युहन्‍ना 4 - बान्‍तावा राई

सामरि मेत्‍छामाएनान येसु म़चेवाओ

¹ युहन्‍नादाङ्‌का येसुआ ब़द्‍धे काखेङ्‌चि म़मुङुचि खोन्‍कि बप्‍तिस्‍मा म़प़ङुचिनि फरिसिचिआ अ़एना।

² (अ़नुछ्‍या येसुआ ना माआङ मेन खोक्‍कोसोओ अ़चुकाखेङ्‌पाचिआ बप्‍तिस्‍मा म़प़ङुचि।)

³ खोन्‍कि येसुआ ओ अ़सिन्‍ताकि खोक्‍को यहुदिया अ़छिरादाकि गालिल्‌दा म़लासाखारा।

⁴ मेन खोक्‍को सामरिया लियाङ्‌सा खात्‍मादोराङा।

⁵ खोन्‍कि खोक्‍को सामरियाओ सुखारनि लोवाङाओ सहरादा म़तादिसा। मो सहरा याकुब्‌आ अ़छा योसेफ प़ओ व़क्‌ओ अ़च़क्‌दा छुक्‍ताङा।

⁶ मोदा याकुब्‌ओ अ़कुपारि याआङा। येसु कोन्‍माआ होत्‍तुकि मो कुपारिओ अ़च़क्‌दा म़युङा। आप्‍फात अ़दाक्‌वालेन लिसायुङ्‌सा।

⁷ अ़क्‍छा सामरि मेत्‍छामा चाक्‌वा भात्‍सि मोदा ता। येसुआ मो मेत्‍छामा अ़लोवा, “अ़ङ्‌का चाक्‌वा दुङ्‌मा पुवाङ।”

⁸ मोन्‍ग़रि खोक्‍कोसोओ अ़चुकाखेङ्‌पाचि सहरादा चामायु खित्‍सि म़खारायुङ्‌सा।

⁹ खोन्‍कि सामरि मेत्‍छामाआ खोक्‍को लो, “खानानिन अ़क्‍छा यहुदि खोन्‍कि अ़ङ्‌का सामरि मेत्‍छामा ओ। देत्‍नि सामरि मेत्‍छामाएदा चाक्‌वा दुङ्‌मा त़दोत्‍निङ्‌नि?” (मोसाआ खोक्‍को ओवात्‍नि लो देकिनालो यहुदिचिआ सामरिचिएनान देत्‍छाङ मान्‍च़याङ्‌चि।)

¹⁰ येसुआ मो लासुलो, “खाना निनाम्‍हाङ्‌ओ अ़चुआसिखा खोन्‍कि खानाएदा चाक्‌वा कादोत म़ना साङ्‍ओ निकिना त़सिन्‍तुओदे खाना खोक्‍को त़दोत्‍तुओ खोन्‍कि खोक्‍कोसाआ खाना ह़ङ्‌म़ङ्‌ओ चाक्‌वा त़पुवाओ।”

¹¹ मो मेत्‍छामाआ खोक्‍को लो, “हाङ्‌पो खानानिन्‌एदा अ़अ़क्‍खा मात्‍द़ङ, खोन्‍कि कुपारिछाङ ग़ङ्‌याङ। खोन्‍कि खानानिन्‌आ खादाङ्‌का मो ह़ङ्‌म़ङ्‌ओ चाक्‌वा त़तारुम?

¹² दि खानानिन आन्‍सुन्‍तुम याकुब्‌दाङ्‌काछाङ तोक्‍पो त़मुन्‌येन? खोसाआ आन्‍कान्‍का ओ कुपारि ऩमेत्‍तिन्‍प़न्‍काकिना खो आप्‍पि, खोन्‍कि खोसोओ अ़छाचि खोन्‍कि खोसोओ अ़सायाम्‍पोक्‌चिआ ओ कुपारिदाओ चाक्‌वा अ़दुङा।”

¹³ येसुआ मो अ़लासालोवा, “ओ चाक्‌वा कादुङ झारा वामित्‍मा म़लास़।

¹⁴ मेन साङ्‌आ अ़ङ्‌का प़ङ्‍ओ चाक्‌वा दुङु, मो देम्‍खाछाङ वामित्‍मा अ़स़निन। खाक्‍को चाक्‌वा अ़ङ्‌का मो प़ङ, मो मोएदा अ़लुक्‍निन्‌ओ ह़ङ्‌म़ङ्‌ओ निम्‍पाङ लोन्‌याङ्‍ओ बोन्‌वा लि!”

¹⁵ मो मेत्‍छामाआ खोक्‍को लो, “हाङ्‌पो अ़ङ्‌का मो चाक्‌वा प़नि खोन्‍कि अ़ङ्‌का वामित्‍मा अ़स़ऩङ, खोन्‍कि ओदा चाक्‌वा भात्‍सि बान्‍मायुङ्‌मा अ़दोत्‍निन्‍ने।”

¹⁶ येसुआ मो अ़लोवा, “खाराकि आम्‍खिम्‍हाङ्‌पा बुत्‍तुबात्‍तु।”

¹⁷ मो मेत्‍छामाआ लासुलो, “अ़ङ्‌खिम्‍हाङ्‌पा मात्‍द़ङ।” येसुआ मो अ़लोवा, “आम्‍खिम्‍हाङ्‌पा मात्‍द़ङ निकिना खाना त़य़ङाओ अ़नुछ्‍याङा ओ।

¹⁸ देकिनालो आम्‍को पाच्‌कापाङ आम्‍खिम्‍हाङ्‌पाचि म़लिसाचिआयुङ्‌सा, खोन्‍कि आइमित मो खानाएनान युङ्‌याङ्‌ओछाङ आम्‍खिम्‍हाङ्‌पा माआङ। खाना अ़नुछ्‍या त़य़ङाओ।”

¹⁹ मो मेत्‍छामाआ खोक्‍को अ़लोवा, “हाङ्‌पो खानानिन निनाम्‍हाङ्‌य़ङ खाकालुओवा अ़ङ्‌का लुङाङा।

²⁰ आन्‍काओ सुन्‍तुम्‌चिआ ओ भ़ऱदु निनाम्‍हाङ अ़ब़क्‍ता, मेन खानानिन यहुदिचि त़य़ङिन, निनाम्‍हाङ ब़क्‍खा यरुसलेम्‌ङा ओ।”

²¹ येसुआ मो अ़लोवा, “मेत्‍छामा, अ़ङ्‌का साकोङ्‌छ़ङ मुवाङ, ग़रि तायाङ, मोन्‍ग़रि खानानिन ना ओ भ़ऱदु, ना यरुसलेम्‌दा पापा निनाम्‍हाङ त़ब़क्‍तुम।

²² खानानिन सामरिचि दि त़ब़क्‍तुम्‌योम मो त़सिन्‍तिमिन। आन्‍कान्‍का दि ब़क्‍तुम्‍का मो आन्‍कान्‍का सिन्‍तुम्‍का, देकिनालो कालेन यहुदिचिदाङ्‌का ता।

²³ मेन ग़रि तायाङ, खोन्‍कि मो ग़रि ओन्‍ग़रिङा ओ, खोन्‍कि अ़छ़ङ काब़क्‌चिआ लावादा खोन्‍कि अ़छ़ङ्‌दा पापा निनाम्‍हाङ अ़ब़क। देकिनालो ओवाको काब़क्‌चिङा पापा निनाम्‍हाङ्‌आ म़लामुचि।

²⁴ निनाम्‍हाङ लावा म़मुयाङ, खोन्‍कि खोक्‍कोसोओ अ़चुकाब़क्‌चिआ लावादा खोन्‍कि अ़छ़ङ्‌दा खोक्‍को ब़क्‍मादोत।”

²⁵ मो मेत्‍छामाआ खोक्‍को लो, “अ़ङ्‌का सिन्‍तुङ्‌योङ, खाउग़रि मसिह म़तायाङ, मोन्‍ग़रि खोक्‍कोसाआङा आन्‍कान्‍का झारा य़ङ खाऩएत्‍तिन्‍का।” मसिह ख्रिस्‍तनि अ़लो।

²⁶ खोन्‍किना येसुआ मो अ़लोवा, “खानाएनान काचेप, अ़ङ्‌का खोक्‍कोङा ओ।”

²⁷ मोन्‍ग़रि येसुओ अ़चुकाखेङ्‌पाचि म़ता, खोन्‍कि खोक्‍को अ़क्‍छा मेत्‍छामाएनान म़हान्‍ताङाओ अ़खाकिना दोम्‍तुदोचि। मेन “खानानिन मोएदा दि त़लामुम्‌योम?” माङ्‌लो “खानानिन मो मेत्‍छामाएनान देकि त़चेविन्‌येन?”निकिना साङ्‌आछाङ मान्‍सेन्‌अ़दा।

²⁸ खोन्‍कि मो मेत्‍छामाआ अ़चाक्‌वा दावा छिरुदोकि सहरादा लासाखारा खोन्‍कि म़नाचि लोचि,

²⁹ “बानानिन्‌कि अ़क्‍छा म़ना खानुम, खोक्‍कोसाआ अ़ङ्‌का मुङ्‌च़ङ्‍ओ झारा काचिचि खाऩएत्‍ताङ। मात्‌दे, खोक्‍को ख्रिस्‍त ना माआङ?”

³⁰ खोन्‍कि मोचि सहरादाङ्‌का म़लोन्‍ताकि खोक्‍कोएदा म़खारा।

³¹ मोवात्‍नि लिसाङाओ ग़रि अ़चुकाखेङ्‌पाचिआ खोक्‍को अ़लोवा, “रब्‍बि, दि-दि चानिन।”

³² मेन खोक्‍कोसाआ मोचि म़लोचि, “अ़ङ्‌काएदा चामायु चा युङ्‌याङ, मोसोओ अ़तुक्‌वादा खानानिन्‌आ त़सिन्‍तिमिन्‌येन।”

³³ खोन्‌ओसा अ़चुकाखेङ्‌पाचि अ़क्‍छा निएदा म़य़ङा, “साङ-साङ्‌आ खोक्‍को चामायु अ़खुत्‍ता हे?”

³⁴ येसुआ मोचि म़लोचि, “अ़ङ्‌का काछुत्‌ओ अ़चुमिन्‍मावा च़मा खोन्‍कि खोक्‍कोसोओ अ़चुकाचि तामालामाङा अ़ङ्‌चामायु ओ।

³⁵ दि खानानिन, ‘हान्‍छाङ चारकादोङ्‌वात युङ्‌याङ, खोन्‍कि चा हेक्‍मा ग़रि लिनि त़य़ङिमिन?’ मेन अ़ङ्‌का खानानिन लोनानिन आम्‍नुओ म़क होआनुम्‌कि व़क्‌चि चोआनुम्‍च़म, चा हेक्‍मा ग़रि लिसायुङ्‌सा।

³⁶ साङ्‌आ चा कोउ मोसाआ अ़लुङ तोक्‍तुयुङ्‌सु, खोन्‍कि अ़लुक्‍निन्‌ओ ह़ङ्‌म़ङ्‌ओ निम्‍पाङ अ़सिवा कोउयुङ्‌सु, खोन्‌ओसा कावेत खोन्‍कि काकोप अ़क्‍नि अ़चुऩङानु।

³⁷ ओवात्‍नि ‘अ़क्‍छाआ वेत्‍तु, खोन्‍कि नितात्‌आ हेक्‍तु,’ निओ य़ङ ओदा अ़छ़ङ लि।

³⁸ अ़ङ्‌का खानानिन मोदा हेक्‍सि छुत्‍नानिन, खादा खानानिन्‌आ काचि मान्‍मुत़युक्‍तुम। निचिआ काचि अ़मुवायुङ्‌सा, खोन्‍कि मोचिओ अ़चुकाचिओ अ़सिवा खानानिन्‌आ त़कोउम्‌युङ्‌सुम।”

³⁹ “अ़ङ्‌का दे चुवाङ्‍ओ झारा काचिचि खोक्‍कोसाआ अ़ङ्‌का खाऩएत्‍ताङ” निओ मो मेत्‍छामाओ अ़सालुम्‍स़ङ्‌आ मो सहरादा सामरिचिएदाओ ब़द्‍धेसाआ खोक्‍को साकोङ्‌छ़ङ अ़मुवा।

⁴⁰ खोन्‌ओसा मोन्‍ग़रि सामरिचि खोक्‍कोएदा म़ता, खोन्‍कि मोचिआ खोक्‍को मोचिएनान “युङिन्‍ने”नि अ़लोवा, खोन्‍कि खोक्‍को ह्‍वा लेन मोदा म़युङा।

⁴¹ खोन्‍किना खोक्‍कोसोओ अ़चुय़ङ्‌आ नि ब़द्‍धेसाआ खोक्‍को साकोङ्‌छ़ङ अ़मुवा।

⁴² मोचिआ मो मेत्‍छामा अ़लोवा, “ओन्‍ग़रि खाना त़य़ङाओ य़ङ्‌आ ओन्‍ङा आन्‍कान्‍का साकोङ्‌छ़ङ मुन्‍काओ माआङ, मेन आन्‍कान्‍का आप्‍पि एनुम्‍काओसाआ अ़नुछ्‍या खोक्‍को हेन्‍खामादाओ कालेन्‍पा ओ निकिना आन्‍कान्‍काआ सिन्‍तुम्‍का।”

तोक्‍पो छान्‍हाङ्‌पाओ अ़छा नुमाय़ङ

⁴³ ह्‍वा लेन्‍किना मोदाङ्‌का खोक्‍को गालिल म़खारा।

⁴⁴ (येसु म़य़ङा, “आप्‍पिओ अ़तेन्‌दा निनाम्‍हाङ्‌य़ङ खाकालु साया ऩमेत्‍तुन।”)

⁴⁵ खोन्‍नुछाङ खोक्‍को गालिल्‌दा म़ता, खोन्‍कि खोक्‍कोसाआ यरुसलेम्‌दा चानुचाओ ग़रिदा दे अ़मुवाओ मो झारा काचि अ़खाओसा गालिलिचिआ खोक्‍को साऩङ्‌वा अ़मेत्‍ता, देकिनालो मोचिछाङ चानुचादा म़खारायुङ्‌साओ।

⁴⁶ खोन्‍किना खोक्‍को गालिल्‌ओ काना सहरादा म़लासाता। मोदा खोक्‍कोसाआ चाक्‌वा अङ्‌गुरा माङ्‌वा अ़मुवाओ। गालिल्‌ओ कफर्नहुम्‌दा अ़क्‍छा हाङ काचि काफा युङाङा, खोसोओ अ़दुवाछा-छा तुआङा।

⁴⁷ येसु यहुदियादाङ्‌का गालिल्‌दा म़बानायुङ्‌सानि एनुकि मो खोक्‍कोएदा खारा, खोन्‍कि “अ़ङ्‌छाएदा बानानिन खोन्‍कि नुनिप़नि”नि बुउ। देकिनालो मोसोओ अ़छा स़मादामा मुवाङा।

⁴⁸ येसुआ मो अ़लोवा, “खानानिन झारा बुन खोन्‍कि म़दोम्‍दाओ काचिचि मान्‍खाङ्‌माङ्‌तारि साकोङ्‌छ़ङ त़मुन्‍मिन।”

⁴⁹ मो हाङ्‌काचि काफाआ खोक्‍को लो, “हाङ्‌पो, अ़ङ्‌छा स़मादामा बुयाङा बानानिन।”

⁵⁰ येसुआ मो अ़लोवा, “खारा, आम्‍छा ह़ङ।” येसुआ अ़लोवाओ य़ङ्‌दा मो म़ना साकोङ्‌छ़ङ मुवा, खोन्‍कि अ़लाम वाङा।

⁵¹ खोन्‍किना खाराङाहिदा लाम्‌दा खोसोओ अ़हारुक्‌चिआ अ़तुआकि खोसोओ अ़छा ह़ङानि खो खाअ़एत्‍ता।

⁵² खाक्‍को ग़रिदाङ्‌का नुमा पुक्‍तु निकिना खोसाआ मोचि सेनुचिहिदा मोचिआ अ़लोवा, “आखोमाङ अ़क साङादाङ्‌का अ़माङ्‌धिन्‌आ मो लेरु।”

⁵³ खोन्‍किना येसुआ मो “आम्‍छा ह़ङ”नि अ़लोवाओ ग़रिदाङ्‌काङा नुवाओ निकिना अ़पाआ सिन्‍तु। खोन्‌ओसा खो खोन्‍कि खोसोओ झारा अ़खिम्‍लुम्‍पा साकोङ्‌छ़ङ म़मुवा।

⁵⁴ यहुदियादाङ्‌का गालिल्‌दा ताकिना येसुआ अ़मुवाओ ओ ह्‍वादुओदुओ म़दोम्‍दाओ बुन ओ।