याकुब 1 - बान्तावा राई1 निनाम्हाङ खोन्कि हाङ्पा येसु ख्रिस्तओ अ़हारुक याकुब्दाङ्का हेन्खामादा रावा-रावाचिओ अ़चुरादा त़रिसिन्चिन्ओ बारकाभुङ्चिएदा अ़ङ्सेवा! साकोङ्छ़ङ खोन्कि खारु 2 ब़ब़, नाना खोन्कि निछाचि ओ, खानानिन्एदा अ़पारा-अ़पाराओ चिन्माखाङ्माचि म़ताहिदा आम्नुओ अ़न्नुनु ऩङानुने। 3 देकिनालो खानानिन त़सिन्तुम्योम, आम्नुओ सोम्कुवाओ चिन्माखाङ्माआ हुङ्मा सावा पोइसु। 4 आम्नुओ हुङ्मा सावा काचि मुमाचिन्मा पुवानुम। खोन्किना खानानिन काले खोन्कि कासिन त़लिसिन्किना दिदाछाङ त़हाप्तिमिन। 5 खानानिन्एदा साङ खारु अ़तोक्निनिन्नालो निनाम्हाङ्एदा दोत्ने, खोन्कि खोक्कोसाआ तोक्पो मिन्माआ यामान्सान्माङ मो अ़प़। 6 मेन मोसाआ साकोङ्छ़ङ्एनान मान्केङ मान्मुमाङ दोरुने। मान्केङ कामु म़ना ना ह़क्आ मुत्तुकि लोङ्लुक्याङ्ओ धियाङ्वामाओ अ़लोङ्वात्वा लि। 7 मोवाको म़नाआ ना हाङ्पाएदाङ्का दित्छाङ तोक्तुङ्नि अ़मिन्निन्ने। 8 देकिनालो अ़मिन्मादा ह्वालिप्पा कामिन म़नाओ झारा अ़च़माथाङ्मा चाप्चिरोङ मु। मान्तोक्कादा खोन्कि चासुम्छेन्बि 9 मान्तोक्कादा साकोङ्छ़ङ कामुचिओ, आम्नुओ ऩङानुसानिन्चिन, देकिनालो निनाम्हाङ्आ खानानिन ऩझोइसिन। 10 कातोक साकोङ्छ़ङ कामुचिओ, आम्नुओ ऩङानुसानिन्चिन, देकिनालो निनाम्हाङ्आ ऩसिम्सिन्युङ्सिन। कातोक्चि खोक्लिदाओ बुङ्वावात्निङा म़युन्खात। 11 देकिनालो अ़राङ्खाखान्खा उप्लाक्वाएनान नाम लोन खोन्कि चाच़ङ युलुखाइसु। बुङ्वा धाखात खोन्कि मोसोओ अ़खान्नुमा लुक्खात। मोवात्निङा कातोक म़नाछाङ अ़काचिचि मुङुचिहिदाङा युन्खात। 12 चिन्माखाङ्मा काआङ म़नाआङा आसिखा तोक्तु। देकिनालो चिन्माखाङ्मा खोसाआ आङ्तुओसा खोसाआ ह़ङ्म़ङ्ओ मो ताङ्बोप्खा तोक्तु, निनाम्हाङ्आ खोक्को सोमाकातुक्चि मो प़माचि निम्पाङ म़हिप्तुयुङ्सुचि। 13 साङ्छाङ चिन्माखाङ्मादा छुक्ओ ग़रि “निनाम्हाङ्लाम्पा अ़ङ्चिन्माखाङ्मा लिसाओ”नि अ़य़ङ्निन्ने। देकिनालो निनाम्हाङ्ओ अ़चुचिन्माखाङ्मा अ़अ़त्पालाम्पा अ़लिनिन, खोन्कि खोक्कोसाआछाङ खाक्कोछाङ म़ना ऩचिन्तुन्खान। 14 मेन झारा म़नाचि अ़चुअ़अ़त्पा मित्माओ च़क्ख़य़लाम्पा चिन्माखाङ्मादा म़छुक। 15 खोन्किना अ़अ़त्पा मित्माआ हेवा म़मेत्तुचि, खोन्कि हेवा पोन्किना स़खादा तित्तुचि। 16 अ़ङ्का सोमातुक्नाङ्नानिन्ओ ब़ब़, नाना खोन्कि निछाचि ओ, मान्धादानिन। 17 झारा अ़नुवाक प़मायु खोन्कि अ़छ़ङ आसिखा निनाम्मादुङ्काओ, मो आसिखा निनाम्मादुओ साम कामुन्पा निनाम्हाङ्आ म़प़। खोक्को सोत्नान्लुक्नान्चिन्ओ लावाछामित्वात्नि अ़फान्नान्चिमिन। 18 खोक्कोसोओ तोक्पो अ़चुमित्चिऩङ्ओ अ़छ़ङ य़ङ्लाम्पा आन्कान म़मुया। खोवात्निओसा आन्कान खोक्कोसोओ झारा अ़चुमुन्माय़ङ्चिदाओ बुयाओ अ़सिवा लिसिन्युङ्सिन। एन्मा खोन्कि मुमा 19 अ़ङ्का सोमातुक्नाङ्नानिन्ओ अ़ङ्ब़ब़, नाना खोन्कि निछाचि ओ, ओ य़ङ तुप्तानुम, झारा म़ना एन्मादा च़क्नि, चेप्मादा स़लेनि खोन्कि माइसुङ्कात्मादा स़लेनि लिमादोत। 20 देकिनालो म़नाओ अ़माइसुङ्आ निनाम्हाङ्आ अ़मित्ओ अ़साम्योक्मि ह़ङ्म़ङ ह़ङ्मा अ़ऱनिन। 21 खोन्ओसा झारा अ़त्लो य़ङ खोन्कि झारा अ़अ़त्पादाङ्का फेआनिन्चिन, आम्नुओ साकोङ्वादा लित्ताओ निनाम्हाङ्ओ अ़चुय़ङ सिम्नान्चिन्सा लोआनुम। देकिनालो निनाम्हाङ्ओ अ़चुय़ङ्आ आम्नुओ ह़ङ्म़ङ रात्तु। 22 निनाम्हाङ्ओ अ़चुय़ङ काएन ओन्ङा मान्लिदानिन्किना आप्पि मान्धान्दानिन्चिन। मेन मो य़ङ्वात्नि चुवानिन। 23 साङ्आ निनाम्हाङ्य़ङ एनुकि मो य़ङ्वात्नि अ़च़निन, मो ना दर्पनादा अ़ङाइवा काखाङ म़नावाकोङा ओ। 24 देकिनालो मोसाआ दर्पनादा अ़ङाइवा खाकि खात्लाप खोन्कि खो देत्नि काराङाओ च़क्नि मान्तुखाइसु। 25 मेन साङ्आ काफोङ ब़द्धे अ़नुवाक य़ङ्हुप नुलोक खाकि मो मुयुङ्सु, खोन्किना एनुओ य़ङ अ़मान्तुन्खाइसुन्किना काचि मु, मेन काचि मुनालो खोसाआ मुओ अ़काचिदा आसिखा तोक्तु। 26 साङ साम्योक्मिनि मित्नान्चिन्कि अ़लेम अ़क़म्तुन्नालो खोङा धान्नान्चिन, खोन्कि खोसोओ अ़साम्योक सोज्जेओ लि। 27 आन्निनाम्हाङ पापाओ अ़चुबुदा सेङ्याङ्ओ खोन्कि मान्पोप्ओ साम्योक ओङा ओ: अ़चाअ़त्मादा म़छुक्ताओ हेत्छाकुवाचि खोन्कि मेन्मित्माचि खाङ्माचि खोन्कि हेन्खामादाओ अ़अ़त्पा य़ङ्चिदाङ्का मान्पोप्दामान्चिन ओ। |
© Wycliffe Bible Translators, Inc. All rights reserved.
Wycliffe Bible Translators, Inc.