युहन्‍ना 12 - बान्‍तावा राई

बेथानियादा येसु

¹ काक्‍माखात्‍मा चानुचाओ छकालेन बुया येसु बेथानियादा म़ता। मो तेन्‌दा लाजरस युङाङा, मो येसुआ सुवादाओदाङ्‌का अ़ह़ङ्‌सालोइसायुङ्‌साओ।

² येसुओ निम्‍पाङ मो तेन्‌दा अ़नाम्‍प़क्‌ओ अ़धिवा चा म़कुक्‍ता। मार्थाआ ब़रुचि, खोन्‍किना लाजरस येसुएनान चासि म़नालान्‍चिन्‌्‌कि कायुङ्‌चिएदाओ अ़क्‍छा याआङा।

³ खोन्‍किना मरियम्‌आ अ़दाक्‌वा लितरालेका अ़लुङ्‌छ़साङाओ जतामसिओ नाम्‍नुवाङाओ सुङ तारुकि येसुओ अ़चुलाङ्‌थेम्‌दा थोक्‍तु, खोन्‍कि खोक्‍कोसोओ अ़चुलाङ अ़ताङ्‌मुवाआ त़उकि नाम्‍नुवाङाओ सुङ्‌आ खिम थ़क्‍तुखात्‍तु।

⁴ मेन खोक्‍कोसोओ अ़चुकाखेङ्‌पाचिएदाओ अ़क्‍छा, खोक्‍को लाप्‍माकालाम यहुदा इस्‍करियोत्‌आ लो,

⁵ “दि ओ नाम्‍नुओ सुङ सुम्‌कासये रुपाओ फेक्‌वादा इनाकि मो फेक्‌वा मान्‍तोक्‍कादाचि म़पुवाओदे मान्‍नुयाङ्‌ओ कि?”

⁶ मेन मोसाआ मान्‍तोक्‍कादाचि मित्‍तुचिकि ओवात्‍नि य़ङाओ माआङ। देकिनालो मो काख़पा ओ, खोन्‍कि फेक्‌वाओ बेखा मोसाआङा युङ्‌सुङु, खोन्‍कि मोदा याआङाओ आप्‍पिओ निम्‍पाङ याङुङु।

⁷ येसुआ म़लोचि, “मो देत्‍छाङ मान्‍लोदानुम! ओसाआ अ़ङ्‌पोक खुम्‍माओ निम्‍पाङ चुम्‍सुङुओ।

⁸ मान्‍तोक्‍कादाचि ना खानानिन्‌एनान अ़धुन म़युङ्‌युङ, मेन अ़ङ्‌का ना खानानिन्‌एनान अ़धुन अ़युङ्‌ऩङ।”

⁹ यहुदिचिओ अ़धिवो मुक्‍लाआ खोक्‍को मोदा म़युङ्‌याङ निकिना अ़सिन्‍ता, खोन्‍कि येसु खाङ्‌सि ओन्‍ङा माआङ, मेन खोक्‍कोसाआ सुवादाओदाङ्‌का अ़ह़ङ्‌साओ लाजरस्‌छाङ चोप्‍सि मोचि म़तायुङ्‌सा।

¹⁰ मुलो काब़क्‍पाचिआ लाजरस्‌छाङ सेत्‍मा निकिना याम़योआ।

¹¹ देकिनालो खोसोओ अ़तुक्‌वाआङा यहुदिचिएदाओ ब़द्‍धेकापाङ्‌आ म़छिरुदोचिकि येसुएदा साकोङ्‌छ़ङ म़मुवाङा।

यरुसलेम्‌दा येसु म़वाङाओ

¹² अ़माङ्‌कोलेन चानुचादा काता अ़धिवो म़ना मुक्‍लाचिआ येसु यरुसलेम्‌दा म़तायाङ निकिना अ़एना।

¹³ खोन्‍किना मोचिआ खजुराताङ्‌ओ अ़खेक्‌चि अ़खात्‍ताकि खोक्‍को साऩङ्‌वा मेत्‍सि पात्‌याङ्‌सा म़लोन्‍ता, “होसन्‍ना! खोक्‍को निनाम्‍हाङ्‌आ आसिखा अ़प़ने, साङ हाङ्‌पा निनाम्‍हाङ्‌ओ अ़चुऩङ्‌दा म़ता! खोक्‍को इस्राएलिचिओ अ़चुहाङ ओ!”

¹⁴ खोन्‍किना गधाओ अ़क्‌तात अ़छा अ़धिरा खोन्‍कि येसु मोसोओ अ़दुङ्‌दा म़युङा। ओसोओ अ़तुक्‌वादा ओवात्‍नि छाप्‌याङ,

¹⁵ “मान्‍क़दानिन, सियोन्‌दाओ म़नाचि ओ। खानुम, आम्‍नुओ हाङ गधाओ अ़क्‌तात अ़छादा म़वाङ्‌कि म़तायाङ।”

¹⁶ ओ य़ङ्‌चिओ अ़तुप्‌य़ङ खोक्‍कोसोओ अ़चुकाखेङ्‌पाचिआ बुया मान्‍तुप्‌अ़दा। मेन निनाम्‍हाङ्‌आ येसु साऩङ्‌वा अ़मेत्‍ताचिआकि ओन्‍ङा ओ य़ङ खोक्‍कोसोओ अ़चुतुक्‌वादा छाप्‍ताओ खोन्‍कि ओ काचि खोक्‍कोसोओ निम्‍पाङ मोचि आप्‍पिआ अ़मुवाओ निकिना अ़सिन्‍ता।

¹⁷ खोक्‍कोसाआ लाजरस एप्‍मादाङ्‌का अ़बुत्‍ताकि सुवादाओदाङ्‌का अ़ह़ङ्‌सालोइसाहिदा खोक्‍कोएनान अ़क्‍नि कायुङ मुक्‍लादाओ म़नाचिआ खोक्‍कोसोओ अ़चुसालुम्‍स़ङ अ़पुवा।

¹⁸ खोक्‍कोसाआ ओ म़दोम्‍दाओ बुन अ़मुवाओ अ़एनाओसाछाङ म़ना मुक्‍लाचि खोक्‍को तुप्‍सि म़ताओ।

¹⁹ खोन्‍किना फरिसिचि अ़क्‍छा निएदा य़ङ्‌मा अ़पुक्‍ता, “खानुम, आन्‍कान्‌एदाङ्‌का दित्‍छाङ लिमा अ़ऱनिन। खा-खानुम, झारासाआ खोक्‍को त़ङ्‌मा अ़पुङ्‌सा!”

अ़चुस़माओ अ़तुक्‌वादा येसुआ खाअ़लुसाओ

²⁰ चानुचादा निनाम्‍हाङ ब़क्‍सि काखात्‍चिएदाओ खा-खाक्‍कोचि ग्रिक य़ङ काचेप्‌चिछाङ म़याआङा।

²¹ मोचि गालिल्‌ओ बेथसेदादा कायुङ फिलिप्‌एदा म़ताकि अ़लोवा, “काचिन्‍पो, आन्‍कान्‍का येसु तुप्‍मा स़न्‌येन्‍का।”

²² फिलिप खाराकि अन्‍द्रियास लो, खोन्‍कि अन्‍द्रियास खोन्‍कि फिलिप खाराचिकि येसु अ़लोवाचु।

²³ येसुआ म़लासुलोचि, “म़नाओ अ़छाओ अ़साऩङ्‌वा तोक्‍मा ग़रि तायुङ्‌सा।

²⁴ अ़नुछ्‍याङा अ़ङ्‌का खानानिन लोनानिन, छुमाचाओ अ़ल़वा बाखादा धाकि अ़स़निन्‌नालो मो अ़क्‍बोप ओन्‍ङा लि। मेन मो स़नालो मोसाआ ब़द्‍धे अ़सिवा सिसु।

²⁵ आप्‍पि अ़ह़ङ्‌म़ङ सोमाकातुक्‌आ मो मासु, मेन आप्‍पि अ़ह़ङ्‌म़ङ ओ हेन्‍खामादा ऩङाकाछित्‌आ अ़धुन्‌तारिओ अ़नुछ्‍याओ ह़ङ्‌म़ङ रात्‍तु।

²⁶ साङ अ़ङ्‌का ब़त्‍मास़नालो मोसाआ अ़ङ्‌का अ़त़ङ्‌ङाने, खोन्‍कि अ़ङ्‌का खादा युङ्‌ङा, अ़ङ्‌का काब़त्‌छाङ मोदाङा युङ। साङ्‌आ अ़ङ्‌का अ़ब़त्‍ङा, अ़ङ्‌पापाआ मो साया अ़मेत।

²⁷ हान अ़ङ्‌साकोङ्‌वा दुखादा छुक्‍तायुङ्‌सा, खोन्‍कि अ़ङ्‌का देत्‍नि य़ङ्‌मा? ‘आपो, अ़ङ्‌का ओ दुखादाङ्‌का लेन्‍नि’? मेन ओ दुखा तोक्‍माओ निम्‍पाङ्‌ङा अ़ङ्‌का ताङ्‌ओ।

²⁸ आपो, आम्‍नुओ ऩङ लोङ्‌सानुम!” खोन्‍किना निनाम्‍मादुङ्‌का अ़क्‌तात य़ङ ता, “अ़ङ्‌का आप्‍पि लोङ्‌साङ्‌युङ्‌साङ्‌च़ङ, खोन्‍कि हान्‍छाङ लाङालोङ्‌ङान्‍च़ङ।”

²⁹ मोदा काएप म़ना मुक्‍लाचिआ ओ अ़एनाकि म़य़ङा, “ओ कुलुङ्‌धिप्‍पा मुक्‍तुङु ओ!” निचि म़य़ङा “निनाम्‍हाङ काफा खोक्‍कोएनान म़चेवाओ।”

³⁰ येसुआ म़लासुलोचि, “ओ य़ङ अ़ङ्‌को निम्‍पाङ ताओ माआङ, मेन आम्‍नुओ निम्‍पाङ ओ।

³¹ हान ओ हेन्‍खामाओ अ़छ़ङ छेन। ओ हेन्‍खामादा हाङ काचि कामु सैताना बुङ्‌खाया लोन्‍खान।

³² खोन्‍कि अ़ङ्‌का हेन्‍खामादाङ्‌का ऩथेन्‍ङाकिना अ़ङ्‌का झारा म़नाचि अ़ङ्‌काएदात्‍नि सारुङ्‌च़ङ।”

³³ खोक्‍कोसोओ अ़चुस़मा देत्‍नि लिओ, मो खाङ्‌मुमा निम्‍पाङ खोक्‍को ओवात्‍नि म़य़ङा।

³⁴ म़ना मुक्‍लाचिआ खोक्‍को अ़लासालोवा, “ख्रिस्‍त अ़धुन म़युङ्‌ओ य़ङ आन्‍कान्‍का य़ङ्‌हुप्‌दाङ्‌का एनुम्‌युङ्‌सुम्‍का। खानानिन देत्‍नि य़ङ्‌मा त़ऱन, ‘म़नाओ अ़छा थेन्‍मादोत’? ओ म़नाओ अ़छा साङ ओ?”

³⁵ येसुआ मोचि म़लासुलोचि, “हान्‍छाङ अ़क्‍चित्‌तारि साम खानानिन्‌एदा युङ। साम खानानिन्‌एदा युङ्‌याङ्‌तारि कोलानिन, खोन्‌ओसा कुइयामाआ खानानिन त़भुक्‍तिमिन्‍ने। साङ कुइयामादा कोन, मोसाआ खो खादात्‍नि खात्‌ओ अ़सिन्‍तुन।

³⁶ देम्‍खातारि साम खानानिन्‌एदा युङ, साम्‌दा साकोङ्‌छ़ङ मुवानिन, खोन्‍कि खानानिन साम खाङ्‌कामेत त़लिसिन।” ओ म़य़ङाचिआकि, येसु मोदाङ्‌का म़खारा, खोन्‍कि मोचिएदाङ्‌का म़कुमा।

³⁷ खोक्‍कोसाआ मोचिओ अ़चुबुदा ब़द्‍धे म़दोम्‍दाओ बुन्‌चि म़मुचिनुछाङ मोचिआ खोक्‍कोएदा साकोङ्‌छ़ङ मान्‍मुचि।

³⁸ खोन्‌ओसा निनाम्‍हाङ्‌य़ङ खाकालु यसैयाओ अ़य़ङ तामालामा दोराङा, “हाङ्‌पा निनाम्‍हाङ, आन्‌य़ङ्‌खान साङ्‌आ साकोङ्‌छ़ङ मुयुङ्‌सु कि? खोन्‍कि हाङ्‌पा निनाम्‍हाङ्‌ओ अ़चुसावा साङ्‌आ खाकिना?”

³⁹ मोचि साकोङ्‌छ़ङ मुमा मान्‍ऱचि। देकिनालो यसैया ओवात्‍नि लासाय़ङा,

⁴⁰ “खोक्‍कोसाआ मोचिओ अ़चुम़क्‌चि दोप्‍म़क म़मेत्‍तुप़युङ्‌सुचि, खोन्‍कि मोचिओ अ़चुसाकोङ्‌वाचि छाक्‍लो म़मेत्‍तुप़युङ्‌सुचि। ओवात्‍नि मोचिआ अ़चुम़क्‌चिआ ऩखान्‍ने, खोन्‍कि अ़चुसाकोङ्‌वाचिआ ऩतुप्‍तुन्‍ने, खोन्‍कि मोचि नुमाचिओ निम्‍पाङ अ़ङ्‌काएदा ऩलानिन्‍नेनि निनाम्‍हाङ म़य़ङ्‌याङ।”

⁴¹ यसैयाआ ओ य़ङ खालुसु, देकिनालो खोसाआ येसु देम तोक्‍पो लि निकिना खा, खोन्‍कि खोक्‍कोसोओ अ़चुतुक्‌वादा चेवा।

⁴² खोन्‍नुछाङ ब़द्‍धे यहुदि बुसुवाचिआ खोक्‍कोएदा साकोङ्‌छ़ङ म़मुवा, मेन फरिसिचिएदाङ्‌का म़क़साकि मोचिआ यावायोक्‍खिम्‌दाङ्‌का म़लोन्‍खान निकिना अ़चुक़माआ मो साङ्‌छाङ खामान्‌एत्‌अ़दा।

⁴³ देकिनालो निनाम्‍हाङ्‌आ प़माय़ङ सायादाङ्‌का म़नाचिआ प़माय़ङ साया तोक्‍मा मोचिओ च़लोक अ़चुऩङा नुवाङा।

⁴⁴ खोन्‍किना येसुआ अ़धिवा य़ङ्‌आ म़लोचि, “अ़ङ्‌का साकोङ्‌छ़ङ कामुआ अ़ङ्‌काएदा ओन्‍ङा माआङ, मेन अ़ङ्‌का काछुत्‌एदाछाङ साकोङ्‌छ़ङ मु।

⁴⁵ साङ्‌आ अ़ङ्‌का अ़खाङ्‌ङा, मोसाआ अ़ङ्‌का काछुत खा।

⁴⁶ अ़ङ्‌का हेन्‍खामादा साम्‌वात्‍नि ताङ्‌युङ्‌साङ, खोन्‌ओसा अ़ङ्‌काएदा साकोङ्‌छ़ङ कामु कुइयामादा अ़युङ्‌निन्‍ने।

⁴⁷ साङ्‌आ अ़ङ्‌य़ङ एनु, खोन्‍कि मोवात्‍नि अ़च़निन, अ़ङ्‌का मोसोओ अ़छ़ङ अ़छेन्‍ऩङ। देकिनालो अ़ङ्‌का हेन्‍खामाओ अ़छ़ङ छेइसि ताङ्‌ओ माआङ, मेन हेन्‍खामा लेइसि ताङ्‌ओ।

⁴⁸ अ़ङ्‌का ऩङाकाछित खोन्‍कि अ़ङ्‌य़ङ मान्‍लोक्‍कादाओ निम्‍पाङ अ़क्‍छा छ़ङ्‌काछेन म़युङ्‌याङ। खाक्‍को य़ङ अ़ङ्‌का चेउङ मो य़ङ्‌आङा आदेङ्‌ओ लेन्‌दा मोसोओ अ़छ़ङ छेन्‍तु।

⁴⁹ देकिनालो अ़ङ्‌का अ़ङ्‌आप्‍पिओ पाङ्‌दाङ्‌का मान्‍चेप्‍ङा, मेन अ़ङ्‌का दे य़ङ्‌मादोत्‌ओ खोन्‍कि दि चेप्‍मादोत्‌ओ, अ़ङ्‌का काछुत पापा निनाम्‍हाङ्‌आ अ़ङ्‌का ऩलोवाङ्‌युङ्‌साङ।

⁵⁰ अ़ङ्‌का सिन्‍तुङ्‌योङ, खोक्‍कोसोओ अ़चुलोमाय़ङ्‍आ अ़लुक्‍निन्‌ओ ह़ङ्‌म़ङ्‌दा म़तित। खोन्‌ओसा अ़ङ्‌का दि चेउङ, पापा निनाम्‍हाङ्‌आ अ़ङ्‌का ऩलोङाओ ओन्‍ङा चेप्‍ङा।”