हिब्रु 9 - बान्‍तावा राई

हेन्‍खामादाओ निनाम्‍हाङ लोङ्‌खा

¹ बुयाओ य़ङ्‌छ़ङ्‌दा निनाम्‍हाङ ब़क्‍खाओ य़ङ्‌हुप खोन्‍कि हेन्‍खामादा सेङ्‌याङ्‌ओ निनाम्‍हाङ ब़क्‍खा याआङा।

² अ़क्‌तात तित्‍खिम मुवायुङ्‌सा। मो तित्‍खिम्‌दा ह्‍वा खोप याआङा। मो खोप्‌चिदाओ बुदाओ खोप सेङ्‌याङ्‌ओ खोप्‌नि लोवाङा। मोदा कुपि, तेबला खोन्‍कि म़सेङ्‌साओ पेम्‍पाक्‌चि म़युङ्‌सायुङ्‌सा।

³ मो ह्‍वा खोप्‌ओ अ़चुकाप्‌दा अ़क्‌तात थेम्‍खातित क़ङ्‌सायुङ्‌सा। मोसोओ अ़देङ्‌लिप्‍पा तोक्‍पो सेङ्‌याङ्‌ओ खोप्‌नि लोवाङा।

⁴ मोदा हाराक्‌वाओ धुपा पाक्‍खा खोन्‍कि अ़दुङ-अ़कोङ्‌लिप्‍पा हाराक्‌वाआ स़प्‍ताओ य़ङ्‌छ़ङ्‌ओ सन्‍दुका याआङा। सन्‍दुकाहुत्‌दा मन्‍ना पाआओ हाराक्‌वाओ ब़, अ़छ़क्‌वा पाक्‍तुओ हारुन्‌ओ अ़तोप्‍मा खोन्‍कि दस्‌कातात लोमाय़ङ्‌चि म़छाप्‍ताङाओ ह्‍वातात थेप्‍पुचिवा लुङ्‌चि याआङाचि।

⁵ य़ङ्‌छ़ङ सन्‍दुका दुङ्‌दा निनाम्‍हाङ मोदा म़युङ्‌याङ्‌निओ खाङ्‌मुमा ह़वाङ साम्‍स़रिओ निनाम्‍हाङ काफाचि याआङाचि। मोचिओ अ़चुलाप्‌चिआ य़ङ्‌छ़ङ सन्‍दुका अ़थेम्‍ताङाचु, मोदा मुलो काब़क्‍पा ताकि निनाम्‍हाङ्‌एदा हेवाचि लेत्‍लुवाङा। मेन ओ य़ङ्‌ओ अ़तुक्‌वादा ओन्‍ग़रि आन्‍कान्‍का अ़स़वा खालुमा अ़ऱन्‍मिन्‍का।

⁶ हान ओ य़ङ्‌चि म़तोङ्‌साचिआकि काब़क्‍पाचि बुदाओ खोप यावायोक मुखादा ब़क्‍मा काचि मुसि अ़धुन म़वाङाङा।

⁷ मेन थेम्‍खातित्‌ओ अ़देङ्‌दाओ खोप्‌दा मुलो काब़क्‍पा ओन्‍ङा अ़क दोङ्‌दा अ़क्‍दु वाङाङा। ह़ मात्‍द़ङ देम्‍खाछाङ मान्‌वाङ्‌याङ। खोन्‍कि मो ह़ खोसोओ निम्‍पाङ खोन्‍कि म़नाचि मान्‍सिन्‍माङ अ़मुवाओ अ़चुहेवाचिओ निम्‍पाङ अ़पुवाङा।

⁸ ओ य़ङ लाम्‍पाङा सेङ्‌लावाआ खाङ्‌अ़मु: देम्‍खातारि बुयाओ सेङ्‌याङ्‌ओ खोप युङ्‌युङ, मोन्‌तारि तोक्‍पो सेङ्‌याङ्‌ओ खोप्‌हुत्‌दा वाङ्‌खा लाम अ़होत्‍निन।

⁹ ओ ना आइमित्‌ओ ग़रिओ निम्‍पाङ अ़क्‌तात अ़मात्‍ऩङ ओ। ओसाआ ओ खाङ्‌मुसु, प़माय़ङ छुक्‍दाम खोन्‍कि हेन्‍खोक्‌वाचिआ काब़क्‌चिओ छेन्‍खाताया सेङ्‌मा अ़ऱन।

¹⁰ मो चामायु, दुङ्‌मायु खोन्‍कि अ़खाला-खालाओ सेङ्‌मान्‍चिन च़माथाङ्‌माचि बुङ्‌खालिप्‍पाओ य़ङ्‌हुप ओन्‍ङा ओ। ओवाको बुयाओ य़ङ्‌हुप्‌चि अ़ऩङ्‌वा य़ङ्‌हुप अ़तानिन्‌तारि ओन्‍ङा अ़काचि याक।

ख्रिस्‍तओ अ़चुह़

¹¹ मेन ख्रिस्‍त आइमित साऱङ म़ताचिआओ अ़नुवाक य़ङ्‌चिओ मुलो काब़क्‍पा म़लिसा। खोक्‍को निनाम्‍मादुओ च़लोक तोक्‍पो खोन्‍कि अ़च़क़ल़क तित्‍खिम्‌दा म़खारा। मो छुक्‌आ मुमाय़ङ्‌ओ माआङ खोन्‍कि ओ मुन्‍माय़ङ हेन्‍खामाओ अ़धाङ माआङ।

¹² मेनेत्‍पा माङ्‌लो बोयोङ्‌ओ अ़ह़आ माआङ, मेन आप्‍पिओ अ़चुह़आ आन्‍कान अ़धुन्‌ओ निम्‍पाङ लेइसि अ़क्‍धुवा तोक्‍पो सेङ्‌याङ्‌ओ खोप्‌हुत्‌दा खोक्‍को म़वाङा।

¹³ मेनेत्‍पा खोन्‍कि बोयोङ्‌चिओ अ़चुह़ खोन्‍कि बाछिओ अ़थाबुत म़नाचिएदा थोत्‌हिदा अ़चुच़माथाङ्‌मावा म़नाचिओ अ़चुपोक्‌चि अ़सेङ्‌निनिन्‌ओदाङ्‌का सेङ।

¹⁴ ओ अ़छ़ङ य़ङ ओनालो, ख्रिस्‍तओ अ़चुह़आ देम च़लोक आन्‍छेन्‍खाताया हेवा काचिचिदाङ्‌का सेङ, खोन्‌ओसा आन्‍कान अ़ह़ङ निनाम्‍हाङ ब़क्‍मा ऱम। देकिनालो खोक्‍कोसाआ अ़धुन्‌ओ लावाओ सावाआ आप्‍पि अ़च़क़ल़क हेन्‍खोक्‌वा म़लिसाकि निनाम्‍हाङ अ़पुवालावा।

¹⁵ खोन्‌ओसा खोक्‍को निनाम्‍हाङ खोन्‍कि म़नाओ अ़चुरादाओ अ़ऩङ्‌वा य़ङ्‌छ़ङ कातुम म़मुयाङ। मोवात्‍नि म़बुत्‍तुचिओचिआ निनाम्‍हाङ्‌आ म़हिप्‍तुचिओ अ़धुन्‌ओ आसिखाचि तोक्‍मा अ़ऱ। देकिनालो बुयाओ य़ङ्‌छ़ङ्‌दा मोचिआ अ़फिसाओ हेवाओ दन्‍दादाङ्‌का फोङ्‌सि येसु म़सुवाचिआयुङ्‌सा।

¹⁶ मिन्‍माछाप्‍लावा साङ्‌आ मुओ, मो कामु सुवादायुङ्‌साओ खाङ्‌मुमादोत।

¹⁷ खो स़दाकि ओन्‍ङा मिन्‍माछाप्‍लावा काचिदा पाक्‍मा ऱम, मिन्‍माछाप्‍लावा काप़ ह़ङ्‌याङ्‌ओन मो काचिदा पाक्‍मा अ़ऱन्‍मिन।

¹⁸ खोन्‌ओसा बुयाओ हिप्‍माय़ङ्‌छाङ साक्‍स़ङ्‌ओ अ़ह़ मात्‍द़ङ काचिदा पाक्‍मा मान्‍ऱ।

¹⁹ निनाम्‍हाङ्‌य़ङ खाकालु मोसाआ य़ङ्‌हुप्‌ओ लोमाय़ङ झारा म़नाचि खाएत्‍तुचिउचि खोन्‍किना खोसाआ पित छाचि खोन्‍कि मेनेत्‍पाचिओ अ़चुह़ चाक्‌वादा होलुकि हालापाक्‍पाक्‌ओ भेराओ अ़मुवा खोन्‍कि हिसप्‌ओ अ़खाङ वालुम्‍तुकि य़ङ्‌हुप छाप्‍लाखादा खोन्‍कि झारा म़नाचिएदा रेप्‍तुचि।

²⁰ खोन्‍किना खोसाआ ओवात्‍नि लोचि, “निनाम्‍हाङ्‌आ खानानिन्‌एनान अ़मुवाओ य़ङ्‌छ़ङ ओ ह़आ अ़छ़ङ मु।”

²¹ मोवात्‍निङा खोसाआ सेङाङाओ तित्‍खिम्‌दा खोन्‍कि ब़क्‍मादा याङ्‌मायु झारा खाम्‍माचिदा ह़ रेप्‍तु।

²² अ़नुछ्‍या य़ङ्‌हुप य़ङ्‌याङ्‌वा ह़आ आप्‍फात झारा सेङ्‌सु, खोन्‍कि ह़ सोन्‍कि ओन्‍ङा हेवा लेत।

²³ मोवात्‍नि निनाम्‍मादुओ अ़नुछ्‍याओ य़ङ्‌चिओ अ़मात्‍ऩङ सायाम्‍पोक हेन्‍खोक्‌वालाम्‍पा सेङ्‌मा दोराङानालो, निनाम्‍मादुओ अ़नुछ्‍याओ य़ङ्‌चि सेङ्‌मा च़लोक अ़नुवाक हेन्‍खोक्‌वा दोरा।

²⁴ ख्रिस्‍त म़नाओ अ़छुक्‌आ मुमाय़ङ सेङ्‌याङ्‌ओदा मान्‌वाङ्‌चि। मो अ़नुछ्‍या निनाम्‍मादुओ अ़मात्‍ऩङ ओन्‍ङा ओ। मेन खोक्‍को निनाम्‍मादुङा म़वाङा, खोन्‍कि खोक्‍को आन्‍लिप्‍पादा निनाम्‍हाङ्‌ओ अ़चुबुदा म़खारायुङ्‌सा।

²⁵ मुलो काब़क्‍पा अ़दोङ्‌खिन्‍तुम साक्‍स़ङ्‌चिओ अ़ह़ खुयुकि तोक्‍पो सेङ्‌याङ्‌ओ हुत्‌दा वाङ। मेन येसुआ खोक्‍को आप्‍पि अ़दु-अ़दु हेन्‍खोक्‌वा प़सि म़वाङाओ माआङ।

²⁶ माङ्‌नालोना हेन्‍खामाओ अ़पुङ्‌चिपुक्‌दाङ्‌काङा खोक्‍कोसाआ अ़दु-अ़दु अ़चाअ़त्‍मा आङ्‌मादोराओ। मेन ओ जुगाओ अ़देङ्‌दा खोक्‍कोसोओङा अ़चुहेन्‍खोक्‌वालाम्‍पा हेवा चुम्‍खाइसि खोक्‍को अ़धुन्‌ओ निम्‍पाङ अ़क्‍धुवा खाङ्‌म़मुसान्‌युङ्‌सान्‍चिन।

²⁷ देत्‍नि म़नाचि अ़क्‍दु स़माङादोत, खोन्‍कि आदेङ निनाम्‍हाङ्‌आ छ़ङ म़छेन्‍तुचि,

²⁸ मोवात्‍नि ख्रिस्‍त्‌छाङ ब़द्‍धेकापाङ्‌सोओ अ़चुहेवा चुम्‍खाइसि अ़क्‍दु हेन्‍खोक्‌वा म़लिसा, खोन्‍कि खोक्‍को ह्‍वादुओदु हेवा चुम्‍खाइसि माआङ, मेन अ़चुऩङानुयाङ्‌सा खोक्‍को काहुङ्‌चि लेइसिओ निम्‍पाङ खाङ्‌म़मुनान्‍चिन।