युहन्‍ना 2 - बान्‍तावा राई

काना सहरादाओ सायाकाम्‍मा

¹ सुम्‌कालेन ओ लेन गालिल्‌दाओ काना सहरादा अ़क्‍छा सायाकाम्‍साङा। येसुओ अ़मा मोदा म़युङाङा।

² येसु खोन्‍कि खोक्‍कोसोओ अ़चुकाखेङ्‌पाचिछाङ सायाकाम्‍खादा म़बुत्‍तुयुङ्‌सुचि।

³ अङ्‌गुरा माङ्‌वा चिआकिना येसुओ अ़चुमाआ खोक्‍को अ़लोवा, “मोचिएदा अङ्‌गुरा माङ्‌वा मात्‍द़ङ।”

⁴ खोन्‍कि येसुआ मो अ़लोवा, “आमो, अ़ङ्‌का दे मुमादोत अ़ङ्‌का मान्‍लोदानि। अ़ङ्‌ग़रि हान्‍छाङ मान्‍तालायुक।”

⁵ खोक्‍कोसोओ अ़चुमाआ काफाचि लोचि, “खोक्‍कोसाआ खानानिन देत्‍नि ऩलोन, खोवात्‍नि चुवानिन।”

⁶ हान यहुदिचिओ सेङ्‌मा अ़चुच़माथाङ्‌माओ निम्‍पाङ मोदा आप्‍फात, अ़क सये लितरा वाङाङाओ लुङ्‌ओ छकातात ल़ङ्‌भ़चि म़युङ्‌सायुङ्‌सा।

⁷ येसुआ काफाचि म़लोचि, “ल़ङ्‌भ़चि चाक्‌वाआ भेम्‍सानुम्‍च़म।” मोचिआ ल़ङ्‌भ़चिओ अ़चुदोदुतारि चाक्‌वाआ म़भेम्‍सुचि।

⁸ खोन्‍किना खोक्‍कोसाआ मोचि म़लोचि, “अ़चिलोक अ़आनुम्‌कि खाबाचा काखाङ्‌एदा खात्‍तानुम।” खोन्‍किना मोचिआ मो अ़खात्‍ता।

⁹ खाबाचादाओ काखाङ्‌पाआ मो चाक्‌वा छेम्‍सु, मो हान अङ्‌गुरा माङ्‌वादा फान्‍तायुङ्‌सा। मो खादाङ्‌का तात्‍माय़ङ्‍ओ मो खोसाआ मान्‍सिन्‍दोङु, मेन चाक्‌वा काभेम काफाचिआ अ़सिन्‍ताङा। खोन्‍कि मो चानुचाओ अ़धुवाआ सायाकाकाम्‍पा बुत्‍तुकि लो,

¹⁰ “झारा म़नाचिआ बुया चानुओ अङ्‌गुरा माङ्‌वा म़प़चि, खोन्‍किना म़नाचिआ ब़द्‍धे अ़दुङ्‌चिन्‌कि ओन्‍ङा चाअ़त्‌ओ अङ्‌गुरा माङ्‌वा म़प़चि। खाना ना चानुयाङ्‌ओ अङ्‌गुरा माङ्‌वा ओन्‍ग़रितारि त़युङ्‌सुङु।”

¹¹ येसुआ ओ बुयाओदुओ बुन गालिल्‌ओ कानादा खाङ्‌अ़मुसाओ। ओवात्‍नि खोक्‍कोसाआ अ़चुसावा खाङ्‌अ़मुसा, खोन्‍कि खोक्‍कोसोओ अ़चुकाखेङ्‌पाचिआ खोक्‍कोएदा साकोङ्‌छ़ङ म़मुवा।

येसुआ निनाम्‍हाङ ब़क्‍खाखिम अ़सेङ्‌साओ

¹² खोन्‍किना येसु अ़चुओमा, अ़चुनिछाचि खोन्‍कि अ़चुकाखेङ्‌पाचिएनान कफर्नहुम म़खारा, खोन्‍कि अ़चित लेन खोचि मोदा म़युङा।

¹³ हान यहुदिचिओ काक्‍माखात्‍मा चानुचा नेक्‍ताताङा, खोन्‌ओसा येसु यरुसलेम म़खारा।

¹⁴ खोक्‍कोसाआ निनाम्‍हाङ ब़क्‍खाखिम बुक्‍लुङ्‌दा म़नाचि बोयोङ्‌चि, भेराचि, साप्दुकुत्‌वाचि म़इनाङाओ खोन्‍कि अ़चुतेबलाचिदा फेक्‌वा म़बाराङाओ म़धिरुचि।

¹⁵ खोन्‍कि खोक्‍कोसाआ माक्‌य़ओ अ़क्‌तात य़हुप अ़मुवाकि झारा मोचिओ अ़चुभेराचि खोन्‍कि अ़चुबोयोङ्‌चि निनाम्‍हाङ ब़क्‍खाखिम्‌दाङ्‌का बुङ्‌खाया म़ऱसुलोइसुचि। खोन्‍कि फेक्‌वा काबात्‍चिओ अ़चुफेक्‌वाचि म़रिसुखाइसुप़चि खोन्‍कि अ़चुतेबलाचि म़लिम्‍सुखाइसुप़चि।

¹⁶ खोक्‍कोसाआ साप्‍दुकुत्‌वा काइन्‌चि म़लोचि, “ओदाङ्‌का ओचि झारा खात्‍तानुम्‍च़म। अ़ङ्‌पापाओ अ़चुखिम खित्‍खाइन्‍खा खिम मान्‍मुदानुम।”

¹⁷ खोक्‍कोसोओ अ़चुकाखेङ्‌पाचिआ साम्‍कालिन्‌दा छाप्‍तायुङ्‌साओ य़ङ अ़मित्‍तातोक्‍ता, “आम्‍नुओ खिम्‌ओ निम्‍पाङ अ़ङ्‌राक्‌आ मिआवात्‍नि अ़ङ्‌का अ़ह़त्‍ङा।”

¹⁸ यहुदिचिओ अ़चुबुसुवाचिआ खोक्‍को अ़सेना, “खाना ओ काचिचि त़मुचि, ओ काचि मुमाओ पाङ खानाएदा युङ्‌याङ्‍ओनालो आन्‍कान्‍का बुन खाङ्‌मेत्‍नि।”

¹⁹ येसुआ मोचि म़लासुलोचि, “ओ निनाम्‍हाङ ब़क्‍खाखिम भुङ्‌साखाइसानुम, खोन्‍कि अ़ङ्‌का सुम्‌कालेन्‌दा ओ मुङ्‌चिउङ।”

²⁰ खोन्‍कि यहुदिचिआ अ़लोवा, “ओ निनाम्‍हाङ ब़क्‍खाखिम मुमाओ निम्‍पाङ छयालिस्‌कादोङ वाङा, खोन्‍कि दि खानानिन ओ सुम्‌कालेन्‌दा मुमाचिन्‍मा त़ऱम कि?”

²¹ मेन येसु म़य़ङाओ निनाम्‍हाङ ब़क्‍खाखिम, खोक्‍कोसोओ आप्‍पिओ अ़चुपोक्‌ओ अ़तुक्‌वादा ओ।

²² खोक्‍को म़सुवादाओदाङ्‌का म़खोन्‍तालोन्‍ताकिना येसुआ म़य़ङाओ मो य़ङ अ़चुकाखेङ्‌पाचिआ अ़मित्‍तातोक्‍ताकि मोचिआ साम्‍कालिन्‌दा खोक्‍कोसोओ अ़चुतुक्‌वादा छाप्‍ताओ य़ङ्‌चि खोन्‍कि येसु म़चेवायुङ्‌साओ य़ङ्‌दा साकोङ्‌छ़ङ म़मुवा।

²³ खोन्‍कि खोक्‍को काक्‍माखात्‍मा चानुचाओ ग़रि यरुसलेम्‌दा म़युङाङाहिदा खोक्‍कोसाआ अ़मुवाओ म़दोम्‍दाओ काचिचि म़खाचिकि ब़द्‍धेसाआ खोक्‍कोएदा साकोङ्‌छ़ङ म़मुवा,

²⁴ मेन येसुआ मोचिओ अ़चुय़ङ्‌दा सोम्‍कुवा मान्‍मुम़दोचि, देकिनालो झारा म़नाचिओ अ़चुसाकोङ्‌वाचि खोक्‍कोसाआ अ़सिन्‍ताङा।

²⁵ म़नाओ अ़तुक्‌वादा साङ्‌आछाङ खोक्‍को चिन्‍मा मान्‍दोत्‌याङ, देकिनालो म़नाओ अ़साकोङ्‌वादा दि याक, मो खोक्‍कोसाआ अ़सिन्‍ताङा।