्‍ताकि हाङ्‌पा लो, “हाङ्‌पो, खानुम! अ़ङ्‌का अ़ङ्‌चासुम, छेन्‍बिओ अ़क्‍धाङ मान्‍तोक्‍कादाचि प़ङ्‌च़ङ खोन्‍कि म़नाचिदाङ्‌का दियाकोनुछाङ सामाचि च़न्‍तुङ्‌युङ्‌सुङ्‌च़ङ्‌नालो अ़ङ्‌का मोसोओ चारकास़रो लासुङ्‌प़ङ्‌च़ङ।”

⁹ खोन्‍कि येसुआ मो अ़लोवा, “अब्राहाम साकोङ्‌छ़ङ मुवाओवात्‍निङा ओ म़नाआछाङ साकोङ्‌छ़ङ मुवाओसा आय़ ओ खिम्‌दा लेन्‍मा तायुङ्‌सा।

¹⁰ अ़ङ्‌का म़नाओ अ़छा ना म़माखाराओचि लाम्‍सि खोन्‍कि लेइसि ताङ्‌ओ।”

दस्‌कापाङ हारुक्‌चि प़माय़ङ फेक्‌वाओ दोय़ङ्‌ला

¹¹ मो म़नाचिआ ओ य़ङ्‌चि अ़एनाङाहिदा येसुआ मोचि अ़क्‌तात दोय़ङ्‌ला खाएत्‍मा म़पुक्‍तुचि। देकिनालो येसु यरुसलेम च़क्‌दा म़युङाङा, खोन्‍कि म़नाचिआ “निनाम्‍हाङ्‌ओ अ़चुहाङ्‌होन च़क्‍नि तामा मुयाङ”नि म़मिनाङा।

¹² खोन्‌ओसा येसुआ म़लोचि, “अ़क्‍छा अ़धुवा म़ना अ़हेन्‍कोप्‌दाओ हाङ मुमाओ पाङ तोक्‍सि अ़क्‌तात अ़थायाओ हेन्‍कोप्‌या खात्‍मा मुवाङा।

¹³ खोन्‍किना मोसाआ दस्‌कापाङ अ़हारुक्‌चि बुत्‍तुचिकि अ़क्‍छा-अ़क्‍छा अ़क सयेकालेन लेकाओ काचिलुङ फेक्‌वा प़चिकि मोचि लोचि, ‘अ़ङ्‌का लाङाताङातारि ओ फेक्‌वा याङानुम्‌कि ब़द्‍धे फेक्‌वा दुवाङानिन।’

¹⁴ मेन अ़हेन्‍कोप्‌दाओ म़नाचिआ मो ऩङाअ़छिराकि, ‘ओ म़नाआ आन्‍कान्‍काएदा हाङ्‌काचि मुओ आन्‍काओ ऩङाअ़नुनिन’नि य़ङ्‌सि मोचिआ अ़क रुहुप म़नाचि म़छुत्‍तुचि।

¹⁵ मेन हाङ मुमाओ पाङ तोक्‍तुकि मो म़ना अ़खिम्‌दा लासाता। खोसाआ फेक्‌वा प़चिओ अ़हारुक्‌चि खोएदा बुत्‍तुचि, खोन्‍कि फेक्‌वा प़चिओदाङ्‌का मोचिआ देम च़लोक फेक्‌वा अ़दुवानि सिन्‍मा लामाङा।

¹⁶ बुयाओ अ़हारुक बानाकि लो, ‘हाङ्‌पो, खानानिन्‌आ त़प़निओ फेक्‌वाआ दस्‌काफेक च़लोक फेक्‌वा दुउङ्‌युङ्‌सुङ।’

¹⁷ खोन्‍कि हाङ्‌आ अ़हारुक लो, ‘त़छोसा, अ़नुवाक हारुक! खाना दस्‌कातात सहरादा पाङ्‌मुमा त़तोक्‍तु। देकिनालो खाना अ़चुप्‍पो काचिदा सोम्‍कुवामुमायु काचि त़मुवा।’

¹⁸ नि अ़हारुक ताकि लो, ‘हाङ्‌पो, खानानिन्‌आ त़प़निओ फेक्‌वाआ नि पाच्‌कालोक च़लोक फेक्‌वा दुउङ्‌युङ्‌सुङ।’

¹⁹ खोन्‍कि हाङ्‌आ मोछाङ लासुलो, ‘खाना पाच्‌कातात सहरादा पाङ्‌मुमा त़तोक्‍तु।’

²⁰ खोन्‍किना नि अ़हारुक्‌छाङ ताकि लो, ‘हाङ्‌पो, आम्‍नुओ फेक्‌वा ओदा ओ। मो अ़ङ्‌का तित्‌ओ अ़धाङ्‌दा फेप्‍तुङ्‌कि कुम्‍सुङ्‌युङ्‌सुङ।

²¹ देकिनालो खानानिन अ़ऱन्‍मिन्‌ओ म़ना त़याइन्‌येन। खोन्‌ओसा खानानिन्‌दाङ्‌का अ़ङ्‌क़माकारा। दि मान्‌युङ्‌त़दोम, मो खानानिन त़लामुम। दि मान्‌वेत्‍त़दोम, मो त़हेक्‍तुम।’

²² मोसोओ अ़हाङ्‌पाआ अ़हारुक लासुलो, ‘आम्‌य़ङ्‌आङा अ़ङ्‌का खाना छ़ङ्‌छेन्‍ना, खाना अ़अ़त्‍पा हारुक! दि मान्‌युङ्‌ङा, मो कालाम, खोन्‍कि दि मान्‌वेत्‌दोङ, मो काहेक अ़ङ्‌का अ़ऱन्‍मिन्‌ओ म़नानि त़मित्‍ङाङा?

²³ खोन्‍नालो देकि अ़ङ्‌फेक्‌वा छेन्‍बि युङ्‌खादा मान्‌युङ्‌त़दो? खाना मोवात्‍नि त़मुओ खाङ्‌दे अ़ङ्‌का लासाङ्‌ताङ्‌हिदा अ़ङ्‌फेक्‌वा अ़तेप्‍माएनान लासुङ तोक्‍तुङ्‌ओ।’

²⁴ खोन्‍कि मोदा काएप म़नाचि हाङ्‌आ लोचि, ‘मोएदाङ्‌का अ़फेक्‌वा ङाप्‍तानुम खोन्‍कि साङ्‌एदा दस्‌काफेक युङ्‌याङ मो पुवानुम।’

²⁵ खोन्‍कि मोचिआ अ़लोवा, ‘हाङ्‌पो, खोएदा ना बुयाओङा दस्‌कातात युङ्‌याङ।’

²⁶ अ़ङ्‌का खानानिन लोनानिन, ‘साङ्‌एदा युङ्‌याङ, मो च़लोक प़, खोन्‍कि मोएदा ब़द्‍धे लि। मेन साङ्‌एदा मात्‍द़ङ, मोएदा युङ्‌याङ्‌ओछाङ मोएदाङ्‌का अ़ङाप।

²⁷ मेन अ़ङ्‌का हाङ मुङाओ ऩङाकाछित मो अ़ङ्‌ङेङ्‌चि ओदा बात्‍तानुम्‍च़म, खोन्‍कि अ़ङ्‌बुदा सेरानुम्‍च़म!’”

येसु यरुसलेम्‌दा म़वाङाओ

²⁸ येसु ओ दोय़ङ्‌ला म़य़ङाचिआकि यरुसलेम्‌दुत्‍नि म़लोन्‍ता।

²⁹ येसु जैतुन भ़ऱनि लोवाङाओ बेथफागे खोन्‍कि बेथानियादा म़ताला। खोन्‍कि खोक्‍कोसाआ अ़चुकाखेङ्‌पाचिदाङ्‌का ह़वाङ ओवात्‍नि लोयाङ्‌सा म़छुत्‍तुखाइसुचि,

³⁰ “खानाचि मो ह्‍याक्‍को तेन्‌या खाराचि। तेन्‌दा त़ताचिलाचिङ्‌चिवा खानाचिआ साङ्‌आछाङ मान्‌युक्‌युक्‍तुओ अ़क्‌तात गधा छा छुम्‍सायुङ्‌साओ त़धित्‍चु। मो हुराचुकि ओदा बात्‍ताचु।

³¹ खा-खाक्‍कोसाआ खानाचि ‘देकि त़हुत्‍चुङ्‌चु?’नि त़सेन्‍चिनालो ‘हाङ्‌पा ओ दोत्‌याङ’नि लोवाचु।”

³² खोन्‍किना मो बुया म़खाइसुचिओ म़नाचि खाराचिकि येसुआ म़लोचिवात्‍निङा अ़क्‌तात गधा छा अ़धिराचु।

³³ मोचिआ गधा छा अ़हुराङाचुहिदा मो गधा छाओ अ़हाङ्‌पाआ मोचि सेनुचि, “खानाचिआ ओ गधा छा देकि त़हुत्‍चुङ्‌चु?”

³⁴ मोचिआ अ़लासालोवाचु, “हाङ्‌पा ओ दोत्‌याङ।”

³⁵ मोचिआ मो गधा छा येसुएदा अ़ताराचु, खोन्‍कि मोसोओ अ़दुङ्‌दु अ़चुतित्‌चि अ़थ़क्‍तापुवा, खोन्‍कि येसु मोसोओ अ़दुङ्‌दा युङ्‌अ़मेत्‍ता।

³⁶ येसु म़खाराङाहिदा म़नाचिआ अ़चुतित्‌चि म़हुरुचिकि लाम्‌दा अ़थ़क्‍तापुवा।

³⁷ येसु जैतुन भ़ऱओ य़न्‍पा लाम्‍च़क्‌दा म़तादिसाहिदा झारा अ़चुकाखेङ्‌पाचिआ आप्‍पि अ़खाओ झारा सावा काचिचि अ़मित्‍ताकि अ़चुऩङानुयाङ्‌सा निनाम्‍हाङ्‌ओ अ़चुऩङ चोन्‌याङ्‌सा अ़धिवो य़ङ्‌आ पात्‍मा अ़पुङ्‌सा।

³⁸ “निनाम्‍हाङ्‌ओ अ़चुऩङ्‌दा म़ताओ हाङ निनाम्‍हाङ्‌आ आसिखा अ़प़ने! निनाम्‍मादु सेवाङ्‌नि लिने खोन्‍कि झारादाङ्‌का धानि निनाम्‍हाङ्‌ओ अ़चुऩङ लोङ्‌ने।”

³⁹ खोन्‍कि मुक्‍लादाओ खा-खाक्‍को फरिसिचिआ येसु अ़लोवा, “काचिन्‍पो, आम्‍नुओ काखेङ्‌चि रेन्‍तानुम्‍च़म।”

⁴⁰ मेन येसुआ म़लासुलोचि, “अ़ङ्‌का खानानिन लोनानिन, ओचि ऩपात्‍निन्‌नालो लुङ्‌ताक्‌चिआ पात्‍मा अ़पुङ।”

⁴¹ येसु यरुसलेम च़क्‌दा म़तादिसाकि मो सहरा अ़खाकि मोसोओ निकि खाप्‌याङ्‌सा म़लोचि,

⁴² “निनाम्‍हाङ्‌एनान देत्‍नि तोङ्‌मा ऱन निकिना खाना आय़नुछाङ त़सिन्‍तुओ खाङ्‌दे नुवाओ! मेन ओन्‍ग़रि मो य़ङ खाना तुप्‍मा मान्‍ऱत़युक्‍तु।

⁴³ खानाएदा ओवाको लेन्‌चि म़ता, आम्‍ङेङ्‌चिआ खाना झोम्‍मा निकि बाखाओ कुदारि अ़पाक, खोन्‍कि झारा दात्‍निदाङ्‌का ऩऱङ्‌कि ऩछेक।

⁴⁴ मोचिआ खाना खोन्‍कि खानाहुत्‌दाओ आम्‍छाचि बाखादा म़धाम्‍सुचिकि अ़क्‌तात लुङ्‌ताक्‌दुङ्‌दु नि लुङ्‌ताक्‌छाङ ऩछिरुन्‍दान। देकिनालो निनाम्‍हाङ खानाएदा म़ताओ ग़रि मान्‍सिन्‍त़दो।”

येसुआ निनाम्‍हाङ ब़क्‍खाखिम अ़सेङ्‌साओ

⁴⁵ खोन्‍किना येसु निनाम्‍हाङ ब़क्‍खाखिम्‌दा म़वाङाकि काइन-काखित्‌चि ऱमाखान्‍मा म़पुक्‍तुचि।

⁴⁶ येसुआ मोचि म़लोचि, “साम्‍कालिन्‌दा ओवात्‍नि छाप्‍तायुङ्‌सा, ‘अ़ङ्‌खिम यामात्‍खा खिम लि।’ मेन खानानिन्‌आ ना ओ काङाप्‍खात्‌चिओ अ़चुबुक्‍ताङ त़मुम्‌युङ्‌सुम।”

⁴⁷ येसुआ लेन-लेन निनाम्‍हाङ ब़क्‍खाखिम्‌दा म़चिन्‍तुङुचि। मेन मुलो काब़क्‍पाचि, य़ङ्‌हुप काचिन्‍पाचिकिना म़नाचिओ अ़चुअ़धुवाचिआ खोक्‍को सेत्‍मा अ़लाप्‍ताङा।

⁴⁸ खोन्‍नुछाङ मोचिआ येसु सेत्‍माओ अ़लाम दित्‍छाङ मान्‍धित्‌अ़दा। देकिनालो झारा म़नाचि खोक्‍कोसोओ अ़चुय़ङ एन्‌याङ्‌सा खोक्‍कोएनान अ़क्‍नि म़युङायाक्‍ताङा।