हिब्रु 6 - बान्तावा राई1 खोन्ओसा ख्रिस्तओ अ़चुतुक्वादाओ ताक्पेत्निओ चिन्माय़ङ्चिदा अ़युङिन्युङ्सिमिन्ने, मेन आन्कान आन्तुप्मादा चात्याङ्सा खारिन्ने। आन्कान स़मादा कालाखात काचिचिओ अ़तुक्वादा खोन्कि निनाम्हाङ्दा साकोङ्छ़ङ्ओ अ़तुक्वादा चिन्माय़ङ अ़लासिन्पुङ्सिमिन्ने। 2 वास़मा थाप्स़ङ्चि, छुक युङ्मा थाप्स़ङ, म़सुवादाओचिओ अ़चुलामाखोन्मालोन्मा खोन्कि अ़लुक्निन्ओ दन्दाओ अ़तुक्वादा अ़दु-अ़दु मान्चिन्युङ्दानिन्चिन। 3 निनाम्हाङ्ओ अ़चुमिन्मा याक्याङ्नालो हान आन्कान चात्याङ्सा खारिन्ने! 4 देकिनालो साङ्चिआ अ़क्दु साम अ़तोक्ताकि निनाम्मादुओ छुक्तुप्मा अ़छेम्सायुङ्साओ, खोन्कि सेङ्लावाओ काचिदा म़वाङायुङ्साओ, 5 निनाम्हाङ्ओ अ़नुवाक य़ङ अ़एनायुङ्साओ खोन्कि तायाङ्ओ ग़रिओ सावापोरिओ काचिचि अ़खायुङ्साओ, 6 खोन्नुछाङ अ़चुओ साकोङ्छ़ङ अ़छित्नालो मो म़नाचिओ अ़चुमिन्मा लामा अ़ऱन्चिमिन। देकिनालो मोचिआ आप्पिङा निनाम्हाङ्ओ अ़चुछा क्रुस्दा अ़लाख़न्याङ, खोन्कि निचिआ खोक्कोसोओ अ़चुसाया पेप्खालाम अ़मुयाङ। 7 अ़ङ्का अ़क्तात अ़मात्ऩङ खाएत्नानिन्ने: हेन्खामादा वाताओसाआ बाखा वापोक्तु, खोन्कि व़क काचि कामुचिओ निम्पाङ अ़नुवाक चा सिसु। अ़नुछ्याङा ओवाको व़क निनाम्हाङ्आ आसिखा अ़प़। 8 मेन मोसाआ त़ङ्खोक्वाचि खोन्कि सुइधाचि लोइसुचिनालो मो अ़काचि मात्द़ङ्ओ लि, खोन्कि ओवाको व़क्दा निनाम्हाङ्ओ अ़चुमाङ्हिम छुक्मा ऱ। आदेङ मो ह़त्खान। 9 सोमातुक्निङ्निओ यावाचि ओ, आन्कान्का ओवात्नि आम्नुओ तुक्वादा य़ङिन्कानुछाङ आम्नुओ लेन्माएनान च़लोक अ़नुवाक य़ङ्चि खानानिन्एदा म़तानि आन्कान्का सोम्कुवा मुन्का। 10 निनाम्हाङ नुलोक छ़ङ्काछेन म़मुयाङ। खोक्कोसाआ आम्नुओ काचि खोन्कि निनाम्हाङ्ओ अ़चुम़नाचि ब़त्मा काचिलाम्पा खानानिन्आ निनाम्हाङ खाङ्त़मुसुम्ओ खोन्कि खाङ्त़मुसुम्योम्ओ सोम्तुक्मा ऩमान्तुन्केसुन। 11 आन्काओ तोक्पो मिन्मा ओङा ओ, खानानिन झारासा आदेङ्तारि मो आम्नुओ राक खाङ्मुसानुम खोन्कि दि खानानिन्आ त़हुङुम्योम्ओ, मो अ़छ़ङ मुवानुम। 12 खानानिन त़सोसिन्नेनि आन्कान्का अ़मिनिमिन्का, मेन साकोङ्छ़ङ खोन्कि हुङ्मालाम्पा निनाम्हाङ्ओ अ़चुहिप्माय़ङ कातोक्चि म़चुवावात्नि लिसानिन। निनाम्हाङ्ओ अ़छ़ङ अ़चुहिप्माय़ङ 13 निनाम्हाङ्आ अब्राहाम अ़हिप्ताङाहिदा किरे चामा खोक्कोएदाङ्का तोक्पो नि साङ्छाङ मात्द़ङ्याङ्ओसा आप्पि अ़चुऩङ्दा किरे म़चा। 14 खोक्को म़य़ङा, “अ़ङ्का अ़नुछ्या खाना आसिखा प़ना, खोन्कि खाना ब़द्धे छाचि पोन्नाप़ना।” 15 खोन्किना अब्राहाम आङ्याङ्सा खाहुङाकि निनाम्हाङ्आ अ़हिप्ताओ तोक्तु। 16 म़नाचि खोचिदाङ्का तोक्पोचिओ अ़चुऩङ्दा किरे म़चा, खोन्कि मोचिओ झारा अ़चुदुम तुमा किरेआ अ़छ़ङ मु। 17 निनाम्हाङ्आ म़हिप्तुचिओ पाङ्यि कातोक्चि खोक्कोसाआ अ़मुवाओ हिप्माय़ङ ऩफान्तुन निकिना अ़छ़ङ मुमाओ निम्पाङ किरे म़चा। 18 निनाम्हाङ्आ ह्वातात ऩफान्निन्ओ य़ङ्चि अ़मुवा। ओसोओ अ़तुक्वादा निनाम्हाङ देम्खाछाङ ऩम़प्निन। खोन्ओसा आन्कान खोक्कोएदा रात्लुसि काखात्चि आन्बुदा म़युक्ताओ सोम्कुवा नुलोक लाप्मा तोक्पो राक आन्कान तोक्तुम्युङ्सुम। 19 ओ सोम्कुवा आन्लावाओ निम्पाङ अ़तुङ्निन्ओ क़क्खावाको मुयाङ। ओ सोम्कुवाआ आन्कान अ़चुथेम्खातित हुत्दाओ सेङ्याङ्ओदा म़तित। 20 येसु आन्को निम्पाङ आन्कान्दाङ्का बुया मोदा म़वाङायुङ्सा। खोक्को मल्किसेदेक्ओ छान्वा आन्को अ़धुन्ओ मुलो काब़क्पा म़लिसायुङ्सा। |
© Wycliffe Bible Translators, Inc. All rights reserved.
Wycliffe Bible Translators, Inc.