युहन्‍ना 13 - बान्‍तावा राई

येसुआ अ़चुकाखेङ्‌पाचिओ अ़चुलाङ्‌थेम वाम़स़त्‍तुप़चिओ

¹ काक्‍माखात्‍मा चानुचाओ बुया, ओ हेन्‍खामा छित्‍मादामाकि पापा निनाम्‍हाङ्‌एदु खात्‍मा खोक्‍कोसोओ अ़चुग़रि तादिसायुङ्‌सानि येसुआ अ़सिन्‍ता। खोन्‍कि ओ हेन्‍खामादाओ अ़चुकाखेङ्‌चि अ़धुन सोमाम़तुक्‍तुचि, खोन्‍कि खोक्‍कोसाआ झारा अ़चुसोम्‍तुक्‍माआ मोचि सोमाम़तुक्‍तुचि।

² खोन्‍कि अ़नाम्‍प़क्‌ओ चा-चामा ग़रि दियाबलस्‌आ सिमोन्‌ओ अ़छा यहुदा इस्‍करियोत्‌ओ अ़मिन्‍मादा येसु धान्‍मा मिन्‍मा बुयाङा पाक्‍तुप़युङ्‌सु।

³ निनाम्‍हाङ पापाआ झारा सामा खोक्‍कोसोओ अ़चुछुक्‌दा अ़पुवाओ खोन्‍कि खोक्‍को निनाम्‍हाङ्‌लाम्‍पा म़ताओ खोन्‍कि निनाम्‍हाङ्‌एदा म़खात्‌याङ्‌नि येसुआ अ़सिन्‍ताङा।

⁴ खोन्‍किना खोक्‍को चा-चाखादाङ्‌का म़पुवालोन्‍ताकि अ़दुङ्‌दाओ अ़चुतित अ़हुराकि अ़क्‌तात मुन्‍जेत अ़चुछुमाय़क्‌दा अ़रिप्‍ता।

⁵ खोन्‍किना खोक्‍कोसाआ खुङ्‌दा चाक्‌वा अ़लेन्‍ताकिना अ़चुकाखेङ्‌पाचिओ अ़चुलाङ्‌थेम वास़मा अ़पुङ्‌सा, खोन्‍कि अ़चुछुमाय़क्‌दा अ़रिप्‍ताओ मुन्‍जेत्‌आ मोचिओ अ़चुलाङ्‌थेम त़क्‍मा अ़पुङ्‌सा।

⁶ खोक्‍को सिमोन पत्रुस्‌एदा म़ता, मोसाआ येसु लो, “हाङ्‌पो, दि खानानिन्‌आ अ़ङ्‌लाङ्‌थेम वात़स़म ओ?”

⁷ येसुआ मो अ़लासालोवा, “अ़ङ्‌का दे च़ङाङा खाना ओन्‍ग़रि त़सिन्‍तुन, मेन माय़ङ त़तुप्‍तु।”

⁸ पत्रुस्‌आ खोक्‍को लो, “खानानिन्‌आ अ़ङ्‌लाङ्‌थेम देम्‍खाछाङ वास़मा अ़नुनिन।” येसुआ मो अ़लासालोवा, “अ़ङ्‌का आम्‍लाङ्‌थेम वाअ़स़त्‍नान्‍प़नान्‌नालो अ़ङ्‌काएदा आम्‍को दित्‍छाङ काचि अ़याक्‍निन।”

⁹ सिमोन पत्रुस्‌आ खोक्‍को लो, “हाङ्‌पो, खोन्‍नालो ना अ़ङ्‌लाङ्‌थेम ओन्‍ङा माआङ, अ़ङ्‌छुक खोन्‍कि अ़ङ्‌ताङ्‌छाङ वास़त्‍ताङ्‌पुवाङ्‌ऩङ!”

¹⁰ येसुआ मो अ़लासालोवा, “वाचाआचिआओ म़नाओ अ़लाङ्‌थेम्‌दाङ्‌का नि दित्‍छाङ वास़मा अ़दोत्‍निन। मो झारा सेङ्‌याङ। खोन्‍कि खानानिन त़सेङिन्‌येन, मेन खानानिन झारा ना माआङ।”

¹¹ देकिनालो साङ्‌आ खोक्‍को धान्‍मा मुङु, मो खोक्‍कोसाआ अ़सिन्‍ताङा। खोन्‌ओसा खोक्‍कोसाआ म़लोचि ओ, “खानानिन्‌एदा अ़क्‍छादाङ्‌का झारा त़सेङिन्‌येन।”

¹² मोचिओ अ़चुलाङ्‌थेम वाम़स़त्‍तुचिउचिकि खोक्‍कोसाआ अ़चुतित अ़लासाहुम्‍सा, खोन्‍कि म़युङा। खोन्‍कि खोक्‍कोसाआ मोचि म़सेनुचि, “दि खानानिन त़तुप्‍तुम्‌योम, आम्‍नुओ निम्‍पाङ अ़ङ्‌का दि मुङ?

¹³ खानानिन्‌आ अ़ङ्‌का ‘काचिन्‍पो’ खोन्‍कि ‘हाङ्‌पो’नि त़लोङाङाऩङ, मो खानानिन तोङ्‌लो त़य़ङिन्‌येन। देकिनालो अ़ङ्‌का खोक्‍कोङा ओ।

¹⁴ अ़ङ्‌का आम्‍नुओ हाङ्‌पा खोन्‍कि आम्‍नुओ काचिन्‍पा लिसाङ्‌किछाङ अ़ङ्‌का आम्‍नुओ लाङ्‌थेम वास़ङ्‌नालो खानानिन्‌आछाङ मोवात्‍नि अ़क्‍छा निएदा आम्‍नुओ लाङ्‌थेम वास़त्‍प़मुमादोत।

¹⁵ अ़ङ्‌का खानानिन अ़क्‌तात अ़मात्‍ऩङ खाङ्‌मेत्‍नायुङ्‌नानिन, खोन्‍कि अ़ङ्‌का देत्‍नि आम्‍नुओ निम्‍पाङ चुवाङ, खानानिन्‌छाङ मोवात्‍निङा चुवानिन।

¹⁶ अ़नुछ्‍याङा अ़ङ्‌का खानानिन लोनानिन, हारुक अ़हाङ्‌पाएदाङ्‌का तोक्‍पो अ़लिनिन, खोन्‍कि य़ङ्‌खान काखात य़ङ्‌खान काखान्‌दाङ्‌का तोक्‍पो अ़लिनिन।

¹⁷ खानानिन ओ य़ङ्‌चि त़तुप्‍तुम्‍च़म। हान मो त़मुम्‍च़म्‌नालो खानानिन आसिखा त़तोक्‍तुम।

खोक्‍कोसोओ अ़चुलाप्‍खावाओ अ़तुक्‌वादा खालुमाय़ङ

¹⁸ अ़ङ्‌का खानानिन झारासोओ आम्‍नुओ तुक्‌वादा य़ङ्‌ङाङाओ माआङ। अ़ङ्‌का साङ छेन्‍तुङ्‌युङ्‌सुङ, मो अ़ङ्‌का सिन्‍तुङ। मेन ‘अ़ङ्‌काएनान अ़क्‍नि पेम्‍पाक काचा अ़ङ्‌देङ्‌सालाप्‍पादा पुवालोन्‍ता’ नि साम्‍कालिन्‌दा छाप्‍ताओ य़ङ तालाने निम्‍पाङ ओवात्‍नि लिसा।

¹⁹ ओ लिमा बुया ओन्‍ग़रि अ़ङ्‌का खानानिन लोनानिन, खोन्‍किना देम्‍खा मो लि, अ़ङ्‌का खोक्‍कोङा ओ निकिना खानानिन साकोङ्‌छ़ङ त़मुन्‍ने।

²⁰ अ़नुछ्‍याङा अ़ङ्‌का खानानिन लोनानिन, साङ अ़ङ्‌का छुत्‍तुङ, खो कालोक्‌आ अ़ङ्‌का अ़लोक्‍ङा, खोन्‍कि अ़ङ्‌का कालोक्‌आ अ़ङ्‌का काछुत्‍पा लोउ।”

²¹ ओ य़ङ म़य़ङाचिआकि येसुओ चाअ़त्‍लो अ़चुदुखाखारा, खोन्‍कि खोक्‍कोसाआ सालुम्‍स़ङ म़प़चि, “अ़नुछ्‍या अ़ङ्‌का खानानिन लोनानिन, खानानिन्‌एदाओ अ़क्‍छाआ अ़ङ्‌का अ़धान्‍ङा।”

²² खोक्‍कोसाआ साङ्‌को अ़तुक्‌वादा म़य़ङ्‌याङ्‌ओ निकिना मान्‍सिन्‌अ़दाओसा काखेङ्‌पाचि अ़क्‍छा निएदा चोप्‍का-चोप म़मुवा।

²³ खोक्‍कोसोओ अ़चुकाखेङ्‌पाचिएदाओ येसुआ सोमाअ़तुक्‍ताओ अ़चुकाखेङ्‌पा खोक्‍कोसोओ अ़चुकोङ्‌कोम्‌दा नालान्‍चिन्‌कि युङाङा।

²⁴ खोन्‍कि सिमोन पत्रुस्‌आ छुक्‌चालाआ मो सेनु, “खोक्‍को साङ्‌को अ़तुक्‌वादा म़चेप्‌याङ ओ?”

²⁵ खोन्‍किना येसुओ अ़चुकोङ्‌कोम च़क्‌दा मेङ्‌नान्‍चिन्‍सा मोसाआ खोक्‍को सेनु, “हाङ्‌पो, मो साङ ओ?”

²⁶ येसुआ अ़लासालोवा, “साङ अ़ङ्‌का पेम्‍पाक्‌ओ अ़धाङ लुप्‍तुङ्‌कि प़ङ, मोङा ओ।” खोन्‍कि खोक्‍कोसाआ पेम्‍पाक्‌ओ अ़धाङ अ़लुम्‍ता, खोन्‍कि मो सिमोन्‌ओ अ़छा यहुदा इस्‍करियोत अ़पुवा।

²⁷ पेम्‍पाक्‌ओ अ़धाङ चोचिउङुवा सैताना मो हुत्‌दा वाङा। खोन्‍कि येसुआ मो अ़लोवा, “खाना दे च़मा त़लाम्‌याङ, मो च़क्‍नि मु।”

²⁸ मेन येसुआ देकि मो ओवात्‍नि अ़लोवा निकिना चा-चासि म़युङाओ नि काखेङ्‌पाचिएदाओ साङ्‌आछाङ मान्‍तुप्‌अ़दा।

²⁹ खा-खाक्‍कोसाआ ओवात्‍नि अ़मित्‍ता, यहुदादा अ़फेक्‌वाओ बेखा युङ्‌याङ, खोन्‌ओसा येसुआ खो चानुचाओ निम्‍पाङ दोत्‌ओ सामा खित्‍ने माङ्‌लो मोसाआ मान्‍तोक्‍कादाचि दिदि प़चिनेनि अ़लोवाओ।

³⁰ खोन्‍किना पेम्‍पाक चोकि यहुदा इस्‍करियोत मोन्‍ग़रिङा बुङ्‌खाह्‍यात्‍नि लोन्‍ताखारा। खोन्‍कि मोन्‍ग़रि खाखुत्‍तायुङ्‌सा।

पत्रुस्‌आ ऩङाछिरुओ येसुआ खालुसु

³¹ मो बुङ्‌खाह्‍यात्‍नि लोन्‍ताखाराकिना येसु म़य़ङा, “हान म़नाओ अ़छाआ अ़साऩङ्‌वा तोक्‍तु, खोन्‍कि खोलाम्‍पा निनाम्‍हाङ्‌आछाङ अ़चुसाऩङ्‌वा अ़तोक।

³² म़नाओ अ़छालाम्‍पा निनाम्‍हाङ अ़चुसाऩङ्‌वा अ़तोक्‌नालो निनाम्‍हाङ आप्‍पिआ म़नाओ अ़छाओ अ़चुसाऩङ्‌वा म़प़चि, खोन्‍कि खोक्‍कोसाआ च़क्‍निङा अ़चुसाऩङ्‌वा म़प़चि।

³³ अ़चुप्‍पो छाचिओ, अ़क्‌ग़रि अ़ङ्‌का खानानिन्‌एनान युङ्‌ङा! खानानिन्‌आ अ़ङ्‌का त़लाम्‍ङाऩङ, खोन्‍कि देत्‍नि अ़ङ्‌का यहुदि बुसुवाचि लोङ्‌च़ङ, हान खानानिन्‌छाङ अ़ङ्‌का लोनानिन, ‘खादा अ़ङ्‌का खात्‍ङाङा, खानानिन तामा त़ऱन्‍मिन।’

³⁴ अ़क्‌तात अ़ऩङ्‌वा लोमाय़ङ अ़ङ्‌का खानानिन प़नानिन: खानानिन अ़क्‍छा निएदा सोमातुक्‍कातुक मुवानिन। खानानिन अ़ङ्‌का देत्‍नि सोमातुक्‍नानिन, खानानिन्‌आछाङ अ़क्‍छा निएदा मोवात्‍निङा सोमातुक्‍कातुक मुवानिन।

³⁵ खानानिन्‌आ अ़क्‍छा निएदा सोमातुक्‍कातुक त़मुन्‌नालो ओवात्‍नि झारा म़नाचिआ खानानिन अ़ङ्‌काखेङ्‌पाचिओनि अ़सिन।”

³⁶ सिमोन पत्रुस्‌आ खोक्‍को अ़सेना, “हाङ्‌पो, खानानिन खात्‍नि त़खारिन्‌येन?” येसुआ अ़लासालोवा, “अ़ङ्‌का खादा खात्‍ङाङा, खाना ओन्‍ग़रि अ़ङ्‌का त़ङ्‌मा त़ऱऩङ, मेन माय़ङ ना खाना अ़ङ्‌का त़त़ङ्‌ङा।”

³⁷ पत्रुस्‌आ येसु लासुलो, “हाङ्‌पो, अ़ङ्‌का देकिना ओन्‍ग़रि खानानिन त़ङ्‌मा अ़ऱनान्‍निमिन ओ? आम्‍नुओ निम्‍पाङ अ़ङ्‌का स़मा ऱङा।”

³⁸ खोन्‍किना येसुआ अ़लोवा, “दि खाना अ़ङ्‌को निम्‍पाङ स़मा त़ऱ कि? अ़नुछ्‍या अ़ङ्‌का खाना लोना, वापापा ओक्‍मा बुया खाना अ़ङ्‌का सुम्‌कादु ऩङात़छित्‍ङा।”