याकुब 2 - बान्तावा राईलिप्पावाङ्माओ अ़देङ्सालाप्पादा चाप्चेत्मा 1 अ़ङ्ब़ब़, नाना खोन्कि निछाचि ओ, साम्स़रिओ आन्हाङ्पा येसु ख्रिस्तएदा साकोङ्छ़ङ कामु त़लिसिन्ओसा खानानिन साङ्लिप्पाछाङ मान्वाङ्दानिन। 2 आम्नुओ यावायोक्खिम्दा अ़क्छा म़ना हाराक्वाओ छोक्वेन्मा खोन्कि खान्नुओ तित हुम्कि ता, खोन्कि अ़क्छा मान्तोक्कादाछाङ अ़पेत्वा तित हुम्कि तानालो 3 खानानिन्आ मो खान्नुओ तित काहुम म़ना साऩङ्वा मेत्याङ्सा, “ओदा आम्नुओ निम्पाङ अ़नुवाक युङ्खादा युङानिन”नि त़लोम, मेन मान्तोक्कादा म़ना “खाना मोदाङा एवा” माङ्लो “बाखायु अ़ङ्लाङ च़क्दा युङा”नि त़लोम्नालो, 4 दि खानानिन्आ आम्नुओ रादाङा लिप्पावाङ्मा खाङ्मान्मुत़दोम, खोन्कि अ़त्लोकामिन छ़ङ्काछेन मान्लित़दान कि? 5 अ़ङ्का सोमातुक्नाङ्नानिन्ओ ब़ब़, नाना खोन्कि निछाचि ओ, एनानुम, दि निनाम्हाङ्आ हेन्खामादाओ मान्तोक्कादाचि साकोङ्छ़ङ्दा कातोक मुसि म़छेन्तुचिओ माआङ कि? खोक्को सोमाकातुक्चि निनाम्हाङ्आ म़हिप्तुचिओ हेन्कोप्ओ पाङ्यि दि मोचिआ ऩतोक्तुन कि? 6 मेन खानानिन्आ मान्तोक्कादा म़नाचि अ़चुसाया त़पेप्तुम्युङ्सुम्च़म। दि कातोक म़नाचिआ खानानिन ऩतिमिमिन्कि मोचिआ खानानिन छ़ङ्छेन्खादा ऩसारिन्खात्तिमिन कि? 7 येसु ख्रिस्तओ अ़नुवाक अ़चुऩङ कासुङ दि मोचिङा माआङ? खोक्कोसोओ अ़चुऩङ्लाम्पा खानानिन ऩबुत्तिन्युङ्सिन। 8 “खाना आम्तेन्पाङ आप्पिवाङा सोमातुक्तु”निओ साम्कालिन्दाओ आन्काओ हाङ्ओ अ़चुय़ङ्हुप अ़नुछ्याङा त़तासुम्लाम्योम्नालो खानानिन नुलोक्ङा त़च़न्येन। 9 मेन खानानिन्लिप्पा त़वाङिन्येन्नालो हेवा त़मुन्येन, खोन्कि य़ङ्हुप्आ य़ङ्हुप काफि त़काइसिन। 10 साङ्आ झारा य़ङ्हुप्चि मुचि, मेन अ़क्तात य़ङ्हुप ओन्ङा फिसुनालो झारा य़ङ्हुप्चि काफि कान। 11 देकिनालो साङ “ताङ्लान मान्मुदा”नि म़य़ङा, खोक्कोसाआ “म़ना मान्सेत्दा”निछाङ म़य़ङा। खाना ताङ्लान त़मुनान मेन म़ना त़सेत्नालो खाना य़ङ्हुप काफि त़लिसायुङ्सा। 12 खोन्ओसा खानानिन दि त़चेविन खोन्कि दि काचि त़मुन, खानानिन काफोङ य़ङ्हुप्लाम्पा आम्नुओ छ़ङ्छेन। 13 देकिनालो साङ्आ सोमातुक्मा खाङ्मान्मुयुक्तु, निनाम्हाङ्आ खो छ़ङ्अ़छेन्हिदा सोमा ऩतुक्तुन। मेन सोमातुक्मा छ़ङ्छेन्माएदा छो। साकोङ्छ़ङ खोन्कि काचि 14 अ़ङ्ब़ब़, नाना खोन्कि निछाचि ओ, अ़क्छा म़ना “अ़ङ्का साकोङ्छ़ङ मुङा”नि य़ङ, मेन काचि अ़नुनिन्नालो मोदाङ्का दि तोक्तु कि? खोसोओ अ़साकोङ्छ़ङ्आ खो लेन्मा ऱ? 15 खाक्को अ़क्छा साकोङ्छ़ङ कामु दुवाछा माङ्लो मेत्छाछा तित अ़तोक्निनिन खोन्कि अ़लेन्खिन्तुम चामायु मो अ़तोक्निनिन्नालो 16 खानानिन्एदाओ अ़क्छाआ खो, “नुलोक खारा, हाक्लो युङा, आम्बुक खालो चा”नि ओन्ङा लो, मेन खोसोओ अ़पोक्ओ निकि दोत्ओ सामाचि अ़प़न्नालो खोसाआ दि तोक्तु कि? 17 मोवात्निङा साकोङ्छ़ङ्छाङ काचिदा खाङ्अ़मुनान्चिमिन्नालो मो साकोङ्छ़ङ ना स़न्दान्वा लि। 18 मेन अ़क्छा म़ना य़ङ्मा ऱ, “खानाएदा साकोङ्छ़ङ याक्याङ, अ़ङ्काएदा काचिचि। काचि मात्द़ङ्ओ आम्साकोङ्छ़ङ अ़ङ्का खाङ्मेत्ताङ, खोन्कि काचि मुङाकि अ़ङ्साकोङ्छ़ङ खाना खाङ्मेत्ना।” 19 खानानिन अ़क्तात निनाम्हाङ म़युङ्याङ निकिना साकोङ्छ़ङ त़मुन। मो अ़नुवाक ओ! चाकावालावाचिछाङ साकोङ्छ़ङ म़मु, खोन्कि अ़चुक़माआ सिन्लुक्लुक्वा धुन्तुचि। 20 खामान्सिन्चि ओ, काचि मात्द़ङ्ओ साकोङ्छ़ङ सोज्जेओ य़ङ्ओ निम्पाङ अ़सालुम्स़ङ खानानिन दोत्याङ? 21 आन्सुन्तुम अब्राहाम्आ अ़छा इसहाक ब़क्खादा प़किना खो अ़काचिलाम्पा साम्योक्मि काइसाओ माआङ कि? 22 खोसोओ अ़साकोङ्छ़ङ खोन्कि अ़काचिचि अ़क्नि काचि म़मुवाङाओ खाना त़खा। खोन्कि अ़काचिचिलाम्पा अ़साकोङ्छ़ङ ताला। 23 “अब्राहाम्आ निनाम्हाङ साकोङ्छ़ङ मु, खोन्कि खो साम्योक्मि अ़काइसा”निओ साम्कालिन्दाओ य़ङ ताला। खोन्कि अब्राहाम निनाम्हाङ्ओ अ़यावानि म़य़ङ। 24 खानानिन्आ त़खाम, म़ना अ़काचिलाम्पा साम्योक्मि अ़काइसाओ, मेन साकोङ्छ़ङ्लाम्पा ओन्ङा माआङ। 25 मोवात्निङा काचान्चा राहाब्आछाङ खाकातुप्चि साऩङ्वा मेत्याङ्सा नि लाम खाइसुचि, खोन्कि अ़काचिलाम्पा साम्योक्मि काइसाओ माआङ कि? 26 देत्नि याम लावादाङ्का फेक्हिदा स़दा, मोवात्निङा साकोङ्छ़ङ्छाङ काचिदाङ्का फेक्हिदा स़दा। |
© Wycliffe Bible Translators, Inc. All rights reserved.
Wycliffe Bible Translators, Inc.