युहन्‍ना 20 - बान्‍तावा राई

अ़होम्‍प़द़क एप्‍मा

¹ साताओ बुयाओ लेन अ़वाय़ङ खामान्‍दात्‌युक्‍ताहिदाङा मग्‍दला सहरादाओ मरियम एप्‍मादा ताला, खोन्‍कि मोसाआ एप्‍माओ अ़दो दिप्‍खा लुङ्‌ताक ध़साखाइसायुङ्‌साओ धिरु।

² खोन्‌ओसा मो सिमोन पत्रुस खोन्‍कि येसुआ सोमाअ़तुक्‍ताङाओ नि काखेङ्‌पाएदा लोराखाराकि मोचि लोचि, “मोचिआ हाङ्‌पा एप्‍मादाङ्‌का अ़लाराखात्‍ताकि खोक्‍को खादा अ़युङ्‌सा, मो आन्‍कान्‍का अ़सिन्‍तिमिन्‍का!”

³ खोन्‍किना पत्रुस खोन्‍कि येसुआ सोमाअ़तुक्‍ताङाओ नि काखेङ्‌पा एप्‍माह्‍यात्‍नि खाराचि।

⁴ खोचि ह़वाङ्‌माङ अ़क्‍नि लोराचि, मेन नि काखेङ्‌पाआ पत्रुस क़प्‍तुखात्‍तुकि एप्‍माया बुया ताला।

⁵ एप्‍माहुत्‌दा पोम्‍साकि चोउखोहिदा खोसाआ अ़रिप्‍खा तित्‌चि ओन्‍ङा म़धुवाङाओ खाचि, मेन खो एप्‍माहुत्‌या मान्‌वाङ।

⁶ सिमोन पत्रुस मोसोओ अ़देङ-अ़देङ खारा, खोन्‍कि एप्‍माहुत्‌दा वाङा, खोन्‍किना मोसाआछाङ रिप्‍माय़ङ तित्‌चि ओन्‍ङा म़धुवाङाओ खाचि।

⁷ खोक्‍कोसोओ अ़चुताङ्‌दु दिप्‍तायुङ्‌साओ तित रिप्‍माय़ङ तित्‌एनान मात्‍द़ङ्‌याङ, मेन अ़चित अ़थाया भेक्‍ताकि युङ्‌सायुङ्‌सा।

⁸ खोन्‍किना एप्‍मादा बुया कातादि काखेङ्‌पाछाङ वाङाकि मो खोसाआ खाकिना साकोङ्‌छ़ङ मु।

⁹ मोचिआ खोक्‍को खोन्‍मालोन्‍मादोत्‌निओ साम्‍कालिन्‌दाओ य़ङ मोन्‍ग़रितारि मान्‍सिन्‌अ़युक्‍ताचु।

येसु मग्‍दलिनिदाओ मरियम्‌एदा खाङ्‌म़मुसान्‍चिन्‌ओ

¹⁰ खोन्‍किना मो काखेङ्‌पाचि अ़चुखिम लासाचि।

¹¹ मेन मरियम एप्‍माओ बुङ्‌खालिप्‍पा खाप्‌याङ्‌सा एवाङा। मोसाआ खाप्‌याङ्‌सा एप्‍माहुत्‌दा पोम्‍सान्‍चिन्‌कि चोउ।

¹² खोन्‍कि येसुओ अ़चुस़पोक युङ्‌साओदा छोक्‍छोक्‍छोक्‌वाओ तित हुम्‍साङाचिओ ह़वाङ निनाम्‍हाङ काफाचि, अ़क्‌तात ताङ्‌लिप्‍पा खोन्‍कि नितात लाङ्‌लिप्‍पा युङाङाचिओ मोसाआ खाचि।

¹³ खोचिआ मो अ़लोवाचु, “मेत्‍छामा, देकि त़खाप्‌याङ?” मोसाआ खोचि लोचि, “खोचिआ अ़ङ्‌हाङ्‌पाओ अ़चुस़पोक अ़खात्‍ता, खोन्‍कि खोक्‍को खादा अ़युङ्‌सायुङ्‌सा, अ़ङ्‌का अ़सिन्‍ऩङ।”

¹⁴ ओ य़ङ य़ङाकि मो अ़देङ्‌ह्‍यात्‍नि हुसान्‍चिन, खोन्‍कि मोसाआ येसु म़एवाङाओ खा, मेन येसुङाओ निकिना मान्‍सिन्‍दो।

¹⁵ येसुआ मो अ़सेना, “मेत्‍छामा, खाना देकि त़खाप्‌याङ? खाना साङ त़लामुङु ओ?” मोसाआ खो स़ङ्‌सिबात्‍बुङ काखाङ्‌नि मित्‍तुकिना लो, “उवा, खानानिन्‌आ खोक्‍को ओदाङ्‌का त़खात्‍तुम्‌ओनालो खादा त़युङ्‌सुम्‌युङ्‌सुम अ़ङ्‌का लोवाङ्‌ऩङ, खोन्‍कि अ़ङ्‌का खोक्‍को खात्‍तुङ।”

¹⁶ येसुआ मो अ़लोवा, “मरियम!” मोसाआ हुसान्‍चिन्‌कि हिब्रु य़ङ्‌दा खोक्‍को लो, “रब्‍बोनि!” मो निओ हिब्रु य़ङ्‌दा “काचिन्‍पो।”

¹⁷ येसुआ मो अ़लोवा, “अ़ङ्‌का मान्‍लाप्‌युङ्‌दाङ, देकिनालो अ़ङ्‌का ओन्‍ग़रितारि निनाम्‍हाङ पापाएदु मान्‍खात्‌युक्‍ङा। अ़ङ्‌निछाचिएदा खाराकि मोचि खाएत्‍तुचि, ‘अ़ङ्‌पापा खोन्‍कि आम्‍नुओ पापा खोन्‍कि अ़ङ्‌निनाम्‍हाङ खोन्‍कि आम्‍नुओ निनाम्‍हाङ्‌एदा खात्‍ङाङा।’”

¹⁸ मग्‍दलिनिदाओ मरियम खाराकि अ़चुकाखेङ्‌पाचि खाएत्‍तुचि, “अ़ङ्‌का हाङ्‌पा खाङ्‌युङ्‌सुङ।” खोन्‍किना खोक्‍कोसाआ म़लोचिओ य़ङ्‌चि मोसाआ मोचि खाएत्‍तुचि।

येसु अ़चुकाखेङ्‌पाचिएदा खाङ्‌म़मुसान्‍चिन्‌ओ

¹⁹ मो लेन माङ्‌लो साताओ बुयाओ लेन्‌ओ अ़नाम्‍प़क, मोदा यहुदिचिओ अ़चुक़माआ काखेङ्‌पाचि लाप्‍तिखोप्‌चि म़खोप्‍तुचिकि खिम्‍हुत्‌या म़युङाङा, येसु म़ताकि मोचिओ अ़चुरादा म़एवाकि मोचि म़लोचि, “खानानिन सेवाङ्‌नि लिसानिन!”

²⁰ खोवात्‍नि म़य़ङाचिआकि खोक्‍कोसाआ मोचि अ़चुछुक खोन्‍कि अ़चुहेबेक्‌छाङ खाङ्‌म़मेत्‍तुचि। खोन्‍किना हाङ्‌पा अ़खाकि अ़चुकाखेङ्‌पाचि अ़न्‍नुनु अ़चुऩङानुवा।

²¹ खोन्‍कि येसुआ मोचि म़लासुलोचि, “खानानिन सेवाङ्‌नि लिसानिन! देत्‍नि पापा निनाम्‍हाङ्‌आ अ़ङ्‌का ऩछुत्‍ताङ, मोवात्‍निङा अ़ङ्‌काछाङ खानानिन छुत्‍नानिन।”

²² खोन्‍किना ओन म़य़ङाचिआकि खोक्‍कोसाआ मोचि म़मुत्‍तुचिकि म़लोचि, “सेङ्‌लावा लोआनुम।

²³ साङ्‌को अ़हेवा खानानिन त़लेत्‍तुम्‌नालो मोसोओ अ़चुहेवा लेत, खोन्‍कि साङ्‌चिओ अ़चुहेवा खानानिन त़लेत्‍तिन्‍चिमिन मोचिओ अ़चुहेवा ऩलेत्‍निन।”

येसु थोमाएदा खाङ्‌म़मुसान्‍चिन्‌ओ

²⁴ येसु म़ताहिदा बारकापाङ काखेङ्‌पाचिएदाओ अ़क्‍छा दिदुमस्‌नि लोवाङाओ थोमा मोचिएनान मात्‍द़ङ्‌याङ।

²⁵ खोन्‌ओसा नि काखेङ्‌पाचिआ मो अ़लोवा, “आन्‍कान्‍का हाङ्‌पा खाम्‍का।” मेन खोसाआ मोचि लोचि, “अ़ङ्‌का खोक्‍कोसोओ अ़चुछुक्‌दा पेरेक्‌ओ थुपि अ़खाङ्‌ऩङ, खोन्‍कि मोदा अ़ङ्‌छुक कुसिप अ़पाक्‍ऩङ, खोन्‍कि खोक्‍कोसोओ अ़चुहेबेक्‌दा अ़ङ्‌छुक्‌आ अ़नोप्‍ऩङ्‌तारि अ़ङ्‌का साकोङ्‌छ़ङ अ़मुऩङ।”

²⁶ आथ्‌कालेन्‌कि खोक्‍कोसोओ अ़चुकाखेङ्‌पाचि खिम्‍हुत्‌या म़लासान्‍कोवान्‌युङ्‌सान्‍चिन। थोमाछाङ मोचिएनान युङाङा। लाप्‍तिखोप्‌चि म़छेक्‍ताङा, मेन येसु म़ताकि अ़चुरादा म़एवा, खोन्‍कि म़लोचि, “खानानिन सेवाङ्‌नि लिसानिन!”

²⁷ खोन्‍किना खोक्‍कोसाआ थोमा अ़लोवा, “आम्‍छुक कुसिप ओदा पाउ, खोन्‍कि अ़ङ्‌छुक्‌चि खाचि। आम्‍छुक बात्‍तुकि अ़ङ्‌हेबेक्‌दा पाउ। मान्‍केङ मान्‍मुदा, मेन साकोङ्‌छ़ङ मुवा।”

²⁸ थोमाआ खोक्‍को लो, “अ़ङ्‌हाङ्‌पो, खोन्‍कि अ़ङ्‌निनाम्‍हाङ!”

²⁹ येसुआ मो अ़लोवा, “खाना अ़ङ्‌का खोन्‍ताङ्‌लोन्‍ताङ्‍ओ त़खाङ्‌युङ्‌साङ्‍ओसा साकोङ्‌छ़ङ अ़ङ्‌का त़मुवाङ्‌युङ्‌साङ्‌ओ। मोचि आसिखा कातोक्‌चि ओ, मोचिआ अ़ङ्‌का मान्‍खाङ्‌ऩयुक्‍ङा, खोन्‍नुछाङ साकोङ्‌छ़ङ ऩमुङा।”

ओ छाप्‍लाखाओ अ़मित्‍चिऩङ

³⁰ येसुआ नि ब़द्‍धे बुन्‌चि अ़चुकाखेङ्‌पाचिओ अ़चुबुदा म़मुचि, मोचि ओ छाप्‍लाखादा मान्‍छाप्‍म़युक।

³¹ मेन ओ य़ङ्‌चि म़छाप्‍तायुङ्‌सा खोन्‌ओसा खानानिन्‌आ येसु निनाम्‍हाङ्‌ओ अ़चुछा ख्रिस्‍तओ निकिना साकोङ्‌छ़ङ मुवानिन, खोन्‍कि साकोङ्‌छ़ङ्‌लाम्‍पा खोक्‍कोसोओ अ़चुपाङ्‌दा खानानिन ह़ङ्‌म़ङ तोक्‍तानुम।