गलाति 6 - बान्तावा राईअ़क्छाआ निओ अ़पाङ खुन्माफामा 1 ब़ब़, नाना खोन्कि निछाचि ओ, खाक्को म़ना अ़त्लोदा लाप्खावाचानालो खानानिन साङ लावामि त़याइन्येन, सिम्नान्चिन्सा मो अ़नुवाक लासामुवानुम। खानानिन आप्पि खानिन्चिन माङ्लो खानानिन्छाङ चिन्माखाङ्मादा त़छुक्तिन। 2 अ़क्छा निएदा पाङ खुन्मा फामुवानिन, खोन्कि ओवात्नि ख्रिस्तओ अ़चुलोमाय़ङ तासालानुम। 3 मेन दित्छाङ माआङ्ओ अ़ङ्का अ़च़वाङ्ओनि मित्नान्चिन्नालो मो आप्पि धान्नान्चिन। 4 झारासाआ आप्पिओ अ़काचि चिन्तुखाने, खोन्कि ओन्ङा खोसाआ निचिएनान मान्तोङ्खाङ्माङ खोएदाङा आप्पि तोक्पो लिमा ऱ। 5 देकिनालो आन्कान झारासाआ आप्पिओ काचि मुमादोत। 6 साङ्आ निनाम्हाङ य़ङ ऩचिन्तिन, मोसाआ अ़नुवाक सामाचि काचिन्एनान हामाचिदोत। 7 आप्पि मान्धान्दानिन्चिन, निनाम्हाङ धान्मा अ़ऱन्मिन। देकिनालो म़नाआ दि लित्तु खोसाआ मोङा कोउ। 8 साङ्आ अ़हेवामि च़माथाङ्मा अ़ऩङानुमाओ निम्पाङ लित्तु, मोसाआ अ़हेवामि च़माथाङ्मादाङ्काङा लुक्माखात्माओ अ़सिवा कोउ। मेन साङ्आ सेङ्लावाओ निम्पाङ लित्तु, मोसाआ सेङ्लावालाम्पाङा अ़लुक्निन्ओ ह़ङ्म़ङ कोउ। 9 अ़नुवाक काचि मुमाआ आन्कान म़होत्निन्ने, देकिनालो मोवात्नि आन्राक अ़स़निन्नालो तोङ्ओ अ़ग़रिदा आन्कान कोउम। 10 खोन्ओसा आन्कान ग़रि तोक्तुम्वा झारा म़नाचि नुलोक मुम्च़म्ने, च़लोक्वा आन्साकोङ्छ़ङ्लुम्पादाओचि। पावल्ओ आदेङ्ओ अ़यायोक 11 खानुम, अ़ङ्का देम अ़धिवा छाप्मा सिवाचिआ आप्पि अ़ङ्छुक्आङा खानानिन छाप्नाङ्नानिन। 12 ख्रिस्तओ अ़चुक्रुस्ओ अ़तुक्वाआ दुखादा ऩछुक्निन्ने निम्पाङ पोक्दा नुलोक खाङ्मुमान्चिन कालाम्चिआ खानानिन सिप्मायाम्बुन पाक्मा राकाङ्थेत्नि ऩमुन। 13 देकिनालो सिप्मायाम्बुन कामुचिछाङ य़ङ्हुप्वा ऩच़निन। मेन आम्नुओ पोक्ओ अ़तुक्वादा तोक्पो खोन्कि खानानिन अ़चुओ कात़ङ्चिनि य़ङ्माओ निम्पाङ खानानिन सिप्मायाम्बुन त़मुन्नेनि मोचि म़मिन। 14 मेन आन्हाङ्पा येसु ख्रिस्तओ अ़चुक्रुस्दाङ्का नि खाक्कोछाङ य़ङ्दा तोक्पो लिमा अ़ङ्काएदाङ्का अ़थाया लिने। मो क्रुस्लाम्पा हेन्खामाओ अ़तुक्वादा अ़ङ्का सुवाङ। हेन्खामा अ़ङ्काएदा अ़सावा मात्द़ङ लिसायुङ्सा। 15 सिप्मायाम्बुन पाक्तुम्नुछाङ अ़पाक्तिमिन्नुछाङ, मेन अ़ऩङ्वा लावामि ह़ङ्म़ङ तोक्मा अ़च़वाङ ओ। 16 हान देम ओ चिन्माय़ङ्दा म़कोन, मोचिएदा सेवाङ्नि खोन्कि सोमातुक्मा युङ्ने, मोचि निनाम्हाङ्ओ इस्राएलि अ़चुरावाचि ओ। 17 हान्दाङ्का साङ्आछाङ अ़ङ्का दुखा ऩप़ऩङ्ने, देकिनालो अ़ङ्पोक्दा येसुओ अ़चुथुपिचि अ़ङ्का खुयुङ्योङ्च़ङ। 18 ब़ब़, नाना खोन्कि निछाचि ओ, आन्हाङ्पा येसु ख्रिस्तओ अ़चुसोम्तुक्मा आम्नुओ लावाएनान युङ्ने। मोवात्निङा लिने। |
© Wycliffe Bible Translators, Inc. All rights reserved.
Wycliffe Bible Translators, Inc.