हिब्रु 10 - बान्तावा राईख्रिस्तओ अ़चुहेन्खोक्वा अ़धुन्ओ निम्पाङ 1 निनाम्हाङ्य़ङ खाकालु मोसाओ य़ङ्हुप तामा म़मुयाङ्ओ अ़नुवाक य़ङ्चिओ अ़इप्नाम्मा ओन्ङाओसा मो अ़छ़ङ माआङ। खोन्ओसा अ़धुन अ़दोङ्खिन्तुम्ओ हेन्खोक्वालाम्पा निनाम्हाङ्ओ अ़चुच़क्दा ब़क्सि काता म़नाचि ओसाआ अ़नुछ्याङा सेङ्मा अ़ऱन्चिन। 2 माङ्नालो हेन्खोक्वा धान्मा काचि छेक्ताओ, देकिनालो काब़क्चि अ़क्दुदाङा म़सेङाओदे मोचिआ देम्खाछाङ हेवाओ लाहि मान्मित्अ़दाओ। 3 मेन मो हेन्खोक्वाचिआ अ़दोङ्खिन्तुम हेवा मित्म़मेत। 4 देकिनालो बोयोङ्चि खोन्कि मेनेत्पाचिओ अ़चुह़आ हेवा खान्मा अ़ऱन। 5 खोन्ओसा हेन्खामादा ख्रिस्त म़ताहिदा म़य़ङा, हेन्खोक्वा खोन्कि छुक्दाम खानानिन मान्लाम्त़दान, मेन खानानिन्आ अ़ङ्को निम्पाङ अ़क्तात पोक त़चुम्सुम्युङ्सुम। 6 होमाय़ङ हेन्खोक्वा खोन्कि हेवा हेन्खोक्वाचिदा खानानिन आम्नुओ ऩङामान्नु। 7 खोन्किना अ़ङ्का य़ङाङ, “खानुम, अ़ङ्निनाम्हाङ्पो, छाप्लाखाओ अ़भोङ्दा अ़ङ्तुक्वादा छाप्तिन्येन्वाङा आम्नुओ मिन्मावा च़सि अ़ङ्का ताङ्युङ्साङ।” 8 बुया खोक्को म़य़ङा, “हेन्खोक्वा खोन्कि छुक्दाम्चि, होमाय़ङ हेन्खोक्वा खोन्कि हेवा हेन्खोक्वा खानानिन मान्लाम्त़दोम माङ्लो मोचिएदा आम्नुओ ऩङामान्नु।” मोचि मोसाओ अ़य़ङ्हुप्वात्नि म़प़। 9 खोन्किना ख्रिस्त म़य़ङा, “खानुम, आम्नुओ मिन्मावा च़सि अ़ङ्का ताङ्युङ्साङ।” आदेङ्ओ काचि पाक्मा निम्पाङ बुयाओ य़ङ्छ़ङ खोक्कोसाआ अ़लोइसाखाइसा। 10 खोन्कि मो निनाम्हाङ्ओ अ़चुमिन्मावात्नि येसु ख्रिस्तआ अ़चुपोक्ओ हेन्खोक्वालाम्पा अ़धुन्ओ निम्पाङ आन्कान म़सेङ्सायुङ्सा। 11 मोसाओ अ़य़ङ्हुप्वात्नि काब़क्पाआ अ़क्निवाको हेन्खोक्वा अ़दु-अ़दु प़याङ्सा अ़लेन्खिन्तुम ब़क्खादा एप्कि ब़रुचि, मो हेन्खोक्वाआ देम्खाछाङ हेवा खान्मा अ़ऱन। 12 मेन ख्रिस्तआ ना हेवाचि अ़धुन चुम्माखान्माओ निम्पाङ अ़क्तात्ङा हेन्खोक्वा अ़पुवा, खोन्किना खोक्को निनाम्हाङ्ओ अ़चुचुप्ताङ्लिप्पा म़युङायुङ्सा। 13 खोन्कि निनाम्हाङ्आ अ़चुङेङ्चि अ़चुलाङ्भेन्यु मान्मुम़युक्तुचितारि खोक्कोसाआ मोदाङा म़हुङुयुङ्सुचि। 14 देकिनालो साङ्आ निनाम्हाङ्एदा म़नाचि तारुचि, अ़क्तात्ङा हेन्खोक्वालाम्पा खोक्कोसाआ अ़धुन्ओ निम्पाङ अ़नुछ्या म़सेङ्सुचि। 15 सेङ्लावाआछाङ आन्कान सालुम्स़ङ म़प़। बुया खोक्को म़य़ङ, 16 “मोचिएनान ओ य़ङ्छ़ङ अ़ङ्का मुङ, हाङ्पा निनाम्हाङ म़य़ङ्याङ, मो लेन अ़ङ्का मोचिओ अ़चुमिन्माचिदा अ़ङ्य़ङ्हुप युङ्सुङ, खोन्कि अ़चुओ साकोङ्वाचिदा मोचि छाप्तुङ्प़ङ्च़ङ।” 17 खोन्किना खोक्को म़य़ङ्याङ, “मोचिओ अ़चुहेवाचि खोन्कि अ़चुअ़त्लो काचिचि देम्खाछाङ अ़ङ्का अ़लाऩङ मित्ऩङ्च़ङ।” 18 खोन्ओसा झारा हेवाचि म़लेत्चिन्कि हान मोदा खाक्कोछाङ हेन्खोक्वा अ़दोत्निन। निनाम्हाङ्ओ अ़चुच़क्दा तान्ने 19 खोन्ओसा ब़ब़, नाना खोन्कि निछाचि ओ, येसुओ अ़चुह़लाम्पा तोक्पो सेङ्याङ्ओदा वाङ्मा आन्कान राक लोक्मा ऱम। 20 खोक्कोसोओ अ़चुस़मालाम्पा आन्को निम्पाङ अ़क्तात अ़ऩङ्वा लाम म़होत्तापुवायुङ्सा मोसाआ ह़ङ्म़ङ्दा म़तित। ओ लाम्आ आन्कान थेम्खातित लियाङ्सा तोक्पो सेङ्याङ्ओदा म़तात्ला। 21 खोन्कि निनाम्हाङ्ओ अ़चुखिम काखाङ आन्कान्एदा अ़क्छा मुलो काब़क्पा म़युङ्याङ। 22 खोन्ओसा आन्कान सेङ्याङ्ओ साकोङ्वा खोन्कि अ़छ़ङ साकोङ्छ़ङ मुन्कि निनाम्हाङ्ओ अ़चुबुदा खारिन्ने। देकिनालो आन्छेन्खातायाचि ख्रिस्तओ अ़चुह़आ सेङ्माचि निकिना म़रेप्तायुङ्सा, खोन्कि आन्पोक्चि सेङ्याङ्ओ चाक्वाआ वाम़स़त्तापुवायुङ्सा। 23 आन्कान लोउम्ओ तोक्मामिन्मा ऱक़क्क़क्वा लाउम्युङ्सुम्ने, देकिनालो आन्कान काहिप सोम्कुवा मुमा खान्तुओ म़मुयाङ। 24 आन्कान अ़क्छा निएदा सोमातुक्मा खोन्कि अ़नुवाक काचि मुमादा राक प़मुमाओ अ़तुक्वादा मिनिन्ने। 25 खा-खाक्कोचिओ अ़चुच़मावा आन्कान यावायोक्दा अ़क्नि कोप्मान्चिन अ़छिरिमिन्ने। मेन हाङ्पाओ अ़चुलेन च़क्दा तायाङ्ओ खानानिन त़खाम्ओसा अ़क्छाआ नि च़लोक राक प़काप़ मुवानिन। 26 देकिनालो अ़छ़ङ्ओ ताया तोक्तुम्किछाङ आन्कान सिन्याङ्सा हेवा मुन्युङ्सिन्नालो हेवाओ निम्पाङ हान्दाङ्का नि खाक्कोछाङ हेन्खोक्वा मात्द़ङ। 27 मेन मोचिओ निम्पाङ क़माकात्तुओ निनाम्हाङ्ओ अ़चुछ़ङ्छेन्मा खोन्कि ङेङ्चि च़ऱप्पाओ मिआ राङ्माखान्मा ओन्ङा याक। 28 निनाम्हाङ्य़ङ खाकालु मोसाओ अ़य़ङ्हुप याङ्मा ऩङाकाछित म़ना ह़वाङ माङ्लो सुम्पाङ सालुम्स़ङ्चिओ अ़चुसालुम्स़ङ्दा सोमामान्तुक्माङ सेत। 29 खानानिन मित्तानुम, निनाम्हाङ्ओ अ़चुछा अ़लाङ्थेम भेन्यु कानेप्चि, खाक्को ह़आ म़सेङ खोन्कि निनाम्हाङ्ओ अ़चुय़ङ्छ़ङ अ़छ़ङ मु, मो ख्रिस्तओ अ़चुह़ दिसुवा मान्मित्कादा खोन्कि सोमाकातुक सेङ्लावा कासुङ्चिआ देम चात्लो दन्दा अ़तोक? 30 देकिनालो “अ़फान कालात अ़ङ्का ओ, अ़ङ्का अ़फान लात्तुङ।” नि काय़ङ्पा आन्कान सिन्तुम्योम। ओवात्निछाङ म़य़ङायुङ्सा, “हाङ्पा निनाम्हाङ्आ अ़चुओ म़नाचिओ अ़चुछ़ङ म़छेन्तुचि।” 31 अ़ह़ङ निनाम्हाङ्ओ अ़चुछुक्दा छुक्मा क़माकात्ओ य़ङ ओ। 32 मो बुयाओ लेन्चि मित्तानुम्च़म। मोन्ग़रि अ़छ़ङ्य़ङ त़सिन्तुम्किछाङ खानानिन ब़द्धे अ़चाअ़त्माचिएनान दुखा आङ्मा दोरा, खोन्नुछाङ खानानिन नुलोक त़युङिन। 33 खानानिन झारा म़नाचिओ अ़चुबुदा ऩसुङ्तिन खोन्कि ऩधात्तिन, खोन्कि अ़क्वावाक दुखादा म़छुक्ताओचि त़फासुम्च़म। 34 म़छेक्ताङाओचि खानानिन सोमात़तुक्तुम्च़म। आम्नुओ चासुम्छेन्बि ऩङाप्तिन्हिदाछाङ आम्नुओ ऩङानुयाङ्सा त़आङ्तुम, देकिनालो खानानिन त़सिन्तुम्योम आम्नुओ झारासोओ अ़नुवाक चासुम्छेन्बि युङ्याङ, मो अ़धुन्तारि युङ्युङ। 35 खोन्ओसा अ़ङ्का चाप्चेत्नानिन, आम्नुओ सोम्कुवा मान्छित्दानुम, ओसाआ अ़धिवा सिरिफा तारु। 36 निनाम्हाङ्ओ अ़चुमिन्मा तामालामा खोन्कि हिप्माय़ङ्ओसो अ़सिवा तोक्मा खानानिन दुखा आङ्मादोत। 37 देकिनालो साम्कालिन्दा छाप्तायुङ्सा, हान “च़क्निङा, काता म़तालाप, खोन्कि स़लेनि ऩच़निन। 38 मेन अ़ङ्साम्योक्मि म़ना साकोङ्छ़ङ्लाम्पा ह़ङ। खोन्कि खो देङ्सालानालो अ़ङ्का खोएदा अ़ङ्ऩङा अ़नुनिन।” 39 आन्कान देङ्साकाला खोन्कि कालुक म़नाचि माआङ, मेन साकोङ्छ़ङ कामु खोन्कि लेन्माय़ङ्चिओ। |
© Wycliffe Bible Translators, Inc. All rights reserved.
Wycliffe Bible Translators, Inc.