हिब्रु 13 - बान्तावा राईदेत्नि निनाम्हाङ्ओ अ़चुऩङानुमा 1 बुवा निछा नाना खोन्कि निछामावा अ़क्छानिेएदा सोमातुक्कातुक मुवायुङ्सानिन। 2 प़न्था काकोत्चि ब़त्मा ऩङामान्छित्दानुम्च़म। ओवात्निङा खा-खाक्कोचिआ मान्सिन्माङ निनाम्हाङ काफाचि साऩङ्वा म़मेत्तुयुङ्सुचि। 3 खानानिन्छाङ छेक्खादा मोचिएनान त़याइन्येन्वा काछेक्चि फासानुम्च़म। खोन्कि खानानिन्आछाङ दुखा त़आङ्तुम्योम्वा दुखादा म़छुक्ताओचि फासानुम्च़म। 4 झारासाआ सायाकाम्माय़ङ साया मेत्मादोत खोन्कि खिम्हाङ्मा खिम्हाङ्पा सोम्कुवा मुकामु लिमादोत, देकिनालो काचान्चाचि खोन्कि ताङ्लान कामुचि निनाम्हाङ्आ छ़ङ म़छेन्तुचि। 5 आम्नुओ ह़ङ्म़ङ फेक्वा च़क्ख़य़ मुमादाङ्का अ़थाया युङ्सानुम, खोन्कि खानानिन्एदा युङ्याङ्ओदाङा आम्नुओ सोम्सेत्तानिन्चिन। देकिनालो खोक्को आप्पि म़य़ङायुङ्सा, “अ़ङ्का खानानिन देम्खाछाङ अ़लेत्नानिमिन, माङ्लो अ़ङ्का खानानिन देम्खाछाङ अ़छित्नान्निमिन।” 6 खोन्ओसा राक्एनान आन्कान य़ङिन, “हाङ्पा अ़ङ्काफापा म़युङ्याङ, अ़ङ्का अ़क़ऩङ, म़नाचिआ अ़ङ्का दे मुमा ऩऱङा कि?” 7 आम्नुओ बुयाओ बुसुवाचि मित्तानुम्च़म, खोचिआ खानानिन निनाम्हाङ्ओ अ़चुय़ङ खाऩएत्तिन। खोचि देत्नि अ़नुवाक ह़ङ्म़ङ म़ह़ङाओ मित्तानुम, खोन्कि मोचिओ अ़चुसाकोङ्छ़ङ्ओ अ़मात्ऩङ त़ङ्तानुम। 8 येसु ख्रिस्त आखोमाङ, आय़ खोन्कि अ़धुन अ़क्निवा म़मुयाङ। 9 अ़खाला-खालाओ मान्सिन्माय़ङ्ओ चिन्माय़ङ्चिआ खानानिन ऩतित्तिन्खातिमिन्ने। देकिनालो चामायु दुङ्मायुओ य़ङ्हुप्आ माआङ, मेन निनाम्हाङ्ओ अ़चुसोमातुक्माआ साकोङ्वा छोलो मुमादा अ़नुवाक मु। चामायु दुङ्मायुओ य़ङ्हुप्आ मो य़ङ्हुप कात़ङ्चि नुलोक मान्मुयुक्तुचि। 10 आन्को अ़क्तात ब़क्खा युङ्याङ, यहुदिचिओ तित्खिम्दा काब़त्चिआ मोदा हेन्खोक्वा प़माय़ङ चामा पाङ मात्द़ङ। 11 यहुदिचिओ अ़चुमुलो काब़क्पाआ हेवा हेन्खोक्वाओ निम्पाङ साक्स़ङ्चिओ अ़चुह़ तोक्पो सेङ्याङ्ओ खोप्दा तारुङु। मेन मोचिओ अ़चुपोक्चि याक्साचिदाङ्का बुङ्खाया म़खात्तुचिकि म़ह़त्तुखाइसुङुचि। 12 मोवात्निओसा येसुआछाङ खोक्कोसोओ अ़चुह़लाम्पा म़नाचि अ़चुहेवादाङ्का सेङ्सि सहराओ अ़वाङ्खालाम्ओ बुङ्खालिप्पादा दुखा अ़आङ्ता। 13 खोन्ओसा आन्कान्छाङ याक्साओ अ़बुङ्खालिप्पा खोक्कोएदा खारिन्ने, खोन्कि खोक्कोसाआ अ़आङ्ताओ सुङ्माय़ङ आन्कान्छाङ आङ्तुम्ने। 14 देकिनालो ओदा आन्को निम्पाङ अ़धुन युङ्युङ्ओ सहरा मात्द़ङ, मेन तायाङ्ओ सहरा आन्कान हुङुम्योम। 15 मोवात्नि येसुओ अ़चुऩङ्दा निनाम्हाङ चोन्माओ हेन्खोक्वा अ़धुन आन्कान प़म्ने। ओ ना हाङ्पानि काबुत म़नाचिआ दोसिवादाङ्का चोन्माय़ङ य़ङ ओ। 16 नुलोक च़मा खोन्कि खानानिन्एदा युङ्याङ्ओ निचिएदा हामा मान्मान्केदानुम, देकिनालो ओवाको हेन्खोक्वाचिआ निनाम्हाङ्ओ अ़चुऩङानु। 17 आम्नुओ बुसुवाचिआ ऩलोन्ओवा चुवानिन, खोन्कि मोचिओ अ़चुपाङ्दा युङानिन। देकिनालो मोचिओ अ़चुकाचि खानानिन खाङ्मा ओ, मोचिआ निनाम्हाङ खाएत्मादोत। खोन्ओसा ओ काचि मोचिआ अ़चुऩङानुयाङ्सा अ़मुने, खोन्कि ह़त्पादा माआङ। माङ्नालो खानानिन नुलोक त़लिसिमिन। 18 आन्काओ निम्पाङ यामारानिन। आन्कान्का सिन्तुम्योम्का आन्काओ छेन्खाताया सेङ्याङ, खोन्कि अ़धुन झारा य़ङ्चि नुलोक मुमानि आन्कान्का मिनिन्येन्का। 19 अ़ङ्का यामात्निप़नि निकिना राक प़नाङ्नानिन। खोन्ओसा अ़ङ्का खानानिन्एदा च़क्नि लामातामा ऱङाने। अ़सेत्मादिमाओ यामात्मा 20 आन्हाङ्पा येसु ख्रिस्त काखोन्लोन निनाम्हाङ्आ सेवाङ्नि ऩमुन्ने। येसु तोक्पो भेरा काखाङ्पावा म़मुयाङ, खोक्कोसोओ अ़चुह़लाम्पा अ़चुभेराचिएनान अ़धुन्ओ य़ङ्छ़ङ्दा सेप्तायुङ्सा। 21 खोक्कोसोओ अ़चुमिन्मा तामालामा रुवानुम निकिना झारा अ़नुवाक य़ङ्चिआ ऩयाङ्सिन्प़न्ने। दिसु य़ङ्आ निनाम्हाङ्ओ अ़चुऩङानुयाङ, येसु ख्रिस्तलाम्पा खोक्कोसाआ खानानिन्एदा ओ अ़मुने। अ़धुन-अ़धुन्तारि खोक्कोसोओ अ़चुऩङ्लोङ्ने! मोवात्निङा लिने। 22 ब़ब़, नाना खोन्कि निछाचि ओ, अ़ङ्का खानानिन राक प़नाङ्नानिन, खानानिन अ़ङ्यायोक्चिदा मिन्मा पाक्तानुम। देकिनालो ओ छाप्लावादा खानानिन अ़ङ्का थुत्मेत्लो ओन्ङा छाप्तुङ्युङ्सुङ। 23 आन्निछा तिमोथि छेक्खादाङ्का लोन्तायुङ्सानि खानानिन सिन्मेत्मा स़ङाङा। खो च़क्नि बान्नालो अ़ङ्का खोक्कोएनान अ़क्नि खानानिन तुप्सि बान्ङा। 24 झारा आम्नुओ बुसुवाचि खोन्कि झारा निनाम्हाङ्ओ अ़चुम़नाचि सेवानि लोवानुम्च़म। इतालियादाओचिआ खानानिन सेवा ऩछोक्तिन्युङ्सिन। 25 खानानिन झारादा निनाम्हाङ्ओ अ़चुसोमातुक्मा युङ्ने! |
© Wycliffe Bible Translators, Inc. All rights reserved.
Wycliffe Bible Translators, Inc.