याकुब 3 - बान्‍तावा राई

लेम क़म्‍मा

¹ ब़ब़, नाना खोन्‍कि निछाचि ओ, खानानिन ब़द्‍धेकापाङ काचिन्‌चि मान्‍लिदानिन। देकिनालो खानानिन त़सिन्‍तुम्‌योम, आन्‍कान्‍का काचिन्‍चिओ आन्‍काओ छ़ङ्‌छेन्‍मा ब़द्‍धे चाअ़त्‍लो लि।

² देकिनालो आन्‍कान झारासा ब़द्‍धे फिसुम्‍च़म। साङ चेप्‌ओ य़ङ्‌दा देम्‍खाछाङ अ़फिसुन्‌नालो खोसाआ झारा अ़याम क़म्‍मा ऱ, खोन्‍कि खो लाहि मात्‍द़ङ्‌ओ म़ना लि।

³ युक्‌वाचि क़म्‍माचिओ निकि आन्‍कान मोचिओ अ़चुदोदा काक्‍माय़ङ काकारा पाक्‍तुम्‍च़म्‌नालो मोचि झारा अ़चुपोक खादात्‍नि खात्‍मा स़न, मोह्‍यात्‍निङा आन्‍कान खात्‍मा ऱम्‍च़म।

⁴ वाप्‍तेलाचिछाङ खानुम्‍च़म। ह़क्‌ओ अ़सावाआ मुत्‍तु खात्‍तुङुचिहिदा वाप्‍तेला हुखाआ अ़क्‌तात अ़चुप्‍पो वाप्‍तेला हुखालाम्‍पा खादात्‍नि खात्‍मानि मिन, मोह्‍यात्‍निङा खात्‍तु।

⁵ मोवात्‍निङा लेम उन्‍चित्‍को मुयाङ्‌नुछाङ अ़धिवो य़ङ्‌चिदा ऱक्‍भाक मु। अ़क्‌तात अ़चुप्‍पो मि छेन्‌वाआ अ़धिवो खोक्‍लिछाङ राङ्‌तुखाइसु।

⁶ लेम्‌छाङ अ़क्‌तात मिङा ओ। ओ आन्‍पोक्‌ओ अ़फुत्‌चिदा झारादाङ्‌का ब़द्‍धे अ़अ़त्‍पा ओ। ओसाआ झारा पोक पोप्‍तु खोन्‍कि झारा ह़ङ्‌म़ङ्‌दा मि लोङ्‌सुलोइसुकि मिराक्‌युओ मिदा मो राङ्‌खात।

⁷ झाराकाखालाओ साक्‍स़ङ्‌चि, छोङ्‌वाचि, कासात्‍नान्‍चिन्‌चि खोन्‍कि धियाङ्‌वामादाओ सायाम्‍पोक्‌चि म़क़म, खोन्‍कि मोचि म़नाचिआङा म़क़म्‍तुयुङ्‌सुचि।

⁸ मेन साङ्‌आछाङ लेम क़म्‍मा अ़ऱन। मो लेम ना क़म्‍मा अ़ऱन्‍मिन्‌ओ अ़अ़त्‍पा ओ, खोन्‍कि स़मादामादा म़तात्‍लाओ अ़छ़क्‌आ भेप्‍तुओ।

⁹ ओ लेम्‌आ आन्‍कान हाङ्‌पा खोन्‍कि निनाम्‍हाङ पापा चोन्‍तुम्‌योम, खोन्‍कि ओ लेम्‌आङा आन्‍कान निनाम्‍हाङ्‌ओ अ़चुकात्‍मादा म़मुयुचिओ म़नाचि माङ्‌हिम्‍सुम्‍च़म।

¹⁰ अ़क्‌तात दोदाङ्‌का चोन्‍मा खोन्‍कि माङ्‌हिम लोन। अ़ङ्‍ब़ब़, नाना खोन्‍कि निछाचि ओ, ओवात्‍नि लिमा अ़नुनिन।

¹¹ दि अ़क्‌तात बोन्‌वादाङ्‌काङा ख़क्‌याङ्‌ओ खोन्‍कि चानुयाङ्‌ओ चाक्‌वा लोन कि?

¹² अ़ङ्‍ब़ब़, नाना खोन्‍कि निछाचि ओ, दि वासिताङ्‌आ जैतुन, माङ्‌लो अङ्‌गुरा अ़ताङ्‌आ वासि सिसु कि? ख़क्‌ओ चाक्‌वा लोन्‍खादाङ्‌का चानुओ चाक्‌वा लोन्‍मा अ़ऱनिन।

निनाम्‍मादुङ्‌काओ खारु

¹³ खानानिन्‌एदा खारु कातोक खोन्‍कि कातुप साङ युङ्‌याङ? खोसोओ अ़खारुदाङ्‌का ताओ अ़सिम्‍मान्‍चिन्‌आ अ़काचिचि मुचिकि अ़नुवाक अ़च़माथाङ्‌मा खाङ्‌मुसुचिने।

¹⁴ मेन आम्‍नुओ साकोङ्‌वादा चात्‍लो ऩङ्‌च़ खोन्‍कि आप्‍पि ओन्‍ङा तोक्‍मामिन्‍मा याक्‌याङ्‌नालो आम्‍नुओ खारुदा ऱफोक्‌वा मान्‍मुदानिन, खोन्‍कि अ़छ़ङ य़ङ सोज्‍जेओ मान्‍मुदानुम।

¹⁵ ओवाको खारु निनाम्‍मादुङ्‌का अ़य़निन। मेन ओ ना हेन्‍खामादाङ्‌काओ, मान्‍साम्‌योक्‍मि खोन्‍कि सैतानादाङ्‌का ओ।

¹⁶ खादा ऩङ्‌च़ खोन्‍कि आप्‍पि ओन्‍ङा तोक्‍मामिन्‍मा याक, मोदा म़पुप्‍खात, खोन्‍कि झारा अ़अ़त्‍पा काचि लि।

¹⁷ मेन निनाम्‍मादुङ्‌का य़ओ खारु बुयाङा अ़च़क़ल़क खोन्‍कि मो तोङ्‌मा काऱ मु, हुङ्‌मा काऱ मु, लोमावा काकाङ मु, सोमाकातुक मु, अ़नुवाक सिवा कासि मु, लिप्‍पा मान्‌वाङ्‌कादा मु खोन्‍कि कोङ्‌क़त्‌वा अ़मुनिन।

¹⁸ कातोङ्‌चिआ सेवाङ्‌निदा अ़वेत, खोन्‍कि मोचिआ साम्‌योक्‍मिओ अ़सिवा अ़कोप।