हिब्रु 8 - बान्‍तावा राई

अ़ऩङ्‌वा य़ङ्‌छ़ङ्‌दाओ मुलो काब़क्‍पा

¹ आन्‍कान्‍का य़ङिन्‌येन्‍काओसो अ़मुलो य़ङ ओङा ओ, आन्‍को ओवाको मुलो काब़क्‍पा म़युङ्‌याङ, खोक्‍को निनाम्‍मादुओ तोक्‍पो निनाम्‍हाङ्‌ओ हाङ्‌युङ्‌खाओ अ़चुचुप्‍ताङ्‌छुक्‌लिप्‍पा म़युङ्‌याङ।

² म़नाआ मुमाय़ङ माआङ, मेन निनाम्‍हाङ्‌आ अ़मुवाओ तोक्‍पो सेङ्‌याङ्‌ओदा अ़नुछ्‍याओ सेङ्‌याङ्‌ओ तित्‍खिम्‌दा खोक्‍को काब़क्‍पा म़मुयाङ।

³ झारा मुलो काब़क्‍पाचि छुक्‍दाम खोन्‍कि हेन्‍खोक्‌वा प़सि म़छेन्‍तुचि, मोवात्‍निङा आन्‌येसु मुलो काब़क्‍पा म़मुयाङ, खोक्‍कोसाआछाङ छुक्‍दाम प़मा दोराङा।

⁴ खोक्‍को ओ हेन्‍खामादाङा म़युङाङाओदे ना खोक्‍को काब़क्‍पा मान्‍लिचिओ। देकिनालो यहुदि य़ङ्‌हुप्‌दा याक्‌याङ्‌वा छुक्‍दाम काप़ काब़क्‍पाचि ना म़युङ्‌याङ्‌ङा।

⁵ मोचिआ सेङ्‌याङ्‌ओदाओ ब़त्‍मायु काचि निनाम्‍मादुओ अ़छ़ङ य़ङ्‌ओ अ़मात्‍ऩङ खोन्‍कि अ़इप्‍नाम्‍मा ओ। देकिनालो निनाम्‍हाङ्‌य़ङ खाकालु मोसाआ सेङ्‌याङ्‌ओ तित्‍खिम मुङुहिदा निनाम्‍हाङ्‌आ ओवात्‍नि अ़लोवा, “भ़ऱदु खाना खाङ्‌मेत्‍नाओ अ़मात्‍ऩङ्‌वा खाना झारा नुलोक मुचि।”

⁶ मेन येसुआ अ़तोक्‍ताओ ब़क्‍मा काचि नि तोक्‍पो काब़क्‌चिदाङ्‌का च़लोक तोक्‍पो मुयाङ। मोवात्‍निङा निनाम्‍हाङ खोन्‍कि खोक्‍कोसोओ अ़चुम़नाचिएदा येसुआ तुम्‍माय़ङ अ़ऩङ्‌वा य़ङ्‌छ़ङ अ़मुवाओ बुया मुमाय़ङ य़ङ्‌छ़ङ्‌दाङ्‌का तोक्‍पो मुयाङ। देकिनालो ओ य़ङ्‌छ़ङ्‌चिदा अ़नुवाक हिप्‍माय़ङ्‌चि म़याक्‌याङ।

⁷ बुयाओ य़ङ्‌छ़ङ लाहि मात्‍द़ङ्‌ओ मुवाङा खाङ्‌देना ह्‍वादुओदु य़ङ्‌छ़ङ मुमा मान्‍दोत्‌ओ।

⁸ देकिनालो निनाम्‍हाङ्‌आ म़नाचिदा लाहि अ़धिरा खोन्‍कि म़य़ङा, “हाङ्‌पा म़य़ङ्‌याङ, मो लेन्‌चि म़तायाङ, मोन्‍ग़रि इस्राएल्‌दाओ म़नाचि खोन्‍कि यहुदादाओ म़नाचिएनान अ़ङ्‌का अ़क्‌तात अ़ऩङ्‌वा य़ङ्‌छ़ङ मुङ।”

⁹ ओ य़ङ्‌छ़ङ मोचिओ अ़चुसुन्‍तुम्‌चिएनान अ़ङ्‌का मुङ ओ य़ङ्‌छ़ङ्‌वात्‍नि अ़लिनिन, मोन्‍ग़रि अ़ङ्‌का मोचि अ़चुछुक्‌दा क़क्‍तुङ्‌च़ङ खोन्‍कि मिस्र हेन्‍कोप्‌दाङ्‌का तित्‍तुङ्‌बात्‍तुङ्‌च़ङ्‌ओ। मोचि अ़ङ्‌य़ङ्‌छ़ङ मान्‍काङ्‌चि, खोन्‌ओसा अ़ङ्‌का मोचि मान्‍खाङ्‌ङाच़ङ।

¹⁰ हाङ्‌पा निनाम्‍हाङ म़य़ङ्‌याङ, मो लेन अ़ङ्‌का इस्राएल्‌दाओ म़नाचिएनान ओ य़ङ्‌छ़ङ मुङ, मोचिओ अ़चुमिन्‍माचिदा अ़ङ्‌य़ङ्‌हुप युङ्‌सुङ, खोन्‍कि अ़चुओ साकोङ्‌वाचिदा मोचि छाप्‍तुङ्‌प़ङ्‌च़ङ, खोन्‍कि अ़ङ्‌का मोचिओ अ़चुनिनाम्‍हाङ लिङा, खोन्‍कि मोचि अ़ङ्‌म़नाचि म़लि।

¹¹ हान्‌दाङ्‌का “हाङ्‌पा निनाम्‍हाङ सिन्‍तानुम”निकिना खाक्‍कोछाङ म़नाआ अ़तेन्‍पाङ माङ्‌लो अ़द़क्‍छाबुवाचि अ़चिन्‍तुन्‍चिन। देकिनालो अ़चुप्‍पोदाङ्‌का अ़धिवातारिओचिआ झारासा अ़ङ्‌का ऩसिन्‍ङा।

¹² मोचिओ अ़चुफिमा काचि अ़ङ्‌का लेत्‍तुङ्‌प़ङ्‌च़ङ, खोन्‍कि मोचिओ अ़चुओ हेवाचि देम्‍खाछाङ अ़ङ्‌का अ़लाऩङ मित्‍ऩङ्‌च़ङ।

¹³ ओ य़ङ्‌छ़ङ “अ़ऩङ्‌वा”नि म़य़ङाओसा बुयाओ निनाम्‍हाङ्‌आ अ़काचि मात्‍द़ङ्‌ओ अ़मुवा। खोन्‍कि खाक्‍को अ़पेत्‌वा खोन्‍कि अ़काचि मात्‍द़ङ्‌ओ लि, मो यात्‌याङ्‌सा माखात।