युहन्‍ना 6 - बान्‍तावा राई

येसुआ पाच हजारा म़नाचि म़चान्‍तुचिओ

¹ ओ य़ङ म़चेवाचिआकि येसु गालिल माङ्‌लो तिबेरियास्‌नि लोवाङाओ धियाङ्‌वामाओ अ़ह्‍याउधेत म़खारा।

² खोन्‍कि अ़क्‌तात अ़धिवो म़ना मुक्‍लाचिआ खोक्‍को अ़त़ङ्‌ता, देकिनालो खोक्‍कोसाआ कातुक्‌चिएदा म़मुचिओ म़दोम्‍दाओ बुन्‌चि मोचिआ अ़खायुङ्‌सा।

³ खोन्‍किना येसु भ़ऱदु म़खाराकि अ़चुकाखेङ्‌पाचिएनान म़युङा।

⁴ यहुदिचिओ अ़चुकाक्‍माखात्‍मा चानुचा नेक्‍ताताङा।

⁵ येसुआ अ़चुऱङ्‌कोप्‍नि अ़चोआहिदा अ़क्‌तात अ़धिवो म़ना मुक्‍लाचि खोक्‍कोएदा म़ताङाओ अ़खाकि फिलिप अ़लोवा, “ओ म़नाचि चान्‍माचिओ निम्‍पाङ आन्‍कान खादाङ्‌का पेम्‍पाक खिरिन्‍तारिन ओ?”

⁶ खोक्‍कोसाआ फिलिप चिन्‍माखाङ्‌माओ निम्‍पाङ अ़लोवा ओ, देकिनालो खोक्‍कोसाआ दि मुमा अ़मुवाङाओ, मो खोक्‍कोसाआ अ़सिन्‍ताङा।

⁷ फिलिप्‌आ खोक्‍को लासुलो, “झारासा उन्‍दा-उन्‍दा अ़चानुछाङ ह्‍वा सये रुपाओ अ़फेक्‌वाओ पेम्‍पाक्‌आ मोचि अ़लात्‍तुन्‍चिन।”

⁸ खोक्‍कोसोओ अ़चुकाखेङ्‌पाचिएदाओ सिमोन पत्रुस्‌ओ अ़निछा आन्‍द्रियास्‌आ खोक्‍को लो,

⁹ “ओदा अ़क्‍छा थाङाछा युङ्‌याङ, खोएदा छोङ्‍ओ पाच्‌कातात पेम्‍पाक खोन्‍कि ह्‍वातात ङाचि म़युङ्‌याङ। मेन ओन ब़द्‍धे म़नाचि ओन्‍साआ दि लात्‍तुचि कि?”

¹⁰ येसुआ म़लोचि, “म़नाचि युङ्‌मेत्‍तानुम्‍च़म।” मोदा ल़क्‍ल़क्‍ल़क्‌वाओ नागि याआङा। खोन्‍किना आप्‍फात पाच हजारा दुवाछाचि मोदा म़युङा।

¹¹ खोन्‍कि येसुआ पेम्‍पाक अ़क़क्‍ताकि निनाम्‍हाङ आलाङ अ़पुवा, खोन्‍कि कायुङ्‌चि म़हात्‍तुचि, खोन्‍कि मोवात्‍निङा ङाछाङ म़हात्‍तुचि। मोचिआ चामा म़सुवाङाओन अ़चा।

¹² खोन्‍किना मोचिआ अ़चुबुक खासालो अ़चाचिआकि खोक्‍कोसाआ अ़चुकाखेङ्‌पाचि म़लोचि, “हेनाओ अ़चेत्‌वाचि कोआनुम्‍च़म, खोन्‍कि उन्‍निछाङ अ़केनिन्‍ने।”

¹³ अ़चाचिआकि अ़हेइसाओ छोङ्‍ओ मो पाच्‌कातात पेम्‍पाक्‌ओ अ़चेत्‌वाचि मोचिआ अ़कोवा, खोन्‍कि बारकाखेङ अ़भेम्‍सा।

¹⁴ खोक्‍कोसाआ अ़मुवाओ म़दोम्‍दाओ बुन अ़खाकि मो म़नाचि म़य़ङा, “हेन्‍खामादा काता निनाम्‍हाङ्‌य़ङ खाकालु अ़नुछ्‍या ओक्‍कोङा ओ।”

¹⁵ मो म़नाचि म़ताकि राकाङ्‌थेत्‍नि हाङ मुमा ऩलाप्‍ङानिओ अ़सिन्‍ताकि येसु आप्‍पि भ़ऱदु म़लासाखारा।

येसु चाक्‌वादुङ्‌दा म़कोलाओ

¹⁶ अ़नाम्‍प़क लिसाकि खोक्‍कोसोओ अ़चुकाखेङ्‌पाचि धियाङ्‌वामा ह्‍युत्‍नि म़खारा।

¹⁷ खोन्‍कि नावादा म़वाङाकि मोचि धियाङ्‌वामाओ अ़ह्‍याउधेत कफर्नहुम्‌ह्‍यात्‍नि खात्‍मा अ़पुङ्‌सा। मोन्‍ग़रि अ़खाखुत लिसायुङ्‌सा, खोन्‍कि येसु मोन्‍ग़रितारि खोचिएदा मान्‍ताम़युक्‍ता।

¹⁸ खोन्‍कि अ़धिवो कुह़क्‍मा बानाङाओसा धियाङ्‌वामाओ अ़लोङ्‌वात लोङ्‌साङा।

¹⁹ अ़चुकाखेङ्‌पाचिआ पाच-छ किलोमितरा नावा अ़याप्‍ताखात्‍ताकिना मोचिआ येसु धियाङ्‌वामादा कोन्‌याङ्‌सा नावाओ अ़च़क्‌दा म़बानाङाओ अ़खा, खोन्‍कि मोचि म़क़सा।

²⁰ मेन येसुआ मोचि म़लोचि, “अ़ङ्‌काङा ओ। मान्‍क़दानिन।”

²¹ मोचिआ खोक्‍को अ़चुऩङानुयाङ्‌सा नावादा अ़युङ्‌सा, खोन्‍कि मोचि म़खाराङाओदा नावा च़क्‍नि ताला।

ह़ङ्‌म़ङ्‌ओ पेम्‍पाक

^22-23 हाङ्‌पाआ निनाम्‍हाङ आलाङ अ़पुवाकि म़नाचिआ पेम्‍पाक अ़चाओ, मो धियाङ्‌वामाओ अ़केम्‌ओ अ़ह्‍याउधेत्‌या छुक। मोदा म़युङालाराओ म़ना मुक्‍लाचिआ अ़सिन्‍ताङा, बुयाओ लेन मोदा अ़क्‌तात ओन्‍ङा नावा याआङा, खोन्‍कि येसु अ़चुकाखेङ्‌पाचिएनान मो नावादा मान्‌वाङ्‌म़दा मेन खोक्‍कोसोओ अ़चुकाखेङ्‌पाचि ओन मो नावादा म़खाराओ। खोन्‍किना अ़माङ्‌कोलेन तिबेरियास्‌दाङ्‌का नि नावाचि मो अ़केम्‌ओ अ़च़क्‌दा म़ता।

²⁴ येसु खोन्‍कि खोक्‍कोसोओ अ़चुकाखेङ्‌पाचि मोदा मात्‍द़ङ्‌याङ्‌चिओ म़ना मुक्‍लाचिआ अ़सिन्‍ताकि मोचि नावादा म़वाङा खोन्‍कि येसु लाम्‌याङ्‌सा कफर्नहुम म़खारा।

²⁵ मोचि धियाङ्‌वामाओ ह्‍याउधेत कफर्नहुम्‌दा म़ताला खोन्‍कि येसु अ़धिराकि खोक्‍को अ़सेना, “रब्‍बि, खानानिन ओदा देम्‍खा त़तान ओ?”

²⁶ येसुआ मोचि म़लासुलोचि, “अ़नुछ्‍याङा अ़ङ्‌का खानानिन लोनानिन, खानानिन म़दोम्‍दाओ बुन्‌चि त़तुप्‍तुम्‍च़म्‌कि माआङ, मेन आम्‍नुओ बुक खासालो पेम्‍पाक त़चोम्‌ओसाआ अ़ङ्‌का त़लाम्‍ङाङाऩङ।

²⁷ लुक्‍खात्‌ओ चामायुओ निम्‍पाङ काचि मान्‍मुदानिन, मेन अ़लुक्‍निन्‌ओ ह़ङ्‌म़ङ काप़ चामायुओ निम्‍पाङ काचि मुवानिन। मो चामायु म़नाओ अ़छाआ खानानिन ऩप़न। देकिनालो पापा निनाम्‍हाङ्‌आ म़नाओ अ़चुछाएदा अ़चुओ सेप्‍मा पाङ अ़पुवायुङ्‌सा।”

²⁸ मोचिआ खोक्‍को अ़सेना, “निनाम्‍हाङ म़मिन्‌याङ्‌वा काचि मुमाओ निम्‍पाङ आन्‍कान्‍का दे च़मादोत?”

²⁹ येसुआ मोचि म़लासुलोचि, “निनाम्‍हाङ्‌ओ अ़चुकाचि ओङा ओ, साङ निनाम्‍हाङ्‌आ अ़छुत्‍ता खोक्‍कोएदा साकोङ्‌छ़ङ मुमादोत।”

³⁰ खोन्‌ओसा मोचिआ खोक्‍को अ़लासालोवा, “खानानिन आन्‍कान्‍का खाक्‍को म़दोम्‍दाओ बुन खाङ्‌त़मेत्‍नि? मो आन्‍कान्‍का खाम्‍काकि खानानिन साकोङ्‌छ़ङ मुनिने। खानानिन दि त़मुम?

³¹ साम्‍कालिन्‌दा ओवात्‍नि छाप्‌याङ, ‘खोक्‍कोसाआ मोचि चान्‍माचिओ निम्‍पाङ निनाम्‍मादुङ्‌का पेम्‍पाक म़प़चि।’ ओवात्‍नि आन्‍सुन्‍तुम्‌चिआ लेक्‍लेक्‍लेक्‌वाओदा मन्‍ना अ़चा।”

³² येसुआ मोचि म़लोचि, “अ़नुछ्‍याङा अ़ङ्‌का खानानिन लोनानिन, खानानिन निनाम्‍मादुङ्‌का पेम्‍पाक काप़ निनाम्‍हाङ्‌य़ङ खाकालु मोसा माआङ, मेन निनाम्‍मादुङ्‌का खानानिन अ़नुछ्‍या पेम्‍पाक काप़ अ़ङ्‌पापा ओ।

³³ देकिनालो निनाम्‍हाङ्‌ओ अ़चुपेम्‍पाक मोङा ओ, मो निनाम्‍मादुङ्‌का धा, खोन्‍कि हेन्‍खामादाओ म़नाचि अ़धुन्‌ओ ह़ङ्‌म़ङ प़चि।”

³⁴ मोचिआ खोक्‍को अ़लोवा, “हाङ्‌पो, ओ पेम्‍पाक आन्‍कान्‍का अ़धुन प़नि।”

³⁵ येसुआ मोचि म़लोचि, “ह़ङ्‌म़ङ काप़ पेम्‍पाक अ़ङ्‌काङा ओ। अ़ङ्‌काएदा काता देम्‍खाछाङ साअ़स़निन, खोन्‍कि अ़ङ्‌काएदा साकोङ्‌छ़ङ कामु देम्‍खाछाङ वामित्‍मा अ़स़निन।

³⁶ मेन अ़ङ्‌का खानानिन लोनानिन्‌ओङा ओ, खानानिन्‌आ त़खाङ्‌चिआङ्‌युङ्‌साङ्‌ऩङ, खोन्‍नुछाङ साकोङ्‌छ़ङ त़मुऩङ्‌ऩम़ङ।

³⁷ अ़ङ्‌पापाआ ऩपुवाङ्‌ओ झारा अ़ङ्‌काएदा म़ता, खोन्‍कि अ़ङ्‌काएदा काता देत्‍निकिछाङ अ़ङ्‌का अ़लाऩङ्‌च़ऩङ।

³⁸ अ़ङ्‌को आप्‍पिओ अ़ङ्‌मिन्‍मा तालासि अ़ङ्‌का निनाम्‍मादुङ्‌का धाङ्‍ओ माआङ, मेन अ़ङ्‌का काछुत्‌ओ अ़चुमिन्‍मा तालासि धाङ्‌ओ।

³⁹ खोन्‍कि अ़ङ्‌का काछुत्‌ओ अ़चुमिन्‍मा ओङा ओ, खोक्‍कोसाआ अ़ङ्‌का ऩपुवाङ्‍ओचिदाङ्‌का साङ्‌छाङ अ़ङ्‌का अ़माऩङ्‌ने, मेन मोचि आदेङ्‌ओ लेन्‌दा अ़ह़ङ मुङ्‌च़ङ्‌ने।

⁴⁰ अ़ङ्‌पापाओ अ़चुमित्‍चिऩङ ओङा ओ, झारा साङ-साङ्‌चिआ अ़चुओ छा अ़खाङ, खोन्‍कि खोक्‍कोएदा साकोङ्‌छ़ङ म़मु अ़धुन्‌ओ ह़ङ्‌म़ङ अ़तोक्‍ने। अ़ङ्‌का मो आदेङ्‌ओ लेन्‌दा अ़ह़ङ मुङ।”

⁴¹ यहुदिचि खोक्‍कोसोओ अ़चुदेङ्‌सालाप्‍पादा छुऩङ्‌वा मुमा अ़पुङ्‌सा, देकिनालो खोक्‍को म़य़ङा, “निनाम्‍मादुङ्‌का धाओ पेम्‍पाक अ़ङ्‌काङा ओ।”

⁴² मोचि म़य़ङा, “दि ओ योसेफ्‌ओ अ़छा येसु माआङ कि? ओसोओ अ़पा खोन्‍कि अ़मा आन्‍कान अ़सिन्‍तिन्‍मिन्‌येन्‍चिन कि? ओन्‍ग़रि ओ देत्‍नि ‘अ़ङ्‌का निनाम्‍मादुङ्‌का धाङ्‍ओ’नि य़ङ्‌याङ ओ?”

⁴³ येसुआ मोचि म़लासुलोचि, “खानानिन आम्‍नुओ रादा छुऩङ्‌वा मान्‍मुदानिन।

⁴⁴ अ़ङ्‌का काछुत अ़ङ्‌पापाआ अ़ङ्‌काएदा मो अ़तित्‍तुन्‍तारुन्‌नालो साङ्‌छाङ अ़ङ्‌काएदा तामा अ़ऱनिन। मेन मो तानालो अ़ङ्‌का मो आदेङ्‌ओ लेन ह़ङ्‌सुङ्‌लोइसुङ।

⁴⁵ निनाम्‍हाङ्‌य़ङ खाकालुचिआ अ़छाप्‍तायुङ्‌सा, ‘मोचि झारा निनाम्‍हाङ्‌आ म़चिन्‍तुचि।’ झारा साङ्‌आ पापा निनाम्‍हाङ्‌एदाङ्‌का एनु खोन्‍कि चिन्‍नान्‍चिन, मो अ़ङ्‌काएदा ता।

⁴⁶ निनाम्‍हाङ्‌एदाङ्‌का ताओदाङ्‌का नि साङ्‌आछाङ पापा निनाम्‍हाङ मान्‍खाङ्‌युक्‍तु। खोसाआ ओन्‍ङा निनाम्‍हाङ खायुङ्‌सु।

⁴⁷ अ़नुछ्‍याङा अ़ङ्‌का खानानिन लोनानिन, साङ साकोङ्‌छ़ङ मु, मोएदा अ़धुन्‌ओ ह़ङ्‌म़ङ याक।

⁴⁸ अ़ङ्‌का ह़ङ्‌म़ङ काप़ पेम्‍पाक ओ।

⁴⁹ आम्‍नुओ सुन्‍तुम्‌चिआ लेक्‍लेक्‍लेक्‌वाओदा मन्‍ना अ़चानुछाङ मोचि म़सुवादा।

⁵⁰ मेन निनाम्‍मादुङ्‌का धाओ पेम्‍पाक ओङा ओ। साङ्‌आ मो चा, मो अ़स़निन्‍दानिन।

⁵¹ निनाम्‍मादुङ्‌का धाओ अ़ह़ङ पेम्‍पाक अ़ङ्‌काङा ओ। साङ्‌आ ओ पेम्‍पाक चा, मो अ़धुन्‌तारि ह़ङ। खोन्‍कि खाक्‍को पेम्‍पाक अ़ङ्‌का हेन्‍खामादाओ ह़ङ्‌म़ङ्‌ओ निम्‍पाङ प़ङ, मो अ़ङ्‌पोक ओ।”

⁵² खोन्‍कि यहुदिचि आप्‍पिओ अ़चुरादा चाअ़त्‍लो दुम्‍छ़न्‍मा अ़पुक्‍ता, “ओ म़नाआ देत्‍नि आन्‍कान अ़चुपोक चामा प़मा म़ऱ?”

⁵³ येसुआ मोचि म़लोचि, “अ़नुछ्‍याङा अ़ङ्‌का खानानिन लोनानिन, खानानिन्‌आ म़नाओ अ़छाओ अ़पोक त़चान्‍मिन खोन्‍कि खोसोओ अ़ह़ त़दुङिमिन्‌नालो खानानिन्‌एदा ह़ङ्‌म़ङ अ़याक्‍निन।

⁵⁴ अ़ङ्‌पोक काचा खोन्‍कि अ़ङ्‌ह़ कादुङ्‌एदा अ़धुन्‌ओ ह़ङ्‌म़ङ याक, खोन्‍कि आदेङ्‌ओ लेन्‌दा अ़ङ्‌का मोचि ह़ङ्‌सुङ्‌लोइसुङ्‌च़ङ।

⁵⁵ देकिनालो अ़ङ्‌पोक अ़नुछ्‍याओ चामायु ओ, खोन्‍कि अ़ङ्‌ह़ अ़नुछ्‍याङा दुङ्‌मायु ओ।

⁵⁶ अ़ङ्‌पोक काचा खोन्‍कि अ़ङ्‌ह़ कादुङ अ़ङ्‌काएदा युङ, खोन्‍कि अ़ङ्‌का मोएदा युङ्‌ङा।

⁵⁷ देत्‍नि अ़ह़ङ पापा निनाम्‍हाङ्‌आ अ़ङ्‌का ऩछुत्‍ताङ खोन्‍कि पापा निनाम्‍हाङ्‌आ अ़ङ्‌का ह़ङ्‌म़ङ ऩपुवाङ्‌ओसाआ मोवात्‍निङा साङ्‌आ अ़ङ्‌का अ़चाङा, अ़ङ्‌का मो ह़ङ्‌म़ङ प़ङ।

⁵⁸ निनाम्‍मादुङ्‌का धाओ ओ पेम्‍पाक, आम्‍नुओ सुन्‍तुम्‌चिआ मन्‍ना अ़चाओवाको माआङ। मोचिआ अ़चानुछाङ म़सुवादा। मेन ओ पेम्‍पाक साङ्‌आ चा, मो अ़धुन्‌तारि ह़ङ।”

⁵⁹ खोक्‍कोसाआ ओ य़ङ कफर्नहुम्‌ओ यावायोक्‍खिम्‌दा म़चिन्‍तुङुचिहिदा म़लोचिओ।

ब़द्‍धे काखेङ्‌चिआ येसु अ़छित

⁶⁰ ओ अ़एनाकि खोक्‍कोसोओ अ़चुकाखेङ्‌चिएदाओ ब़द्‍धेकापाङ म़य़ङा, “ओ चिन्‍माय़ङ य़ङ चाअ़त्‌याङ, साङ्‌आ ओ लोक्‍मा ऱ कि?”

⁶¹ मेन खोक्‍कोसोओ अ़चुकाखेङ्‌चि ओसोओ अ़तुक्‌वादा छुऩङ्‌वा म़मुयाङ्‌नि अ़सिन्‍ताकि येसुआ मोचि म़लोचि, “दि ओ य़ङ आम्‍नुओ निम्‍पाङ धुङ्‌खा लिसा?

⁶² खोन्‍नालो खानानिन्‌आ म़नाओ अ़छा खादा खो बुया युङाङा, मोदा थेन्‍खात्‌याङ्‍ओ त़खाम्‌नालो देम च़लोक धुङ्‌खा लि?

⁶³ ह़ङ्‌म़ङ काप़ लावाङा ओ! मेन पोक्‌आ दित्‍छाङ ओवाको काचि मुमा अ़ऱन। खाक्‍को य़ङ अ़ङ्‌का खानानिन्‌एदा चेउङ, मो निनाम्‍हाङ लावादाङ्‌का ओ, खोन्‍कि मो य़ङ्‌आ अ़धुन्‌ओ ह़ङ्‌म़ङ प़।

⁶⁴ मेन खानानिन्‌एदाओ देम्‍पाङ्‌साआ अ़ङ्‌का साकोङ्‌छ़ङ्‌ङा त़मुऩङ्‌ऩम़ङ।” येसु ओवात्‍नि म़य़ङा, देकिनालो साकोङ्‌छ़ङ मान्‍मुकादाचि साङ-साङ ओ, खोन्‍कि खोक्‍को काधान साङ लि निकिना खोक्‍कोसाआ बुयादाङ्‌काङा अ़सिन्‍ताङा।

⁶⁵ “खोन्‌ओसाआ अ़ङ्‌का खानानिन लोनानिन्‌ओ पापा निनाम्‍हाङ्‌आ ऩप़ऩङ्‌नालो साङ्‌छाङ अ़ङ्‌काएदा तामा अ़ऱनिन” निकिना खोक्‍कोसाआ म़लोचि।

⁶⁶ खोन्‍किना खोक्‍कोसोओ अ़चुकाखेङ्‌चिएदाओ ब़द्‍धेकापाङ देङ्‌सा म़लासा, खोन्‍कि खोक्‍कोएनान कोन्‍मा अ़छिरा।

⁶⁷ येसुआ बारकापाङ्‌माङ अ़चुकाखेङ्‌पाचि म़लोचि, “दि खानानिन्‌आछाङ छित्‍मादामानि त़मिनिन्‌येन?”

⁶⁸ सिमोन पत्रुस्‌आ लासुलो, “हाङ्‌पो, आन्‍कान्‍का साङ्‍एदा खारिन्‍का ओ? खानानिन्‌एदा अ़धुन्‌ओ ह़ङ्‌म़ङ्‌ओ य़ङ्‌चि म़युङ्‌याङ।

⁶⁹ खोन्‍कि आन्‍कान्‍का साकोङ्‌छ़ङ मुनियुङ्‌नि खोन्‍कि सिन्‍नियुङ्‌नि, खानानिन निनाम्‍हाङ्‌ओ त़सेङिन्‌येन्‌ओ अ़चुम़ना ओ।”

⁷⁰ येसुआ मोचि म़लासुलोचि, “दि अ़ङ्‌का खानानिन बारकापाङ छेन्‍नानिन्‌ओ माआङ कि? मेन खानानिन्‌एदाओ अ़क्‍छा सैतानाआ क़म्‍तुयुङ्‌सु।”

⁷¹ ओ खोक्‍कोसाआ सिमोन इस्‍करियोत्‌ओ अ़छा यहुदाओ अ़तुक्‌वादा म़य़ङाओ, देकिनालो बारकापाङ्‌दाओ अ़क्‍छा मुवाङानुछाङ खोसाआ येसु धान्‍मा मुङु।