युहन्ना 10 - बान्तावा राईयेसु अ़नुवाक भेरा काखाङ्पा 1 “अ़नुछ्या, अ़ङ्का खानानिन लोनानिन, साङ भेरा युङ्खाओ लाप्तिखोप्दाङ्का अ़वाङ्निन, मेन नि लाम्दाङ्का वाङ, मो ना काख़पा खोन्कि काङाप्खात ओ 2 मेन लाप्तिखोप्दाङ्का कावाङ भेरा काखाङ्पा ओ। 3 लाप्तिखोप काहुङ्आ भेरा काखाङ्पाओ निम्पाङ लाप्तिखोप होत्तु प़, खोन्कि भेराचिआ भेरा काखाङ्पाओ अ़य़ङ अ़एन, खोन्कि खोसाआ अ़भेराचिओ अ़चुऩङ्लाम्पा बुत्तुचि, खोन्कि मोचि बुङ्खाह्यात्नि खात्तुचि। 4 खोन्किना खोक्कोसाआ झारा अ़भेराचि बुङ्खाया लोत्तुचि, खोक्को मोचिओ अ़चुबुबु कोन, खोन्कि भेराचिआ खोक्को अ़त़ङ। देकिनालो मोचिआ खोक्कोसोओ अ़य़ङ अ़सिन। 5 ऩसिन्तुन्योन्ओ म़ना मोचिआ ऩत़ङ्तुन, मेन मोएदाङ्का म़फुङ। देकिनालो अ़ऩङ्वा काताओसोओ अ़य़ङ मोचिआ ऩसिन्तुन।” 6 येसुआ मोचि ओ दोय़ङ्ला खाम़एत्तुचि, मेन खोक्कोसाआ मोचि खाम़एत्तुचिओ य़ङ मोचिआ मान्तुप्अ़दा। 7 खोन्ओसा येसुआ मोचि म़लासुलोचि, “अ़नुछ्या, अ़ङ्का खानानिन लोनानिन, भेरा वाङ्खाओ अ़लाप्तिखोप अ़ङ्काङा ओ। 8 अ़ङ्कादाङ्का बुया काता झारा काख़पा खोन्कि काङाप्खात्चि ओ, मेन भेराचिआ मोचिओ अ़चुय़ङ मान्एन्अ़दा। 9 लाप्तिखोप अ़ङ्काङा ओ। साङ अ़ङ्कालाम्पा वाङ्नालो मोचि म़लेत, खोन्कि खिम्हुत बुङ्खा लोइसा वाङ्सा म़मु, खोन्कि नागिदा चान्मा अ़तोक। 10 काख़ ना ख़सि, सेत्सि खोन्कि लुक्सि ओन्ङा ता। मेन अ़ङ्का ना भेराचिआ ह़ङ्म़ङ अ़तोक्ने खोन्कि मो ह़ङ्म़ङ च़लोक अ़तोक्ने निकिना ताङ्ओ। 11 अ़ङ्का अ़नुवाक भेरा काखाङ्पा ओ। अ़नुवाक काखाङ्पाआ अ़भेराचिओ निम्पाङ अ़ह़ङ्म़ङ प़। 12 भेरा खाङ्सि युङ्साओ हारुक बेन्पा खाहिदा भेराचि छिरुदाचिकि फुङ। देकिनालो भेराचि खोसोओचि माआङ, खोन्कि बेन्पाआ भेराचि झोम्तुचि खोन्कि भेरा रुहुप्चि फात्ताफेला मुचि। 13 मो म़ना फुङ, देकिनालो मो भेरा खाङ्सि युङ्साओ काब़त ओ, मोसाआ भेराचि अ़खान्चिन। 14 अ़ङ्का अ़नुवाक भेरा काखाङ्पा ओ। अ़ङ्का अ़ङ्भेराचि सिन्तुङ्च़ङ, खोन्कि अ़ङ्भेराचिआ अ़ङ्का ऩसिन्ङा। 15 देत्नि अ़ङ्पापाआ अ़ङ्का ऩसिन्ङा, मोवात्निङा अ़ङ्का अ़ङ्पापा सिन्तुङ। अ़ङ्का अ़ङ्भेराचिओ निम्पाङ अ़ङ्ह़ङ्म़ङ प़ङ्च़ङ। 16 अ़ङ्को नि अ़ङ्भेराचि म़युङ्याङ। मोचि ओ रुहुप्दाओचि माआङ। मोचिछाङ अ़ङ्का तात्माचिदोत। मोचिआ अ़ङ्य़ङ अ़एन, खोन्कि मोचि अ़क रुहुप्ओ म़लि, खोन्कि मोचिओ निम्पाङ अ़क्छाङा अ़चुकाखाङ्पा लि। 17 अ़ङ्पापाआ अ़ङ्का सोमाऩतुक्ङा, देकिनालो अ़ङ्का अ़ङ्ह़ङ्म़ङ लामातोक्मा मिन्माआ प़ङ। 18 साङ्आछाङ अ़ङ्कादाङ्का अ़ङ्ह़ङ्म़ङ खात्मा अ़ऱन, मेन अ़ङ्का आप्पि अ़ङ्मिन्माआ अ़ङ्ह़ङ्म़ङ प़ङ। अ़ङ्ह़ङ्म़ङ प़मा पाङ अ़ङ्काएदा याक्याङ, खोन्कि लामातोक्मा पाङ्छाङ अ़ङ्काएदा याक्याङ। ओ लोमाय़ङ अ़ङ्का अ़ङ्पापाएदाङ्का तोक्तुङ्युङ्सुङ।” 19 ओ य़ङ्चिओ अ़तुक्वाआ यहुदिचि म़लासाफेआन्चिन। 20 मोचिएदाओ ब़द्धेकापाङ म़य़ङाङा, “ओ चाकावालावाआ लाउयुङ्सु, खोन्कि ओ हिम्सावा ओ। देकि खानानिन ओसोओ अ़य़ङ त़एनुम्योम?” 21 निचि म़य़ङाङा, “चाकावालावाआ लाउओ म़नाओ अ़य़ङ ओवात्नि अ़मुनिन। दि चाकावालावाआ दोप्म़क खाकाखाङ मुमा ऱ कि?” यहुदिचिआ साकोङ्छ़ङ मान्मुअ़दा 22 यरुसलेम्दा निनाम्हाङ ब़क्खाखिम्ऱङ चानुचा युङाङा। 23 ओ चुङ्हिप्ओ ग़रि मुवाङा। येसु निनाम्हाङ ब़क्खाखिम्हुत्दाओ सोलोमन सिकुवादा म़कोलाङा। 24 यहुदिचि खोक्कोसोओ अ़चुऱङ्कोप्नि म़कोवान्चिन्कि अ़सेना, “देम्खातारि खानानिन्आ आन्कान्का हाक्हाक्किरा त़मुनि ओ? खानानिन ख्रिस्त ओनालो आन्कान्का नुलोक खाएत्नि।” 25 येसुआ मोचि म़लासुलोचि, “अ़ङ्का खानानिन खाएत्नायुङ्नाचिन्नानिन, मेन खानानिन साकोङ्छ़ङ त़मुन्मिन। अ़ङ्पापाओ अ़चुऩङ्दा खाक्को म़दोम्दाओ काचिचि अ़ङ्का मुङ्योङ्च़ङ, मोचिआङा अ़ङ्सालुम्स़ङ अ़प़। 26 मेन खानानिन साकोङ्छ़ङ त़मुन्मिन, देकिनालो खानानिन अ़ङ्भेराचि माआङ। 27 अ़ङ्भेराचिआ अ़ङ्य़ङ अ़एन, खोन्कि मोचि अ़ङ्का सिन्तुङ्च़ङ, खोन्कि मोचिआ अ़ङ्का ऩत़ङ्ङा। 28 मोचि अ़ङ्का अ़लुक्निन्ओ ह़ङ्म़ङ प़ङ्च़ङ, खोन्कि मोचि देम्खाछाङ ऩलुक्निन, खोन्कि साङ्आछाङ मोचि अ़ङ्छुक्दाङ्का ऩङाप्ऩङ्खात्ऩङ। 29 अ़ङ्पापाआ मोचि अ़ङ्का ऩपुवाङ्युङ्साङ, खोक्को झारादाङ्का तोक्पो म़मुयाङ। अ़ङ्पापाओ अ़चुछुक्दाङ्का साङ्आछाङ मोचि अ़ङाप्तुन्खात्तुन्चिन। 30 अ़ङ्पापा खोन्कि अ़ङ्का अ़क्तात्ङा ओ।” 31 यहुदिचिआ खोक्को वेन्मासेत्मा निम्पाङ लुङ्चि अ़लासा कुआ। 32 मेन येसुआ मोचि म़लोचि, “अ़ङ्का अ़ङ्पापालाम्पा ब़द्धे अ़नुवाक काचिचि खानानिन खाङ्मेत्नायुङ्नानिन। मोचिदाङ्का खाक्को काचिआ आम्नुओ मान्सुङ काराकि लुङ्आ अ़ङ्का वेन्मा त़लाप्ङाङाऩङ?” 33 यहुदिचिआ खोक्को अ़लासालोवा, “अ़नुवाक काचिओसा आन्कान्काआ खाना लुङ्आ वेन्मा लामिन्येन्काओ माआङ, मेन निनाम्हाङ्ओ अ़चुसाया त़पेप्तुओसा ओ। देकिनालो खाना म़ना त़मुकिछाङ आप्पि निनाम्हाङ त़मुनानान्चिन।” 34 येसुआ मोचि म़लोचि, “दि निनाम्हाङ्आ आम्नुओ य़ङ्हुप्दा ‘अ़ङ्का य़ङाङ, खानानिन माङ्चि ओ’नि मान्छाप्युक्तु कि? 35 साम्कालिन सोज्जे अ़लिनिन। साङ्एदा निनाम्हाङ्ओ अ़चुय़ङ ता, निनाम्हाङ मोचि ‘माङ्चि’नि म़लोचिनालो, 36 अ़ङ्का ‘निनाम्हाङ्ओ अ़चुछा ओ’नि य़ङाङ्हिदा देत्नि निनाम्हाङ्ओ अ़चुसाया पेप्तुङ्नि त़लोनि? अ़ङ्का पापा निनाम्हाङ्आ ऩछेन्ताङ्कि हेन्खामादा ऩय़साङ्ओ म़ना ओ। 37 अ़ङ्का अ़ङ्पापाओ अ़चुकाचिचि अ़मुऩङ्च़ऩङ्नालो अ़ङ्काएदा साकोङ्छ़ङ मान्मुदानिन। 38 मेन अ़ङ्का अ़ङ्पापाओ अ़चुकाचि मुङ्नालो खानानिन अ़ङ्काएदा साकोङ्छ़ङ त़मुन्मिन्नुछाङ ओ म़दोम्दाओ काचिचिदा साकोङ्छ़ङ मुवानिन। खोन्ओसा खानानिन्आ सिन्मा त़ऱम खोन्कि त़तुप्तुम, पापा अ़ङ्काएदा म़याक्याङ खोन्कि अ़ङ्का पापाएदा याक्ङाङा।” 39 मोचिआ खोक्को लामालाप्मा अ़लाप्ता, मेन खोक्को मोचिएदाङ्का म़फुङ्सा। 40 खोन्किना खोक्को यर्दन याङ्वामाओ अ़ह्याउधेत म़लासाखाराकि मोदाङा म़युङा। बुया मोदा युहन्नाआ बप्तिस्मा प़याङ्सा मुङुचि। 41 ब़द्धे म़नाचि खोक्कोएदा म़ता खोन्कि मोचि म़य़ङा, “युहन्नाआ दियाकोछाङ बुन्चि मान्मुदोचि, मेन युहन्नाआ खोक्कोसोओ अ़चुतुक्वादा झारा य़ङाओ मो अ़नुछ्या ओ।” 42 खोन्किना मोदा ब़द्धेसाआ खोक्को साकोङ्छ़ङ अ़मुवा। |
© Wycliffe Bible Translators, Inc. All rights reserved.
Wycliffe Bible Translators, Inc.