युहन्ना 21 - बान्तावा राईयेसु सात्कापाङ अ़चुकाखेङ्पाचिएदा खाङ्म़मुसान्चिन्ओ 1 आदेङ अ़चुकाखेङ्पाचिएदा तिबेरियास धियाङ्वामाओ अ़केम्दा येसु म़लासान्खाङ्म़मुसान्चिन। ओवात्नि खोक्को आप्पि खाङ्म़मुसान्चिन। 2 सिमोन पत्रुस, दिदुमस्नि लोवाङाओ थोमा, गालिल्दाओ काना सहरादाओ नथानेल, जब्दियाओ ह़वाङ अ़छाचि खोन्कि खोक्कोसोओ अ़चुकाखेङ्पाचिएदाङ्काओ नि ह़वाङ अ़क्नि म़युङाङा। 3 सिमोन पत्रुस्आ मोचि लोचि, “अ़ङ्का ङा लाप्सि खात्ङाङा।” मोचिआ खो अ़लोवा, “आन्कान्काछाङ खानाएनान खारिन्का।” मोचि म़खाराकि वाप्तेलादा म़वाङा, मेन मो खाखुत मोचिआ दित्छाङ मान्लाप्चि। 4 अ़वाय़ङ लिमामुवाङा, येसु धियाङ्वामा केम्दा म़एवा। मेन काखेङ्पाचिआ खोक्को येसु निकिना मान्सिन्अ़दा। 5 येसुआ मोचि म़लोचि, “छाचि ओ, खानानिन्एदा देम ङाचि म़युङ्याङ?” मोचिआ खोक्को अ़लासालोवा, “मात्द़ङ।” 6 खोक्कोसाआ मोचि म़लोचि, “बोप्छ़क वाप्तेलाओ चुप्ताङ्लिप्पा वेत्तानुम, खोन्कि अ़क्चित त़धिरिन।” खोन्किना मोचिआ बोप्छ़क अ़वेत्ता, खोन्कि ब़द्धे ङाचिओसा मोचिआ बोप्छ़क नावादा सात्मा मान्ऱअ़दा। 7 येसुआ सोमाअ़तुक्ताओ काखेङ्पाआ पत्रुस लो, “खोक्को ना हाङ्पा ओ!” “खोक्को ना हाङ्पा”निओ य़ङ एनुकि सिमोन पत्रुस्आ बुङ्खालिप्पाओ अ़तित अ़छुमाय़क्दा छ़सु, देकिनालो खोसाआ अ़तित काचि मुमाओ निम्पाङ हुरुयुङ्सु, खोन्कि धियाङ्वामादा छुक्तादिसाकि अ़केम्या लोन्ता। 8 नि काखेङ्पाचि नावादाङा म़युङाकि ङाआ भेप्तुओ बोप्छ़क सात्याङ्सा म़बाना। मोचि धियाङ्वामा केम्दाङ्का अ़थाया माद़ङ्याङ्चि, मेन आप्फात सये मितरादा म़युङाङा। 9 खोन्कि मोचि अ़केम्दा म़लोन्ताहिदा मोचिआ मि काक्दा ङा युङ्साओ खोन्कि पेम्पाक अ़खा। 10 येसुआ मोचि म़लोचि, “खानानिन्आ ओन्ग़रि त़लाउम्च़म्ओ अ़क्चित ङाचि बात्तानुम्च़म।” 11 खोन्कि सिमोन पत्रुस नावादा वाङाकि अ़क सये तिरपन्न कातात अ़धिवो-अ़धिवो ङाआ भेप्तुओ बोप्छ़क अ़केम्दा सारुलोत्तु, मेन ओन ब़द्धे ङाचि म़धानुछाङ बोप्छ़क मान्पेत्खात। 12 येसुआ मोचि म़लोचि, “बानानिन्कि अ़वाय़ङ्ओ चामायु चानुम।” काखेङ्पाचिएदाओ खाक्कोसाआछाङ “खानानिन साङ ओ?” निकिना सेन्मा राक मान्मुचि, देकिनालो मोचिआ खोक्को हाङ्पा ओ निकिना अ़सिन्ताङा। 13 येसु म़बाना खोन्कि पेम्पाक अ़कुवाकि मोचि म़प़चि, खोन्कि मोवात्निङा ङाछाङ म़प़चि। 14 म़सुवादाओदाङ्का म़खोन्तालोन्ताकि येसु अ़चुकाखेङ्पाचिएदा खाङ्म़मुसान्चिन्ओ ओ सुम्कादुओदु ओ। पत्रुस आदेङ यायोक प़माय़ङ 15 मोचिआ अ़चाचिआकिना येसुआ सिमोन पत्रुस अ़लोवा, “युहन्नाओ अ़छा सिमोन, दि खाना अ़ङ्का ओचिदाङ्का च़लोक सोमात़तुक्ङा?” खोसाआ येसु लो, “उवा हाङ्पो, खानानिन त़सिन्तुम्योम, अ़ङ्का खानानिन सोमातुक्नानिन्ओ।” खोक्कोसाआ खो अ़लोवा, “अ़चुप्पो अ़ङ्भेराचि चान्तुचि।” 16 खोक्कोसाआ ह्वादुओदु मो अ़लासालोवा, “युहन्नाओ अ़छा सिमोन, दि खाना अ़ङ्का सोमात़तुक्ङा?” खोसाआ खोक्को लासुलो, “उवा हाङ्पो, खानानिन त़सिन्तुम्योम, अ़ङ्का खानानिन सोमातुक्नानिन।” खोक्कोसाआ मो अ़लोवा, “अ़ङ्भेराचि खाचि।” 17 खोक्कोसाआ मो सुम्कादुओदु अ़लोवा, “युहन्नाओ अ़छा सिमोन, दि खाना अ़ङ्का सोमात़तुक्ङा?” पत्रुस्ओ अ़राक सुवा, देकिनालो खोक्कोसाआ सुम्कादुओदु “दि खाना अ़ङ्का सोमात़तुक्ङा?” निकिना खो अ़सेना। मोसाआ खोक्को लो, “हाङ्पो, खानानिन झारा त़सिन्तुम्योम, अ़ङ्का सोमातुक्नानिन निकिना खानानिन त़सिन्तुम्योम।” येसुआ खो अ़लोवा, “अ़ङ्भेराचि चान्तुचि। 18 अ़नुछ्या अ़ङ्का खाना लोना, खाना सावाछा त़मुवाङाहिदा खाना आप्पिआ आम्छिप्माय़ङ त़छिउङु, खोन्कि खादा खात्मानि त़मिना त़खाराङा। मेन खाना देम्खा खोक्पा त़लि, खाना आम्छुक त़फेसु खोन्कि निचिआ खाना ऩछ़, खोन्कि खाना खादा खात्मा त़स़नान मोदा ऩखात।” 19 खाक्को पाराओ स़मालाम्पा खोसाआ निनाम्हाङ्ओ अ़चुऩङ अ़लोङ्ओ, मो खाङ्मुयाङ्सा खोक्कोसाआ ओ म़य़ङाओ। खोन्किना ओन म़य़ङाकि खोक्कोसाआ खो अ़लोवा, “अ़ङ्का त़ङ्ताङ।” येसुआ अ़न्नुनु सोमाअ़तुक्ताङाओ अ़चुकाखेङ्पा 20 पत्रुस अ़देङ्ह्यात्नि हुसान्चिन्कि चोउहिदा येसुआ सोमाअ़तुक्ताओ अ़चुकाखेङ्पा खोचिओ अ़चुदेङ-देङ बानाङाओ खा। खोसाआङा अ़नाम्प़क्ओ चा-चामा ग़रिदा खोक्कोसोओ अ़चुकोङ्कोम्दा नालान्चिन्कि, “हाङ्पो, खानानिन कालाप्प़पा साङ ओ?”नि सेनुओ। 21 खो खाकि पत्रुस्आ येसु सेनु, “हाङ्पो, ओ म़ना देत्नि लि?” 22 येसुआ पत्रुस लासुलो, “अ़ङ्का अ़ताऩङ्तारि खो ह़ङ्युङ्नेनि अ़ङ्का मिन्ङानुछाङ खाना देकात? खाना अ़ङ्का त़ङ्ताङ।” 23 खोन्ओसा मो काखेङ्पा अ़स़निन्निओ य़ङ साकोङ्छ़ङ कामुचिओ अ़चुरादा फेसा। येसुआ मो अ़स़निन्नि म़य़ङाओ माआङ, मेन “अ़ङ्का अ़ताऩङ्तारि मो ह़ङ्युङ्नेनि मिन्ङानुछाङ खाना देकात?”नि म़य़ङाओ। 24 ओ मो काखेङ्पाङा ओ, खोसाआ ओ य़ङ्चिओ अ़तुक्वादा सालुम्स़ङ प़ङु, खोन्कि ओ य़ङ छाप्तुयुङ्सु, खोन्किना आन्कान्का सिन्तुम्योम्का खोसोओ अ़सालुम्स़ङ अ़नुछ्या मुयाङ। 25 येसुआ निछाङ ब़द्धे काचिचि म़मुचि। झारासो अ़तुक्वादा छाप्ताओनालो अ़ङ्का ओवात्नि लुङा, मोसोओ अ़तुक्वादा छाप्माय़ङ्ओ छाप्लाखाचि हेन्खामा भेप्लोदाछाङ म़छ़त्ताओ। |
© Wycliffe Bible Translators, Inc. All rights reserved.
Wycliffe Bible Translators, Inc.