हिब्रु 4 - बान्तावा राईनिनाम्हाङ्ओ अ़चुम़नाचिओ अ़चुसावातोम्मा 1 निनाम्हाङ्ओ अ़चुसावातोम्खादा वाङ्माओ हिप्माय़ङ हान्छाङ युङ्याङ। खोन्ओसा आन्कान चाप्चेत्मान्चिन्दोत खोन्कि खानानिन्एदाङ्का साङ्छाङ मो हिप्माय़ङ सावातोम्खादा मान्तालामादामादा त़छुक्तिमिन्ने। 2 देकिनालो आन्कान्छाङ मोचिवात्निङा नुय़ङ्खान एनुम। मोचिआ अ़एनाओ य़ङ्लाम्पा मोचिआ दित्छाङ मान्तोक्अ़दा, देकिनालो काएन्चिआ ओ साकोङ्छ़ङ मान्मुअ़दा। 3 मेन आन्कान साकोङ्छ़ङ कामुचि मो सावातोम्खादा वाङिन। मेन नि म़नाचिओ अ़चुतुक्वादा निनाम्हाङ ओवात्नि म़य़ङायुङ्सा, “अ़ङ्का अ़ङ्च़ऱपादा ओवात्नि किरे चोङ, ‘अ़ङ्सावातोम्खादा मोचि देम्खाछाङ ऩवाङ्निन’।” निनाम्हाङ्आ हेन्खामा अ़मुयाहिदा सावातोम्खा मोदा युङाङा, 4 आन्कान ओ सिन्तुम देकिनालो साम्कालिन्दा सात्कालेन्ओ अ़तुक्वादा ओवात्नि छाप्तायुङ्सा, “निनाम्हाङ झारा अ़चुकाचिचिदाङ्का सात्कालेन्ओ लेन सावा म़तोम्सा।” 5 खोन्कि ओ अ़धाङ्दाङा खोक्को म़य़ङायुङ्सा, “अ़ङ्सावा तोम्खादा मोचि देम्खाछाङ ऩवाङ्निन।” 6 बुयाङा ऩङानुमाओ य़ङ्खान काएन्चिआ लोमावा मान्च़चिओसा निनाम्हाङ्ओ अ़चुसावातोम्खादा हान्छाङ मान्वाङ्म़युक। मेन नि म़नाचिओ निम्पाङ निनाम्हाङ्ओ अ़चुसावातोम्खा तोक्मा अ़वाखाम म़प़युङ्सुचि। 7 खोन्ओसा निनाम्हाङ्आ निलेन “आय़” निकिना अ़लोवायुङ्सा, खोक्कोसाआ ब़द्धे आदेङ्माङ दाउद्लाम्पा बुया म़य़ङाओ य़ङ म़लासाय़ङा, “आय़ खानानिन्आ खोक्कोसोओ अ़चुय़ङ त़एनुम्नालो आम्नुओ साकोङ्वा छाक्लो मान्मुदानुम।” 8 देकिनालो यहोसुआ इस्राएलिचि सावातोम्खादा वाक्तुचिओदे निनाम्हाङ्आ आदेङ्माङ नि लेन्ओ अ़तुक्वादा मान्य़ङ्चिओ। 9 मोवात्निङा निनाम्हाङ्ओ अ़चुम़नाचिओ निम्पाङ सावातोम्खा-लेन हान्छाङ युङ्याङ। 10 मो लेन निनाम्हाङ्ओ अ़चुसावातोम्खादा कावाङ साङ्आनुछाङ अ़काचिदाङ्का सावातोम, देत्नि निनाम्हाङ्आ अ़चुकाचिदाङ्का सावा म़तोम्सा। 11 खोन्ओसा मो सावातोम्खादा वाङ्मा आन्कान अ़न्नुनु लामिन्ने, खोन्कि मोवाको लोमावा मान्च़दामादाङ्का साङ्छाङ अ़धानिन्खात्निन्ने। 12 देकिनालो निनाम्हाङ्ओ अ़चुय़ङ अ़ह़ङ खोन्कि सावापोरिओ मुयाङ। ओ ह्वालिप्पा अ़हायाक्ओ बान्छोन्दाङ्काछाङ च़लोक अ़हायाक। खोक्कोसोओ अ़चुय़ङ्आ साक्मा खोन्कि लावा मोचिओ अ़चुतुप अ़तुप्दा खोन्कि य़वाओ अ़दुङ्कुछुत्तारि अ़धाङ-अ़धाङ मुलो लेनुखात्तु, खोन्कि साकोङ्वादाओ मित्मा खोन्कि मिन्माचि छ़ङ्छेन्तुचि। 13 निनाम्हाङ्ओ अ़चुखाङ्मादाङ्का मुन्माय़ङ दित्छाङ अ़कुम्निन। खोक्कोसोओ अ़चुबुदा झारा य़ङ्चि ऩदिप्निनिन, खोन्कि छेङ्छेङ्छेङ्वा म़मुयाङ। आन्कान मुम्ओ अ़छ़ङ य़ङ खोक्को खाएत्मादोत। येसु झारादाङ्का मुलो काब़क्पा 14 मोवात्नि निनाम्मादु काखात निनाम्हाङ्ओ अ़चुछा येसु आन्को झारादाङ्का तोक्पो मुलो काब़क्पा म़युङ्याङ्ओसा आन्कान लोउम्ओ ओ साकोङ्छ़ङ नुलोक आन्कान क़क्तुम्युङ्सुम्ने। 15 आन्काओ मुलो काब़क्पा आन्माऱदामाचिदा सोमामान्तुक्कादा ऩमुनिनिन। मेन आन्कान्वात्नि खोक्को झारा य़ङ्दा हेवादा धान्मा अ़लाप्ताहिदाछाङ खोक्को हेवादा मान्धान्दान्चिन। 16 खोन्ओसा आन्कान राक्एनान सोम्तुक्माओ हाङ्युङ्खादा खारिन्ने। मोदा निनाम्हाङ्आ सोम्तुक्मा दोत्ओ ग़रिदा आन्कान फामा तोक्तुम। |
© Wycliffe Bible Translators, Inc. All rights reserved.
Wycliffe Bible Translators, Inc.